Ahyɛmu Mbaa a wɔnye Nyame Dzi Dwuma

M’enyisɔ dɛ ɔayɛ me adom dɛ menye hom, Nyame n’ahyɛmu mbaa no rebɛkasa. Anafua yi, mo botae nye dɛ mebɛhyɛ hom nkuran wɔ som kɛse a wɔafrɛ hom no ho. Nyew, Nyame ne babaa biara oritsie me ndze enya ɔfrɛ efi Ewuradze Jesus Christ hɔ.

Hom frɛ no hyɛɛ ase ber a wɔdze hom baa ɔnnkyebo asetsena yi mu, wɔ bea na mber a Nyame Ɔnoara a Onyim wo papaapa na Ɔdɔ wo dɛ Ne babaa no asan mu eyi ama wo. Sunsum wiadze mu no, nna Onyim wo na Ɔkyerɛkyerɛɛ wo adze na Ɔdze wo too bea a ibenya kwan, a ɔnntɔ kã wɔ wiadze abakɔsɛm mu, dɛ wɔbɔto nsa afrɛ wo akɔ enuma nsubura bi mu. Hɔ no, ibɛtse nkasafua yinom a Jesus Christ ɔsomfo a wɔafrɛ no no bɛkã: “Ɔnam tumdzi a Jesus Christ dze ama me no do, munuma wo wɔ Egya, Ɔba, nye Sunsum Krɔnkrɔn dzin mu. Amen.”¹

Ber a ifii nsu no mu puei no, nna agye ɔfrɛ kor so dɛ ebɔsom. Dɛ eyɛ Nyame n’ahyɛmu babaa fofor no, ibɔɔ anohoba na igyee dwumadzi wɔ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo mu, a nna woesi wo pi dɛ asɔrba. Enye Nyame dzii ahyɛmu dɛ ebɛfa Jesus Christ ne dzin ato wo do, na esie Ne mbrasɛm, na asom No.

Obiara a odzi ahyɛmu yinom no, ɔsom no a Ewuradze frɛ no ho no bɛyɛ dza ɔsɛ fata dɛm nyimpa no pɛpɛɛpɛr. Naaso, Nyame n’ahyɛmu mbabaa na mbabanyin nyina kyɛ ɔfrɛ tsitsir a ɔyɛ enyigye kor. Ɔno nye dɛ wɔbɔsom binom ama No.

Ɔrekasa kyerɛ nkyerɛbaa no, President Russell M. Nelson twaa Ewuradze ne frɛ a Ɔdze ama hom dɛ hom mbɛkã N’edwuma ho no tsia, nwanwa mu. President Nelson kyerɛɛ hom frɛ no mu wɔ kwan yi do:“Ewuradze ase dɛ, ‘M’edwuma na m’enyimnyam [nye] dɛ medze nyimpa ne bɛkyebo na onnyiewiei nkwa bɔbɔ adze.’ (Moses 1:39.) Ntsi Ne babaa-osuanyi nokwafo botum akã no nokwar mu ara dɛ, ‘M’edwuma na m’enyimnyam nye dɛ mobɔboa m’adɔfo ma ndaamba wɔakɔ dɛm ɔsor fie no.

“Ebɔboa nyimpa bi ma obenya no ɔsorsor hyɛbea no kã ɔbaa ne frɛ krɔnkrɔn no ho. Dɛ ɔyɛ enã, ɔkyerɛkyerɛnyi, anaa Ɔhotseweenyi a ɔnyɛn binom no, ɔwen dɛtse tseasefo ma wɔfa n’enyidado su no. Ɔnye Nyame ridzi dwuma no, ne frɛ krɔnkrɔn nye dɛ ɔbɔboa esunsum na akra ma woenya nkwagye ntowdo. Iyi nye ne mbɔe ho botae. Ɔyɛ enyimnyamhyɛ, ɔma ntowdo, na ɔkrɔn.”²

Hom nnkotum ehu ber no, anaa ne tsentsen, a hom ankorankor ɔfrɛ no betsim wɔ som mu tse dɛ ɔfrɛ dɛ enã, baanodzinyi, anaa akyerɛbaa a ɔrosom. Ewuradze, osiandɛ ɔdɔ hɛn ntsi, Onngyaa hɛn ma yɛnnsan mu nnyi ber no, ne tsentsen, anaa dwumadzi horow no ho nhyehyɛɛ no. Naaso yenyim fi kyerɛwsɛm na nkɔnhyɛfo atseasefo hɔ dɛ dwumadzi horow iyinom nyina no bɛba, Nyame ne babaa biara do, sɛ abrabɔ yi mu o anaa ma ɔreba no mu o. Na ne nyina yɛ onnyiewiei nkwa a yɛnye ebusua ebusua adɔfo benya ho ahosiesie—”akyɛdze a ɔsõ kyɛn Nyame n’akyɛdze nyina.”³

Hom bɛyɛ enyansafo dɛ hom dze hom mbɔdzembɔ biara betsim ahosiesie do aber yi mu a, ewiei enyadze no da hom adwen do. Wɔama dɛm edwuma no ayɛ mberɛw osiandɛ dwumadzi yinom hia ahosiesie kor noara.

Yɛmfa dwumadzi dɛ ebɛyɛ akyerɛbaa a erosom . Sɛ ewɔ dwumadzi dɛ mfe-10 [du] babaa wɔ ebusua a egya no efi mu o, anaa dɛ Relief Society Presidency wɔ kurow a ndaansa yi gya tɔɔ mu a, anaa ewɔ asopitsi a wɔyɛɛ wo ɔperɛhian mbrɛana eretse apɔw o—ewɔ kwan dɛ ehyɛ wo frɛ a Ewuradze dze afrɛ wo dɛ N’akyerɛbaa a ɔrosom no mã.

Iyinom yɛ dɛ erosom ho dwumadzi a nsonsonee kɛse da ntamu. Naaso ne nyina hia dɛ wosiesie ɔdɔ akoma a tum wɔ mu, gyedzi a onnhihim dɛ Ewuradze mmfa mbrasɛm biara mma, gyedɛ oesiesie kwan, na pɛ a wɔdze bɔkɔ na wɔakɛyɛ ama No.⁴

Osiandɛ ɔayɛ ahosiesie no ntsi, mfe-10 babaa no dze n’abasa fua ne nã ɔayɛ okunafo no na ɔbɔɔ mpaa dze ehu mbrɛ obesi bɔboa n’ebusua no. Na ɔyɛ ne nyina.

Nna Relief Society president no ayɛ ahosiesie ansaana gya rotɔ n’apaamu hɔ. Oebohu nkorɔfo no yie na oenya dɔ ama hɔn. Ne gyedzi wɔ Jesus Christ mu enyin mfe rugu mu no, fi som kumabaa horow ho mpaabɔ a oebisa Ewuradze hɔ mboa ma oenya ho nyiano. Osian n’ahosiesie a ɔakɔ do akyɛr ntsi, nna ɔayɛ krado na ɔwɔ ɔpɛ kɛse dɛ ɔbɛhyehyɛ ne nkyerɛbaa no ma wɔasom nkorɔfo na ebusua ebusua a wɔwɔ ahohia mu.

Akyerɛbaa ɔretse apɔw wɔ asopitsi n’operehian ekyir no ayɛ ahosiesie dɛ ɔbɔsom ne mfɛfo ayarfo no. Ɔahwer n’abrabɔ nyina dze asom ama Ewuradze, dze ama ɔhɔho biara tse dɛ mbrɛ ɔyɛ fipamfo anaa nyɛnko. Ber a ɔtsee wɔ n’akoma mu ɔfrɛ no dɛ ɔnsom wɔ asopitsi hɔ no, ɔdze akokodur na ɔdɔ kɛse soom binom a ɔmaa ayarfo nkaa no nna hɔn yamu a nkyɛ ɔrenntse apɔw ntsɛm.

Kwan kor noara a edze yɛ ahosiesie dze som no, ibotum na otwar dɛ eyɛ ahosiesie ma wo ɔfrɛ dɛ ebɛyɛ baanodzinyi ama Ewuradze , ber a ɔfrɛ no bɛba no. Obehia gyedzi wɔ Jesus Christ mu, a otsim wɔ wo dɔ mapã ma kyerɛwsɛm no do, ama edze eedzi nkorɔfo baano na aakyerɛkyerɛ hɔn N’asɛm a nnkosuro. Nkyii ebɛyɛ krado dɛ ebenya Sunsum Krɔnkrɔn no ma Ɔayɛ wo daa daa nyɛnko. Ebɛkã no ɔpɛ mu ara dɛ “Mebɛyɛ,” ber a wo ɔpamfo a ɔwɔ Young Women presidency, dze hu wɔ ne ndze mu bɛkã dɛ “Akyerɛbaa Alvarez yar ndɛ. Woana bɛkyerɛ n’adzesũafo kuw no?

Ɔgye dɛm ahosiesie kor noara wɔ nda nwanwa no a Ewuradze bɛfrɛ wo ama wo dwumadzi dɛ enã. Mbom ɔno behia ɔdɔ akoma kyɛn dza ehiaa no nkaano no. Ɔbɛgye gyedzi wɔ Jesus Christ mu a ɔtra dza ɔahyɛ w’akoma mu pɛn no. Na ɔbɛgye ahom a edze bɔbɔ mpaa enya Sunsum Krɔnkrɔn no ne nhyɛdo, kwankyerɛ, na awerɛkyekyer a ɔtra dza atse nkã pɛn dɛ obotum aba no.

Bia ibebisa nokwar mu ara mbrɛ banyin, a ɔmmfa ho ne mfe oedzi, botum ehu dza enãnom hia. Ɔyɛ asɛmbisa a ɔtsen. Mbanyin nnkotum ehu biribiara, naaso yedua nyikyerɛ ofi Nyame hɔ dze sũa adzesuadze binom. Na yebotum so esũa adze pii ber a yɛrehwɛ adze, ber a yefa kwan hwehwɛ Sunsum no ma Ɔboa hɛn ma yɛtse dza yɛahwɛ no ase.

Maahwɛ Kathleen Johnson Erying mfe 57 [eduonum esuon] yi a yɛawar yi. Ɔyɛ mbanyimba baanan na mbaa beenu hɔn nã. Besi ndɛ, ɔagye ɔfrɛ dɛ ɔyɛ enã baatan ma ebusua mba akɔntsen bɔbor ɔha na ɔha pii so wɔ hɔn a ɔdze ne enã akoma no apaa hɔn abayɛn.

Hom kaa President Nelson dza ɔkãa no pɛɛpɛr faa mbaa hɔn dwuma krɔnkrɔn ho—a enã baatanyɛ dwuma kã ho: Dɛ ɔyɛ enã, ɔkyerɛkyerɛnyi, anaa Ɔhotseweenyi a ɔnyɛn binom no, ɔwen dɛtse tseasefo ma wɔfa n’enyidado su no. Ɔnye Nyame ridzi dwuma no, ne frɛ krɔnkrɔn nye dɛ ɔbɔboa esunsum na akra ma woenya nkwagye ntowdo. Iyi nye ne mbɔe ho botae.⁵

Dɛ mbrɛ mutum hu mo hokãfo yie no, Kathleen, edzi dɛm ahyɛdze a, hɛn Egya dze ama ne mbabaa no do. Ɔyɛ me dɛ asɛntsitsir no nye nkasafua no “ɔnye Nyame dzi dwuma… ɔwen dɛtse tseasefo ma wɔfa n’enyidado su no.” Ɔannhyɛ hɔn. Ɔween hɔn. Nna ɔwɔ dza ɔhwɛ do dze yɛ n’enyidado a ɔbɔɔ mbɔdzen dɛ ɔbɔwen hɔn a ɔdɔ hɔn a ɔyɛ hɔn baatan no. Dza ɔhwɛ do no nye Jesus Christ asɛmpa no—dɛ ma mpaabɔ mu ara mutumii hunii mfe pii mu no.

Wɔreyɛ ahyɛmu mbaa a wɔnye Nyame dzi dwuma no nye mbrɛ Nyame ne mbabaa ekunyin a wɔtsen edua do ayɛ baatan, woedzi kan, na wɔasom, a wɔsom wɔ kwan na bea biara a Oesiesie ama hɔn. Mobɔ wo anohoba dɛ ibenya enyigye wɔ wo ɔsor fie akwantu no mu ber a esan kɔ Ne nkyɛn dɛ Nyame babaa a oesie ahyɛmudzi.

Megye dase dɛ Nyame Egya no tse ase na Ɔdɔ wo. Obobua wo mpaabɔ. Biribiara mu no, No Dɔba na Odzi baano wɔ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no. President Russell M. Nelsonn nye No nkɔnhyɛnyi tseasefo. Na Joseph Smith hunii na ɔnye Nyame Egya no na Jesus Christ kasae wɔ ndua kwãa mu wɔ Palmyra, New York. Minyim dɛ ɔyɛ nokwar. Megye dase so dɛ Jesus Christ nye w’Agyenkwa; Ɔdɔ wo. Na ɔnam No Werdambɔ no do, woho botum atsew na woepegya wo akɔ ɔfrɛ krɔnkrɔn abɔso a ɔbɛba wo do. Megye ho dase wɔ Jesus Christ ne dzin krɔnkrɔn no mu, amen.