Te mau tāpa’o o te ’oa’oa

E rave rahi matahiti i ma’iri a’e nei ’a tere ai au nā ni’a i te manureva nō te hō’ē tere ’ohipa, ’ua pārahi au i pīha’i iho i te hō’ē ta’ata nō te fenua Hōrane. E hina’aro rahi tō’u ’ia paraparau iāna i te mea ē, i tō’u ’āpīra’a ’ua tāvini au i te hō’ē misiōni i te fenua Beretita ’e i Hōrane.

’A mātau ai māua, ’ua hōro’a mai ’oia i tāna tāreta ’ohipa ma te ti’ara’a tōro’a ’ohipa i ni’a iho, « ’orometua nō te ’oa’oa ».  ’Ua paraparau vau nō ni’a i tōna tōro’a māere ’e ’ua ui atu vau iāna e aha te ’ohipa a te hō’ē ’orometua nō te ’oa’oa. Nā ’ō mai ra ’oia ē, e ha’api’i ’oia i te ta’ata nāhea ’ia fa’ari’i i te hō’ē orara’a ’oa’oa nā roto i te ha’amaura’a i te mau tā’amura’a pāpū ’e te mau fā faufa’a. ’Ua pāhono atura vau ē, « E mea nehenehe mau, terā rā, ’āhani ē, e nehenehe ato’a tā ’oe e ha’api’i ē, nāhea te reira mau tā’amura’a e ti’a ai e vai tāmau noa i ’ō roa mai i te mēnema ’e e pāhono ho’i i te tahi atu mau uira’a o te vārua, mai te huru, e aha te fā ’o te orara’a, nāhea e ti’a ai ia tātou ’ia upo’oti’a i ni’a i tō tātou mau paruparu, ’e e haere tātou i hea ’ia pohe tātou ? » ’Ua fāri’i ’oia ē, e mea fa’ahiahia roa ïa mai te mea e pāhonora’a tā tātou i te reira mau uira’a, ’e ’ua ’oa’oa vau i te fa’a’itera’a iāna ē, tē vai ra tā tātou pāhonora’a.

I teie mahana, tē hina’aro nei au e hi’o fa’ahou i te tahi mau tumu parau faufa’a nō te ’oa’oa mau, tē mo’ehia ra i te mau ta’ata e rave rahi i roto i teie ao ’ārepurepu, tei reira ho’i e rave rahi mau mea ’ana’anatae, e mea iti rā tei riro ’ei mea faufa’a mau.

’Ua ha’api’i Alama i te ta’ata i tōna ra ’anotau, « Inaha ho’i, tē parau atu nei au ia ’outou na, e rave rahi te mau mea e tupu a muri atu, ’e inaha, tē vai nei te hō’ē mea i hau roa atu i te faufa’a rahi i te mau mea ato’a—inaha ho’i, tē fātata mai nei te tau e ora ai ’e e tae mai ai te Tāra’ehara i rotopū i tōna mau ta’ata ».¹

E mea faufa’a ato’a teie fa’aarara’a nō tātou i teie mahana nō te mea tē tīa’i nei ’e tē fa’aineine nei tātou nō te tae-piti-ra’a mai o te Mesia !

Nō reira, tā’u parau mātāmua ’oia ho’i, te patura’a i ni’a i te niu o Iesu Mesia, e mea faufa’a ïa nō tō tātou ’oa’oa. E niu pāpū teie, « ’e mai te mea e patu te ta’ata ia rātou i ni’a i taua niu ra, e ’ore ïa rātou e ma’iri i raro ».² Nā te reira e fa’aineine ia tātou nō te mau tāmatara’a o te orara’a, noa atu te ’ohipa e tupu mai.

E rave rahi matahiti i ma’iri a’enei, ’ua haere au i te hō’ē puhapara’a scout i te pu’e tau māhanahana ’e tā māua tamaiti ’o Justin. ’A ha’amata ai te mau ’ātivite, ’ua fa’aara mai ra ’oia ma te ’oa’oa ē, tē hina’aro ra ’oia ’e tōna mau hoa ’ia roa’a ia rātou te tāpa’o o te manuïara’a i te te’ara’a. Nō te rave i te reira, tītauhia i te mau tamāroa ’ia manuia i roto i te hō’ē hi’opo’ara’a pāpa’i poto ’e ’ia puta tā rātou te’a i ni’a i te hō’ē tāpa’o.

’Ua hepohepo roa vau. I taua tau ra, e mea paruparu roa ’o Justin nō te ma’i mucoviscidose, tāna i fa’ari’i mai tōna fānaura’ahia mai. ’Ua uiui noa vau ē, e nehenehe ānei tāna e huti i te fana ’ia nava’i nō te vero i te te’a i ni’a i te tāpa’o.

’A haere atu ai ’oia ’e tōna mau hoa i te vāhi ha’api’ipi’ira’a i te ’ohipa te’a, ’ua pure marū noa vau ’eiaha ’oia ’ia fa’aha’eha’ahia i roto i teie ’ohipa. Tau hora pe’ape’a i muri a’e, ’ua ’ite atu vau iāna i te haerera’a mai iā’u ra ma te mata ’ata’ata. ’Ua parau ’oia, « Pāpā !». « ’Ua roa’a iā’u te tapa’o manuiara’a ! ’Ua fa’atano vau i rōpū mau ; tei ni’a i te tāpa’o i pīha’i iho i tā’u, terā rā ’ua mouche maita’i tā’u ! » ’Ua huti ’oia i te fana ma tōna pūai ato’a ’e ’ua pe’e te te’a, ma te ’ore e nehenehe e arai i te terera’a o te te’a. ’Auē tō’u māuruuru i terā ’orometua ha’api’i te’a nō tōna hāro’aro’a, tei ’ore i parau noa’e ē, « ’Eiaha e ’ino’ino, ’ua hape te tāpa’o ! » I tōna rā ’itera’a i te mau fifi ’e te mau tauto’ora’a pāpū a Justin, ’ua pāhono marū noa ’oia, « Maita’i roa ! »

Mai terā ïa te huru nō tātou mai te mea ē, e ’imi tātou i te mau rāve’a ato’a nō te pe’e i te Mesia ’e i tāna mau peropheta noa atu tō tātou mau tā’ōti’ara’a. Mai te mea e haere tātou iāna ra ma te ha’apa’o i tā tātou mau fafaura’a ’e ma te tātarahapa i tā tātou mau hara, e fa’aro’o ïa tātou ma te ’oa’oa i te ’āruera’a a tō tātou Fa’aora : « ’Ua ti’a roa e teie nei tāvini maita’i ’e te ha’avare ’ore ».³

Tē fa’a’ite pāpū atu nei i te ti’ara’a hanahana ’o te Fa’aora o te ao nei ’e tōna here fa’aora ’e tōna mana nō te fa’aora, nō te ha’apūai, ’e nō te fa’ateitei ia tātou ’ia tauto’o ana’e tātou ’ia haere mai iāna ra ma te ’ā’au tae mau. I te tahi a’e pae, ’aita hō’ē rāve’a e nehenehe ai ia tātou ’ia haere nā roto i te naho’a ta’ata ’e ’ia haere atu ia Iesu ra. ’Ua upo’oti’a te Fa’aora i ni’a i te pohe, te ma’i ’e te hara, ’e ’ua ’īriti i te ’ē’a nō tō tātou maita’i hope’a, mai te mea e pe’e tātou iāna ma tō tātou ’ā’au ato’a.⁴

Te piti o tō’u mana’o maori rā e mea faufa’a rahi nō tō tātou poupou ’ia ha’amana’o tātou ē, e mau tamaiti ’e e mau tamāhine tātou nā te hō’ē Metua here i te ao ra. Te ’itera’a ’e te ti’aturira’a i te reira parau mau, e taui te reira i te mau mea ato’a.

E rave rahi matahiti i teie nei, te ho’i ra vau nā ni’a i te manureva i muri a’e i te hō’ē tere ’ohipa nā te ’Ēkālesia, ’ua pārahi māua te tuahine Sabin i muri noa mai i te hō’ē ta’ata rahi, e hōho’a mata iria, e upo’o pahure ’ua tātauhia, ’e te nūmera 439.

I te taura’a te manureva, ’ua parau vau, « ’Āhani na, E nehenehe ānei ’oe e fa’a’ite mai i te aura’a nō te nūmera i tātauhia i muri i tō ’oe upo’o ? ’Ua taiā vau i te ani i te mau uira’a nō ni’a i te mata iria.

’Ua nā ’ō mai ’oia, « ’O vau terā. Terā ïa tō’u huru. Nō’u terā fenua : 219 ! »

E maha hānere toru ’ahuru ma iva ho’i te nūmera i ni’a i tōna upo’o, nō reira ’ua maere au i te mea ē, ’ua hape ’oia, inaha ho’i e mea faufa’a te reira nōna.

’Ua feruri au ē, ’auē te ’oto i te mea ē, ’ua niuhia te ti’ara’a ta’ata o teie ta’ata, ’e tōna fa’atura iāna iho i ni’a i te hō’ē nūmera tei tā’atihia i ni’a i te hō’ē tuha’a fenua nō te hō’ē pupu ’ohipa ’ino. ’Ua feruri au ē : teie ta’ata hi’ora’a ’iriā, ’ua riro ’oia na ’ei tamaiti nā te hō’ē ta’ata tei hina’aro ’ia ha’afaufa’ahia ’e ’ia vai i roto. ’Āhiri pa’i ’oia i ’ite ē, ’o vai mau ’oia, ’e nō vai mau ’oia, nō te mea, « ua tauihia ’outou i te taui ».⁵

Tē vai ra hō’ē parau pa’ari i roto i te hō’ē hīmene nō te hōho’a teata The Prince of Egypt(Te ari’i nō Aiphiti) tē nā ’ō ra, « ’A hi’o i tō ’oe orara’a nā roto i te mata o te ra’i ».⁶ ’A tomo hōhonu ai te ’itera’a i tō tātou rēni tupuna hanahana ’e tō tātou pūai mure ’ore i roto i tō tātou vārua, e ti’a ïa ia tātou ’ia hi’o i te orara’a mai te hō’ē tere faufa’a e parare nei, nō te ha’api’i mai ’e nō te tupu i te rahi, noa atu ē, « e hi’o tātou nā roto i te hō’ē hi’o, i roto i te pōiri ».⁷

Te toru o te tāpa’o o te poupou o te ha’amana’o-tāmau-noa-ra’a ïa i te faufa’a o te hō’ē vārua. E rave maita’i a’e tātou i te reira nā roto i te pe’era’a i te a’ora’a a te Fa’aora, « E aroha ’outou ia ’outou iho, mai iā’u e aroha atu ia ’outou na ».⁸

’Ua ha’api’i ato’a ’oia, « ’O ’outou i nā reira i te hō’ē taea’e iti ha’iha’i roa i roto i tā’u mau taea’e nei, ’ua nā reira mai ïa ’outou iā’u nei ».⁹

Te a’o mai nei te buka Maseli ia tātou ma te pa’ari, « ’Eiaha ’oe e tāpe’a i te maita’i i te ta’ata e au iāna ’ia hopoi ra, tei tō rima taua maita’i ra ’ia hopoi ».¹⁰

E’ita tātou e tātarahapa noa a’e i te hāmani-maita’i-rahi-roa-ra’a. I te hi’ora’a a te Atua, ’ua tuea noa te hāmani maita’i ’e te faito rahi mau. Te tahi tuha’a o te hāmani maita’i o te rirora’a ïa ’ei ta’ata fa’a’oroma’i ’e ’eiaha e ha’avā.

E rave rahi matahiti i ma’iri a’enei, ’ua haere tō mātou ’utuāfare ’āpī ’e māta’ita’i i te hō’ē hōho’a nō te pō ’utuāfare. Tei roto mātou pā’āto’a i te pere’o’o van, ’eiaha rā hō’ē o tā māua nau tamaiti ’e tā’u vahine, ’o Valérie. ’Ua pō i taua taime ra ’e, a tātara ai tā māua tamaiti i te ’ōpani, ’e ’a hōro atu ai i te pere’o’o ra, ’ua tano tōna ’āvae i ni’a i te mea tāna i mana’o ē, tā mātou mimi, i ni’a i te taupe’e fare. Te fifi rā nō tā māua tamaiti ’e tā’u vahine, tei muri noa mai iāna, e ’ere ïa tā mātou mimi, hō’ē rā mofeta riri, ’e ’ua fa’a’ite mai ia rāua ! ’Ua ho’i pauroa mātou i te fare, ’e ’ua hopu rāua to’opiti i te pape ’e ’ua tāmā i tō rāua rouru i te pape tomati, te rā’au pāpū i mana’ohia nō te fa’a’ore i te hau’a mofeta. I te taime ’a tāmā ai rāua ia rāua ’e ’a taui ai i te ’ahu, ’aita e hau’a fa’ahou i ni’a iho ia mātou pā’āto’a, fa’aoti a’era mātou ē, e nehenehe tā mātou e haere i te teata. 

I tō mātou pārahira’a i muri roa i te piha, ’ua fa’aoti hō’ē hō’ē a’era te mau ta’ata ’ati a’e ia mātou, ’ia haere i rāpae e ti’i i te pop-corn. Terā rā, ’ia ho’i mai rātou, ’aita hō’ē ta’ata i ho’i fa’ahou mai i tō rātou pārahira’a matamua.

’Ua ata mātou i te ha’amana’o-fa’ahou-ra’a i taua ’ohipa ra, terā rā ’āhani pa’i ē, e hau’a tō tā tātou mau hara ato’a ? ’E ’āhani e hau’a tātou i te parau ti’a ’ore, te hina’aro ti’a ’ore, te nounou ’e te te’ote’o ? ’Ia ’’itehia tō tātou mau paruparu, e hau atu ïa tō tātou hāmani maita’i, ’e te ha’apa’o maita’i ia vetahi ’ē, ’e ’oia ato’a, e tauturu mai rātou ia tātou ’a rave ai tātou i te mau tauira’a tītauhia i roto i tō tātou orara’a. E mea au nā’u te hau’a ’ava’ava i te fare purera’a, nō te mea e fa’a’itera’a te reira ē, tē tāmata ra te hō’ē ta’ata i te taui. E hina’aro rātou i tō tātou mau rima fa’ari’i ’ati a’e ia rātou.

’Ua parau te peresideni Russell M. Nelson ma te pa’ari, « Hō’ē o te mau rāve’a ’ōhie roa a’e nō te ’ite i te hō’ē pipi mau nā Iesu Mesia o te huru aroha ïa o te reira ta’ata i ni’a i te tahi atu mau ta’ata ».¹¹

’Ua pāpa’i ’o Paulo i tō Ephesia, « ’Ia hāmani maita’i ’outou ia ’outou iho, ma te ’ā’au marū aroha noa, ma te fa’a’ore ho’i i te hara te tahi ’e te tahi, mai tā te Atua i fa’a’ore mai i tā ’outou i te Mesia ra ».¹²

’Ei mau pipi nā Iesu Mesia, ’ua anihia ia tātou ’ia ti’aturi i tō tātou Metua i te ao ra ’e i tō tātou Fa’aora ’e ma te ’ore e tāmata i te mono ia rāua. ’Ua ’ite maita’i roa Iesu Mesia i te mau huru ti’a ’ore o te mau ta’ata ato’a ’e e ha’avā ’oia ia rātou ma te maita’i roa.

Te maha o tā’u tāpa’o nō te ’oa’oa o te tāpe’a-noa-ra’a ïa i te hō’ē hi’ora’a mure ’ore. E parare te fa’anahora’a a tō tātou Metua e tae roa atu i te mau ao ’amuri atu ; e mea ’ōhie ’ia fa’atumu i ’ōnei ’e i teienei ’e ’ia ha’amo’e i te ao i muri a’e.

’Ua ha’api’i-pāpū-hia mai teie ha’api’ira’a iā’u e rave rahi matahiti i teienei nā tā māua tamāhine ’o Jennifer, 16 matahiti tōna i taua taime ra. ’Ua fa’atata tōna nā māhāhā i te tauihia, ’oia ho’i, e tātarahia e pae tuha’a o tōna māhāhā ’e e monohia atu e piti tuha’a na’ina’i a’e, e mea ora maita’i, tei hōro’ahia mai e nā hoa keretetiano maere mau. E ravera’a fifi roa te reira, terā rā, i te ’āru’i nā mua a’e i tōna tāpūra’a, fātata ’o Jennifer i te vauvau mai i te hō’ē a’ora’a iā’u i roto i tōna faito teiaha e 41kiro, ma te parau ē, « ’Eiaha e ha’ape’ape’a e pāpā ! Ananahi, e ara mai au ’e te māhāhā ’āpī, ’aore rā, e ti’a mai au i ni’a i roto i te hō’ē vāhi maita’i a’e. I roto i nā tupura’a e piti, e mea maita’i roa ». Terā te fa’aro’o ; e hi’ora’a ātea mure ’ore terā ! Te hi’ora’a i te orara’a i roto i te hō’ē hi’ora’a mure ’ore, e hōro’a mai te reira i te māramarama, te tāmāhanahana, te itoito ’e te ti’aturi.

’I muri mai i te tāpūra’a, i te mahana i tīa’i-maoro-hia nō te tātara i te rāve’a hutira’a aho ’e e tūpohe i te mātini pūpuhi mata’i tei tauturu ’ia Jennifer ’ia huti i te aho, ’ua tīa’i mātou ma te māna’ona’o ē, e tere maita’i ānei tōna nā tuha’a māhāhā na’ina’i. I te hutira’a ’oia i te aho nō te taime mātāmua, ’ua ha’amata ihora ’oia i te ta’i i terā iho taime. I tōna ’itera’a i tō mātou mata’u, ’ua parau ’oi’oi mai ra ’oia, « ’Auē te au ’ia huti i te aho ». 

Mai taua mahana ra, ’ua ha’amāuruuru vau i te Metua i te ao ra i te po’ipo’i ’e te pō nō te ti’ara’a iā’u ’ia huti i te aho. ’Ua hā’atihia tātou i te mau ha’amaita’ira’a e rave rahi tā tātou e nehenehe e fa’ariro ē, ’ua nōa’a, mai te mea ’aita tātou e tau’a. I te tahi a’e pae, ’ia ’ore te hō’ē mea e tīa’ihia, ’e ’ia fa’ari’i auhia te mau mea ato’a, e riro mai te orara’a ’ei mea manamana.

’Ua parau te peresideni Nelson : « E ō nā te Atua te mau po’ipo’i ’āpī ato’a. Tae noa atu i te mata’i tā tātou e huti nei, e hōro’a here ato’a te reira nō ’ō mai iāna ra. E pāruru ’oia ia tātou i terā mahana ’e terā mahana ’e e pāturu ia tātou i terā ’e terā taime. Nō reira, tā tātou ’ohipa hanahana mātāmua i te po’ipo’i, o te hō’ē ïa pure ha’eha’a o te ’ā’au mehara ».¹³

E haere mai au i teienei i ni’a i te pae ’e te hope’a o tō’u mana’o, ’oia ho’i, e’ita roa atu tō ’outou ’oa’oa e hau atu i tō ’outou māuruuru.

Ua parau te Fatu, « ’E ’o ’oia ’o te fa’ari’i mai i te mau mea ato’a ma te māuruuru e fa’ahanahanahia ïa ».¹⁴ Penei a’e nō te mea e hōro’a mai te ’ā’au mehara i te tahi atu mau maita’i e rave rahi.

Nāhea tō tātou hāro’aro’ara’a e taui ai mai te mea ē, pauroa te po’ipo’i e ara mai tātou ma te mau ha’amaita’ira’a ana’e tā tātou i māuruuru i te ’āru’i nā mua atu. ’Ia ’ore tātou e māuruuru i tō tātou mau ha’amaita’ira’a, e nehenehe te reira e fa’atupu mai i te mana’o māuruuru ’ore, o tē nehenehe ho’i e fa’a’ere ia tātou i te ’oa’oa ’e te poupou tā te ’ā’au mēhara e fa’atupu mai. Te tūra’i nei te feiā i roto i te fare rahi ’e te ’a’ano ia tātou ’ia hi’o i ’ō atu i te tāpa’o, nā reira ho’i e ’ere hope roa ai i te tāpa’o.

Te ti’ara’a mau, te poupou ’e te ha’amaita’ira’a rahi a’e o te orara’a tāhuti nei, e ’itehia te reira i roto i te ta’ata tā tātou e riro mai, maoti te aroha ’o te Atua ’a rave ai tātou ’e a ha’apa’o ai i te mau fafaura’a mo’a ’e ’ōna, ’e ’a ha’apa’o ai i te reira. E ha’amānina tō tātou Fa’aora ia tātou ’e e fa’anehenehe ho’i ia tātou maoti te mau maita’i o tōna tusia tāra’ehara ’e ’ua parau ’oia nō te feiā e pe’e iāna ma te ’ā’au tae, « 3 Nā’u ho’i rātou ’ia tae i te mahana vau e haere mai ai nō te ha’aputuputu i tā’u ra mau tao’a faufa’a rahi ».¹⁵

Tē fafau atu nei au ia ’outou ē, mai te mea e patu tātou i tō tātou orara’a i ni’a i te niu o Iesu Mesia ; ma te ha’afaufa’a i tō tātou ti’ara’a mau ’ei mau tamaiti ’e ’ei mau tamāhine nā te Atua ; ma te ha’amana’o i te faufa’a o te hō’ē vārua ; ma te tāpe’a maīte i te hō’ē hi’ora’a ātea mure ’ore ; ’e ma te ’oa’oa māuruuru i tō tātou mau ha’amaita’ira’a e rave rahi, ’oia ihoā rā te anira’a manihini a te Mesia ’ia haere mai iāna ra, e nehenehe e ’itehia ia tātou te ’oa’oa mau tā tātou e ’imi nei i roto i teie tere orira’a tāhuti nei. E vai noa ā te mau tāmatara’a o te orara’a nei, terā rā, e nehenehe tā tātou fa’aruru maita’i a’e i te reira ma te mana’o pāpū ’e ma te hau, maoti te mau parau mau mure ’ore tā tātou e māramarama nei ’e tā tātou ho’i e ora nei.

Tē fa’a’ite atu nei au ia ’outou i tō’u ’itera’a pāpū nō te vai-mau-ra’a te Atua, tō tātou Metua here, ’e tāna tamaiti here, ’o Iesu Mesia. Tē fa’a’ite pāpū ato’a nei au nō te mau peropheta, te mau hi’o, ’e te mau heheu parau.ora. ’Auē ïa ha’amaita’ira’a ’ia fa’ari’i i te mau parau a’o nō te ra’i mai nā roto mai ia rātou. Mai tā te Fa’aora i parau mai ma te māramarama, « Nā roto i tō’u iho reo ’e ’aore rā, nā roto i te reo o tō’u mau tāvini, hō’ē ā ïa ».¹⁶ Nā roto i te i’oa mo’a o Iesu Mesia, ’āmene.