Yɛmfa Hɛn Mbeamudua
Yɛrefa hɛn mbeamudua ahorow na yɛreka Agyenkwa no do n’asekyerɛ nye dɛ yɛdze gyedzi rokɔdo wɔ Ewuradze n’anamɔn kwan no do na yɛremmfa hɛn ho nhyehyɛ wiadze su mu.
Enuanom na nkyerɛbaa adɔfo yeenya nkyerɛkyerɛ nwanwa efi hɛn baanodzifo hɔ nda ebien yinom mu. Megye dase kyerɛ hom dɛ sɛ yɛper dze nkenyan nkyerɛkyerɛ yinom a yehia no wɔ hɛn abrabɔ mu ndɛ bɔ bra a, Ewuradze, nam N’adom do, bɔboa hɛn mu kor biara ma wɔasoa ne mbeamudua na ɔama hɛn adzesoa ayɛ har.1
Ber a nna ɔwɔ Caesarea Philippi apaamu no, Agyenkwa no daa amandze a Obohu wɔ elderfo, asɔfompanyin, na akyerɛwfo nsaaano wɔ Jerusalem no edzi kyerɛɛ N’esuafo. Tsitsir ara Ɔkyerɛkyerɛɛ hɔn No wu na Ne enyimnyam Wusoɛr ho asɛm.2 Dɛm mber no mu no, nna N’esuafo no nntse No somdwuma krɔnkrɔn wɔ asaase do no ase koraakoraa. Ber a Peter noara, tsee dza Agyenkwa akã no, suoo No mu kɔr nkyɛn na Otwuuw n’enyim, see dɛ, “Wɔmma ɔmpar wo, Ewuradze: iyi remmba wo do.’’3
Ɔbɔboa N’esuafo ma ɔaatse ase dɛ Ɔdze noho rema na amandzehu ka No som edwuma ho no, Agyenkwa no tsii mu paa mu kãa dɛ:
“Sɛ obi pɛ dɛ odzi m’ekyir a, ma ɔmpa noho, na ompegya ne mbeamudua na ɔnkã mo do.
“Na obiara a ɔpɛ dɛ ɔgye no nkwa no, ɔbɛyew no: na obiara a emi ntsi ɔbɛyew no nkwa no, obohu.
“Na sɛ nyimpa nya wiadze nyina, ma ntsi ɔhwer no nkwa a, ebɛn mfaso na obenya? anaa ebɛnadze na nyimpa bɛma dze asesa no nkwa?’’4
Ɔnam mpaa mu kã yi do no, Agyenkwa no tsii mu dɛ hɔn nyina a wɔpɛ dɛ wodzi N’ekyir no hia dɛ wɔpa hɔnho na wɔhyɛ hɔn apɛdze, akɔndɔ, na akɔndɔdze do, a wɔdze biribiara robɔ afɔr, mpo sɛ ohia nkwa ankasa, a wɔdze hɔnho nyinara rema Egya ne pɛ—dɛmara dɛ Ɔyɛe no.5 Nokwar, iyi yɛ bo a wotua dze ma ɔkra no nkwagye. Jesus dze enyidaho na ntotoho mu ara dze mbeamudua yɛɛ asɛnkyerɛdze dze boa N’esuafo ma wɔatse dza afɔrbɔ na som dze ma Ewuradze n’edwuma n’asekyerɛ bɛyɛ ara yie. Nna N’esuafo na Roman Aheman manmufo nyim mbeamudua honyi no ara yie osiandɛ Romefo hyɛɛ nkorɔfo a wɔbɔbɔ hɔn mbeamudua no ma hɔnara wɔsoaa hɔn mbeamudua anaa mbeamudua mpuna no wɔ bagua mu dze kɔr bea a woboku hɔn no.6
Agyenkwa no Wusoɛr ekyir nko na wobuei esuafo no hɔn adwen mu ma wɔtsee dza wɔakyerɛw no wɔ No ho nyina ase7 na dza wobehia efi hɔn hɔ ofi dɛm mber no.8
Kwan noara mu no no, hɛn nyina, enuanom na nkyerɛbaa, yehia dɛ yebuei hɛn adwen na hɛn akoma mu ama yɛatse hia a ohia dɛ yɛrefa hɛn mbeamudua ahorow ato hɛnho do no na yɛreka No do ase yie. Yɛnam kyerɛwsɛm no do sũa dɛ hɔn a wɔpɛ dɛ wɔfa hɔn mbeamudua to hɔnho do no dɔ Jesus Christ wɔ kwan bi mu a wɔpa hɔnho fi dza ɔnnyɛ nyamesu na wiadze akɔndɔ bɔn biara ho na wosie Ne mbrasɛm.9
Hɛn adwen a yesi no pi dɛ yɛnnkɛyɛ biribiara a ɔnye Nyankopɔn ne pɛ bɔ ebira na dza wɔbɛserɛ hɛn nyinara a yɛdze bɔbɔ afɔr na yeedzi Ne nkyerɛkyerɛ do no bɔboa hɛn ma yeetsim wɔ Jesus Christ n’asɛmpa anamɔn kwan no do—mpo ber a yerenya atseetsee, hɛn akra mu mberɛwyɛ, anaa nkitahodzi mu nhyɛ na wiadze mu enyansasɛm a wokotsĩa Ne nkyerɛkyerɛ.
Mfatoho, hɔn a wonnyae nnya onnyiewiei hokanyi na wɔtse ankonamyɛ na abagura nkã, anaa hɔn a woegyaa awar na wɔtse nkã dɛ enyi nnyi hɔn do na wɔnnkaa hɔn no, mema hom awerɛhyɛmu dɛ wɔregye Agyenkwa ne ɔfrɛ do dɛ homara hom bɛfa hom mbeamudua ahorow na wɔaka No do asekyerɛ nye dɛ wɔdze gyedzi rokɔdo wɔ Ewuradze n’anamɔn kwan no do, hom bɔkɔdo edzi homho nyi, na hom nnkɛfa homho aforafora wiadze suban mu a ewiei no wobeyi hom enyidado wɔ Nyankopɔn no dɔ na ehumbɔbɔr mu efi hɔ.
Fapem kor noara fa hɔn a worinya banyin na banyin anaa basia na basia nkitahodzi akɔndɔ na wɔtse abagura na onnyibi nkã wɔ hɔnho. Ebia hom mu bi bɔdwen dɛ Jesus Christ n’asɛmpa no nnyi hɔ mma hom bio. Sɛ dɛm na ɔtse a, mepɛ dɛ mema hom awerɛhyɛmu dɛ enyidado wɔ Nyame Egya na N’enyigye ho nhyehyɛɛ no mu, wɔ Jesus Christ na No werdam afɔrbɔ no mu, na hom dze Hɔn ɔdɔ mbrasɛm robɔ bra no mu, daa. Ne nyansaa, nye tum, nye pɛrpɛrdzi, nye ehumbɔbɔr a odzi mu yie mu no, Ewuradze bɔsɔw hom ano ama Noho, ama wɔdze hom aaba N’enyim na hom eenya daapem nkwagye, sɛ hom gyina pintsinn na hom nnhihim wɔ hom risie mbrasɛm no10 na hom yɛ ndwuma pa daa a.11
Hom a hom ayɛ bɔn a ɔyɛ dzen no, hom regye ɔfrɛ kor yi ara do asekyerɛ dɛ, dza ɔka ho no, hom bɛbrɛ homho adze wɔ Nyankopɔn enyim, wɔnye Asɔr baanodzifo a wɔfata no afa apam, na hom enu homho na wɔpow hom bɔn. Kwan yi so behyira hɔn nyinara a wɔroko tsĩa ɔsɛɛ nkowaa, a nhataw bɔn, ndurbɔn, nsãhyew, na ehuhu mfonyin kã ho. Hom anamɔntu yinom dze hom bɛba Agyenkwa no hɔ, ɔno a ewiei no obotum agye hom efi afɔdzi, awerɛhow, na sunsum na honandua mu ndɔnkɔyɛ mu. Dza ɔka ho no, hom botum so enya pɛ dze ahwehwɛ mboa efi hom anyɛnkofo, ebusuafo, eduryɛfo a wodzi mu na hɔn a wɔawea wɔ afotu mu.
Sɛ hom dzi nkogu toatoado a, meserɛ mma hom mmpa aba na hom nhu homho dɛ hom botum egyaa bɔn yɛ na hom edzi ɔsɛɛ nkowaa do nyim. Obomuo koraa ama hom dɛ hom begyae mbɔdzen bɔ na ekyir no hom akɔdo wɔ mberɛwyɛ na bɔn mu! Hom mper nyɛ dza oye koraa daa, a ɔnam hom ndwuma do wɔda pɛ edzi dɛ hom bɛtsew kuraba no mu, dɛ mbrɛ Agyenkwa no kyerɛkyerɛe.12 Ɔtɔfabi a tafɛrbanyinmbɔmu ahorow bi ne nyiano ba wɔ abosoom mbɔdzembɔ pii ekyir no. Anohoba a yehu no wɔ Mormon Nwoma mu dɛ “dza yebotum ayɛ nyinara ekyir no, wɔnam adom do na wɔbɛgye hɛn nkwa,’’13 fa gyinabew horow yinom ho. Meserɛ hom nkaa dɛ Agyenkwa n’adom akyɛdze no “nnhyɛdaa nnyi mber mu mma ‘ekyir’ dza yebotum ayɛ nyinara. Yebotum enya N’adom no ansaana, ber no mu, na ber n’ekyir a hɛnara hɛn mbɔdzenbɔ asa.’’14
Megye dase dɛ ber a yɛkɔdo per dze dzi hɛn ɔhaw do konyim no, Nyankopɔn dze gyedzi a yebenya ayarsã na anwanwadze ndwuma ho akyɛdze horow behyira hɛn.15 Ɔbɛyɛ dza yenntum nnyɛ mma hɛnho no dze ama hɛn.
Medze ka ho dɛ, hɔn a ayawdzi, ebufuw, biribi atow hɔn fintsindua, anaa wonntum nnyɛ nsiesie wɔ biribi a ɔnnsɛ mmfata hɔn no, dɛ fa wo mbeamudua na ka Agyenkwa no do n’asekyerɛ dɛ per fa nkã-tse yinom gu nkyɛn na dan kɔ Ewuradze hɔ ama Ɔaagye hɛn efi adwen ne tsebea yi mu na ɔaboa hɛn ma yeenya asomdwee. Awerɛhow mu ara, sɛ yenntum nnyɛ gyaa mu ma ɔnka wɔ iyinom ho a, yebohu dɛ yɛtse a Ewuradze no Sunsum nnya nhyɛdo biara wɔ hɛn abrabɔ mu. Yennkotum ayɛ nnuhu ama binom, mbom yebotum dze bɔn akyɛ hɔn—ber a yɛpow dɛ yɛbɔdwen hɔn a wɔafom hɛn hɔn ho.16
Kyerɛwsɛm no kyerɛkyerɛ dɛ kwan bi da hɔ puei fi gyinabew yinom mu—ber a yɛrefrɛ Agyenkwa no dɛ ɔmboa hɛn ma yɛmfa akoma fofor nhyɛ hɛn ɔbo akoma no ananmu.17 Iyi besi no, yehia dɛ yɛdze hɛn mbrɛwyɛ horow ba Ewuradze enyim, yɛbrɛ hɛnho adze wɔ N’enyim18 na yɛserɛ No mboa na bɔnfakyɛ,19 tsitsir ara wɔ mber krɔnkrɔn mu a yedzi sacrament no Kwesida biara. Hom mma yɛnhwehwɛ No bɔnfakyɛ na No mboa na yenntu anamɔn a ohia na ɔyɛ dzen ber a yɛdze hɔn a wɔafom hɛn no hɔn mfom bɛkyɛ hɔn ama hɛn epira kur no ahyɛase dɛ ɔresã. Mobɔ hom anohoba dɛ yɛreyɛ dɛm no, hom bɛtse mboa a ofi Ewuradze ahotɔ mu ba ne nkã.
Ber a nna ɔda Liberty Efiadze wɔ 1839 mu no, Nkɔnhyɛnyi Joseph Smith kyerɛɛw nwoma kɛmaa Asɔrmba no a nna nkɔnhyɛ a ɔfa gyinabew horow dodow yinom nyina ho wɔ mu no. Ɔkyerɛɛw dɛ, “Ahengua na ahenman, mpanyindzi na etum nyina wɔbɛda no edzi ama hɔn a wogyinaa akokodur mu dze maa Jesus Christ n’asɛmpa no.20 Dɛm ntsi, mo nuanom na nkyerɛbaa, hɔn a wɔfa Agyenkwa ne dzin to hɔn do, na wɔwɔ awerɛhyɛmu wɔ N’anohoba mu na wotsim kodu ewiei no, wɔbɛgye hɔn nkwa21 na wɔnye Nyankopɔn aakɛtsena enyigye a onnyi ewiei tsebea no mu.22
Hɛn nyina yehyia nkodzen horow wɔ hɛn abrabɔ mu a ɔma yedzi awerɛhow, yɛnntum nnyɛ hwee, yennyi enyidado, na ɔtɔfabi a yɛyɛ mberɛw. Nkã-tse yinom bi gya hɛn ma yebisa Ewuradze asɛm dɛ, “Ebɛnadze ntsi na merefa gyinabew yinom mu?’’ anaa “Ebɛnadze ntsi na me nsa nnka m’enyidoadze yi? Osiandɛ, mereyɛ biribiara a mubotum dze asoa me mbeamudua na maaka Agyenkwa no do!’’
M’anyɛnkofo adɔfo, otwar dɛ yɛkaa dɛ yɛreyɛ ahobrɛadze na yerenya awerɛhyɛmu wɔ Nyankopɔn mu na Ne nyansaa a ɔmmbɔadze da mu no ka yɛrefa hɛn mbeamudua ato hɛnho do no ho. Otwar dɛ yɛgye to mu dɛ Onyim hɛn mu kor biara na hɛn ehiadze. Ɔsan so hia dɛ yɛgye nokwar no to mu dɛ Ewuradze ne mber nnye hɛn dze nnsɛ. Ɔtɔfabi a yɛhwehwɛ nhyira bi na yɛhyɛ mber ma Ewuradze. Yennkotum dze mbataho ato hɛn nokwardzi ho ama No ber a yɛdze hɛn nyiano mber ma hɛn apɛdze horow hyɛ No do. Sɛ yɛyɛ iyi a, nna yɛasɛ tsetse mber Nephifo ekyingyefo no a, wosii hɔn enuanom na nkyerɛbaa atwetwe ber a wɔkã no dɛm aber no dɛ mber no apa ho dɛ nsɛm a Samuel Lamanyi no kãe no bɛba mu, a ɔdze basabasayɛ baa agyedzifo no mu.23 Yehia dɛ yɛdze hɛn werɛ hyɛ Ewuradze mu yie na yɛyɛ komm na yehu dɛ Ɔyɛ Nyame, dɛ Onyim biribiara, na dɛ Onyim hɛn mu kor biara.24
Ɔnnkyɛree na menya kwan dze som akyerɛbaa kunafo bi a ne dzin dze Franca Calamassi, a nna oruhu amandze wɔ honam mu mberɛwyɛ yarba mu. Nna Akyerɛbaa Calamassi nye n’ebusua mu ba a odzii kan bɔdɔm Jesus Christ N’Asɔr nsanananmu no ho. Ɔwɔ mu dɛ woennuma no kun dabiarada dze, ɔpeen do dɛ obehyia asɛmpasomafo no na nna ɔtaa kɔ Asɔr nhyiamu horow. Gyinabew horow yinom nyina ekyir no, Akyerɛbaa Calamassi yɛ nokwafo na ɔtsetsee ne mba baanan wɔ Jesus Christ n’asɛmpa no mu. Afe kor ekyir no a kun wui no, Akyerɛbaa Calamassi na ne mba kɔr temple na wɔkɛyɛɛ ayɛdze krɔnkrɔn horow na wɔbɔmu sɔɔw hɔn ano dɛ ebusua. Anohoba a ɔka ayɛdze horow yinom ho no brɛɛ no enyidado, dɛwdzi, na enyigye mbordo a ɔboa no ma ɔkɔrdo wɔ abrabɔ mu.
Ber a yarba no n’asɛnkyerɛdze a odzi kan hyɛɛ ase dɛ orupuei no, ne bishop maa no nhyira. Dɛm aber no ɔkãa kyerɛɛ ne bishop dɛ ɔayɛ krado dɛ ɔbɛgye Ewuradze ne pɛ ato mu, ɔkyerɛɛ ne gyedzi dɛ obenya ayarsa dɛmara na ne gyedzi a ɔdze bɔsɔw ne yarba no dze akɔ ewiei.
Me nsera ber mu no, mber a nna medze Akyerɛbaa Calamassi ne nsa mu na morohwɛ n’enyiwa mu no, muhun abɔfo hyerɛn wɔ n’enyim—ɔkyerɛɛ n’awerɛhyɛmu wɔ Nyankopɔn ne nhyehyɛɛ mu na n’enyidado a ɔhyerɛn na odzi mu wɔ Egya no dɔ na nhyehyɛɛ ma no no mu.25 Metsee ne nkitsesi nkã dɛ obetsim wɔ ne gyedzi mu kɛpem ewiei no ber a ɔafa ne mbeamudua, a ɔhaw a nna orinya no mpo mmfa ho. Akyerɛbaa yi n’abrabɔ yɛ Christ ho dasegye, ne gyedzi na no som ma No.
Nuambanyin na nkyerɛbaa, megye dase kyerɛ hom dɛ yɛrefa hɛn mbeamudua ato hɛn do na yɛreka Agyenkwa no do hia dɛ yedzi No fasusu do na yɛper bɛyɛ tse dɛ Ɔno,26 abotar mu ara yɛgye abrabɔ mu gyinabew horow to mu, yɛpa na yɛpow honammunyi n’akɔndɔdze, na yɛtweɔn Ewuradze. Ndwomkyerɛwfo no kyerɛɛw dɛ:
“Tweɔn Ewuradze: hyɛ woho dzen, na ma w’akoma nnya akokodur: nyew, tweɔn Ewuradze.’’27
“Ɔno no ɔyɛ hɛn boafo na hɛn kyɛm.’’28
Megye dase kyerɛ hom dɛ ber a yetsiatsia hɛn Wura n’anamɔn mu na yɛrotweɔn Ɔno a ɔyɛ hɛn abrabɔ mu ɔyarsafo koraa no bɛma hɛn akra ahomgye na ɔaayɛ hɛn adzesoadze mberɛw na haahar.29 Ndzɛmba yinom ho na megye me dase wɔ Jesus Christ ne dzin mu, amen.