Tum dze Edzi Abɔnsam No Do Konyim
Yebesi dɛn benya asomdwee, yɛakaa hɛn nyimpa ban, na yeedzi abɔnsam ne Edwindze ahorow ebiasa no do konyim?
Enuanom na nkyerɛbaa, yɛda hom ase wɔ dza hom yɛ nyina dze bɛyɛ, na hom boa binom so ma wɔbɛyɛ Jesus Christ akadofo nokwafo, na wonya enyigye wɔ temple krɔnkrɔn ho nhyira mu. Yɛda hom ase wɔ hom papayɛ ho. Hom yɛ anwanwafo; hom ho ayɛ fɛfɛɛfɛw.
Ɔyɛ me mpaabɔ dɛ yebohu Sunsum Krɔnkrɔn ne pisi nhyɛdo ber a yɛba bɛtse ase yie ara dɛ yɛyɛ Nyankopɔn ne mba. “Ebusua No: Dawurbɔ ma Wiadze” kã dɛ: “Nyimpa nyinara —mbanyin na mbaa—wɔabɔ hɔn wɔ Nyame no su do. Kor biara yɛ sor awofo hɔn sunsum dɔba banyin anaa dɔba ɔbaa, na dɛm ntsi, kor biara wɔ awosu na hyɛbea krɔnkrɔn.’’1 Yɛyɛ “esunsum a wɔasan mu eyi hɔn a woesiesie hɔn esie dɛ wɔbɛba wɔ ne mberano mu ebosuo mu ma wɔaatow dwuma a wobedzi wɔ da kɛse a odzi ekyir mu ne fapem.’’2 President Russell M. Nelson paa mu kãa dɛ: “Wɔkyerɛkyerɛɛ hom wɔ sunsum wiadze dze siesie hom ma adzebiara na biribiara a hom behyia wɔ nda a odzi ekyir yi mu (hwɛ N&A 138:56). Dza wɔdze kyerɛkyerɛɛ hom no aka hom mu!’’3
Hom yɛ Nyankopɔn ne mbabanyin nye ne mbabaa mpamufo. Hom wɔ tum a hom dze bedzi abɔnsam no do. Naaso, abɔnsam, nyim hom nyimpa ban. Onyim hom egyapadze krɔnkrɔn na ɔhwehwɛ dɛ obotwa hom asaase na ɔsor gyinabew a hom botum enya do ber a ɔdze Edwindze ahorow ebiasa dzi dwuma.
-
Ndaadaa
-
Ndanenyi
-
Abagura
Ndaadaa
Abɔnsam dze ndaadaa edwindadze dzii dwuma wɔ Moses n’aber do. Ewuradze paa mu kãa kyerɛ Moses dɛ:
“Hwɛ, eyɛ me babanyin;
“Na mowɔ edwuma ma wo, … na ɔwo eyɛ nyia mo Woo no Kortoo no ne saso.’’4
Mber tsiabaa wɔ enyimnyam enyido-adzehu yi ekyir no, Satan peer dɛ ɔbɛdaadaa Moses. Nsɛmfua a ɔkãe no yɛ ahobow: “Moses, nyimpa ba, som me.’’5 Ndaadaa no nnyi ɔfrɛ no nko mu dɛ ɔnsom Satan, mbom nna san so wɔ kwan a ɔdze kãa Moses ho asɛm dɛ ɔyɛ nyimpa ba no mu. Kaa dɛ, nna Ewuradze akã akyerɛ Moses hɔnara dɛ ɔyɛ Nyame ne ba, a ɔbɔɔ no wɔ nyia a Ɔwoo no Kortonoo no ne saso do.
Abɔnsam ammpa aba wɔ n’aperdzi mu dɛ ɔbɛdaadaa Moses, mbom Moses poow no, rese dɛ, “Fi me nkyɛn fi, Satan, osiandɛ Nyame kor yi nko na mobɔsom no, nyia ɔyɛ enyimnyam Nyame.’’6 Moses kaa ne nyimpa ban a ɔyɛ—Nyame na ba.
Ewuradze ne nsɛm a ɔdze ma Moses no ɔkɔ ma emi na ɔwo. Nyame bɔɔ hɛn wɔ ɔnoara no su do na Ɔwɔ edwuma ma hɛn dɛ yɛyɛ. Abɔnsam per daadaa ber a ɔma hɛn werɛfir nyimpa ban a nokwar ara yɛyɛ. Sɛ yɛanntse hɛn nyimpa ban a yɛyɛ ase a nna ɔbɛyɛ dzen dɛ yebohu ma yebotum abɛyɛ.
Ndanenyi
Abɔnsam per dan hɛn enyi fi Christ ho na N’ahymudze kwan no do. Elder Ronald A. Rasband kãa asɛm a odzi do no: “Abɔnsam ne nhyehyɛɛ nye dɛ ɔdan hɛn enyi fi sunsum mu adasefo ho, ber a Ewuradze ne pɛ nye dɛ ɔma hɛn nyimdzee na ɔdze hɛn ka N’edwuma ho.”7
Hɛn nda mu no, ndan enyi beberee wɔ hɔ a, Twitter, Facebook, virtual reality agodze, na beberee koraa ka ho. Mfirdwuma kankɔ yinom yɛ nwanwa, mbom sɛ yɛannyɛ ahwɛyie a, wobotum adan hɛn enyi efi hɛn ndaamba krɔnkrɔn ne mãhyɛ ho. Yɛdze reyɛ adze papa no botum dze ɔsor tum aba na ɔama hɛn kwan ma yeehu anwanwadze ber a yɛhwehwɛ boa lsrael a wɔapetse hɔn ano wɔ ntwamutam n’afã ebien no.
Hom mma yɛnyɛ ahwɛyie na yɛannyɛ bi na biara wɔ mfirdwuma a yɛdze dzi dwuma ho.8 Hom nkɔdo nhwehwɛ akwan a mfirdwuma botum atwe hɛn abɛn Agyenkwa no na ɔaama hɛn kwan ma yeewie N’edwuma ber a yɛyɛ Ne Mbae a Otsĩa ebien ho ahosiesie.
Abagura
Odzi ewie no, abɔnsam pɛ hɛn abagura. Sɛ yɛdze hɛnho toto binom ho anaa yehu dɛ hɛnara hɛn abrabɔ nnhyɛ mã a, hɛn abaw bogura.
Mehyɛ m’adzesua kankɔ nhyehyɛɛ ase no m’abaw gurae. Nhyehyɛɛ no gyee adzesũafo anan pɛr dɛm afe no, na nna adzesũafo nkaafo no nyim adze papaapa. Wotwaa hɔn nsɔhwɛ no na nna wɔwɔ edwuma mu mpanyimfo dzibew sũahu. na wɔkyerɛɛ awerɛhyɛmu wɔ hɔn ahom horow mu. Me adapɛn ebien a odzi kan ekyir wɔ nhyehyɛɛ no mu no, abagura na ekyingye ho atse-nkã nyaa nsunsuando wɔ modo, a nkyɛ ɔrehyɛ modo koraa.
Misii gyinae dɛ sɛ mobowie mfe anan nhyehyɛɛ no a, ɔwɔ dɛ mowie Mormon Nwoma n’akenkan semester biara. Ber a mekenkan no dabiara no, muhun Agyenkwa no ne mpaamu kã dɛ Sunsum Krɔnkrɔn no bɛkyerɛkyerɛ me ndzɛmba nyina na ɔbɛma makaa ndzɛmba nyina.9 Osii me nyimpa ban a meyɛ dɛ Nyame ne ba do, kaa medɛ mma memmfa moho ntoto binom ho, na ɔmaa me awerɛhyɛmu wɔ m’asɛdze krɔnkrɔn mu dɛ mebedzi nkonyim.10
M’anyɛnkofo adɔfo, meserɛ mma hom mma obi nnwia homm enyigye. Mma mmfa woho nntoto binom ho. Meserɛ hom nkaa Agyenkwa n’ahomka nsɛm: “Asomdwee na medze gya hom, mara m’asomdwee na medze mema hom: nnyε dε mbrε wiadze mã, na mema hom. Mma hom akoma nntutu, eso mma ɔmmbɔ hu.”11
Ntsi yesi dɛn yɛ? Yebesi dɛn benya asomdwee yi, yɛakaa hɛn nyimpa ban a yɛyɛ, na yeedzi abɔnsam ne Edwindze ahorow ebiasa no do konyim?
Odzi kan, hom nkaa dɛ mbrasɛm a odzi kan na ɔsõ nye yɛdze hɛn akoma, ahom, adwen, na ahoɔdzen bɔdɔ Nyankopɔn.12 Hɛn dɔ a yɛwɔ ma Ɔno na Ne Ba na ɔwɔ dɛ okenyan dza yɛyɛ nyina. Ber a yenya dɔ ma Hɔn no, ber a yerisie Hɔn mbrasɛm no, hɛn ahom dɛ yɛdɔ hɛnho na yɛdɔ binom so benyin. Yɛbɛhyɛ ase asom ebusua, anyɛnkofo, na fipamfo osiandɛ yebohu hɔn dɛ mbrɛ Agyenkwa no hu hɔn—dɛ Nyankopɔn ne mbabanyin na ne mbabaa.13
Otsia ebien, hom mbɔ mpaa mma Egya no wɔ Jesus Christ ne dzin mu dabiara, dabiara, dabiara.14 Ɔnam mpaabɔ do na yetum tse Nyame no dɔ nkã na yɛkyerɛ hɛn dɔ dze ma No. Ɔnam mpaabɔ do yɛkyerɛ ndaase na yɛserɛ ahoɔdzen na akokodur a yɛdze hɛn pɛ bɛma Nyankopɔn ne dze na yeenya akwankyerɛ na kwankyerɛ wɔ adze nyina mu.
Mehyɛ hom nkuran dɛ hom “mfa hom akoma mu ahoɔdzen nyina “mbɔ mpaa mma Egya no, ama ɔdze dɛm ɔdɔ yi aahyɛ hom mã, … ama hom aabɛyɛ Nyankopɔn ne mba [na mbabaa]; ama ber a obopue no, yɛabɛyɛ dɛ Ɔno.’’15
Otsĩa ebiasa, kenkan na sua Mormon Nwoma no dabiara, dabiara, dabiara.16 Sɛ medze asɛmbisa bi to m’adwen do dze kenkan a mo Mormon Nwoma adzesũa no kɔ yie. Ber a yɛdze asɛmbisa ka ho kenkan no, yebotum enya nyikyerɛ na yeehu dɛ Nkɔnhyɛnyi Joseph Smith kãa nokwar no mber a ɔpaa mu kã dɛ, “Mormon Nwoma no dzi mu kyɛn nwoma biara a ɔwɔ asaase do, … na banyin [anaa ɔbaa] a obedzi no mu nsɛm do no ɔbɛbɛn Nyankopɔn kyɛn dɛ obedzi nwoma biara no mu nsɛm do.”17 Jesus Christ ne nsɛm wɔ Mormon Nwoma no mu na ɔboa hɛn ma yɛkaa hɛn nyimpa ban.
Odzi ewiei, mpaabɔ mu ara dzi sacrament no dapɛn biara, dapɛn biara, dapɛn biara. Ɔnam ahyɛmudzi na asɔfodzi ayɛdze horow do, a sacrament no kã ho, na nyamesu da edzi wɔ hɛn abrabɔ mu.18 Elder David A. Bednar kyerɛkyerɛɛ dɛ: “Sacrament ayɛdze no yɛ ɔfrɛ krɔnkrɔn a wosi do dɛ yennu hɛn ho nokwar mu na yɛnyɛ fofor wɔ sunsum mu. Yeridzi sacrament ne nyɛe, noara nnyi bɔn mmfi hɔ. Naaso ber a yɛdze enyidahɔ siesie hɛn ho na yɛdze akoma a abobɔ na sunsum a abotow dze yɛ ayɛdze krɔnkrɔn no, nna anohoba no nye dɛ aber nyina yebenya Ewuradze no Sunsum ma ɔnye hɛn atsena.’’19
Ber a ahobrɛadze mu ara yedzi sacrament no yɛkaa Jesus N’amandzehu wɔ dɛm ture krɔnkrɔn no a wɔfrɛ no Gethsemane na N’afɔrbɔ wɔ mbeamudua no do. Yɛkyerɛ ndaase dze ma Egya no dɛ ɔsoma Ne Ba Kortonoo no, hɛn Pomfo, na yɛkyerɛ hɛn pɛ a yɛdze bedzi Ne mbrasɛm do na yɛakaa No aber nyina.20 Sunsum mu nyimdzee bi na ntseasee bata sacrament no ho—ɔyɛ ankorankor, tum wɔ mu, na yehia.
M’anyɛnkofo, mobɔ anohoba dɛ ber a yɛper dze hɛn akoma nyina dɔ Nyankopɔn, yɛbɔ mpaa wɔ Jesus Christ ne dzin mu, yesũa Mormon Nwoma no, na mpaabɔ mu ara yedzi sacrament no, yebenya ahom, a Ewuradze n’ahoɔdzen ka ho, dze edzi abɔnsam ne ndaadaa nyɛe no do konyim, dze ehuan enyidan horow a otwa hɛn ndaamba krɔnkrɔn no do, na yenntsĩa abagura no a ɔyew hɛn ahoɔdzen dɛ yɛbɛtse hɛn Ɔsor Egya na Ne Ba hɔn dɔ ne nkã no. Yɛbɛtse ase yie ara mu hɛn nyimpa ban a yɛyɛ dɛ Nyankopɔn ne mbambanyin na mbabaa.
Enuanom na nkyerɛbaa, menye hom kyɛ mo dɔ na mepaa mu kã me dase dɛ minyim dɛ Ɔsor Egya tse ase na Jesus nye Christ no. Modɔ Hɔn. Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no nye Nyankopɔn N’ahenman wɔ asaase do. Yɛwɔ ahyɛdze krɔnkrɔn dɛ yɛbɔboaboa Israel ano na yesiesie asaase no ma Messiah ne Mbae a Otsĩa ebien no. Jesus Christ ne dzin mu, amen.