Mbrasɛm mu dza Ɔsõ Ebien

Medze dza Jesus kyerɛkyerɛɛ dɛ ɔyɛ mbrasɛm mu dza ɔso ebien no hyɛ ase.

“Dɔ Ewuradze wo Nyankopɔn, wɔ w’akoma nyina mu, nye wo kra nyina mu, nye w’adwen nyina mu.

“Iyi nye mbra no mu asɛm kɛse a odzi kan na ɔsõ.

“Na dza otsĩa ebien no a ɔtse dɛ ɔno nye dɛ, Dɔ wo nyɛnko dɛ wankasa woho.”⁴

Iyi kyerɛ dɛ wɔhyɛ hɛn mbra dɛ yɛndɔ obiara, osiandɛ Jesus ne Samarianyi pa abɛbu no kyerɛ hɛn dɛ obiara yɛ hɛn nyɛnko.⁵ Mbom hɛn mbɔdzembɔ dɛ yebedzi mbrasɛm a otsĩa ebien yi do no nnyi dɛ ɔma hɛn werɛ fir dza odzi kan no koraa, dɛ yɛdze hɛn akoma, akra, na adwen nyina bɔdɔ Nyankopɔn. Yɛkyerɛ hɛn dɔ ber a “ye[re]sie [Ne] mbrasɛm no.”⁶ Nyame hwehwɛ hɛn dɛ yebesie Ne mbrasɛm osiandɛ ɔnam setsie, a nnuho kã ho mu, na yebotum asan akɔ Ne nkyɛn na yebedzi mu dɛ mbrɛ Ɔtse no.

Ndaansa yi ne kasaa a ɔkãa kyerɛɛ Asɔr no mu young adultfo no, President Russell M. Nelson kãsaa faa “nsunsuando a ɔyɛ dzen a ɔda Nyame No dɔ na Ne mbrasɛm ntamu.”⁷ Mbrasɛm tsitsir ara a ɔfa hɔn a wohu hɔn dɛ wɔyɛ LGBTfo ho nsɛmnsɛm nye Nyame n’awar ho mbra na dza ɔfam ho, ahosie ho mbra no. Ebien no nyina ho wɔ hia tsitsir wɔ hɛn Ɔsor Egya no nkwagye ho nhyehyɛɛ ma Ne mba ho. Dɛ mbrɛ President Nelson kyerɛkyerɛe no, “Nyankopɔn Ne mbrasɛm ho tsirmpɔw no yɛ No dɔ a ɔmmbɔadze da ma hɛn na Ne pɛ dɛ yɛbɛyɛ dza yebotum abɛyɛ nyina.”⁸

President Nelson kyerɛkyerɛɛ dɛ: “Aman pii mbra … apen banyin na banyin ntamu awar do. Dɛ yɛyɛ Asɔrmba yi, yɛdze obu ma aman hɔn mbra … , a mbra kwan do awar kã ho. Nokwar no nye dɛ, ahyɛse no … Nyame na Ɔhyehyɛɛ awar! Na besi ndɛ no Ɔkyerɛkyerɛmu dɛ ɔyɛ banyin na ɔbaa ntamu awar. Nyame nnsesãa N’awar ho nkyerɛkyerɛmu no.”

President Nelson sɔɔw do dɛ: “Nyame nnsesãa N’ahosie ho mbra so.” Ahwehwɛdze a wɔdze hɛn temple mu no so nnsesãa.”⁹

President Nelson kaa hɛn nyina dɛ “hɛn asodzii dɛ Asomafo nye dɛ nokwar no nko na yɛnkyerɛkyerɛ. Dɛm asodzii no a wɔdze ama [Asomafo] no mmahɔn tumdzi no dɛ wɔnsesã mbra krɔnkrɔn no.”¹⁰ Dɛm ntsi, me nkyerɛbaa, otwar dɛ Asɔr baanodzifo no kyerɛkyerɛ daa dɛ banyin na ɔbaa ntamu awar na ahosie ho mbra a ɔfam ho yɛ soronko a ho hia tsitsir.

Ne nyina ekyir no, Jesus Christ N’Asɔr a ɔwɔ hɔ ma Nda a Odzi Ekyir Ahotseweefo n’edwuma no fa ɔresiesie Nyame ne mba ama celestial ahenman no, nkankara ama n’enyimnyam no a ɔkrɔn kɛse no, nkwagye ntowdo anaa onnyiewiei nkwa. Dɛm nkrabea a ɔkrɔn koraa no, gyedɛ wodua mbersantsen mu awar nko do na wobotum enya.¹¹ Abɔdze tum no wɔ banyin na ɔbaa beenu no mbɔmu mu¹²—dza ndɛ nyikyerɛ kyerɛ mu dɛ “hɔn asefo wɔakɔ do afebɔɔ ekesi afebɔɔ”¹³ no kã onnyiewiei nkwa ho.

Ne kasaa a ɔdze maa young adultfo mu no, President Nelson kyerɛkyerɛɛ dɛ, “Hom ridzi Nyame ne mbrasɛm do no bɛma hom enya ahotɔ ber a hom rutu mpon ekodu nkwagye ntowdo mu no”¹⁴—ɔno nye dɛ, hom bɛyɛ tse dɛ Nyame, a hom wɔ abrabɔ ntowdo mu na hom wɔ hɛn Ɔsor Awofo hɔn nkrabea krɔnkrɔn no. Dɛm no nye nkrabea a yɛhwehwɛ ma hɔn a yɛdɔ hɔn nyina. Osian dɛm ɔdɔ no ntsi, yennkotum ama hɛn dɔ no abor mbrasɛm no na nhyehyɛɛ no na Nyame n’edwuma do, dza yenyim dɛ ɔdze enyigye kɛsenara brɛɛ hɔn a yɛdɔ hɔn no.

Naaso dodowara wɔ hɔ a yɛdɔ hɔn, a binom a wɔagye asɛmpa nsan-ananmu no kã ho, a wɔnngye nndzi anaa wɔsan mu yi dɛ wonnkedzi Nyame ne mbrasɛm a ɔfa awar na ahosie ho mbra do no. Hɔn so ɛ?

Nyame ne nkyerɛkyerɛ kyerɛ dɛ hɛn nyina yɛyɛ Ne mba na Ɔabɔ hɛn dɛ yebenya enyigye.¹⁵ Ndɛ nyikyerɛ kyerɛkyerɛ dɛ Nyankopɔn ama nhyehyɛɛ ma ɔnnkyebo abrabɔ yi mu a hɛn nyina yebotum asan mu eyi setsie dze ahwehwɛ Ne nhyira mu kese koraa no anaa ɔbɛyɛ ɔsanmuyi a obegya no akɔ enyimnyam ahenman no a ɔnnkrɔn no mu kor.¹⁶ Osiandɛ Nyankopɔn no dɔ ma Ne mba nyina yɛ kɛse ntsi, dɛm ahenman no a ɔnnkrɔn no mpo yɛ nwanwa kyɛn dza adasa botum atse ase.¹⁷ Jesus Christ No Werdambɔ no na ɔma iyinom nyina tum ba mu, ber a “ɔhyɛ Egya no enyimnyam, na ɔgye ne nsaano ndwuma nyina nkwa.”¹⁸

Maaka mbrasɛm a odzi kan no ho asɛm, na ma otsĩa ebien no so ɛ? Yebesi dɛn besie mbrasɛm no dɛ yɛdɔ hɛn anyɛnkofo? Yɛhwehwɛ dɛ yetu hɛn asɔrmba hɔn aso ma hɔn a wodzi lesbianfo, gayfo, ɔyɛ banyin so nna ɔyɛ basia, anaa wɔasesã n’awoo su, a wɔtaa frɛ hɔn LGTBfo no hɔn nkyerɛkyerɛ na ndzeyɛɛ no do no ɔwɔ dɛ yɛdze ɔdɔ no a Jesus ahyɛ hɛn ho mbra dɛ yɛnkyerɛ mma hɛn anyɛnkofo nyina no hwɛ hɔn. Dɛm ntsi, ber a wɔyɛɛ banyin na banyin awar mbra kwan mu awar wɔ America no, President a Odzi Kan na n’Apamfo na Asomafo Duebien no hɔn Quorum no paa mu kãa dɛ: “Jesus Christ n’asɛmpa no kyerɛkyerɛ hɛn dɛ yɛndɔ na yɛnkyerɛ ayamuyie na obu mma nkorɔfo nyina—ber mpo a yɛnye hɔn nnyɛ adwen kor no. Yesi no pi dɛ hɔn a wodzi mbra no do anaa asɛndzibea do atsɛmbu do a, ɔma banyin na banyin awar ho kwan no, ɔnnsɛ dɛ yebu hɔn enyimtsia.”¹⁹

Bio so, onnyi dɛ yɛtseetsee hɔn a wɔnnye hɛn nnkyɛ hɛn gyedzi na enyimpi si no.²⁰ Ɔyɛ yaw dɛ, binom a worihyia dɛm nsɛmnsɛm yinom kɔ do nya nkã-tse dɛ woeyi hɔn esi nkyɛn na asɔrmba binom na hɔn baanodzifo apow hɔn wɔ hɛn ebusua ebusua, ward na stake horow mu. Otwar dɛ hɛn nyina yɛbɔ mbɔdzen kyerɛ ayamuyie na enyidzi ara yie.

Siantsir binom a yɛnntse ase mu no, hɛn abrabɔ sũahu mu no ɔson dza ɔhaw obiara. Naaso yenyim dɛ Nyankopɔn bɔboa hɛn mu kor biara ma oedzi ɔhaw yinom do, sɛ yɛhwehwɛ No mboa a. Yehu amandze na yeenu hɛnho efi mbra no a wɔakyerɛkyerɛ hɛn na yɛafom wɔ ho no a, hɛn nyina bɔkɔ enyimnyam ahenman bi mu. Ewuradze ankasa na Obobu atsɛmbu a odzi ewiei, Ɔno nko na Ɔwɔ nyimdzee, nyansa, na adom a Ɔdze bobua hɛn mu kor biara atsɛn.

Sesei dze, otwar dɛ yɛbɔ mbɔdzen sie mbrasɛm a ɔsõ ebien nyina no. Ama yɛayɛ dɛm no, yɛnantsew kwan tseabaa a ɔda mbra na ɔdɔ ntamu—yerisie mbrasɛm no na yɛrenantsew ahyɛmu anamɔn kwan no do, ber a yɛdɔ hɛn anyɛnkofo wɔ kwan no do. Nantsew yi hia hɛn ma yɛahwehwɛ sor nkenyan wɔ dza yɛma ho abamba na dza yentsĩa nna mbrɛ yensi ndɔ na yentsie enyidzi mu ara na yɛnkyerɛkyerɛ wɔ kwan no do. Hɛn nantsew hwehwɛ dɛ yennkwetsir mbrasɛm no na mbom yɛbɛkyerɛ ntseasee na ɔdɔ a obu do. Otwar dɛ hɛn nantsew no yɛdwen mbofra a wonnyim sɛ wɔyɛ banyin anaa ɔbaa ho, naaso onnyi dɛ yɛma wɔto no dzin ntsɛmpɛ mu osiandɛ, mbofra dodow ara mu no, mber rugu mu no dza wonnyim no enyim bɛda hɔ ara yie.²¹ Hɛn nantsew tsĩa hɔn a wɔtwetwe nkorɔfo fi ahyɛmu anamɔn kwan do no, na ɔpow dɛ ɔbɔboa obiara a obegya nkorɔfo efi Ewuradze nkyɛn no. Iyi nyina mu no yɛkaa Nyame n’enyidado na enyigye mapã na nhyira anohoba a, ewiei no ɔwɔ hɔ ma hɔn nyina a wosie Ne mbrasɛm no.

Enãnom na Egyanom na hɛn nyina yɛwɔ asodzi dɛ yɛkyerɛkyerɛ mbrasɛm mu dza ɔso ebien nyina. Asɔr mu mbaa no, President Spencer W. Kimball kyerɛkyerɛɛ dɛm asodzi no mu kyerɛɛ hɔn wɔ nkɔnhyɛsɛm kɛse yi mu. “Nda a odzi ewiei no osian mbaa apapa dodow a wɔwɔ wiadze … a wɔbɔtwe hɔn dodowara aba Asɔr no mu no na Asɔr ne nyinii ne kɛse noara befir aba. Iyi besi susuampara dɛ Asɔr mu mbaa no bɛkyerɛ tseneneeyɛ na kasakwan a ɔda edzi pefee wɔ hɔn abrabɔ mu ama woeebohu dɛ Asɔr mu mbaa no yɛ soronko … fi wiadze mu mbaa ho. … Dɛm ntsi ɔbɛnam Asɔr no mu mbaa hɔn fasusu do na ɔbɛyɛ nhyɛdo kɛse wɔ asɔrmba hɔn dodow na Asɔr no sunsum mu mpontu mu wɔ nda a odzi ewiei no mu.”²²

Ɔreka dɛm nkɔnhyɛ ho asɛm no, President Russell M. Nelson paa mu kãa dɛ “da no President Kimball hunii no nye ndɛ. Hom nye mbaa no a ohunii no!”²³ Hɛn a yɛtsee dɛm nkɔnhyɛ mfe 40 a abɛsen kɔ no nna yennyim dɛ hɔn a Asɔr mu mbaa no botum agye hɔn no bɛyɛ hɔnankasa hɔn anyɛnkofo adɔfo na ebusua a sesei wiadze ehiadze na mbɔnsamdze ndaadaa ahyɛ hɔn do no. Me mpaabɔ na nhyira nye dɛ hom bɛkyerɛkyerɛ na hom edzi dwuma ma nkɔnhyɛ no ahyɛ mã, wɔ Jesus Christ ne dzin mu, amen.