Adasefo, Aaron Asɔfodzi Quorum horow, na Young Women Adzesũa

Enuanom na nkyerɛbaa adɔfo, ɔyɛ me enyigye dɛ menye hom wɔ ha bio wɔ wiadze mfɛndzanan ehyiadzi mu. Dapɛn yi mu no, wɔdze nhyehyɛɛ mu nsesã a ɔfa hɔn a wobotum asom dɛ adasefo wɔ enuma na nsɔwano ayɛdze ho nkaabɔ too Asɔrmba no enyim. Mebɛpɛ dɛ mekyerɛ dɛm nsɛngyinado ebiasa no mu yie.

1. Obiara a okita temple recommend anaa limited-use recommend a ɔmmpaa ho no, obotum ayɛ dasefo ama owufo ananmusinyi enuma.

2. Asɔrba biara a agye ne endowment na okita temple recommend a ɔmmpaa ho no botum asom dɛ dasefo ma atseasefo na ananmusinyi nsɔwano ayɛdze.

3. Asɔrba biara a woenuma wo no botum asom dɛ dasefo wɔ ɔtseasefo enuma. Iyi fa enuma nyina a wɔnnyɛ no wɔ temple mu no.

Nhyehyɛɛ yinom mu nsesã no yɛ ndzeyɛɛ kwan ara. Fapem nkyerɛkyerɛ na ahyɛmudzi no nsesãa. Wodzi mu wɔ ayɛdze horow nyina mu. Nsesã yinom wɔdɛ ɔboa ebusua ma wɔdze hɔnho hyɛ ayɛdze yinom mu ara yie.

Aber yi mebɛpɛ so dɛ menye hom kasa dze yɛ nyienyim ma nsesã a ɔfa hɛn mbabun na hɔn baanodzifo ho.

Hom bɛkaa dɛ maato nsa afrɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo mu mbabun dɛ wɔmbɛkã Ewuradze ne mbabun nsordaafo kuw ho na wɔnkã dwuma kɛse ɔkɔ do wɔ wiadze ndɛ no ho—Israel mboano no.¹ Motoo nsato yi maa hɛn mbabun osiandɛ wɔwɔ akyɛdze soronko a wotum tsen kɔ binom hɔ na wɔkyɛ dza wɔgye dzi wɔ kwan a otu aso yie. Mboano dwuma no yɛ ɔfã tsitsir wɔ yɛroboa esiesie wiadze yi na no mu nkorɔfo ama Ewuradze Ne Mbae a Otsĩa Ebien no.

Ward biara mu no, bishop a, ɔyɛ Nyame no somfo mapã no, na ɔda Ewuradze ne mbabun nsordaafo kuw no ano. N’asɛdze tsitsir a odzi kan nye dɛ ɔbɔhwɛ no ward mu young men na young womenfo no do. Bishop no na n’apamfo na wɔhwɛ Aaron Asɔfodzi quorum horow na Young Women adzesũa mbea no do.

Nsesã no a yɛdze roto gua sesei no no botae nye dɛ ɔbɔboa young men na young women no ma woetu hɔn ankorankor nkrabea krɔnkrɔn no mpon. Yɛpɛ so dɛ yɛhyɛ Aaron Asɔfodzi quorum horow na Young Women adzesũa mbea no dzen na yɛma bishopfo na baanodzifo mpanyimfo no abamba ber a wɔsom ebusuasantsen a wɔreba yi.

Afei Elder Quentin L. Cook bɛkasa afa nsesã no a ɔfa young men ho no. Na anafua yi, wɔ wiadze mfɛndzanan mbaa nhyiamu no, Akyerɛbaa Bonnie H. Cordon, Wiadze Mfɛndzanan Young Women President, bɛkasa afa nsesã no a ɔfa young women ho.

President a Odzi Kan na n’Apamfo na Duebien no abɔmu efua mbɔdzembɔ yinom a ɔbɛhyɛ hɛn mbabun no dzen no n’ekyir. Yɛdɔ hɔn papaapa na yɛbɔ mpaa ma hɔn! Hɔn nye “Israel enyidado no, Zion nsordaafo no, anohoba da mba no.”² Yɛkyerɛ hɛn awerɛhyɛmu mapã wɔ hɛn mbabun mu na hɛn enyisɔ ma hɔn. Wɔ Jesus Christ ne dzin krɔnkrɔn no mu, amen.