Bra, Bɛka Mo Do—Ewuradze ne Ɔkotsĩadze na Nsiwanodze Nhyehyɛɛ

Yedzi ehurusi dɛ yɛabɔmu ehyia wɔ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo wiadze mfɛndzanan ehyiadzi kɛse yi mu. Ɔyɛ nhyira dɛ yebodua Ne nkɔnhyɛfo na asomafo hɔn nkyerɛkyerɛ do bɛgye Ewuradze n’adwen na ne pɛ. President Russell M. Nelson nye Ewuradze ne nkɔnhyɛnyi tseasefo. Mbrɛ hɛn enyi si sɔ n’afotu na akwankyerɛ a yɛagye no ndɛ.

Medze me dasedzi ka dza wɔakã no dada no ho. Megye dase wɔ Nyankopɔn, hɛn Onnyiewiei Egya ho. Ɔtse ase na ɔdɔ hɛn, na Ɔhwɛ hɛn do. N’enyigye ho nhyehyɛɛ no ma ɔnnkyebo abrabɔ yi na ewiei dɛ yɛbɛsan akɔ Ne nkyɛn no ho nhyira.

Me san so gye dase wɔ Jesus Christ ho. Ɔno nye Nyankopɔn ne Ba Kortonoo. Ɔgyee hɛn fi owu mu, na Ɔpon hɛn fi bɔn mu ber a yɛkyerɛ hɛn gyedzi wɔ No mu na yenu hɛnho. No werdam afɔrbɔ a ɔmmbɔadze da a ɔbɔe dze maa hɛn no dze ɔnnkyebo na onnyiewiei nkwa ba. “Yɛda Nyame ase wɔ Ne Ba krɔnkrɔn akyɛdze a onnyi kãbea no ntsi.’’ (“Christ Ɔtseasefo No: Asomafo no hɔn Dasegye no,’’ Liahona, Esusow Aketseaba 2017, enyim nduraho n’ekyir).

Woehyira Latter-day Saintfo a wɔwɔ wiadze mfedzanan dɛ wɔsom Jesus Christ wɔ Ne temple horow mu. Seseiara worisi temple horow no kor wɔ Winnipeg, Canada. Menye me yer, Anne Marie nyaa kwan kɔr bea a worisi hɔ no wɔ afe yi Dzifuu abosoom mu. Wɔahyehyɛ temple no fɛɛfɛw ara ma dɛ sɛ wowie a ɔbɛyɛ ɔkrabɔhwɛ. Naaso, nnkotum enya ɔkrabɔhwɛ temple wɔ Winnipeg anaa beebiara so a, fapem no nnyɛ dzen na onntsim.

Winnipeg dɛtse ne tsebea dɛ ohuhur a nna ɔamoa no yɛ esukwankyɛba kye no a nna ɔanan akɔ na aba dzi no maa temple fapem ne si no gyee mbɔdzenbɔ ara yie. Dɛm ntsi, wosii enyimpi dɛ temple yi ne fapem no bɛgye ndadze mpuna 70 a wɔhyehyɛ konkrit mu. Mpuna yinom atsentsen yɛ anamɔn 60 na 12 dze kesi 20 nkyis wɔ ne tɛtɛr mu. Wopia do dze hyɛ famu kɛpem dɛ wɔbɛpem ɔbonkofi bɛyɛ anamɔn 50 dze kɔ asaase tsirmu. Kwan yi mu no, mpuna 70 no ma fapem a otsim na ɔyɛ dzen ma dza Winnipeg temple fɛɛfɛw no bɛyɛ.

Dɛ Latter-day Saintfo no, yɛhwehwɛ fapem a ɔyɛ dzen na otsim tse dɛm wɔ hɛn abrabɔ mu—sunsum mu fapem a yehia wɔ hɛn ɔnnkyebo akwantu mu dze asan akɔ hɛn ɔsor fie. Dɛm fapem no yeesi no wɔ hɛn nsakyeree dze kɔ Ewuradze Jesus Christ hɔ ɔbonkofi no do.

Yɛkaa Helaman ne nkyerɛkyerɛ fi Mormon Nwoma no mu dɛ: “Na afei me mbabanyin, hom nkaa, hom nkaa dɛ hɛn Pomfo a ɔyɛ Christ, Nyame ne Ba no, no botan no do na ɔwɔ dɛ hom tow hom fapem; ama sɛ abɔnsam bɔ n’ehum dzendzen no a, nyew, n’egyen menaba a ɔwɔ ekyinehyia ehum no mu no a, … orinnya tum wɔ hom do nntwe hom nnkɛhyɛ awerɛhow nye mbusu a onnyi ewiei no bun ase, osian ɔbotan a hom atow hom adan wɔ do ntsi, dza ɔyɛ fapem tsim, fapem a sɛ adasamba si hɔn adan wɔ do a wɔnkɔhwe ase’’ (Helaman 5:12).

Ndaase mu ara yɛtse mber bi mu a nkɔnhyɛfo na asomafo kyerɛkyerɛ hɛn Agyenkwa Jesus Christ no ho nsɛm. Yeridzi hɔn afotu do no boa hɛn ma yesi fapem tsim wɔ Christ mu.

Mfeda, wɔ ne mbuei nsɛm wɔ Ɔbɛsɛ 2018, wiadze mfɛndzanan ehyiadzi mu no, President Russell M. Nelson dze dawurbɔ na kɔkɔbɔ yi too gua dɛ, “Botae a Asɔr no wɔ nye dɛ ɔbɔboa asɔrmba nyinara ma woetu hɔn gyedzi wɔ Jesus Christ na No Werdambɔ mu no mpon, wɔbɔboa hɔn ma wɔayɛ na woesie hɔn ahyɛmu a wɔnye Nyankopɔn edzi no, na wɔahyɛ hɔn ebusua ebusua dzen na wɔasɔw hɔn ano.’’ Ndɛ wiadze huhuuhu mu no, iyi nngow.. Abɔnsam remia no ɔkotsia wɔ gyedzi do na wɔ hɛn na hɛn ebusua ebusua do ntsɛmntsɛm ara. Yɛbɛtsena ase sunsum mu no, yehia ɔkotsĩadze na nsiwanodze nhyehyɛɛ” (“Opening Remarks,” Liahona, Ɔberɛfɛw 2018, 7; wotsĩmu aka ho).

President Nelson n’asɛm ekyir no, Elder Quentin L. Cook a ɔkã Asomafo Duebien no hɔn Quorum ho no dze Bra, Bɛka Mo Do mboa ma ankorankor na ebusua ebusua no too gua. Nsɛntɔw a odzi do no ka Ne nsɛm no ho:

• “Fie adzesua fofor Bra, Bɛka Mo Do mboa no … wɔayɛ dze bɔboa asɔrmba ma woesua asɛmpa no wɔ fie.’’

• “Mboa yi wɔ hɔ ma ankorankor na ebusua biara wɔ Asɔr no mu’ [Come, Follow Me—For Individuals and Families (2019), vi].”

• “Hɛn botae nye dɛ yɛbɛhyehyɛ Asɔr na fie suahu ahorow wɔ kwan bi mu a ɔbɛma gyedzi na sunsum mu atsenkã enyin kɛsenara na hɛn nsakyeree kɔ Ɔsor Egya na Ewuradze Jesus Christ hɔ no mu adɔ yie.’’ Hwɛ Quentin L. Cook, (“Deep and Lasting Conversion to Heavenly Father and the Lord Jesus Christ,’’ Liahona, Ɔberɛfɛw 2018, 8–12.)

Wɔhyɛ ase wɔ afe yi mu Sanda abosoom mu no, wiadze mfendzanan Latter-day Saintfo hyɛɛ ase dɛ wɔdze Bra, Bɛka Mo Do mboa dɛ hɛn akwankyerɛ rusua Ahyɛmu Fofor no. Dapɛn dapɛn nhyehyɛɛ ka ho no, Bra, Bɛka Mo Do boa hɛn ma yesua kyerɛwsɛm no, asɛmpa ho nkyerɛkyerɛ no, na nkɔnhyɛfo na asomafo hɔn nkyerɛkyerɛ no. Ɔyɛ mboa nwanwa ma hɛn nyina.

Abosoom akron wiadze mfendzanan kyerɛwsɛm adzesũa mbɔdzenbɔ ekyir no, ebɛnadze na yehu? Yehu Latter-day Saintfo a wɔwɔ beebiara no rinyin wɔ gyedzi na som ma Ewuradze Jesus Christ mu. Yehu ankorankor na ebusua esbusua a wɔdze mber ato hɔ wɔ dapɛn no nyina mu dze sua hɛn Agyenkwa ne nsɛm. Yehu asɛmpa nkyerɛkyerɛ dɛ orutu mpon wɔ hɛn Sunday adzesua horow mu ber a yesua kyerɛwsɛm no wɔ fie na yɛkyɛ hɛn nhumu wɔ Asɔr. Yehu ebusua dɛwdzi na koryɛ kɛsenara osiandɛ yeefi yɛrekenkan no ara dze kɔ yerusua kyerɛwsɛm no wɔ kwan a no mu dɔ mu.

Ɔayɛ me adom ma menye Latter-day Saintfo pii edzi ehyia na marankasa maatse hɔn suahu horow wɔ Bra, Bɛka Mo Doho. Hɔn gyedzi a wɔkyerɛe no dze dɛw hyɛ m’akoma mã. Nsɛm kakra a maatse efi Asɔrmba ahorow hɔ wɔ wiadze n’afã kakra nye yi:

• Egya bi kãa dɛ, “M’enyi gye Bra, Bɛka Mo Do ho, osiandɛ ɔma kwan ma megye Agyenkwa noho dase kyerɛ me mba.’’

• Fie kor bi so mu no, abofra bi kãa dɛ, “Iyi yɛ kwan a metse dɛ m’awofo gye hɔn dasee.’’

• Ɛnã bi kãa dɛ: “woekenyan hɛn ma yeehu mbrɛ yebesi dze Nyankopɔn edzi kan. Mber no a [yɛdwen dɛ] ‘nna yennyi no’ enyidado, dɛwdzi, asomdwee, na nkonyimdzi ahyɛ no [mã] wɔ akwanhorow mu a nna yenyim dɛ ɔnnkɛyɛ yie.

• Awarfo bi hun dɛ: “Yɛrekenkan kyerɛwsɛm no nyina soronko kyɛn dza a nna yeedzi kan akenkan no da. Yerusua adze dodow kyɛn dza a nna yeedzi kan esua da. Ewuradze pɛ dɛ yehu ndzɛmba nsonsonee mu. Ewuradze risiesie hɛn.

• Ɛnã bi kãa n’asɛm dɛ: Ɔyɛ me ahomka dɛ yɛrobɔmu sua adze kor noara. Nkaano no, nna yɛrekenkan. Ndɛ, yerusua’’

• Akyerɛbaa bi kãa nhumu a no mu dɔ yi dɛ: “Nkaano no, nna inya adzesuadze no nna kyerɛwsɛm no boa. Sesei dze, ewɔ kyerɛwsɛm no na adzesuadze no boa.

• Akyerɛbaa bi so kãa asɛm dɛ: “ Sɛ meyɛ a metse nsonsonee wɔ [medze toto] sɛ mannyɛ ho a. Ɔnnyɛ me dzen dɛ mebɛka Jesus Christ na hɛn gyedzi ho asɛm akyerɛ binom.

• Nanabasia bi kãa dɛ, “Mefrɛ me mba na nananom Kwesida biara, na yɛbɔmu kyɛ nhumu fi Bra, Bɛka Mo Do mu’’

• Akyerɛbaa bi hun dɛ, “Bra, Bɛka Mo Do tse dɛ Agyenkwa nankasa rosom me. Ɔyɛ ɔsor nkenyan.”

• Egya bi kãa asɛm dɛ, “Ber a yɛdze Bra, Bɛka Mo Do, dzi dwuma no, yɛtse dɛ Israelmba, a yɛrehyɛ hɛn mbobow ano nsew, dze robɔ hɛn ebusua ebusua ho ban efi ɔsɛɛfo ne nhyɛdo ho.’’

Enuanom na nkyerɛbaa, ɔyɛ me enyigye dɛ menye hom edzi nkɔmbɔ na metsie mbrɛ hom mbɔdzenbɔ wɔ Bra, Bɛka Mo Do ho risi hyira hom abrabɔ. Yɛda hom ase wɔ hom som no ho.

Yɛdze kyerɛwsɛm no rusua Bra, Bɛka Mo Do no dɛ akwankyerɛ no rehyɛ hɛn nsakyeree kɔ Jesus Christ na N’asɛmpa hɔ no dzen. Yɛremmfa dɔnhwer kor no a ɔatsew do wɔ asɔr Kwesida no nnsesa dɔnhwer kor mbordo ma kyerɛwsɛm adzesũa wɔ fie ara. Yerusua asɛmpa no yɛ mbɔdzenbɔ a ɔsaa wɔ dapɛn no mu nyina. Dɛ mbrɛ akyerɛbaa kor nye me kyɛɛ nhumu dɛ, “Botae no nnyɛ dɛ asɔr bɛyɛ etsia dɔnhwer kor, ɔama asɔr ayɛ tsentsen koraa nda esia!’’

Afei, hom nhwɛ kɔkɔbɔ a hɛn nkɔnhyɛnyi, President Nelson, bɔɔ no bio ber a obuei Ɔbɛsɛ 2018 wiadze mfɛndzanan ehyiadzi no:

“Abɔnsam remia ne ɔkotsia wɔ gyedzi do na wɔ hɛn na hɛn ebusua ebusua do ntsɛmntsɛm ara. Yɛbɛtsena ase sunsum mu no, yehia ɔkotsĩadze na nsiwanodze nhyehyɛɛ’’ (Opening Remarks,” 7).

Afei, (bɛyɛ dɔnhwer 29 ekyir) wɔ Kwesida ewiaber no, ɔdze anohoba yi wiei ehyiadzi no: “Ber a hom dze enyimia dze resesa hom fie ayɛ no asɛmpa adzesua no, … abɔnsam ne nhyɛdo wɔ hom abrabɔ na hom efiefie no do bo huan’’ (“Becoming Exemplary Latter-day Saints,” Liahona, Ɔberɛfɛw 2018, 113).

Abɔnsam ne nyɛe no besi dɛn botum enyin ntsɛmntsɛm ara a ber kor noara mu no abɔnsam ne nhyɛdo no do ruhuan nokwar mu ara? Obotum esi, na orisi wɔ Asɔr no nyina mu, osiandɛ Ewuradze siesie No nkorɔfo dze tsĩa abɔnsam ne nyɛɛe. Bra, Bɛka Mo Do yɛ Ewuradze ne ɔkotsĩadze na nsiwanodze nhyehyɛɛ. Dɛ mbrɛ President Nelson kyerɛkyerɛɛ no, “Fie-Nhyiamu, Asɔr-Mboa adzesua a wɔdze abɔmu no wɔ ahoɔdzen dɛ ɔma ebusua ebusua hɔn tum no mu yɛ dzen.’’ Naaso, ohia na obehia hɛn mbɔdzenbɔ papaapa; yehia dɛ yɛdze enyidahɔ na ahwɛyie mu ara “[dzi do] yie ma wɔasesa [hɛn] fie ayɛ no gyedzi guandɔbea’’ (“Becoming Exemplary Latter-day Saints,” 113).

Dza ohia tsitsir no, dɛ mbrɛ Prsident Nelson asan so akã dɛ, “Obiara no sunsum mu mpontu yɛ nankasa n’asodzi’’ (“Opening Remarks,” 8).

Yɛdze Bra, Bɛka Mo Do mboa no, Ewuradze resiesie hɛn “ama mber huhuihu a sesei ɔda hɛn enyim no’’ (Quentin L. Cook, “Deep and Lasting Conversion,” 10). Ɔroboa hɛn ma yeesi dɛm “fapem tsim no, fapem a sɛ adasamba si hɔn adan wɔ do a wɔronnhwe ase’’ (Helaman 5:12)—dasegye fapem a oetsim dzendzenndzen wɔ hɛn nsakyeree kɔ Ewuradze Jesus Christ hɔ ne ɔbonkofi a.

Mowɔ enyidado dɛ hɛn daadaa mbɔdzenbɔ wɔ kyerɛwsɛm nsuae mu no bɛhyɛ hɛn dzen na wɔakyerɛ hɛn dɛ yɛfata anohoba nhyira yinom. Mobɔ ho mpaa wɔ Jesus Christ ne dzin mu, amen.