Yerenya Dɛwdzi wɔ Asɛmpa ne Nkyɛɛ mu

Primary ndwom no kor a mepɛ dze nkasafua yinom hyɛase:

Nokwar ho nsɛm tsiabaa na ɔyɛ ahomka a yɛgye dzi!

Yɛyɛ Jesus Christ N’Asɔr a ɔwɔ hɔ ma Nda a odzi Ekyir Ahotseweefo mba no, yenyim hɛn nyimpa ban. Yenyim dɛ “Nyankopɔn nye hɛn esunsum n’Egya. Yɛyɛ ne mba, na Ɔdɔ hɛn. Yɛnye [No tsenae wɔ sor] ansaana [yɛreba] asaase do.’’

Yenyim Nyankopɔn ne nhyehyɛɛ. Nna yɛnye No wɔ hɔ ber a Ɔdze too gua. Hɛn Egya a ɔwɔ Sor ne “botae nyina—N’edwuma na N’enyimyam—nye dɛ hɛn mu kor biara botum edzi Ne nhyira nyina mu dɛw. Ɔayɛ … nhyehyɛɛ a odzi mu ama hɛn dze ayɛ No botae. Yɛtsee … enyigye, … ɔpon, na … nkwagye’’ nhyehyɛɛ no ase na yɛgyee too mu ansaana yɛreba asaase do.

Jesus Christ hia tsitsir wɔ Nyankopɔn ne nhyehyɛɛ mu. Ɔnam No Werdambɔ do, Jesus Christ hyɛɛ N’Egya ne botae mã na ɔyɛe ma hɛn mu kor biara bedzi ɔnnkyebo na nkwagye ntowdo mu dɛwdzi. Satan, anaa abɔnsam, yɛ tamfo ma Nyankopɔn ne nhyehyɛɛ’’ na ɔaayɛ fitsi ahyɛase.

“Nyimpa ne pɛ, anaa ahom dɛ yɛbɛsan mu eyi, yɛ Nyankopɔn n’akyɛdze akɛse no mu kor a Ɔdze ma Ne mba. … Otwar dɛ yɛsan mu yi sɛ yɛbɛka Jesus Christ do anaa yɛbɛkã Satan do.’’²

Iyinom yɛ nokwar tsiabaa a yebotum nye binom akyɛ.

Hom mma menkã mber bi a me maame kãa nokwar tsiabaa a ɔtse dɛm ho asɛm ber a ohun kwan a oenya dze hyɛɛ nkɔmbɔdzi ase.

Mfe pii abasen kɔ no, nna me maame resan akɔ Argentina akɛsera mo nuabanyin. Osiandɛ me maame mmpɛ wimu akwantu ntsi no, ɔserɛɛ me mba mbanyin no kor dɛ ɔma no awerɛkyekyer na bambɔ ho nhyira. Onyaa nkenyan dɛ onhyira ne nanabasia ma onya akwankyerɛ soronko na kwankyerɛ fi Sunsum Krɔnkrɔn no hɔ ma ɔnhyɛ no dzen na ɔnka dodow a wonya pɛ dɛ wobosua asɛmpa no hɔn akoma.

Salt Lake wimuhɛn gyinabea no, me maame na nuabanyin hyiaa mfe esuon basiaba a nna ɔnye n’ebusua a woeketsi papatser wɔ esukwankyɛba do no wɔresan akɔ fie. N’awofo hun dɛ ɔnye me maame na nuabanyin edzi nkɔmbɔ akyɛr no, wosii gyinae dɛ wɔbɛka hɔn babasia no ho. Wɔdaa hɔnho na hɔn babasia no edzi dɛ Eduardo, Maria Susana, na Giada Pol. Ahomka nkitahodzi bɛdaa ebusua nwanwa yinom ntamu.

Ebusua ebusua beenu no nyaa enyibye dɛ wɔrobɔmu etu kwan wɔ wimuhɛn kor noara mu akɔ Buenos Aires, Argentina. Hɔn nkɔmbɔdzi rokɔdo no, me maame hun dɛ kesi dɛm mber no nna wɔnntse Jesus Christ N’Asɔr a wɔdze asan ananmu no ho asɛm biara da.

Nsɛmbisa kor a odzi kan a Susana bisae nye dɛ, “Ana ebɛkã museum fɛfɛɛfɛw no a sika kɔkɔɔ ohonyi si no sor ho asɛm akyerɛ me a?’’

Me maame kyerɛkyerɛɛ mu dɛ dan fɛfɛɛfɛw no nnyɛ museum mbom Ewuradze ne temple bea a yɛnye Nyankopɔn dzi ahyɛmu ama yeetum asan nye No akɛtsena da bi. Susana paa mu kãa kyerɛ me maame dɛ ansaana hɔn Salt Lake akwantu no ɔbɔɔ mpaa dɛ biribi mbɛhyɛ no sunsum dzen.

Akwantu mu no , me maame gyee asɛmpa no ho dase tsiabaa naaso ɔyɛ dzen na ɔtoo nsa frɛ Susana dɛ ɔnhwehwɛ asɛmpasomafo no wɔ no kurow mu. Susana bisaa me maame dɛ, “ Mibesi dɛn bohu hɔn?’’

Me maame buaa dɛ, “W’enyi nnkotum apa hɔn do; wɔyɛ mberantsɛ beenu a wɔhyɛ sortar fufuw na wɔbɔ tae anaa nkataasia beenu a woesiesie hɔn ho yie, na ahyɛnsew bɔ hɔn akoko daa daa a ɔkyerɛ hɔn edzin na ‘Jesus Christ N’Asɔr a ɔwɔ hɔ ma Nda a Odzi Ekyir Ahotseweefo so.’’

Ebusua ebusua no gyee obiara ne foon nkanee na wɔsee hɔnho nanatsew yie wɔ Buenos Aires wimuhɛn gyinabea hɔ. Susana a, ofitsi dɛm ber no ɔabɛyɛ me nyɛnko mãpa no, akã akyerɛ me mpɛn pii dɛ nna ɔyɛ no awerɛhow dodow dɛ origya me maame wɔ wimuhɛn gyinabea hɔ. Ɔkãa dɛ, “Wo maame hyerɛɛn. Munntum nnkyerɛkyerɛ mu, naaso nna kan bi etwa noho ehyia a mammpɛ dɛ megya no ekyir.’’

Ntsɛmpanara a Susana koduur no kurow mu no, ɔnye ne babasia Giada, kɔr ɔno Susana ne maame, a ɔtse bɛn hɔn fie hɔ nye no kɛkyɛɛ sũahu yi. Ber nna wɔreka hɔn hɛn no, ɔba no dɛ Susana hun mberantsɛ beenu a wɔnam stiitsi kwan do a wɔahyɛ hɔn ntar dɛ mbrɛ me maame kãa ho asɛm no. Ɔdze ne hɛn no sii stiitsi ne finimfin, puei fii mu, na obisaa mberantsɛ beenu yinom dɛ, “Agyengyanbiara hom fi Jesus Christ N’Asɔr hɔ?’’

Wɔsee dɛ, “Nyew.’’

Obisaa dɛ “Asɛmpasomafo?’’.

Hɔn beenu buaa dɛ, “Nyew yefi hɔ!’’

Afei ɔsee dɛ, “hom mfow me hɛn no; hom reba fie abɛkyerɛkyerɛ me.’’

Abosoom ebien ekyir no, wonumaa Maria Susana. Wonumaa ne babasia, mber a odzii mfe akron. Yɛda ho reyɛ Eduardo, a biribiara mmfa ho no yɛdɔ no noho edwuma.

Ofitsi dɛm mber no, Susana abɛyɛ asɛmpasomafo akɛse no mu kor a mehyia da. Ɔtse dɛ Mosiah ne mbambanyin no, a wɔdze akra pii baa Christ hɔ no.

Hɛn nkɔmbɔdzi kor mu no, mibisaa no dɛ, “Wo esumasɛm nye ebɛnadze? Isi dɛn nye binom kyɛ asɛmpa no?’’

Ɔkãa kyerɛ me dɛ, “Ɔnnyɛ dzen koraa. Dabiara ansaana mibefi me fie no, mobɔ mpaa, serɛ Ɔsor Egya dɛ Ɔnkyerɛ me obi a ohia asɛmpa no wɔ hɔn abrabɔ mu. Ɔtɔfabi a mefa Mormon Nwoma nye hɔn kyɛ anaa krataasin a asɔr ho nsɛm wɔdo fi asɛmpasomafo hɔ—na mehyɛase nye obi ridzi nkɔmbɔ a, mibisa hɔn tsiabaa dɛ sɛ wɔatse Asɔr noho asɛm da.’’

Susana so see dɛ, “ Mber bi so meyerɛw m’ano ara ber morotweɔn keteke. Da kor bi banyin bi hwɛɛ me na obisaa me dɛ, ‘Ebɛnadze na ereyerɛw w’ano wɔ ho?’ Ɔyɛɛ me ahobow.

“Mobuaa dɛ, mereyerɛw m’ano osiandɛ m’enyi agye!’

“Na afei ɔkãa dɛ, ‘Na ebɛnadze na w’enyi agye ho dodow yi?’

“Miyii ano dɛ, ‘Meyɛ Jesus Christ N’Asɔr a ɔwɔ hɔ ma Nda a odzi Ekyir Ahotseweefo mu ba, na ɔno na ɔma m’enyi gye. Ana atse ho asɛm a?’”

Ber a ɔkãa dɛ oho no, ɔmaa no krataasin no bi na motoo nsa frɛ no dɛ Kwesida a ɔreba no ɔmbra som. Kwesida a odzi do no, okyiaa no abow n’ano.

President Dallin H. Oaks kyerɛkyerɛɛ dɛ:

“Ndzɛmba ebiasa wɔ hɔ a asɔrmba nyinar botum ayɛ dze aboa akyɛ asɛmpa no. …

Odzi Kan hɛn nyina botum abɔ mpaa dze enya pɛ dze aboa nkwagye ho edwuma n’afã a ohia yi. …

Otsĩa Ebien, yebotum esie mbrasɛm no. … Asɔrmba anokwafo benya Agyenkwa no Sunsum … ɔnye hɔn aatsena ama hɔn akwankyerɛ ber a wɔhwehwɛ dze hɔnho hyɛ Jesus Christ n’asɛmpa nsanananmu ne kyɛ edwuma kɛse no mu.

“Otsĩa Ebiasa, yebotum abɔ mpaa dze enya nkenyan wɔ dza yebotum ayɛ … nye binom akyɛ asɛmpa no … [na] yɛdze enyimpi abɔ mpaa dze nkyenya a [yenya] no edzi dwuma.’’³

Nuambanyin, nkyerɛbaa, mbofra, na mbabun, yebotum ayɛ tse dɛ me nyɛnko Susana na yɛnye binom akyɛ asɛmpa no a? Yebotum ato nsa afrɛ nyɛnko a onnyi hɛn gyedzi no mu ma ɔnye hɛn aba asɔr Kwesida a? Anaa ebia yebotum nye ebusuanyi anaa nyɛnko bi akyɛ Mormon Nwoma no? Yebotum aboa binom ma woehu hɔn ewuakɔr wɔ FamilySearch do anaa yenye binom akyɛ dza yeesua no adapɛn no mu ber a yeesua Come, Follow Me? Yebotum ayɛ tse dɛ hɛn Agyenkwa, Jesus Christ ara, na yɛnye binom akyɛ dza enyigye ba hɛn abrabɔ mu no bi? Nsɛmbisa yinom nyina nyiano yɛ nyew! Yebotum ayɛ!

Kyerɛwsɛm mu no yɛkenkan dɛ “wɔasoma Jesus Christ N’Asɔr mba dɛ wɔbɛyɛ edwuma wɔ wenyin ture mu dze ama akra eenya nkwagye’ (Nkyerɛkyerɛ na Ahyɛmudzi 138:56). Asɛmpasomafo edwuma, nyia ɔasakyer reka asɔr no mu, wɔrobɔ asɔrmba akɔtrɔbɔdwefo hyew, temple na ebusua abakɔsɛm, na erekyerɛkyerɛ asɛmpa no,” kã nkwagye edwuma ho.’’⁴

M’anyɛkofo adɔfo, Ewuradze hia hɛn ma yɛaboa Israel ano. Nkyerɛkyerɛ na Ahyɛmudzi mu no, Ɔkã dɛ, “Eso mma hom nndzi kan nndwendwen dza hom bɛkã; na mbom hom nkora nkwa nsɛm wɔ hom adwen aber nyina, na dɔn no nya sõ a wɔdze obiara nedze bɛma no,’’⁵

Dza ɔka ho no, Ɔabɔ hɛn anohoba dɛ:

“Na sɛ ɔba dɛ hom dze hom nda nyina bɔ nnuho ho dawur kyerɛ nkorɔfo yi na hom dze ɔkra kor mpo brɛ me a, mbrɛ hom bodua nye no edzi dɛw kɛse wɔ m’Egya n’ahenman no mu a!

“Na afei, sɛ hom dɛw bɔdɔɔ sõ wɔ ɔkra kor a hom dze no abrɛ me wɔ m’Egya n’ahenman mu ho a, nna sɛ edze akra pii brɛ me a, nna hom enyigye ne kɛse bɛyɛ dɛn!’’⁶

Primary ndwom a medze hyɛɛ ase no dze tum asɛm yi wie dɛ:

Megye dase dɛ nsɛm yinom yɛ nokwar na yɛwɔ Egya dɔfo wɔ Sor a ɔrotweɔn hɛn ma yɛadan No ma oehyira hɛn abrabɔ na hɔn a woetwa ehyia hɛn no hɔn abrabɔ. Hom mma yenya pɛ dɛ yɛdze hɛn nuambanyin na nkyerɛbaa bɛba Christ hɔ nye me mpaabɔ wɔ Jesus Christ Ne dzin mu, amen.