Sunsum mu Egudzi
Na hom dze gyedzi wɔ Ewuradze na N’asɔfodzi tum mu no ridzi dwuma no, hom tum a hom dze twe sunsum mu egudzi yi a Ewuradze ama nsa botum akã, no bɛyɛ kɛse.
Yɛda hom ase wɔ dɛm ndwom dɛɛdɛw no ho. Ber a hɛn nyina soɛree gyinae tow ndwom no, “O Nyame, Yɛda Wo Ase, wɔ Nkɔnhyɛnyi a,” adwen ebien bi bɛhyɛɛ mo do. Kor fa Nkɔnhyɛnyi Joseph Smith ho, mberano nkɔnhyɛnyi no. Mo do na m’enyisɔ ma no no nyin da biara rutwa mu no. Adwen ebien no baa ber a mohwɛɛ mo hokafo, me mbabaa, nananom, na nansum mbabaa no. Metsee dɛ memfa hom mu kor biara nkã m’ebusua ho.
Abosoom pii abɛsen no, temple endowment nhyiamu bi baa ewiei no, mesee me yer, Wendy dɛ, “Mowɔ enyidado dɛ nkyerɛbaa no bɛtse sunsum mu egudzi a ɔyɛ hɔn dze wɔ temple mu no ase.” Nkyerɛbaa, m’adwen taa bɛda hom do, a bosoom ebien yi a ɔabɛsen no, ber a emi na Wendy yɛkɛseraa Harmony, Pennsylvania no kã ho.
Iyi yɛ hɛn mpɛn ebien akwantu a yɛdze akɔ hɔ. Mpɛn ebien nyina no ber a yɛnam asaase krɔnkrɔn no do nna woekitsa hɛn dodow. Bea a ɔbɛn Harmony hɔ na John Onumanyi no puei Joseph Smith do na ɔdze Aaron Asɔfodzi no saan ananmu bae.
Hɔ na Ɔsomafo Peter, James, na John puei na wɔdze Melchizedek Asɔfodzi no saan ananmu bae.
Harmony hɔ na Emma Smith soom dɛ no kun no ɔkyerɛwfo a odzi kan ber a Nkɔnhyɛnyi no rekyerɛ Mormon Nwoma no ase no.
Harmony hɔ so na Joseph nyaa nyikyerɛ a ɔdaa Ewuradze ne pɛ kyerɛɛ Emma. Ewuradze kyerɛkyerɛ Emma dɛ osiansian kyerɛwsɛm no mu, ontu Asɔr no fo, ɔngye Sunsum Krɔnkrɔn, na ɔmfa ne mber “[n]sũa pii.” Wotuu Emma fo so dɛ “ɔmfa wiadze ndzɛmba nto nkyɛn na ɔnhwehwɛ ndzɛmba a ofir bea pa,” na onsuo ahyɛmu a ɔnye Nyame edzi no mu dzen. Ewuradze dze nokwar nsɛm yinom wiei Ne nkyerɛkyerɛ no: “Iyi yɛ me ndze a ɔwɔ hɔ ma obiara.”1
Biribiara a osii wɔ apaamu ha yi no wɔ nsunsuando kɛsɛ wɔ hom abrabɔ mu. Asɔfodzi Nsan-ananmu, nye Ewuradze n’afotu ma Emma no, botum ama hom mu kor biara akwankyerɛ na woehyira hom abrabɔ. Me yamu annkyɛ hom nyina atse ase dɛ asɔfodzi nsan-ananmu no ho hia wo dɛ eyɛ ɔbaa tse dɛ ma ohia banyin biara so no. Osiandɛ Melchizedek Asɔfodzi wɔdze asan ananamu aba no ntsi, mbaa a wosie ahyɛmudzi na mbanyin nyina wɔ kwan wɔ “asɔr no no sunsum mu nhyira “nyina,” ho2 anaa, yɛbɛkã no dɛ, sunsum mu egudzi nyina a Ewuradze wɔ ma ne mba no.
Ɔbaa biara na barimba biara a ɔnye Nyame dzi ahyɛmu na osie dɛm ahyɛmudzi no, na ɔdze no hyɛ asɔfodzi ayɛdze emudzi mu no, wɔ kwan tɔɔtsen kɔ Nyankopɔn no tum no ho. Hɔn a wɔadom hɔn akyɛdze wɔ Ewuradze fie no, enya Nyame N’asɔfodzi tum akyɛdze ɔnam hɔn ahyɛmudzi do, nye nyimdzee akyɛdze wɔ mbrɛ wobesi bɔtwe dɛm tum no.
Woebuei ɔsor mu ama mbaa a wɔama hɔn Nyame no tum akyɛdze a ɔpem fi hɔn asɔfodzi ayɛdze mu tse dɛ ma ɔyɛ ma mbarimba a wokitsa asɔfodzi no. Mobɔ mpaa dɛ hom bɛtse nokwar no ase wɔ hom mu kor biara n’akoma mu osiandɛ megye dzi dɛ ɔbɛsesã hom abrabɔ. Nkyerɛbaa, hom wɔ kwan dɛ hom twe Ewuradze no tum dze boa hom ebusua na binom a hom dɔ hɔn no mpɛn dodow a hom pɛ.
Afei, bia ebɛse woho dɛ. “Iyi yɛ ahomkã, mbom mensi dɛn nyɛ? Mibesi dɛn atwe Ewuradze no tum aba m’abrabɔ mu?”
Irunnhu kwan yi dɛ wɔakyerɛw no wɔ nkyerɛkyerɛ buukuu biara mu. Sunsum Krɔnkrɔn no bɛyɛ hom ankorankor kyerɛkyerɛnyi, ber a hom per hwehwɛ dɛ wɔbɛtse dza Ewuradze pɛ dɛ hom hu na hom yɛ no ase. Kwan yi nnyɛ ntsɛm anaa mberɛw, mbom ɔyɛ sunsum mu enyikadze. Ebɛnadze na ɔbɛyɛ enyigye akyen enye Sunsum no bedzi dwuma dze atse Nyankopɔn no tum no—asɔfodzi tum no ase?
Dza mubotum akã akyerɛ hom nye dɛ nsa rekã Nyame no tum no hia ndzɛmba kor noara a Ewuradze dze kyerɛkyerɛɛ Emma na hom mu kor biara dɛ ɔyɛ no.
Ntsi, moto nsa afrɛ hom dɛ mpaabɔ mu ara hom nsũa Nkyerɛkyerɛ na Ahyɛmudzi, ɔfa 25 na hom bohu dza Sunsum Krɔnkrɔn no bɛkyerɛkyerɛ hom. Hom ankorankor, sunsum mu mbɔdzembɔ no dze enyigye bɛbrɛ hom ber a hom nya ntseasee, na hom dze tum no a wɔdze adom hɔn no yɛ edwuma.
Mbɔdzembɔ yi ne fã behia dɛ hom dze wiadze ndzɛmba pii ato nkyɛn. Ɔtɔfabi a, yɛkasa ara fa yerifi wiadze na ne aperperdzi, nsɔhwɛ a wɔatahye, na ator adwenkyerɛ ho. Mbom nokwar ara hom reyɛ dɛm no behia dɛ hom taa hwehwɛ hom abrabɔ mu yie. Hom reyɛ dɛm no, Sunsum Krɔnkrɔn no bekenyan hom afa dza ho nnhia bio, dza ɔmmfata hom mber na hom ahom bio.
Sɛ yɛtwe hɛn enyi fi wiadze enyidan ndzɛmba horow ho a, ndzɛmba binom a ɔyɛ dɛ sesei ho wɔ hia dodow no rennhia wo pii. Obehia dɛ ebɛse oho ama ndzɛmba binom, kansa wɔyɛ dɛ wɔnnyɛ haw biara mpo a. Ber a ihyɛ ase na isɔw do abrabɔ yi ber nyina mu, a edze wo bra ama Ewuradze no, wo nhumu bɛsesã, w’atsenkã, na sunsum mu ahoɔdzen bɛyɛ wo nwanwa!
Afei kɔkɔbɔ nsɛm tsiabaa. Binom bɔwɔ hɔ a wɔbɛbrɛ wo tum a edze frɛ Nyame no tum no adze. Binom bɛma agye w’akyɛdze ho kyim na wo sunsum mu ahoɔdze kɛse dɛ ɔbaa tseneneenyi no, wɔatoto no ase.
Nokwar ara, abɔnsam mmpɛ dɛ etse ase, ahyɛmu a iyɛɛ no w’enuma no anaa endowment nyimdzee na tum akyɛdze a egyee anaa erebɛgye no wɔ temple—Ewuradze fie no. Na Satan mmpɛ koraa dɛ hom bɛtse ase dɛ ber biara a hom som na hom sɔr emudzi mu wɔ temple no, hom dze Nyame no tum akontar fi mu puei na N’abɔfoe “ahwɛ hom do.”3
Satan na n’edziekyirfo bɛfa kwan daa esisi akwansidze a obesiw hom kwan ma hom nnkɛtse sunsum akyɛdze a wɔdze ehyira hom anaa wobotum dze ehyira hom no ase. Naaso, akwansidze binom bɛyɛ obi ne bra bɔn ho nsunsuando. Midzi ho yaw dɛ modwen ho dɛ hom mu binom atse dɛ wommbu hom anaa asɔfodzi banodzifo no anngye hom enndzi anaa woebu hom enyimtsia anaa hom kun, egya, anaa obi a wosusuu no dɛ nyɛnko no apa hom ekyir. Metse yaw kɛse dɛ hom mu biara atse dɛ oeyi no esi nkyɛn, wommbu no, anaa woedzi no atsɛnkyew. Dɛm mfom yi nnyi kwan wɔ Nyame ahenman mu.
Mbom, midzi dɛw ber a metse fa asɔfodzi banodzifo a wɔdze enyigye hwehwɛ mbaa ma wɔkã ward nye stake abaguago ho. Okun biara a ɔkyerɛ dɛ n’asɔfodzi asodzi a ohia kɛse nye dɛ ɔbɔhwɛ ne yer do no, kenyan me dodow.4 Motonton banyin biara ara yie, a obu ne yer dɛ otum nya nyikyerɛ na ɔma ɔsom no bo dɛ adamfo tsĩpɛnfo wɔ hɔn awar no mu.
Sɛ banyin tse Latter-day Saintnyi ɔbaa a oenya adom akyɛdze na ɔhwehwɛ tsenenee n’ahendzi na tum ase a, ana ɔyɛ nwanwa dɛ ɔbɛtse dɛ ɔwɔ dɛ ɔsoɛr gyina dze yi no ayew?
Fitse asɔpɔkan no, woehyira mbaa wɔ ɔbrapa ho kwankyerɛ soronko—mbrɛ wotum hu papa fi bɔn ho. Akyɛdze yi nya ntowdo wɔ hɔn a wɔyɛ na wosie ahyɛmudzi horow. Na no do huan wɔ hɔn a wɔgye enyim bu enyi gu Nyame ne mbrasɛm do no.
Medze kã ho ntsɛmara dɛ wonnyi mbanyin mmfi Nyame n’ahwehwɛdze ma hɔn so dɛ wotum hu nsonsonee a ɔda papa na bɔn ntamu. Naaso me nkyerɛbaa adɔfo, mbrɛ hom tum hu papa fi mfom ho no, dɛ hom bɛyɛ ɔman no suban pa ahwɛdofo no, hia tsitsir wɔ nda odzi ekyir yinom mu. Na yɛdan hom dɛ hom bɛkyerɛkyerɛ nkaafo no dɛmara. Menkã iyi ho pefee dɛ: sɛ wiadze no yew ne mbaa hɔn tsenenee suban pa a, wiadze no nnkotum asan ekyir dabiarada.
Hɛn Latter-day Saintfo yemmfi wiadze; yɛfi Israel ahyɛmu mu. Wɔafrɛ hɛn dɛ yensiesie nkorɔfo mma Ewuradze ne Mbae a Otsĩa Ebien no.
Afei, hom mma menkyerɛkyerɛ nsɛmpɔw binom so ɔfa mbaa na asɔfodzi ho. Sɛ woyi wo si hɔ dɛ som wɔ ɔfrɛ biara mu a wɔ nyia okitsa asɔfodzi nsaafee no kwankyerɛ ase—tse dɛ wo bishop anaa stake president a—wɔma wo asɔfodzi tumdzi dɛ fadzi dwuma wɔ dɛm ɔfrɛ no mu.
Dɛmara, wɔ temple krɔnkrɔn mu no, iwɔ tum dɛ eyɛ asɔfodzi ayɛdze na iyɛ ma binom ber biara aekɔ temple no. Wo endowment no siesie wo ma ayɛ dɛm.
Sɛ enya w’adom akyɛdze na mbom sesei nnwar banyin a okitsa asɔfodzi, na obi se wo dɛ, “Ɔyɛ me yaw dɛ nnyi asɔfodzi wɔ wo fie a,” meserɛ tse ase dɛ dɛm asɛm no nnyɛ nokwar. Innyi obia a okitsa asɔfodzi no wɔ wo fie ampara, naaso agye na enye Nyame edzi ahyɛmu krɔnkrɔn wɔ temple. Ofi dɛm ahyɛmudzi no mu na N’asɔfodzi tum mu adom akyɛdze no pem ba hom do. Na kaa dɛ, sɛ wo kun wu a, ɔwo na ebɔhwɛ wo fie do.
Dɛ eyɛ Latter-day Saintnyi ɔbaa tseneneenyi a, wɔama no adom akɛdze no, edze tum na tumdzi a ofi Nyame hɔ kasa na edze kyerɛkyerɛ. Sɛ nkuranhyɛ anaa nkɔmbɔdzi mu o, yehia hom ndze a wɔrekyerɛkyerɛ Christ ne nkyerɛkyerɛ no. Yehia dza hom wɔ dze ama ebusua, ward, na stake abaguafo. Ohia tsitsir dɛ hom kã ho na nnyɛ afɛfɛdze ntsi a!
Me nkyerɛbaa adɔfo, hom tum no bɛyɛ kɛse ber a hom som binom. Hom mpaabɔ, akɔnkye, kyerɛwsɛm nsũae mber, na som wɔ temple mu, na ebusua abakɔsɛm edwuma mu no bobuei ɔsorsor ama hom.
Meserɛ mpaabɔ mu ara hom nsũa nokwar nyina hom botum ehu afa asɔfodzi tum ho. Bia hom dze Nkyerɛkyerɛ na Ahyɛmudzi afã 84 [eduowɔtwe anan] na 107 [ɔha na esuon] bɛhyɛ ase. Dɛm afã yinom begya hom akɔ nyiyimu binom so. Nokwar yinom hyɛ kyerɛwsɛm no na ndɛ nkɔnhyɛfo, adzehufo, na nyikyɛrɛfo hɔn nkyerɛkyerɛ no mu mã. Na ber a hom ntseasee reyɛ kɛse no na hom dze gyedzi wɔ Ewuradze mu na N’asɔfodzi tum no ridzi dwuma no, tum a hom dze twe sunsum mu egudzi yi a Ewuradze ama nsa botum akã, no bɛyɛ kɛse. Hom reyɛ dɛm no, hom bohu dɛ hom botum aboa yie ma wɔakyekyer onnyiewiei ebusua ebusua a wɔyɛ nkabɔmu, wɔasɔw hɔn ano wɔ Ewuradze ne temple mu, na Ɔsor Egya na Jesus Christ ho dɔ ahyɛ hɔn mã.
Hɛn mbɔdzembɔ nyina dɛ yɛbɔsom hɛnho nkorkor, yɛabɔ asɛmpa no dawur, Ahotseweefo hɔn emudziyɛ, na yɛapon hɛn ewufo no nyina no hyia mu wɔ temple krɔnkrɔn no mu. Sesei yɛwɔ temple dodow 166 [ɔha eduosia esia], na dodow so reba.
Dɛ mbrɛ hom nyim no, Salt Lake Temple, Temple Square, na asaase a ɔda Asɔr Ofese Dan no ho no wɔbɛyɛ ho edwuma esiesie hɔ fofor a wɔbɛhyɛ ase ɔdze rokɔ afe yi n’ewiei no. Temple krɔnkrɔn yi otwar dɛ yɛhwɛ do yie na yesieisie no ma okenyan ndaamba ebusuasantsen, tse dɛ ma oekenyan hɛn wɔ ebusuasantsen yi mu no.
Asɔr no renyin no, wobesisi temple binom so ama ebusua ebusua nsa etum akã nhyira a ɔkrɔn kyɛn nhyira biara no, ɔyɛ onnyiewiei nkwa.5 Yɛhwɛ temple no dɛ ɔyɛ dan krɔnkrɔn wɔ Asɔr no mu. Ber biara a wɔkã dɛ wobesi temple fofor no, ɔbɛyɛ hɛn abakɔsɛm ne fã kɛse a ohia. Dɛ mbrɛ yɛapɛnsampɛsamu wɔ ha anafua yi, nkyerɛbaa ho hia papaapa wɔ temple edwuma mu, na temple no nye bea a hom benya hom sunsum mu egudzi a ɔkrɔn no.
Meserɛ hom ntsie no yie na obu mu ara ber a mobɔ nhyehyɛɛ dɛ yebesi temple dodow awɔtwe ho dawur. Sɛ no mu kor bɛn bea a ɔda w’akoma do a, mususu dɛ si wo tsir adze a wɔ mpaabɔ na enyisɔ akoma mu. Ɔyɛ hɛn enyigye dɛ yɛbɔ no dawur dɛ yebesisi temple wɔ mbea a odzi do yi: Freetown, Sierra Leone; Orem, Utah; Port Moresby, Papua New Guinea; Bentonville, Arkansas; Bacolod, Philippines; McAllen, Texas; Cobán, Guatemala; na Taylorsville, Utah. Nkyerɛbaa, yɛda hom ase. Hɛn enyi asɔ obu kɛse a hom dze gyee nhyehyɛɛ yinom.
Afei, muruwiei yi, mebɛpɛ dɛ megya nhyira wɔ hom do, dɛ hom bɛtse asɔfodzi tum no a wɔdze adom hɔn no ase, na dɛ hom dze hom gyedzi bedzi dwuma wɔ Ewuradze na No tum no mu dze akã ho.
Nkyerɛbaa adɔfo, medze obu na enyisɔ dze kã modɔ ma hom. “Ahobrɛadze mu mekã dɛ Nyame tse ase!” Jesus nye Christ no. Iyi nye N’Asɔr. Megye ho dase wɔ Jesus Christ ne dzin krɔnkrɔn no mu, amen.