Mbabaa Adɔfo
Odzi kan, dza odzi mu akotsen wɔ adze a yɛyɛ no wɔ Young Women nyina nye hɛn ahwehwɛdze dɛ yɛbɔboa wo ma enya gyedzi a onnhihim wɔ Ewuradze Jesus Christ mu.
Me nkyerɛbaa adɔfo, ɔyɛ enyigye dɛ menye hom wɔ ha! Yerenya nyikyerɛ beberee a ɔgye sunsum mu mbɔdzenbɔ na nkenyan.
Ber a yɛbɛhyɛ ase no, mepɛ dɛ medze anyɛnkofo bi kyerɛɛ hom; wɔyɛ young women a wɔyɛ soronko wɔ talent, kusum, na ankorankor na ebusua gyinabew mu. Hɔn mu kor biara, tse dɛ hom no, ekenyan me wɔ m’akoma mu.
Odzi kan, hom nhyia Bella. Osi pi dɛ ɔno nko nye young woman wɔ ne nkorbata mu wɔ Iceland.
Hom nhyia somfo Josephine a ofi Ebibir man mu, a ɔasan dze esi n’enyi do dɛ obosua Mormon Nwoma no dabiara. Oruhu tum na nhyira a ofi nyɛe yi mu a ɔnnyɛ dzen, a ɔyɛ nokwar.
Na no koraa no hom nhyia Ashtyn, young woman soronko bi a ofii mu wɔ mfe esia kokoram yarba ho akodzi. Ne dasee dzendzen wɔ Jesus Christ No Werdambɔ no ho da ho gyegye wɔ m’akoma mu.
Hom nyina yɛ young women awanwafo. Hom yɛ soronko, a hom mu biara nankasa wɔ n’akyɛdze horow na suahu horow naaso hom yɛ kor wɔ onnyiewiei kwan a ohia dodow mu.
Hom yɛ Ɔsor Awofo hɔn sunsum mu mbabaa, na biribiara nnkotum aatsew hom efi Hɔn dɔ na ɔdɔ wɔ hom Agyenkwa no ho.1 Ber a hom twe bɛn No no, mpo hom rututu mbɔdomaba anamɔntu ketseketse koraa dze kɔ kan no, hom bohu mfesantsen asomdwee dɛ ɔtsena hom kra mu dɛ hom yɛ hɛn Agyenkwa, Jesus Christ no osuanyi nokwafo.
President Russell M. Nelson, hɛn nkɔnhyɛnyi dɔfo, aserɛ dɛ menye hom nkyɛ nkenyan nsesã bi a ɔbɔboa hom ma “woetu [hom] ankorankor ndaamba krɔnkrɔn mpon’’2 na hom tsenenee nhyɛdo enyin. Mebɛkã nsesa ahorow anan ho asɛm anafua yi.
Young Women Ngyinado
Odzi kan, dza odzi mu akotsen wɔ adze a yɛyɛ no wɔ Young Women nyina nye hɛn ahwehwɛdze dɛ yɛbɔboa wo ma enya gyedzi a onnhihim wɔ Ewuradze Jesus Christ mu3 na nokwar nyimdzee wɔ wo ahyɛnsew krɔnkrɔn ho dɛ Nyankopɔn ne babaa.
Anafua yi, mepɛ dɛ mobɔ Young Women ngyinado nsesae no ho dawur. Meserɛ dɛ hom bɛtse nkã dɛ Sunsum Krɔnkrɔn no regye nokwar nsɛm yinom ho dase ber a mese ngyinado fofor no.
Meyɛ ɔsor awofo hɔn babaa dɔfo,4 a mowɔ awosu krɔnkrɔn na onnyiewiei nkrabea.5
Dɛ Jesus Christ osuanyi no,6 meper dɛ mebɛyɛ tse dɛ Ɔno.7 Mohwehwɛ mankasa me nyikyerɛ na me dze dzi dwuma8 na masom binom wɔ Ne dzin krɔnkrɔn mu.9
Mibegyina dɛ Nyankopɔn ne dasefo wɔ mber nyina na wɔ ndzɛmba nyina mu na wɔ mbea ahorow nyina.10
Ber a meper fata nkwagye ntowdo no,11 nnuhu akyɛdze no som me bo12 na mohwehwɛ mpontu dabiara.13 Medze gyedzi no,14 mebɛhyɛ me fie na m’ebusua dzen,15 mebɛyɛ na mesie ahyɛmudzi krɔnkrɔn horow,16 na magye temple ho ayɛdze horow17 na nhyira.18
Hom nhwɛ nsesã no fi “hɛn’’ kɔ “me.’’ Nokwar yinom fa hom ho dɛ ankorankor. Eyɛ Ɔsor Awofo hɔn babaa dɔfo. Eyɛ hɛn Agyenkwa, Jesus Christ n’ahyɛmu osuanyi. Mo to nsa frɛ wo dɛ sua na dwendwen nsɛm yinom ho. Minyim dɛ ber a eyɛ no, ibenya hɔn nokwaryɛ no ho dasee. Eretse nokwar yinom ase bɛsesã kwan a idzi ɔhaw do. Eruhu wo nyimpa ban na wo botae bɔboa wo ma edze wo pɛ abata Agyenkwa ne dze ho.
Asomdwee na akwankyerɛ bɛyɛ wo dze ber a ika Agyenkwa Jesus Christ no do.
Young Women Adzesua Ahorow
Nhyehyɛɛ a otsĩa ebien no kã Young Women adzesũa ahorow. Elder Neal A. Maxwell akã dɛ, “Ɔtaa dɛ dza nkorɔfo hia no dodowdo nye dɛ wobenya bambɔ wɔ guandɔbea a wɔbɛgye hɔn efi ɔbra n’ehum mu.’’19 Otwar dɛ hɛn guandɔbea ahorow fi ehum mu no, yɛ ɔdɔ na ɔgye mbea dwudwoodwo. Hɛn mbɔdzembɔ mu dɛ yɛbɛkyekyer nkabɔmu kɛsenara, yɛbɛhyɛ anyɛnkoyɛ dzen na yɛama ɔgye wɔ Young Women ho nkã enyin no, yɛreyɛ nsesa bi wɔ adzesũa nyehyɛɛ su do.
Mfe bɔbor 100 no, wɔakyekyɛ young women adzesũa ahorow mu ebiasa. Yɛrehyɛ ase seseiara no, yɛserɛ Young Women baanodzifo na bishopfo dɛ mpaabɔ mu ara wɔnhwɛ young womanyi biara n’ehiadze na wɔmfa nhyehyɛ dɛ mbrɛ ward no ne gyinabew horow tsitsir no tse. Mfatohobi a ɔkyerɛ mbrɛ iyi besi botum ayɛ.
-
Sɛ hom young women nndɔɔso a, hom botum enya Young Women adzesua kor a hɔn nyina bɔmu hyia.
-
Ebia hom wɔ young women beberee a woedzi mfe 12 na afei young women a hɔn enyi efir kakra na wɔnndɔɔ sõ. Hom botum esi egyinae dze enya adzesũa ahorow ebien: Young Women 12 na Young Women 13–18.
-
Anaa sɛ hom wɔ ward kɛse a young women 60 ba a, hom botum enya adzesũa ahorow esia, kor ma mfe kor biara, a wɔdze afe da no hyehyɛ.
Mbrɛ wɔbɛhyehyɛ hom biara no, hom young women hia tsitsir wɔ nkabɔmu ne nkyekyer mu. Yɛ kan ma hɔn a woetwa woho ehyia no. Yɛ ɔdɔ na ahohia a w’enyi da do dɛ ibenya efi binom hɔ ne farbaa. Mpaabɔ wɔ w’akoma mu no, kɔdo kyerɛ ayamuyie na yɛ papa ho nhyɛdo. Sɛ eyɛ a, ayamuyie bɛhyɛ w’abrabɔ mu mã. Ibenya nkã-tse papa ama binom na ebɛhyɛ ase ehu hɔn papayɛ dze ahyɛ anan mu.
Young Women Adzesũa ahorow Edzin
Otsĩa ebiasa, yɛdze adzesũa nhyehyɛɛ fofor yi no, wɔdze nkabɔmu dzin “Young Women’’ bɛfrɛ adzesũa ahorow nyinara.20 Yebegyae edzin Beehive, Mia Maid, na Laurel no frɛ.
Hom Nhyɛ Adzesũa Presidencyfo no Dzen
Nhyehyɛɛ a odzi ewiei a mepɛ dɛ mekã ho asɛm no yɛ adzesũa presidencyfo no ho hia. Ɔmmfa ho mbrɛ woesi ahyehyɛ Young Women adzesũa ahorow no, ɔwɔ dɛ adzesũa biara nya adzesũa president na n’apamfo!21 Ɔyɛ nhyehyɛɛ krɔnkrɔn dɛ wɔfrɛ young women ma wodzi baano wɔ hɔn mbabun ber mu.
Wɔahyɛ adzesũa presidencyfo hɔn asɛdze na hɔn botae mu dzen na wɔakyerɛkyerɛ mu yie. Nkwagye Edwuma no yɛ asodzii horow yinom mu kor, tsitsir ara wɔ erosom, asɛmpasomafo edwuma, ɔhyewbɔ, na temple na ebusua abakɔsɛm edwuma afa mu.22 Nyew, iyi nye mbrɛ yesi boa Israel ano23—enyimnyam edwuma ma nkataasia nyina dɛ Ewuradze ne mbabun aserafomba.
Dɛ mbrɛ hom nyim no, Asɔr no ne mpɛnpɛndo biara no, Ewuradze frɛ president na n’apamfo horow ma wodzi No nkorɔfo baano. Young Women, ebia eyɛ adzesũa president na n’apamfo mu ba no bɛyɛ kwan a odzi kan a enya dze wo ho rehyɛ nkenyan baanodzi nhwɛdo yi mu. Baanodzifo mpanyimfo, hom mma adzesũa presidencyfo hɔn ɔfrɛ no ndzi kan na afei hom nye hɔn nnantsew ho ndzi baano, wɔnkyerɛkyerɛ hɔn na wɔmma hɔn akwankyerɛ ama woetum edzi konyim.24 Adzesũa president na n’apamfo hɔn baanodzi sũahu mpɛnpɛndo biara mmfa ho no, hyɛ ase wɔ beebi a wɔwɔ no na boa hɔn ma wontu hɔn edwuma na awerɛhyɛmu mpon a obehyira hɔn dɛ baanodzifo. Bɛn hɔn, mbom mma nnhyɛ hɔn do. Sunsum no bɛkyerɛ hom kwan ber a hom kyerɛ hɔn kwan.
Hom mma menkã hom asɛm bi mfa nkyerɛ awofo na baanodzifo hɔn asɛdze a ohia dɛ akyerɛkyerɛfo. Wɔfrɛɛ Chloe dɛ ɔmbɔsom dɛ adzesũa president. N’asɔfodzi banodzinyi nyansafo hyɛɛ no nkuran dɛ ɔnhwehwɛ Ewuradze ne mboa dɛ ɔbɛkamfo edzin ama ne presidency. Chloe bɔɔ mpaa na onyaa nkenyan wɔ hɔn a ɔnkamfo dɛ n’apamfo ntsɛmara dodow. Ber a ɔkɔɔr do dwendwen ho na ɔbɔɔ ɔkyerɛwfo ho mpaa no, Sunsum no sii do twee n’adwen gyinaa akataasia bi do ma ɔyɛɛ no ahobow—obi a ɔnntaa mmba asɔr anaa dwumadzi horow bi.
Noho mmbaa no kakra wɔ nkenyan ho no, Chloe nye ne maame dzii ho nkɔmbɔ, a ɔkyerɛkyerɛɛ no mu dɛ akwanhorow mu kor a yebotum enya nyikyerɛ nye adwendwen nwɔwdo. Onyaa awerɛhyɛmu fofor no, Chloe tsee nkã dɛ obotum akamfo akataasia yi. Bishop no dze ɔfrɛ no mae, na akataasia no gyee too mu. Wɔdze nsa guu no do ekyir no, ɔkyerɛwfo nwanwanyi yi kãa dɛ, “Inyim a, nna menntse nkã mpo dɛ mekã ho anaa wohia me wɔ beebi. Manntse dɛ mekã ho. Mbom ɔfrɛ yi dze, metse nkã bi dɛ Ɔsor Egya wɔ botae na kwan bi dze ma me.’’ Ber a Chloe na ne maame fii nhyiamu hɔ no, Chloe danee hwɛɛ ne maame na nyinsuwa wɔ n’enyiwa mu no kãa dɛ, “Nyikyerɛ yɛ nokwar!’’ Nokwar nyikyerɛ yɛ edwuma!’’
Adzesua presidencyfo, Nyankopɔn na ɔafrɛ hom na ɔwɔ awerɛhyɛmu wɔ hom mu dɛ wobedzi Ne mbabaa kuw bi baano. Ewuradze nyim hom. Ɔsaan mu yii hom.’’25 Onyia a okitsa asɔfodzi etumdzi dze ne nsa egu hom do eyi hom esi hɔ; iyi n’asekyerɛ nye dɛ sɛ hom yɛ hom ɔfrɛ ho edwuma a, hom dze asɔfodzi etumdzi dzi dwuma. Hom wɔ edwuma a ohia yɛ. Hom nkã-tse nyɛ har na hom mfa Sunsum Krɔnkrɔn no ne nkenyan nyɛ adze. Sɛ hom yɛ a, hom botum dze awerɛhyɛmu asom, osiandɛ nnyɛ hom nko na hom som!
Adzesua presidentfo, yehia hom nyansaa, ndze, na ahom wɔ ward mbabun baguabɔ fofor no do a Elder Quentin L. Cook maa ho nkaabɔ ndɛ no. Hom yɛ nyiano ne fa tsitsir bi wɔ hom nuambanyin na nkyerɛbaa hɔn nsa reka hɔn ehiadze.26
Nsesã yinom wɔ adzesũa nhyehyɛɛ na baanodzi mu no botum ahyɛ ase ntsɛmpara a ward na nkorbata horow ayɛ krado na mbom ɔwɔ dɛ Sanda 1, 2020, na ɔahyɛ ase.
Me nkyerɛbaa adɔfo, megye dase dɛ nsesa yinom a makã ho nsɛm no ndɛ no yɛ nkenyan akwankyerɛ fi Ewuradze hɔ. Ber a yɛdze enyiber dze nsesa yinom dzi dwuma no, mma hɛn werɛ mmfir hɛn botae: dɛ yɛbɛhyɛ hɛn ngyinae mu dzen dɛ yɛbɛka Jesus Christ do na yɛaboa binom ma wɔaba No hɔ. Megye dase dɛ iyi yɛ N’Asɔr. Mbrɛ m’enyi si sɔ dɛ Ɔma hɛn kwan ma yɛyɛ adzehia papaapa wɔ N’edwuma krɔnkrɔn mu.
Meserɛ dɛ Sunsum noara a ɔweɔn nsesa yinom no bɔweɔn hom ber a hom per kɔ kan wɔ ahyɛmudzi anamɔn kwan no do. Megye ho dase wɔ Jesus Christ ne dzin mu, amen.