Yeridzi Hɛn Anohoba na Ahyɛmudzi Do

Enuanom na nkyerɛbaa, ber a yɛdze nhyiamu yi reba ewiei no, hom mu kor biara nkora wɔ n’akoma mu dasegye a wɔagye no ndɛ a ɔfa Jesus Christ asɛmpa no no nokwar ho. Woehyira hɛn dɛ yeenya mber krɔnkrɔn yi d yɛrobɔ mu ahyɛ hɛn anohoba dzen ama Ewuradze Jesus Christ dɛ yɛyɛ N’asomfo na Ɔyɛ hɛn Agyenkwa.

Yɛrobɔ anohoba na yeridzi ahyɛmu do no ho hia no ada m’adwen do kɛsenara. Osi dɛn na ohia wo yie dɛ ibedzi w’asɛm do? wɔbɛgye wo edzi? ibɛyɛ dza ese dɛ ebɛyɛ? ibɔbɔ mbɔdzen esie w’ahyɛmudzi krɔnkrɔn? ibɛyɛ nokwafo? Yeridzi anohoba a yɛdze bɔ Ewuradze na binom do nokwar mu wɔ abrabɔ mu no, yɛnantsew ahyɛmu anamɔn kwan no do san kɔ hɛn Egya a ɔwɔ Sor hɔ na yɛtse No dɔ wɔ hɛn abrabɔ mu.

Hɛn Agyenkwa Jesus Christ nye hɛn Fasusu mapã wɔ erobɔ anohoba na eridzi ahyɛmu na irisie ho. Ɔbaa asaase do a Ɔbɔɔ anohoba dɛ obedzi Egya no ne pɛ do. Ɔdze asɛm no na ndzeyɛɛ kyerɛkyerɛɛ asɛmpa fapem. Ɔbɔɔ werdam maa hɛn bɔn ama yeetum atsena ase bio. Odzii N’anohoba biara do.

Ana wobotum akã dɛmara afa hɛn mu kor biara ho a? Ebɛn mbusu na ɔwɔ hɔ sɛ yesisi binom kakra, yɛpatser kakra, anaa dza yɛagye pen dɛ yɛbɛyɛ no yɛannyɛ no yie a? Na sɛ yegyaa hɛn ahyɛmudzi ekyir dzi ɛ? Ana binom bɛba Christ hɔ osian hɛn fasusu ntsi? Ana w’asɛm kyekyer wo a? Iridzi anohoba do nnyɛ suban ara; ɔda wo edzi dɛ eyɛ Jesus Christ osuanyi.

Daa N’enyi wɔ hɛn ɔnnkyebo abrabɔ mbrɛwyɛ do no, Ewuradze abɔ anohoba d, “Na hom enyi ngye, na mma hom nnsuro, na emi, Ewuradze menye hom wɔ hɔ, na mibegyina hom afã.”¹ Maatse Ne nkã ber a nna mehia awerɛhyɛmu, awerɛkyekyer, anaa sunsum mu nhumu kɛse anaa ahoɔdzen, na No sor anyɛnkoyɛ no abrɛ me adze ara yie na m’enyi sɔ.

Nokwar, dɛm na Ewuradze se: “Ɔkra biara a obegyaa no bɔn yɛ na ɔbɛba mo hɔ, na ɔbɔbɔ me dzin afrɛ me, na obetsie me ndze, na obedzi me mbrasɛm do no, obohu m’enyim na oehu dɛ metse ase”² Bia dɛm no nye N’anohoba tsitsir no.

Musũaa iridzi w’asɛm do no, ho hia a ohia wɔ me mbabunber mu. Dɛm mfatoho no kor nye ber a migyina tsentsen se Scout Nsew no fi me tsir mu. Hɛn nkitahodzi a yɛnye America Boys Scoutfo no, afei yeruwie yi no, ɔbɛyɛ nkaadze a ohia ara yie ma emi na Asɔr yi aber nyina. Yɛkã kyerɛ Scout kuw no, mbanyin na mbaa dodow a wɔasom enyiberdo do dɛ Scout baanodzifo, enãnom—ha na nkamfo ne kɛse kɔ—nye mberantsɛ a wɔdze hɔnho hyɛɛ Scout nhyehyɛɛ mu no, dɛ “Yɛda hom ase.”

Nhyiamu yi ara mu no, hɛn nkɔnhyɛnyi dɔfo President Russel M Nelson, na Elder Quentin L Cook dze nsakyer ato gua a yɛdze hɛn enyi rebetsim hɛn mbabun do na yɛama hɛn ekuwekuw no nye nokwar a woeyi akyerɛ no asaa. Kwesida yi ara abɛsen no, President Nelson na President M Russel Ballard kyerɛkyerɛɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no Mbofra na Mbabun nhyehyɛɛ no mu kyerɛɛ Asɔrtɔw no nyina. Ɔyɛ wiadze nyina mu dwumadzi fofor a otsim hɛn Ewuradze na Agyenkwa, Jesus Christ do. President a Odzi Kan na n’Apamfo na Asomafo Duebien no hɔn Quorum yɛ kor wɔ kwankyerɛ fofor yi ho, na mankasa megye me dase dɛ Ewuradze akyerɛ hɛn kwan wɔ anamɔntu kor biara mu. Ɔyɛ me enyigye ma Asɔr no no mbofra na mbabun no dɛ wobenya sũahu yi a otsim hɔn do wɔ asɔr na fie nyina no—a odua asɛmpa adzesua, som na dwumadzi horow, na ankorankor mpontu mu.

Mbaabun theme wɔ afe 2020 a ɔreba no mu kãsa fa Nephi n’anohoba a wɔayɛ atsenkã no ho, “kɔ na kɛyɛ.” Ɔkyerɛɛw dɛ, “Na ɔbaa dɛ, emi Nephi, mekãa kyerɛɛ m’egya dɛ, mobɔkɔ akɛyɛ ndzɛmba a Ewuradze ahyɛ no, osiandɛ minyim dɛ Ewuradze mmfa mbrasɛm biara mma adasamba, gyedɛ oesiesie kwan ama hɔn a wɔnam do botum ayɛ dza ɔahyɛ hɔn dɛ wɔnyɛ no.³ Ɔkãe no akyɛr yie dze, naaso hɛn a yɛwɔ Asɔr mu no gyina dɛm anohoba no do ndɛ.

Dɛ “kɔ na kɛyɛ” kyerɛ dɛ eredan wiadze akwan egya, irinya ankorankor nyikyerɛ na iridzi do, edze enyidado na gyedzi wɔ ndaamba mu robɔ tsenenee bra, iridzi ahyɛmu dɛ ebɛka Jesus Christ do na irisie, na ɔnam dɛm ntsi wo dɔ ma Ɔno, wiadze Agyenkwa no, ayɛ kɛse.

Ahyɛmu yɛ anohoba a odzi dwuma afã ebien mu na ɔda hɛn na Ewuradze ntamu. Dɛ yɛyɛ asɔrmba no, yedzi ahyɛmu wɔ enuma ber dɛ yɛbɛfa Jesus Christ Ne dzin bɔto hɛn do, na yɛabɔ bra dɛ mbrɛ Ɔbɔe no. Tse dɛ hɔn a wonumaa hɔn wɔ Mormon Esu ho no, yedzi ahyɛmu dɛ yɛbɛyɛ No nkorɔfo, “hom soasoa kor biara n’adzesoadze ama ɔayɛ har; … wɔkyekye hɔn a wohia awerɛkyekyer no hɔn werɛ, na wogyina dɛ Nyankopɔn n’adasefo aber nyina wɔ adze nyina mu, wɔ gyinabew biara a … mu.”⁴ Yɛrosom hɛn ho nkorkor wɔ Asɔr no mu no kyɛrɛ hɛn enyimpi si dɛ yebedzi dɛm anohoba yinom do.

Sɛ yedzi sacrament a, yekenyan hɛn ahyɛmu dɛ yɛbɛfa Ne dzin ato hɛn do no na yɛbɔ anohoba binom so kã ho. Hɛn daa daa adwendwen na ndzeyɛɛ, akɛse na nketsewa, nyina kyerɛ hɛn enyimpi si a yɛdze ma No no. N’anohoba a ɔdze bɔ hɛn ho nye: “Sɛ hom kaa me daa a hom benya mo Sunsum ma ɔnye hom abɛtsena.”⁵

M’asɛmbisa ndɛ nye, ana yedzi hɛn anohoba na ahyɛmudzi do a, anaa yɛdzi do afã na afã, yɛyɛ no biara biara ntsi ɔyɛ mberɛw dɛ yebu do a? Sɛ yɛkɛkyerɛ obi dɛ, “Mobɔbɔ mpaa ama wo a,” ana yɛyɛ? Sɛ yesi no pi dɛ, “Mebɛba hɔ abɔboa a,” ana yɛbɛyɛ? Sɛ yɛhyɛ hɛnho dɛ yebotua kaw bi a, ana yɛyɛ? Sɛ yɛma hɛn nsa do dɛ yɛbɛma asɔrba fofor tsĩpia wɔ ne frɛ fofor mu a, a ɔkyerɛ dɛ yɛbɛma abamba a, ana yɛyɛ?

Me mbabun ber mu ewimbir bi, me maame nye me tsenaa ne mpa anaafo na ɔkasaa dzendzen faa hia a ohia dɛ yɛdze Enyansasɛm no bɔ bra, Ɔkãa dɛ “Minyim fi binom hɔn sũahu horow mu mfe pii dɛ, sunsum mu atsenkã na honandua mu nkã-tse yew a ofi Enyansasɛm a wonndzi do no.” Ɔhwɛɛ m’enyiwa mu hann, na metsee dɛ ne nsɛm no ehwirom m’akoma mu: “Bɔ me anohoba ndɛ, Ronnie, [ɔfrɛɛ me Ronnie], dɛ ebedzi Enyansasɛm no do aber nyina.” Mobɔɔ anohoba ahobrɛadze mu maa no, na medzi do mfe yinom nyina mu.

Dɛm enyimpi si no boaa me yie ber a mowɔ me mbabun ber mu nye ekyir yi ber a nna mowɔ edwuma kɛse mu a nhyiamu ase no anondze nnyɛ nã. Midzii kan sii egyinae dɛ mebedzi Nyame ne mbra do, na mennsan m’ekyir wɔ ho bio. Ewuradze ase dɛ, “Emi Ewuradze, sɛ hom yɛ dza mekã a, hom kyekyer me; mbom sɛ hom annyɛ dza mekã a nna hom nnyi anohoba biara.”⁶ Ebɛn asɛm na Ɔrekã kyerɛ hɔn a wosie Enyansasɛm no? Dɛ yebenya apɔwmudzen, anohoba, nyansa, nyimdzee, na abɔfo bambɔ ho anohoba.⁷

Mfe kakra a abasen kɔ no, nna emi na Akyerɛbaa Rasband yɛwɔ Salt Lake Temple ɔnam hɛn mbabaa mu baako no nsɔwano. Ber a yenye hɛn mbabaa kakraba bi a ɔnnsoe dɛ ɔkɔ ayɛdze no yegyina temple abowano no, yɛkãa wɔrosɔw ano wɔ Nyame ne temple krɔnkrɔn mu no ho hia a ohia ho asɛm. Tse dɛ ma me maame kyerɛkyerɛɛ me mfe pii abɛsen no, yɛkaa kyerɛɛ hɛn babaa no dɛ, “Yɛpɛ dɛ wɔasɔw wo ano dwudwodwoo wɔ temple mu, na yɛpɛ dɛ ibɔ hɛn anohoba dɛ sɛ ehu wo daapem adamfo a, enye no nyɛ nhyehyɛɛ ma wɔnsɔw ano wɔ temple mu.” Ɔhyɛɛ hɛn bɔ.

Mfonyin

Elder Rasban na ne babaa na no kun

Ekyir no ɔakã dɛ hɛn kasaa no na n’anohoba no abɔ noho ban ma ɔakaa no “dza ohia mapã no.” Ekyir no odzii ahyɛmu krɔnkrɔn no do ber a wɔsɔɔw no ano ka no kun ho wɔ temple mu.

President Nelson akyerɛkyerɛ dɛ:”Yɛma … Agyenkwa no tum wɔ hɛn abrabɔ mu yɛ kɛse ber a yedzi ahyɛmu krɔnkrɔn na yesie ahyɛmudzi no pɛpɛɛpɛr. Hɛn ahyɛmudzi no kyekyer hɛn fam No na ɔma hɛn nyametum.⁸

Sɛ yesie hɛn anohoba ma hɛnho nkorkor a, yebotum esie anohoba a yɛdze bɔ Ewuradze no ara yie. Hom nkaa Ewuradze ne nsɛm yi:“Susuampa dɛ hom ayɛ ama mo nuanom nketseaba yi mu kor no, hom ayɛ ama me.”⁹

Hom nye me ndwendwen anohoba mfatoho a ɔwɔ kyerɛwsɛm no mu. Ammon na Mosiah ne mbambanyin a wɔwɔ Mormon Nwoma mu no dze sii hɔn enyido dɛ “wɔbɛkã Nyame n’asɛm no akyerɛ.”¹⁰ Ber a Lamanfo kyeer Ammon no, wɔdze no kɔɔr Lamanfo Hen Lamoni hɔ. Ɔdze sii ɔhen no n’enyim dɛ, “Mebɛyɛ w’akowaa.”¹¹ Ber a ewifo baa dɛ woribowia ɔhen no nguan no, Ammon twitwaa hɔn abasa fii hɔ. Ɔyɛɛ ɔhen no ahobow, ma otsie Ammon n’asɛmpa nkaabɔ na ɔsakyeree.

Ruth, wɔ Ahyɛmu Dadaw no, bɔɔ n’asew anohoba dɛ, “Beebiara mbrɛ ebɔkɔ no, mobɔkɔ.”¹² Odzii n’asɛm do nokwar ara mu. Samarianyi pa no a, ɔwɔ Ahyɛmu Fofor mu abɛbusɛm mu no, bɔɔ ahɔhodan wura no anohoba dɛ sɛ ɔhwɛ ɔkwantunyi no a oepira no a, “Biribiara a ebɔhwer aka ho no, sɛ mesan ba a, mebɛhyɛ wo ananmu”¹³ Zoram, wɔ Mormon Nwoma mu no, bɔ anohoba dɛ ɔnye Nephi na no nuanom bɔkɔ sar no do. Nephi rekãa no dɛ, “Na Zoram dzii nsew kyerɛɛ hɛn wiei no, hɛn suro wɔ noho bɔɔ adze.¹⁴

Na tsetse anohoba a “wɔdze bɔɔ egyanom” a wɔakã ho asɛm wɔ kyerɛwsɛm no mu dɛ “Mba no hɔn akoma bɛdan akɔ hɔn egyanom do no ɛ?¹⁵ Abrabɔ a ansaana nyimpa reba asaase do no ber a yɛsaan mu yii Nyame ne nhyehyɛɛ no, yɛbɔɔ anohoba dɛ yɛbɔboaboa Israel ano wɔ ntwamutam afã ebien nyina. Elder John A. Widtsoe kyerɛkyerɛɛ mu mfe pii abɛsen no dɛ “Yɛnye Ewuradze bɔɔ mu dɛ yɛbɛyɛ edwuma.” Afei nhyehyɛɛ ne nyɛe no ammbɛyɛ Egya no n’edwuma, na Agyenkwa no n’edwuma ara, mbom hɛn so hɛn edwuma a.¹⁶

“Mboano [no] nye adze tsitsir a ɔrokɔ do wɔ asaase do ndɛ,” President Nelson akã ber a oetutu kwan kɔ wiadze aporow no. “Sɛ yɛrekã mboano ho asɛm a, nna yɛrekã no sin ara dɛ nokwar fapem yi: hɛn Ɔsor Egya ne mba mu kor biara, a ɔwɔ ntwamutam n’afa na afa ho no, fata dɛ ɔtse Jesus Christ n’asɛmpa a wɔdze asan-ananmu no ho asɛm.”¹⁷

Dɛ meyɛ Ewuradze Jesus Christ no Somafo no, medze nsato na anohoba wiei. Odzi kan: Moto nsa frɛ hom dɛ hom dze nokwardzi kɛse bɔhwɛ anohoba na ahyɛmu a hom nye Nyame na binom dzi no, a hom nyim dɛ hom asɛm kyekyer hom. Otsĩa Ebien, mobɔ hom anohoba dɛ, ber a hom reyɛ iyi no, Ewuradze bɛma hom asɛm etsim na Oehyira hom ndzeyɛɛ do ber a hom bɔ mbɔdzen dze aperdzi a hom mmberɛ dze tu hom abrabɔ, hom ebusua ebusua, na Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no mpon. Ɔbɛkã hom ho, mo nuanom na nkyerɛbaa adɔfo, hom botum dze awerɛhyɛmu, ahwɛ kan dɛ “wɔbɛgye hɔn akɔ sor, ama wɔnye Nyankopɔn aakɛtsena wɔ enyigye a onnyi ewiei da tsebea no … mu osiandɛ Ewuradze Nyankopɔn na ɔakã.”¹⁸

Megye ho dase wɔ Jesus Christ ne dzin mu, amen.