Asɛm no, Ɔno, na Dɔm no
Hɛn da no mu ndwom na dede nyina ekyir no nkyɛ yɛaper ahwehwɛ Christ wɔ hɛn abrabɔ, hɛn gyedzi, na hɛn som ne fapem.
Enuanom na nkyerɛbaa, iyi yɛ Sammy Ho Ching, oenya abosoom esuon, ɔrohwɛ ndaansa yi Ebɔbira wiadze mfɛndzanan ehyiadzi wɔ ne fie.
Ber durii dɛ wɔbɛma President Russell Nelson na Wiadze Mfɛndzanan Etumdzifo Etsitsir nkaa no tsipia no, nna Sammy ne nsa dze no bɔdambɔ mu. Ntsi ɔyɛɛ dza odzi do a obotum ayɛ.
Sammy ma asekyerɛ fofor koraa wɔ anan ambatow ho.
Mema hom akwaaba ba Jesus Christ N’Asɔr a ɔwɔ hɔ ma Nda a Odzi Ekyir Ahotseweefo n’afrenhyia mprɛnu wiadze mfɛndzanan ehyiadzi. Mefa dza osii a wɔakyerɛw no Luke Ahyɛmu Fofor nwoma no mu, dze hyɛ mpɛnsampɛnsamu wɔ hɛn afe mpɛn ebien ehyiadzi yi n’asekyerɛ ase:1
“Na ɔbaa dɛ, [Jesus] ɔbɛɛn Jericho no, onyifurafo bi tse kwan kyɛn reserɛserɛ adze:
“… na ɔtsee nyimpadodow rutwa mu no, obisaa dɛ iyi ase nye dɛn.
“… Na wɔkãa kyerɛɛ no dɛ Jesus Nazarethnyi na ɔresen no.
Na ɔkaa mu see dɛ, Jesus, [Ɔwo] David Ba, hu me mbɔbɔr.”
Ɔkã dɛ, n’akokodur yɛɛ hɔn nwanwa no, dɔm no bɔɔ mbɔdzen dɛ wɔbra no ma ɔyɛ dzinn no, na ɔnodze mbom “ɔtsẽaa mu pii.” Ɔnam dɛ ɔwɔw do ntsi, wɔdze no baa Jesus nkyɛn a ɔtsee ne gyedzi mu ntotɔserɛɛ dɛ ɔnsan nhu adze na Ɔsaa no yarba.2
Asɛm pefee tsiabaa yi tɔ mo do ber biara a mekenkan. Yetum tse banyin no n’atsetsee. Yetum mpo tse dɛ ɔretsẽatsẽa mu dze enya Agyenkwa no N’aso. Ɔyɛ hɛn enyigye dɛ ɔammpen ma wɔannhyɛ no ma ɔannyɛ komm—mbom, omiaa noho maa ne ndze do ber a obiara rekã dɛ ɔmbra ne ndze adze. Iyi ara mpo yɛ asɛm dɛw dɛ ogyinaa pintsinn wɔ gyedzi mu. Mbom tse dɛ kyerɛwsɛm biara no, yɛrekenkan no, nna yehu pii wɔ mu.
Adwen a okenyaan me ndaansa yi ara nye banyin yi n’adwen pa dɛ onyaa nkorɔfo a wɔwɔ sunsum mu nhumu bɔɔ noho aporow. Asɛntsitsir a ɔwɔ asɛm yi mu no gyina nkorɔfo kumabaa a yennyim hɔn edzin, ber a hɔn fɛfo bisaa dɛ, “Dede yi ase nye dɛn?” a wonyaa nyansa, sɛ ihu a, wɔdze kyerɛɛ dɛ Christ nye dede n’asekyerɛ; Ɔno nye “Asekyerɛ Nyimpa mu.” Adzesuadze wɔ nkɔmbɔdzi tsiabaa yi mu ma hɛn nyina. Dza ɔfa gyedzi na dza yɛgye to mu no, ɔboa dɛ yɛdze hɛn nhwehwɛmu bɛdan hɔn a wɔwɔ no bi ankasa! “Ana onyifurafo botum akyerɛ onyifurafo kwan? Jesus bisaa ber bi. “[Sɛ ɔtse dɛm a,] hɔn beenu nyina nnkɔtɔ amona mu anaa?”3
Gyedzi na dza yɛgye to mu a ɔtse dɛm no hwehwɛ nye hɛn botae wɔ ehyiadzi horow yi mu, na hom abɛkã hɛn ho ndɛ yi, hom bohu dɛ dodow no nyina hɔn ahwehwɛdze nye no. Hwɛ woho aporow. Daadze ha no hom hu ebusua ebusua a hɔn dodow gu ahorow a wofi mbea nyina. Anyɛnkofo adadaw fua hɔnho enyigye mu, adwontokuw nwanwa no reyɛ krado, nkasahofo kekamu fi hɔn egyinae wɔ bea a wɔpɛ. Asɛmpasomafo a wɔasom ewie dada no hwehwɛ hɔn adamfofo, ber a asɛmpasomafo a ndaansa yi ara wɔsanee bae no rohwehwɛ adamfo afofor koraa (sɛ hom tse me ase a!). Na mfonyin ɛ! Gyedɛ ɔsor boa hɛn! Cell phone kitsa nsa biara mu no, yɛasesã “asɔrba biara yɛ asɛmpasomafo” ayɛ no “asɔrba biara yɛ mfonyintwanyi.” Enyigye dede yi nyina mu no, obi botum ebisa nokwar ara dɛ, “Iyi nyina n’ase nye bɛn?”
Tse dɛ ma ɔwɔ hɛn Ahyɛmu Fofor asɛm no mu no, hɔn a woehyira hɔn enyiwa no bohu dɛ, ne nyina ekyir dza ehyiadzi ntɔyɛɛ wɔ ma hɛn no, gyedɛ yeehu Jesus wɔ ne nyina ne fapem mu, ɔno ntseasee biara anaa kumabaa bi na ɔbɔ wɔ mu. Ama yeenya enyido-adzehu a yɛrohwehwɛ no, ayarsã a Ɔabɔ ho anohoba, n’adze tsitsir a yenyim dɛ ɔwɔ ha no, otwar dɛ yetwa dua dede no mu—ɔyɛ enyigye dɛnara mpo a—na yɛdze hɛn aso etsim No do. Ɔsɛnkafo biara ne mpaabɔ, adwontofo hɔn enyidado, hɔhɔ biara no bu—wɔbɔ mu dze to nsa frɛ Ɔno a N’Asɔr nye yi no Sunsum—Christ ɔtseasefo no, Nyame Eguambaa, Asomdwee Hen no.
Mbom onnhia dɛ ibɔwɔ ehyiadzi asoɛe bi ana ehu No. Sɛ abofra kenkan Mormon Nwoma no ahyɛse no na n’enyi gye Abinadi n’akokodur ho anaa mberantsɛ nkakraba 2,000 [mpem ebien] a wɔnantsewee no a, ibotum edze akã ho bɔkɔɔ dɛ nna Jesus wɔ hɔ na Ɔno nye nwoma nwanwa yi ne fapem, ogyina dɛ ɔkatakyi wɔ ne krataafa biara do na ɔkyerɛ hɛn agyefo nkaa no a wɔwɔ mu no.
Dɛmara, sɛ nyɛnko bi rusũa afa hɛn gyedzi ho a, ndzɛmba soronko bi anaa nsɛm a yɛkã fa hɛn som ho ndzeyɛɛ a onnyim no bɔbor no do—dza wonndzi na wɔnnom, ahodan guadzi, edzikamfo akwantu, kɔmputa do ebusuasantsen, nye stake center ahorow a binom hɔn enyi daa dɛ wɔrebɛma hɔn edziba akɔndɔ bi. Ntsi, ber a hɛn anyɛnkofo afofor no hu na wɔtse ndzɛmba asorɔtow yi, otwar dɛ yɛtra dza ɔrokɔ do na yɛma wotsim wɔ ne nyina ne nkyerɛase do, wɔ dza ɔyɛ onnyiewiei asɛmpa n’akoma a ɔtow no—Ɔsor Awofo hɔn dɔ, Ɔba krɔnkrɔn no ɔpon akyɛdze no, Sunsum Krɔnkrɔn awerɛkyekye kwankyerɛ, ndɛ nda yi nokwar yinom, na pii so nyina ho nsan-ananmu na pii so.
Sɛ obi kɔ temple krɔnkrɔn ne mpɛn a odzi kan a, dɛm sũahu no botum ayɛ no ahobow kɛse noara. Hɛn edwuma nye dɛ yɛbɛyɛ ahwɛyie dɛ nsɛnkyerɛdze krɔnkrɔn na guado adzeyɛɛ a woeyi akyerɛ, ayɛdze ho atarhyɛ no na dza woyi kyerɛɛ no, nndan enyi mmfi No do, na mbom ɔkyerɛ no Agyenkwa no, Ɔno na yɛaba robɔsom no. Temple no yɛ Ne fi, na ɔsɛ dɛ Ɔda hɛn adwen na akoma do tsitsir ara—Christ enyimnyam nkyerɛkyerɛ hɛnhɛn hɛn nyimpadua nyina mu tse dɛ ma ɔhɛnhɛn temple ayɛdze no—fi ber a yɛkenkan dza wɔakyerɛw wɔ abotsen no kodu mber ewiei a yɛbɔhwer wɔ dan no mu. Dza ɔyɛ nwanwa nyina a yehu no, ɔwɔ dɛ ne nyina ekyir no, yehu Jesus N’asekyerɛ wɔ temple mu.
Hom nsusu dwumadzi pii a ɔyɛ ndam na nkaabɔ afofor wɔ Asɔr no mu a ndaansa abosoom yi mu wɔaba. Ber a yɛsom hɛnho nkorkor, anaa yɛsakyer hɛn Ahomgyeda ne nsiei, anaa yefua nhyehyɛɛ fofor ma mbofra na mbabun no, yɛbɛyew nsakyeree a woeyi akyerɛ no siantsir ankasa no, sɛ yehu no dɛ wɔyɛ ndzɛmba nkorkor a wonnhia, kyɛn dɛ ɔyɛ nkabɔmu mbɔdzembɔ a ɔboa hɛn ma yɛtow wɔ Nkwagye Botan no do yie.4 Ampaara, ampara, iyi nye dza President Russell M. Nelson pɛ dɛ yɛdze Asɔr no ne dzin a woey i akyerɛ dzi dwuma.5 Sɛ Jesus—Ne dzin, Ne nkyerɛkyerɛ, Ne fasusu, Ne nyamesu—tum hyɛ hɛn som ne fapem do a, yɛrebɛhyɛ nokwar kɛse a Alma kyerɛkyerɛɛ no mpɛn bi no dzen :“Ndzɛmba pii bɛba; na hwɛ, adze kor na noho hia kyɛn ne nyinara—na hwɛ, mber no nnyi ekyir koraa, na Ɔpomfo tseasefo no bɛba abɛtsena no nkorɔfo mu.”6
Adwen kor a medze wiei, Joseph Smith ne mfe ɔha a otsĩa 19 [duakron] ahɔho tsenabea no nna Christianfo agyedzifo dɔm a woresi empire regyam wɔ hɔ.7 Mbom nna begyabegyayɛ a nkenyan asɔfo yinom dze bɔbɔɔ adze no, resiw Agyenkwa no a akɔkowaba Joseph hwehwɛɛ no enyiberdo do no. Ɔnye dza ɔfrɛɛ no “sum nye adwensɛɛ,” no redzi esi no,8 ɔtwee noho kɔr ndua kwaa a hɔ yɛ dzinn, bea a ohunii na ɔtsee Agyenkwa no n’enyimnyam na ne fapem ma asɛmpa no kyɛn biribiara yɛakã no ha anapa yi. Onyaa akyɛdze a oennsusu na ɔanndwen ho no, Joseph hun wɔ enyido-adzehu mu, Ɔsor Egya, wiadze mu Nyame kokroko no, na Jesus Christ, No Dɔba Kortonoo no a Odzi mu no. Nkyii Egya no kyerɛɛ fasusu a yɛrekamfo no anapa yi: Ɔtseen Ne nsa wɔ Jesus do, rese dɛ: “Iyi nye Modɔba. Tsie No!”9 Worunntum nkã Jesus No krɔnkrɔn su, Ne kandzifo wɔ nkwagye ho nhyehyɛɛ mu, na Ne gyinabew wɔ Nyame enyim ma ɔmmbor dɛm nsɛmfua enum mpaamukã yi.
Dede na basabasayɛ? Dɔm na wentwiwentwi? Iyinom nyina mu pii wɔ hɛn wiadze yi mu. Nokwar, ekyingyefo na nokwafo kɔ do gye enyido-adzehu yi ho kyim na dza yɛakã ho asɛm nyina ndɛ yi. Sɛ bia ereper ehu no yie na ahwehwɛ ntseasee wɔ adwenkyerɛ dodow a ɔnnsaa mu a, mebɛkyerɛ wo dɛm Jesus Ɔnoara na megye ɔsomafo dase wɔ Joseph Smith no sũahu ho, a ɔbaa mfe 1,800 [apem ɔhawɔtwe] fitsi ber a hɛn nyɛnko onyifurafo no hun adze wɔ tsetse Jericho kwan no do. Megye dase dɛ nsɛm ebien yi na pii binom so a wɔakɔ do wɔ mber a abɛsen no na ampara dɛ dza yebohu na yɛbɛtse a ɔbɛyɛ enyigye mapã nye dɛ Orunntwa mu ara nko10 mbom Ne mbaa ba hɛn nkyɛn, Origyina hɛn nkyɛn na Ɔnye hɛn rebɛtsena.11
Nkyerɛbaa na enuanom, ɔnam hɛn da no mu ndwom na dede nyina ekyir no nkyɛ yɛaper ahwehwɛ Christ wɔ hɛn abrabɔ, hɛn gyedzi, na hɛn som ne fapem mu. Hɔ na nokwar asekyerɛ no da. Na sɛ nda no bi mu yennhu adze yie a, anaa hɛn awerɛhyɛmu apa, anaa wɔrosɔ hɛn gyedzi ahwɛ na wɔasɔn do a—dɛ ma ampara wɔbɛyɛ no—nkyii yɛntsẽa mu kɛse, “Jesus, Ɔwo David ba, hu me mbɔbɔr.”12 Medze ɔsomafo enyimia na nkɔnhyɛ gyedzi bɔ hom anohoba dɛ Ɔbɛtsie hom na ɔbɛkã, ntsɛmara anaa ekyir no dɛ, “Hu adze: wo gyedzi agye wo nkwa.”13 Akwaaba ba wiadze mfɛndzanan ehyiadzi. Jesus Christ ne dzin mu, amen.