Yeridzi Ne Dzin Nyi.

Ber a awofo enyigye mu ara wɔtweɔn hɔn ba n’awoo no, wɔwɔ asodzi dɛ woyi dzin a wɔdze bɛma hɔn abɔdomaba fofor no. Ebia aber a wɔwoo wo no, inyaa dzin fofor bi a wɔdze atoto ebusuasantsen wɔ w’ebusua no mu. Anaa ebia wɔtoo wo dzin a nna ɔayɛ atsenkã wɔ afe no anaa apaamu hɔ a wɔwoo wo no.

Nkɔnhyɛnyi Helaman na ne yer dze edzin a wɔsombo totoo hɔn mbambanyin mbɔdomamba Nephi na Lehi. Helaman kãa kyerɛɛ ne mbambanyin ekyir no dɛ:

“Medze hɛn awofo a wodzi kan no a wofi edzin ama hom … ama sɛ hom kaa hom edzin a hom aakaa hɔn; na sɛ hom kaa hɔn a hom akaa hɔn ndwuma; … a hom ehu dza wɔkãe, na wɔkyerɛwee so too hɔ dɛ woye.’’

“Dɛm ntsi, me mbambanyin, mebɛpɛ dɛ hom bɛyɛ dza oye.’’¹

Nephi na Lehi nom hɔn edzin no boaa hɔn ma wɔkãa hɔn ewuakɔrfo hɔn ndwuma pa na ɔhyɛɛ hɔn nkuran dɛ hɔn so wɔnyɛ papa dɛmara.

Nkyerɛbaa, bea a yɛtsetse, kasa a yɛkã, anaa sɛ yeedzi mfe 8 anaa 108 [awɔtwe anaa ɔha awɔtwe] o, mmfa ho, hɛn nyina yekitsa dzin soronko bi a ɔwɔ botae horow yinom dɛmara.

“Na [hɛn] mu dodow a woenuma hɔn akɔ Christ mu no wɔahyɛ Christ … na [hɛn] nyina ayɛ kor wɔ Christ Jesus mu.’’²

Dɛ yɛyɛ Jesus Christ N’asɔr a ɔwɔ hɔ Nda a Odzi Ekyir Ahotseweefo mba no, “yɛnam enuma ayɛdze do dzii kan bɔɔ anohoba dɛ yɛpɛ dɛ yɛfa Christ ne dzin to hɛn do.’’³ Ɔnam ahyɛmudzi yi do no, yɛbɔɔ anohoba dɛ yɛbɛkaa No aber nyina, yeesie Ne mbrasɛm, na yɛasom binom so. Yɛyɛ hɛn pɛ dɛ yebedzi ahyɛmu yi do fofor Kwesida biara mber a yedzi sacrament no na yedzi ehurusi bio wɔ nhyira no mu dɛ “{yɛre] nanatsew nkwa fofor mu.’’⁴

Dzin a wɔdze maa hɛn awober no kyerɛ hɛn ankorankor ahyɛnsew na ɔma hɛn ebusuabɔ wɔ hɛn ebusua ebusua mu. Naaso, mber a wonumaa hɛn dze “woo hɛn bio’’ no, hɛn ntseasee wɔ nyimpa ban a yɛyɛ mu tserɛwee. “Osian ahyɛmu a hom edzi yi ntsi wɔbɛfrɛ hom Christ ne mba, … na hwɛ, … ndɛ da yi wɔawo hom wɔ sunsum mu; na hom kã dɛ hom akoma enya nsakyer ɔnam dɛ woenya gyedzi wɔ ne dzin mu ntsi; dɛm ntsi, ɔawo hom.’’⁵

Dɛm ntsi, yɛdze ahyɛnsew na ebusuabɔ no, wɔdze Jesus Christ dzin frɛ hɛn. Na “dzin biara [nnyi] hɔ a wɔdze ama anaa kwan biara nnyi hɔ a wobodua do ama nkwagye aba adasamba do, gyedɛ ɔnam Christ, Ewuradze Tumfo nkotoo ne dzin mu.’’⁶

Jesus ne dzin no nna wonyim mber tsetsen koraa ana N’awooe. Ɔhen Benjamin dze, sor ɔbɔfo hyɛɛ nkɔm dɛ, “Na wɔbɛfrɛ no Jesus Christ, Nyame ne Ba, … na wɔbɛfrɛ ne nã Mary.’’⁷ No “ɔdɔ ɔpon’’ ho edwuma no⁸ woyii kyerɛɛ Nyankopɔn ne mba mber biara a asɛmpa no baa asaase no do so, ofi Adam na Eve hɔn aber do dze besi hɛn nda do, ama woeetum ehu “fibea kor a ɔsɛ dɛ wɔkɔ kɔhwehwɛ hɔn bɔnfakyɛ.’’⁹

Mfe da no, President Russell M. Nelson dze nkɔnhyɛsɛm ntotɔserɛ maa nkyerɛbaa dɛ “wonya nhyɛdo wɔ ndaamba do ber a wɔroboa ma wɔaboa Israel a wɔapetse hɔn no ano.’’ Ɔserɛɛ hɛn dɛ yɛnkenkan Mormon Nwoma na “yɛnyɛ ahyɛnsew wɔ nyiyimu biara a ɔkã Agyenkwa no ho asɛm anaa ɔkyerɛ no.’’ Ɔserɛɛ dɛ “yɛngye enyim nkã Christ ho asɛm, ndzi dɛw wɔ Christ mu, na yɛnye [hɛn] ebusua ebusua na anyɛnkofo mbɔ Christ ho dawur.’’ Ebia hom ahyɛ ase ruhu n’anohoba n’aba dɛ “hom nye hɔn bɔtwe abɛn Agyenkwa no … Na nsesã, anwanwadze mpo, bɛhyɛ ase aba.’’¹⁰

Hɛn anohoba dɛ yɛbɛkaa Agyenkwa no aber nyina ma hɛn ahoɔdzen ma yegyina dze ma nokwar na tseneneeyɛ—sɛ yɛwɔ dɔm mu o anaa mbeambea a hɔ yɛ kɔɔn, a obiara nnyim hɛn ndzeyɛɛ gyedɛ Nyankopɔn. Sɔ yɛkaa Ɔno nye Ne dzin a ɔda hɛn do no a, nna onnyi dɛ yɛma ntotoho eyimtsiabu anaa atsɛmbu a ɔnnyɛ ntowdo kwan. Hɛn enyiwa tsim Agyenkwa no do no, yɛtse hɛn nyimpa ban a yɛyɛ ase ankasa—Nyankopɔn ne ba a ɔsombo.

Yɛrekaa hɛn ahyɛmudzi no ma wiadze haw da dzinn, ɔdan ekyingye yɛ akokodur, na ɔma enyidado wɔ nsɔhwɛ ber mu.

Na sɛ yɛyɛ mfomdo wɔ hɛn kankɔ mu wɔ ahyɛmudzi anamɔn kwan no do a, dza yɛwɔ yɛ nye dɛ yɛkaa Ne dzin na N’ayamuyie dɔ ma hɛn “Osiandɛ ɔwɔ tum nyina, nye nyansa nyina, na adze nyina mu ntseasee; onyim adze nyina, na ɔyɛ Mbɔbɔrhunyi, … ma hɔn a wonu hɔnho na wɔgye ne dzin dzi no.’’¹¹ Nokwar mu ara, dzin biara nnyi hɔ a odua yɛ dɛw kyɛn Jesus ne dzin ma hɔn nyina a, wɔdze akoma a abobɔ na sunsum a abotow, hwehwɛ dze “yɛ papa na wɔyɛ apapfo.’’¹²

President Nelson kyerɛkyerɛɛ dɛ: “Mber no apa ho dɛ ibotum ayɛ Christianyi dzinn a wobo bɔtɔ wo yamu. Wo nyamesom nnyɛ dɛ erokɔ Asɔr Kwesida ara. Ɔyɛ erokɔ dɛ osũanyi nokwarfo fi Kwesida anapa dze kesi Memenda anafua mu nyina. Adze biara nnnyi hɔ tse dɛ Ewuradze Jesus Christ ne osuanyi mu “ɔfã.’’¹³

Hɛn pɛ yɛdze Christ ne dzin bɔto hɛn do no nnyɛ nkitahodzi nsɛm a yɛkã ara. Ɔnnyɛ akɔtrɔbɔdwe anaa abɔtsir mu anohoba. Ɔnnyɛ amandze bi a ɔsen anaa dzin ahyɛnsew a yɛbɔ. Ɔnnyɛ asɛnkã bi a yɛdze to pon do anaa yɛdze san banho ara. Ne dzen yɛ dzin a “yɛhyɛ,’’¹⁴ wɔkyerɛɛw no wɔ hɛn akoma mu, na “woetsintsim wɔ [hɛn] enyim.’’¹⁵

Ɔwɔ dɛ yedua hɛn adwendwen ,ndzeyɛɛ, na yɛnye binom nkitahodzi do kaa Agyenkwa no werdam afɔrbɔ no aber nyina. Nnyɛ dɛ Ɔkaa hɛn edzin, nko mbom Ɔkaa hɛn aber nyina. Agyenkwa no paa mu kãa dɛ:

“Aso ɔbaa no werɛ befir no numfoanoba ara ma onnkenya ayamuhyehye no wɔ ba a ofi n’awotoa mu no ho? Nyew, annyɛ a woyinom hɔn werɛ befir, na emidze mo werɛ nnkefir wo da, O Israel fifo.

“Hwɛ, mekrukye wo wɔ me nsayamu.’’¹⁶

President George Albert Smith kyerɛkyerɛɛ dɛ, “Hom ndzi edzin a ɔdeda hom do no nyi, osiandɛ da bi hom benya adom na ahyɛdze dɛ hom bɔbɔ … hom Egya a ɔwɔ sor amandzeɛɛ … wɔ dza wɔdze edzin [nom] ayɛ ho.’’¹⁷

Tse dɛ Nephi na Lehi hɔn edzin a ahwɛyie muara woyii no, ana wobotum akyerɛw no wɔ hɛn ho dɛ yɛyɛ Ewuradze Jesus Christ no nokwar esuafo a? Ana yedzi Jesus Christ ne dzin nyi dɛ ɔpɛ muara yɛdze ato hɛn do a? Ana yɛyɛ “asomfo na dasefo’’¹⁸ wɔ Ne ayamuyie ɔdɔ na No ɔpon tum ebien no ho?

Ɔnnkyɛree, na nna meretsie Mormon Nwoma no. Tsir a odzi ewiei wɔ 2 Nephi mu no, metsee dɛ Nephi rekã biribi a mennkenkan no a meedzi ayɛ no dɛm kwan noara mu no dabiarada. Ne nkyerɛwee nyina mu no, ɔkyerɛkyerɛ na ɔgye “Pomfo,’’ no Israel Krɔnkrɔnnyi,’’ no “Nyankopɔn Eguambaa,’’ no na “Messiah’’ no ho dase. Mbom ber a owiei ne nsɛm no, metsee no a ɔrekã nsɛm yinom dɛ: “Mehyɛ moho enyimnyam wɔ pefeeyɛ mu; mehyɛ moho enyimnyam wɔ nokwardzi mu; mehyɛ moho enyimnyam wɔ me Jesus, mu,osiandɛ ɔapon me kra efi hɛl.’’¹⁹ Mber a metsee nsɛm yinom nono, me kra dzii ehurusi na nna ɔwɔ dɛ metsie no mpɛn pii. Muhunii na megyee nyiyimu no do dɛmara dɛ muhu mara me dzin na megye do.

Ewuradze akã dɛ “Nyew, nhyira akã nkorɔfo a wɔagye ato mu dɛ wɔbɛgye me dzin; na wɔdze me dzin bɛfrɛ hɔn; na wɔayɛ me dze.’’²⁰

Dɛ yɛyɛ Jesus Christ N’asɔr a ɔwɔ hɔ Nda a Odzi Ekyir Ahotseweefo mba no, hom mma “enyigye muara [yɛmmfa] Christ ne dzin nto hɛn do’’²¹ ber a yɛdze ɔdɔ, som na ndwumapa ridzi Ne dzin nyi. Megye dase dɛ Ɔno nye “Nyankopɔn Eguambaa, nyew, Onnyiewiei Egya ne Ba no mpo.’’²² Ne ba Krɔnkrɔn, Jesus Christ ne dzin mu, amen.