Agyenkwa N’Esuafo Nokwafo
Sɛ hɛn Agyenkwa na N’asɛmpa no bɛyɛ hɛn fapem tsitsir ber a yɛtow hɛn abrabɔ wɔ do a, yebotum atse dɛwdzi a ɔmmbɔadze.
Beebi a oesuma Haggai nwoma no wɔ Ahyɛmu Dadaw no mu a, ɔkã nkorɔfo binom ho nsɛm a nkyɛ wobotum dze Elder Holland n’afotu no edzi dwuma. Dza wɔyɛe no muo dɛ wɔammfa Christ annto hɔn abrabɔ na hɔn som ne finimfin. Haggai dze nsɛm twa mfonyin bi a ɔgye ndwendwenho ber a otwuw nkorɔfo yinom enyim dɛ wɔtsetse hɔn efiefi ahotɔ mu, kyɛn dɛ worisi Ewuradze ne temple no:
“Aso homdze, ber edu ama hom dɛ hom tsena hom efi a wɔasesɛw enyi mu, ber a ofi yi da hɔ pan yi?
“Dɛm ntsi afei mbrɛ dɔm Ewuradze se nye yi; Hom ndwendwen hom akwan ho.
“Hom edua pii, na ketseaba bi na hom dze ba fie; hom dzidzi, naaso hom mmee; homnom nsã, naaso hom mmbow; hom furafura atam, naaso hom ho nnyɛ hom hyew; na nyia onya akatua gye akatua gu foto ntokurntokur mu.
“Mbrɛ dɔm Ewuradze se nye yi; Hom ndwendwen hom akwan ho.’’1
Ana hom mmpɛ dɛ yɛbɛma Nyankopɔn ne ndzɛmba ehia kyɛn yɛbɛma ndzɛmba a onnyiewiei mfaso biara nnyi ho a wɔakã ho asɛm yi edzi kan?
Sacrament nhyiamu bi a ɔnnkyɛree a mokɔree no, asɛmpasomafo bi a ɔaba fie serɛɛ n’egya n’asɛm bi a ɔbɔɔ no tɔw emudzi mu ara maa ne mba kaa dɛ, “Dza yehia no wɔ ha nye Wi-Fi no do bohuan na Nephi mbordo!’’
Metsenaa Ebibir Anee mfe enum no, muhun nyimpa beberee hɔn fasusu a ɔyɛ hɔn awosu na wɔmmfɛr dɛ asɛmpa no bedzi hɔn kan. Fasusu kor a ɔtse dɛm nye bɔlkanizer edwuma bi a ɔwɔ Ghana ne dzin. No wura no ato ne dzin “Wo Pɛ Alignment.’’
Sɛ hɛn Agyenkwa na N’asɛmpa no bɛyɛ hɛn fapem tsitsir ber a yɛtow hɛn abrabɔ wɔ do a, yebotum atse dɛwdzi a ɔmmbɔadze.2 Naaso, ɔnnyɛ dzen koraa dɛ dɛm fapem tsitsir no bɛyɛ, dɛ wiadze ndzɛmba, a asɛmpa no yɛ adze kor bi so, anaa dɛ Kwesida a yɛrokɔ asɔr dɔnhwer ebien ara. Sɛ ɔba no dɛm a, ɔtse dɛ yɛdze hɛn akatua rugu “foto ntokurntokur mu.’’
Haggai rekɛkyerɛ hɛn dɛ yensi enyimpi–dɛ yɛbɛyɛ, dɛ mbrɛ wɔse wɔ Australia kasa mu no, “yɛ nokwafo’’ wɔ asɛmpa abrabɔ ho. Nkorɔfo yɛ nokwarfo sɛ dza wɔka noara na wɔtse a.
Musũaa mereyɛ nokwardzifo na mirisi enyimpi ber a morobɔ rugby bɔɔl no. Musũaa dɛ sɛ mobɔ dza mubotum koraa, meyɛ dza mubotum nyinara a, nna menyi gye agordzi no papaapa.
Afe a mepɛɛ rugby nye afe a mowie nsɔwdo skuul no. Kuw a nna meka ho no nna ɔyɛ hɔn talent na wɔyɛ enyimpisifo so. Dɛm afe no nna hɛn nye kuw konyimdzifo. Naaso, da kor bi nna ɔwɔ dɛ yɛnye kuw bi a wɔnnyɛ hɛn etsipɛnfo bɔ, na sɛ nna yewie a hɛn nyina wɔ mfɛfo mbasiafo a yɛnye hɔn bɔkɔ ekedzi asaw wɔ afrenhyia kɔlegye nhyiamu ase. Modwenn ho dɛ osiandɛ iyi nnkɛyɛ agordzi a ɔyɛ dzen no ntsi, ɔwɔ dɛ mobɔmbɔdzen bɔ moho ban fi epira ama meetum asaw yie ankasa. Agordzi mu no yennsi enyimpi wɔ apempem a nnkyɛ ɔwɔ dɛ yetum nye akansifo no dzi no mu, na yedzii nkogu. Dza ɔsɛɛ asɛm koraa no, yesii akan wiei no nna m’ano ahon, ayɛ pɔfoo a nna ɔmmfata dɛ medze kedzi asaw. Ebia nna mihia dɛ musua biribi.
Suahu soronko bi koraa sii ekyir no wɔ agordzi bi mu a misii enyimpi koraa. Odu beebi no medze adwen pa dzii apempem; ntsɛmara na metsee yaw wɔ m’enyim. M’egya akyerɛɛ me dɛ sɛ mepira onnyi dɛ mema otsĩafo no hu ntsi no, mokɔɔr do dzi agor no. Dɛm anafua, ber a nna miridzidzi no, muhum dɛ nna munntum nnkaw. Anapa no, mokɔɔr asopitsi, a ɛksree sii no pi dɛ m’adadaw ebubu. Wɔkyekyeer m’ano famm ho adapɛn esia ɔtoado no.
Adzesuadze pii fi ano pɔfoo na adadaw a oebubu abɛbusɛm mu bae. Mokɔn dɔɔ edziban a no mu yɛ dur adapɛn esia a nna mutum nom nsunsu edziban nkotsee mmfa ho no, mennya mfehoekyir biara wɔ m’adadaw a obubuii no ho osiandɛ ɔyɛ dza mubotum ayɛ nyina ho nsunsundo Mbom mowɔ mfehoekyir wɔ ano pɔfoo no ho osiandɛ ɔyɛ moho a motwee ho asɛnkyerɛdze.
Yɛreyɛ dza yebotum ayɛ nyina nnkyerɛ dɛ hɛn gyinadew bɛyɛ papa nkotsee. Mbom ɔkyerɛ dɛ yebenya dɛwdzi. Dɛwdzi nnyɛ enyigye a ɔresen, anaa mpo enyigye a ɔnnkyɛr. Dɛwdzi mmbɔadze na ogyina hɛn mbɔdzenbɔ a Ewuradze gye to mu do.3
Ngyetomu mfatoho a ɔtse dɛm yɛ Oliver Granger noho asɛm. Dɛ mbrɛ President Boyd K. Packer kãe no: “Mber a wɔpam ahotseweefo no fii Kirtland no, … Wogyaa Oliver wɔ ekyir dɛ ɔtɔn hɔn egyapadze mfa ngye kakra biara obotum enya. Nna ɔyɛ dzen dɛ obotum enya. Na, ampara, oennya!’’4 President a Odzi Kan na n’Apamfo ahyɛ no dɛ ɔnyɛ edwuma a ɔyɛ dzen, sɛ ɔbɛyɛ yie o. Naaso Ewuradze dze nsɛmfua yinom kamfoo no wɔ ne mbɔdzembɔ a nna ɔnnkɛyɛ yie ho.
“Mekaa m’akowaa Oliver Granger; hwɛ, nokwar, mese no dɛ wɔbɛkaa ne dzin krɔnkrɔnyɛ mu fi ebusuasantsen kesi ebusuasantsen, afebɔɔ kesi afebɔɔ, Ewuradze na ɔse.
“Dɛm ntsi, wɔmma ɔmper enyiberdo nhwehwɛ m’asɔr mu President a Odzi Kan na n’Apamfo hɔn mponee, … na sɛ ɔhwe ase a ɔbɔsoɛr bio, na n’afɔrbɔ bɛyɛ krɔnkrɔn mbordo asen n’ahodze pii, Ewuradze na ɔse.’’5
Dɛm no yɛ nokwar ma hɛn nyina—ɔnnyɛ hɛn nkonyimdzi mbom hɛn afɔrbɔ na mbɔdzembɔ na ohia ma Ewuradze.
Jesus Christ no osũanyi nokwafo ho fasusu kor so nye hɛn nyɛnko dɔfo wɔ Côte d’Ivoire wɔ Ebibir Anee. Akyerɛbaa nokwafo, nwanwanyi yi dzii awerɛhow yaayaw, na no mpo kun boor no mber pii, na ewiei no awargyae bae. Oennhihim wɔ ne gyedzi na ne papayɛ ho dabiarada, naaso osian kun no n’emumuyɛdze wɔ no do ntsi, odzii yaw mber tsentsenntsen Ɔnoara n’anomu nsɛm mu no, ɔkaã dza osii:
“Mekaã dɛ medze akyɛ no dze, naaso nna ayawdzi da ho wɔ mo mu. Nna ɔyɛ dɛ mahyehyew wɔ m’akoma mu. Mber pii no mobɔɔ mpaa maa Ewuradze dɛ onyi mmfi mo mu, naaso nna ɔyɛ yaw ara ma dɛ nna megye dzi dɛ ɔbɛka mo do mo nkwa nyina. Nna ɔyɛ yaw kyɛn mber a me maame wui a nna musuar; nna ɔyɛ yaw kyɛn ber a m’egya na me babanyin wui. Nna ɔyɛ dɛ ɔretserɛw na ɔrehata m’akoma do, a ɔyɛɛ dɛ gyama murubowu ara nye no.
“Nna ɔtɔ mber bi a mibisa moho dɛ nkyɛ ebɛnadze na sɛ Agyenkwa no wɔ me gyinabew mu a ɔbɛyɛ, na maakã dɛ, ‘Ewuradze, iyi dze ɔdɔɔ sõ dodow.’
Afei anapa bi mohwehwɛɛ yaw no a ofi iyi mu nyina ba m’akoma mu no na mo dɔ bun mu, hwehwɛɛ no wɔ me kra mu. Nna munnhu no beebiara. Ntsɛmtsɛm ara modwendwenn siantsir nyina ho a nna ɔwɔ dɛ metse yaw no, naaso nna menntse yaw no bio. Motweɔɔn da mu no nyina hwɛ dɛ mebɛtse yaw no wɔ m’akoma mu a; manntse. Afei mubuu ntwɛr na medaa Nyankopɔn ase dɛ ɔma Ewuradze no werdam afɔrbɔ no yɛ edwuma maa me.’’6
Obanyin nokwafo, nwanwafo bi a ɔdɔ akyerɛbaa yi yie asɔw no enyigye mu ara afam no ho.
Ntsi sɛ yɛyɛ Christ n’esuafo nokwarfo a ebɛn suban na ɔwɔ dɛ yɛkyerɛ? Na ebɛn bo na asɛmpa no som ma hɛn sɛ yɛ “dwendwen [hɛn] akwan ho,’’ dɛ mbrɛ Haggai susuii no a?
M’enyi gye Ɔhen Lamoni n’egya no suban pa mfatoho a ɔkyerɛe no ho. Hom bɛkaa ahyɛse n’ebufuw a onyae dɛ Ammon, Nephinyi—nkorɔfo a Lamanfo no kyiir hɔn no ka ne babanyin no ho. Ɔtwee ne nkrantsee dɛ ɔnye Ammon bedzi esi na ohun no ntsɛm dɛ Amon ne nkrantsee da ɔnoara ne men mu. “Afei ɔhen no suroo bɛyɛ na ɔayew no nkwa ntsi ɔsee dɛ: Sɛ edze mo nkwa kyɛ me a ɔno biribiara a ibebisa me no mebɛyɛ ama wo, sɛ ɔyɛ m’ahenman fã mpo a.’’7
Hyɛ n’akyɛdze no nsew—n’ahenman ne fã dze gye no nkwa.
Mbom ekyir, no a ɔtse asɛmpa no ase no, ɔdze akyɛdze fofor mae. “Ɔhen no see dɛ: Ebɛnadze na menyɛ ma minya dɛm onnyiewiei nkwa yi a akã ho asɛm yi? Nyew, ebɛnadze na menyɛ ma Nyankopɔn nwo me fofor na woetutu emumuyɛ sunsum a agye ndwow wɔ mo mu yi, na meebenya no Sunsum, ama dɛw aahyɛ me mã, amma woenntwa me annkyen wɔ da a odzi ewiei no mu? Hwɛ, ɔse, mibegyaa m’ahodze nyina mu, nyew, mobɔpow m’ahenman, ama me nsa akã dɛm dɛwdzi kɛse yi.’’8
Aber yi, nna ɔayɛ krado dɛ obegyaa n’ahenman no nyina mu, osiandɛ nna asɛmpa no som bo kyɛn dza ɔwɔ nyina! Nna ɔyɛ nokwafo wɔ asɛmpa no ho.
Ntsi, asɛmbisa ma hɛn mu kor biara nye dɛ: ana hɛn so yɛyɛ anokwarfo wɔ asɛmpa no ho a? Osiandɛ ereyɛ afã na afã nnyɛ ereyɛ nokwafo Na yenyim dɛ Nyankopɔn nnkamfo akɔtrɔbɔdwenyi no.9
Akoradze biara nnyi hɔ, anaa enyikadze biara, anaa dzibew biara, anaa ɔmamfo amandzɛɛbɔdze biara, anaa video agodzihorow biara, anaa mprensi biara, anaa atsenkanyi nkitahodzi biara, anaa biribiara a ɔwɔ asaase do nnyi hɔ a ɔsom bo kyɛn onnyiewiei nkwa. Ntsi Ewuradze n’afotu a ɔdze ma obiara nye dɛ “hom ndwendwen hom akwan ho.’’
Wɔakyerɛ me nkã-tse yie wɔ Nephi ne nsɛm mu: “Mehyɛ moho enyimnyam wɔ pefeeyɛ mu; mehyɛ moho enyimnyam wɔ nokwardzi mu; mehyɛ moho enyimnyam wɔ Jesus mu,osiandɛ ɔapon me kra efi hɛl.’’10
Ana yɛyɛ Ɔno a ɔdze dza Ɔwɔ nyina dze maa hɛn no nokwar akadofo a? Ɔno a ɔyɛ hɛn Pomfo na Dzimafo ma Egya no? Ɔnoara dze noho mae wɔ No werdam afɔrbɔ no mu na dɛm ntsi afei wɔ No dɔ mu, N’ehumbɔbɔr mu, na Ne pɛ mu ma hɛn no dɛ yebenya onnyiewiei dɛwdzi a? Mototɔserɛ hɔn a wɔtse na wɔbɛkenkan nsɛm yinom dɛ: Mepa kyɛw, mepa kyɛw mma hom mmfa hom enyimpi si nyina nnto nnkyɛn kɛpem ber a wɔbɛsan akɔ ho wɔ ndaamba mber bi a onnyi hɔ no Hom nyɛ nokwarfo sesei na hom ndzi dɛw! Jesus Christ ne dzin mu, amen.