Krɔnkrɔnyɛ na Enyigye ho Nhyehyɛɛ no

Mo nuanom na me nkyerɛbaa adɔfo, mabɔ mpaa ebisa tum a ɔbɔboa hom wɔ hom ankorankor enyigye nhwehwɛe ho. Bia binom benya atsenkã dɛ hɔn enyigye a wɔwɔ noara yie, naaso nokwar ara obiara rommpoow enyigye bi so a wɔdze rekã no ho. Obiara dze enyimpi bɛgye daapem enyigye a wɔabɔ ho anohoba a, wɔdze rema.

Ɔno nye dza Ɔsor Egya, No Dɔba, Jesus Christ, na Sunsum Krɔnkrɔn no dze ama Ɔsor Egya no sunsum mu ba biara a sesei ɔtse ase, ɔbɛtse ase, anaa wɔatsease pɛn wɔ wiadze yi mu. Dza wɔdze ma yi, ɔtɔfabi a, wɔfrɛɛ no enyigye ho nhyehyɛɛ. Dɛm so na nkɔnhyɛnyi Alma frɛɛ no ber a ɔkyerɛkyerɛɛ ne babanyin a bɔn n’awerɛhow amim no no. Nna Alma nyim dɛ emumuyɛdze nnkotum ayɛ enyigyedze dabiara da ama ne ba no—anaa Ɔsor Egya ne ba biara.¹

Ɔkyerɛkyerɛɛ ne ba no dɛ no orinyin wɔ krɔnkrɔnyɛ mu no nye anamɔn kwan nko ogya kɔ enyigye mu. Ɔmaa ɔdaa edzi pefee dɛ krɔnkrɔnyɛ a ɔkrɔn no ɔnam Jesus Christ no Werdambɔ no do na ɔba, na ɔtsew hɛnho ma yedzi mu.² Gyedzi wɔ Jesus Christ mu, daa daa nnhu, na irisie ahyɛmudzi no nko do, na yetum gye daapem enyigye no a hɛn nyina yɛrohwehwɛ enya ma ɔaatsena no.

Me mpaabɔ ndɛ nye dɛ mubotum aboa ma hom aatse ase dɛ enyigye kɛse fi ankorankor krɔnkrɔnyɛ kɛse do ba ama hom dze dɛm gyedzi no aayɛ edwuma. Nkyii mebɛkyɛ dza mara minyim a ɔfa dza yebotum ayɛ dze afata dɛm akyɛdze no dɛ yɛbɛyɛ krɔnkrɔn ara yie no.

Kyerɛwsɛm no kyerɛkyerɛ hɛn dɛ, hɛnho botum atsew anaa yɛayɛ krɔnkrɔn ara yie ber a yɛdze gyedzi wɔ Christ mu no yɛ edwuma,³ yɛkyerɛ hɛn setsie,⁴ yenu hɛnho,⁵ yɛbɔ afɔr ma No,⁶ yɛgye ayɛdze krɔnkrɔn horow, na yesie hɛn ahyɛmudzi a yɛnye No ayɛ no.⁷ Yɛrefata krɔnkrɔnyɛ akyɛdze no hia ahobrɛadze,⁸ ɔdwe⁹ na abotar.¹⁰

Sũahu kor a ɔfa erepɛ enya krɔnkrɔnyɛ kɛse no bae maa me wɔ Salt Lake Temple mu. Ber a odzi kan a mehɛɛn temple no, nna wɔakã dza enyi bɛda ho kwan kakrabaa akyerɛ me. Meehu nsɛm a ɔwɔ dan no ho: “Krɔnkrɔnyɛ ma Ewuradze” na “Ewuradze ne Fi.” Menyaa enyidakwan kɛse noara. Naaso modween ho dɛ sɛ mayɛ ahoboa dɛ mehɛn mu a.

Me maame na me papa nantsewee dzii m’enyim kan ber a yɛhɛɛn temple no mu no. Wobisaa hɛn dɛ yɛmfa hɛn nkamfo krataa nkyerɛ, mfa, nkyerɛ hɛn emudziyɛ.

Nna m’awofo nyim nyimpa a ɔtsena nkamfo pon ho no. Ntsi wogyinaa hɔ kakra nye no kasae. Mo nko mokɔr kan kɔr bea kɛse bi a beebiara ayɛ fitaa hyɛnhyɛn no. Mohwɛɛ sor hwɛɛ nsamdo no a ɔwɔ sorsor ara yie a ɔyɛ dɛ wimu. Dɛm ber mu noara no, menyaa nkenyan pefee dɛ maaba hɔ da.

Mbom nkyii, metsee ndze bɔkɔɔ bi—nna ɔnnyɛ mara medze. Nsɛm a ɔkãa no bɔkɔɔ nye iyinom: “Mmbaa ha da. Irekaakaa ber bi ansaana wɔrobɔwo wo no. Nna ewɔ bea krɔnkrɔn a ɔtse dɛm. Itsee dɛ Agyenkwa no reba bea a egyinae no. Na inyaa enyigye osiandɛ nna epɛ dɛ ihu No.”

Dɛm sũahu wɔ Salt Lake Temple no dzii mber kumabaa bi. Naaso no ho nkaa da ho dze asomdwee , dɛwdzi, na enyigye komm brɛ me.

Musũaa adzesuadze pii dɛm da no. Kor nye dɛ Sunsum Krɔnkrɔn no dze ndze tseabaa kasa. Mutum tse Ne ndze ber a sunsum mu asomdwee wɔ m’akoma mu no. Ɔdze enyigye na awerɛhyɛmu atsenkã brɛ me dɛ mereyɛ krɔnkrɔn ara yie. Na dɛm dze enyigye atsenkã no a metsee no wɔ dɛm mber kakra ara a odzi kan wɔ Nyankopɔn ne temple mu no, bra me daa.

Hom ahyɛ no nsew wɔ hom ankasa hom abrabɔ mu na binom so dze mu enyigye anwanwadze a ofi irinyin wɔ krɔnkrɔnyɛ mu, iribɛyɛ tse dɛ Agyenkwa no ara yie. Ndaansa adapɛn yi, makɔ binom hɔn mpa anaafo, nkorɔfo a wobotum dze gyedzi kɛse wɔ Agyenkwa no mu na enyimtsewee ehyia owu.

Kor yɛ banyin bi a nna n’ebusua etwa noho ehyia. Ɔno na ne yer nna woridzi nkɔmbɔ kommyɛ mu ber a emi na me babanyin hɛɛn hɔ no. Minyim hɔn mfe pii mu. Meehu Jesus Christ No Werdambɔ no a oedzi dwuma wɔ hɔn na hɔn ebusua hɔn abrabɔ mu.

Wɔabɔ mu asan mu eyi dɛ wobegyaa eduryɛ mbɔdzembɔ a ɔrema no nkwa awar no. Nna atsenkã komm wɔ hɔ ber a ɔnye hɛn kasaa no. Ɔyerɛɛw n’ano na ɔkãa n’enyisɔ ma asɛmpa na ne ahotsew nsunsuando wɔ ɔno na n’ebusua a ɔdɔ hɔn no do. Ɔkasaa faa enyigye mfe pii a ɔsoom wɔ temple mu no. Ɔnam banyin yi n’ebisadze do, me ba no seraa ne tsir ngo a woehyira do. Mosɔɔw ngosera no ano. Meyɛɛ no, menyaa nkenyan pefee dɛ menkã nkyerɛ no dɛ ɔnnkɛkyɛr na oehu n’Agyenkwa no enyim na enyim.

Mobɔɔ no anohoba dɛ ɔbɛtse enyigye, ɔdɔ na Agyenkwa no Ne nkamfo. Ɔyerɛɛw n’ano fɛfɛɛfɛ ber a yerokɔ no. N’asɛm a odzi ewiei a ɔkãa nye dɛ, “Kã kyerɛ Kathy dɛ modɔ no.” Me yer, Kathleen, dze mfe pii ahyɛ ebusua mu ebusuasantsen pii nkuran dɛ wɔngye Agyenkwa no ne nsato no nto mu, dɛ wɔmbra Ne nkyɛn na wɔnyɛ na wonsie ahyɛmudzi krɔnkrɔn, na ama wɔafata enyigye nsunsuando no a ofi dɛm krɔnkrɔn kɛse no.

Dɔnhwer kumabaa ekyir na owui. Adapɛn kakra ara twaa mu no, no kunafo no dze akyɛdze brɛɛ emi na me yer. Ɔyerɛɛw n’ano ber a yerɛkasa no. Ɔtseew n’enyim kãa dɛ, “Nna minyim dɛ medzi awerɛhow na maayɛ ankonam. Meenya ahomkã papaapa. Ana edwen dɛ dɛm no oye?

Minyim mbrɛ osi dɔ no kun na mbrɛ hɔn beenu no aba ebohu, wɔadɔ, na wɔasom Ewuradze no, mekãa kyerɛɛ no dɛ enyigye atsenkã a onya no, ɔyɛ akyɛdze a wɔabɔ ho anohoba osiandɛ, ɔnam no som nokwar do, ɔayɛ krɔnkrɔn ara yie. No krɔnkrɔnyɛ no ama ɔaafata dɛm enyigye no.

Binom a woritsie me ndɛ no ɔbɛyɛ hɔn nwanwa dɛ: “Dɛn ntsi na menntse asomdwee na enyigye a wɔdze abɔ anokwafo anohoba no nkã? Meedzi nokwar edua abrɛbrɛsɛ yaayaw mu, naaso menntse dɛ menya ahomkã.”

Nkɔnhyɛnyi Joseph Smith mpo hyiaa nsɔhwɛ yi. Ɔbɔɔ mpaa dze serɛɛ mboa ber a nna wɔnye no ato efiadze wɔ Liberty, Missouri no. Nna oedzi nokwar ama Ewuradze. Oenyin wɔ krɔnkrɔnyɛ mu. Naaso ɔtsee nkã dɛ wɔdze enyigye akam no.

Ewuradze kyerɛkyerɛɛ no abotar adzesuadze a hɛn nyina yebehia no ber bi, na annhwɛ a, mber tsentsen wɔ hɛn abrabɔ nsɔhwɛ mu no. Ewuradze n’asɛm a Ɔdze maa No nkɔnhyɛnyi nokwafo a oruhu amandze no nye yi:

“Na sɛ wɔtow wo kyen mona mu, anaa wɔdze wo hyɛ ewudzifo nsa, na wobu wo okumfɔ; sɛ wɔtow wo kyen po bun mu; sɛ po asorɛkye nye wo dzi aper; sɛ ehum dzendzen bɛyɛ wo tamfo; sɛ sor yɛ kebii, na abɔdze-dze nyina bɔ mu siw wo kwan, na iyinom nyina ekyir no, sɛ hɛl ankasa bue n’anomu wɔ wo do a, me babanyin, hu dɛ dɛm ndzɛmba yinom nyina bɛma wo ntɔhunii, na ɔbɛyɛ wo mfaso.

“Nyimpa Ba no duaa iyinom nyina mu. Ana eyɛ kɛse sen no?

“Dɛm ntsi, mma mmpa abaw, na asɔfodzi no bɛka wo nkyɛn; ɔahyehyɛ n’ahe ama hɔn, worunntum nntra. Wonyim wo nda, na wɔnnkɛtsew wo mfe do; dɛm ntsi, mma nnsuro dza nyimpa bɛyɛ, osiandɛ Nyame nye wo wɔ hɔ afebɔɔ kesi afebɔɔ.”¹¹

Nkyerɛkyerɛ adzesuadze dɛmara na Ewuradze dze maa Job, a odua nsɔhwɛ yaayaw mu ma ɔma kwan ma Werdambɔ no dzii dwuma ma ɔbɛyɛɛ krɔnkrɔn ara yie. Yenyim dɛ Job yɛ krɔnkrɔn, fi nyienyim nsɛm a yɛwɔ wɔ noho: “Ɔbarimba bi wɔ Uz asaase do a ne dzin dze Job; na ɔbarimba no dzi mu na ɔtsen, na obi a osuro Nyankopɔn na okyir bɔn a.”¹²

Ekyir no ɔyeew n’ahonyadze, n’ebusua, na n’apɔwmudzen mpo. Hom bɛkaa dɛ Job gyee no krɔnkrɔnyɛ kɛse a, oedua abrɛbrɛse kɛse do enya, ma ɔama ɔabɛfata enyigye a ɔkrɔn no, no ho kyim. Ɔyɛɛ Job dɛ krɔnkrɔnyɛ no dze awerɛhow aba.

Naaso Ewuradze maa Job ntsentsenee adzesuadze dɛ ma Ɔdze maa Joseph Smith no. Ɔmaa Job dze sunsum mu enyiwa hwɛɛ n’akomayaw gyinabew no. Ɔsee dɛ:

“Afei bɔ w’asen do dɛ barimba; Na mibebisa wo, na kã kyerɛ me.

“Aber a motoo asaase ne fapem no na ɔwo ewɔ hen? Sɛ ewɔ ntseasee a, kã ɛ.

“Woana na ɔdze no nsusui too hɔ, sɛ inyim a? Anaa woana na ɔtseen ahoma mu wɔ do?

“Ebɛnadze do na wɔdze ne fapem tsintsimii? Anaa woana na ɔdze kutuwdo-bo no toe?

“Aber a adzekyee nworaba bɔɔ mu toow ndwom, na Nyame mba nyinara bɔɔ ose wɔ enyigye ntsi?”¹³

Nkyii, Job nuu noho ekyir no dɛ ɔkaã dɛ Nyame annye no enndzi no yie no, wɔmaa Job kwan ma ohun no nsɔhwɛ wɔ kwan a ɔkrɔn na ɔyɛ krɔnkrɔn mu. Nna oenu noho.

“Nna Job buaa Ewuradze, na ɔsee no dɛ,

“Minyim dɛ ɔwo itum adze nyinara yɛ, na dɛ wo tsirmpɔw biara worunntum nnsiw no kwan,

“Woana nye nyia okwetsir nyimdzee huntsa apam enyi yi? dɛm ntsi na mekã dza menntse ase yi, ndzɛmba a ɔyɛ nwanwa dodow ma me a minnyim.

“Meserɛ wo, tsie, na menkasa, mibebisa wo, na akã akyerɛ me.

“Ɔnam asowa ne ntsee do na metsee wo nkã; na afei dze m’enyiwa tua wo.

“Dɛm ntsi na mopow moho, na munu moho wɔ dɛtse nso mu.”¹⁴

Job nuu noho ekyir no ma ɔbɛyɛɛ krɔnkrɔn yie no, Ewuradze hyiraa no bor dza ɔayew nyina do. Mbom bia nhyira kɛse koraa Job nyae nye krɔnkrɔnyɛ ntowdo a oduaa abɛbrɛsɛ na nnuhu mu no nyae. Nna ɔafata dɛ onya enyigye kɛsenara wɔ nda wɔaka a ɔdze bɛtsena ase no mu.

Krɔnkrɔnyɛ kɛse mmba ɔnam dɛ ebisa ara. Ɔbɛba ber a yɛreyɛ dza Nyame hia ma wɔasesã hɛn no.

President Russell M. Nelson ama hɛn dza ɔyɛ me dɛ ɔyɛ afotu pa mapã wɔ mbrɛ yɛbɔkɔ kan wɔ ahyɛmu anamɔn kwan no do akɔ krɔnkrɔnyɛ kɛse mu no. Ɔkyerɛɛ kwan no ber a otuu fo dɛ:

Dua ndzeyɛɛ na papayɛ nkakrankakra da kor biara do—fa nya daa daa nnuho ho ahoɔdzenhyɛ tum ho sũahu.

Sɛ yesan mu yi dɛ yebonu hɛnho a, yɛfa dɛ yɛbɛsesã. Yɛma Agyenkwa no kwan ma ɔsesã hɛn ma yɛfa hɛn tam mapã no fura. Yɛsan mu yi dɛ yebenyin sunsum mu na yeenya enyigye—hɛn mponee ho enyigye wɔ No mu. Sɛ yesan mu yi dɛ yebonu hɛnho a, yɛfa dɛ yɛbɛyɛ tse dɛ Jesus Christ ara yie!”

President Nelson kɔr do maa hɛn nkuranhyɛ yi wɔ hɛn mbɔdzembɔ dɛ yɛbɛyɛ krɔnkrɔn ara yie no: “Ewuradze n’enyi nnda hɛn ahotsewyɛ seisei … Naaso N’enyi da kwan dɛ hɛnho bɔkɔ do atsew. Daa daa nnuho nye ahotsew no kwan no.”¹⁵

President Dallin H. Oaks ne kasaa wɔ ndaansa ehyiadzi bi mu no, so boaa me ma muhun no pefee ara yie mbrɛ yebesi benyin wɔ krɔnkrɔnyɛ mu na mbrɛ yebotum ehu dɛ yɛrebɛn ho. Ɔkãa dɛ: “Yesi dɛn yenya sunsum mu atsenkã? Yesi dɛn nya dɛm krɔnkrɔnyɛ dzibew a yebotum enya Sunsum Krɔnkrɔn no ne daa daa anyɛnkoyɛ no? Yebesi dɛn bɔhwɛ na yeker wiadze ndzɛmba a yɛdze onnyiwiei nhumu?”¹⁶

President Oaks ne nyiano dze gyedzi kɛse wɔ Jesus Christ, hɛn Agyenkwa dɔfo no, hyɛ ase. Ɔno gya hɛn ma yɛhwehwɛ bɔnfakyɛ dabiara na yɛkaa daa daa ber a yerisie Ne mbrasɛm no. Dɛm gyedzi kɛse wɔ Jesus Christ mu no ba ber a daa daa yɛmee wɔ N’asɛm mu.

Ndwom no “More Holiness Give Me” susu kwan bi a idze bɔbɔ mpaa ebisa mboa ama ayɛ krɔnkrɔn yie. Ɔkyerɛwfo no susu dɛ krɔnkrɔnyɛ no a yerohwehwɛ no yɛ akyɛdze a ofi Nyame dɔfo a, Ɔdze ma mber tsentsen mu, yɛayɛ dza yebotum ayɛ nyina ekyir no. Hom kaa nyiyimu no a odzi ewiei no:

Mbrɛ hɛn ankorankor gyinabew tse biara no, bea biara a yɛbɔwɔ wɔ ahyɛmu anamɔn kwan do rokɔ fie no, nkyɛ hɛn mpaabɔ ebisadze ma krɔnkrɔnyɛ kɛsɛ no woeyi ano. Minyim dɛ wɔdze hɛn ntotɔserɛdze no rema no, hɛn enyigye bɔdɔɔ sõ. Ɔbɛba nyaa, naaso ɔbɛba. Mowɔ awerɛhyɛmu fi Ɔsor Egya dɔfo na No Dɔba, Jesus Christ hɔ.

Megye dase dɛ Joseph Smith nna ɔyɛ Nyame no nkɔnhyɛnyi, dɛ President Russell M. Nelson nye hɛn nkɔnhyɛnyi tseasefo ndɛ. Nyame Egya no tse ase na Ɔdɔ hɛn. Ɔpɛ dɛ yɛsan ba fie ba No hɔ dɛ ebusua ebusua. Hɛn Agyenkwa dɔfo to nsa frɛ hɛn dɛ yɛnka no do wɔ hɛn hɔ akwantu no mu. Wosiesie kwan no. Wɔ Jesus Christ ne dzin krɔnkrɔn no mu, amen.