Yɛ Nokwafo, Nnyɛ Okyingyefo

Minyim pefee dɛ hom mu pii wɔ suahu a ɔtsetse dɛm. Abaefo mfir ahorow no hyira hɛn wɔ akwan pii mu. Wotum ma yɛnye anyɛnkofo na ebusuafo dzi nkitaho, yenya nkaabɔ, na yenya wiadze mu nsɛmnsɛm a orisisi. Naaso, wobotum so adan hɛn enyi efi nkitahodzi a ohia ho: yɛnye ɔsor nkitahodzi.

Misi dza hɛn nkɔnhyɛnyi, President Russell M. Nelson akã no do:“Yɛtse wiadze a ɔyɛ kyinkyinɛnn na wentwiwentwi rodɔɔ sõ mu. Ɔmamfo Amandzɛɛbɔdze a ber biara nsa kã na dawurbɔ a wɔbɔ no adzekyee kesi adzekyee bio, dze nsɛmnsɛm hyɛ hɛn do. Sɛ yebenya enyidado apa ndze horow na nyimpa adwenkyerɛ a wɔkõ tsia nokwar no mu a, nna otwar dɛ yesũa mbrɛ yɛbɛnya nyikyerɛ.”

President Nelson kɔɔr do bɔɔ kɔkɔ dɛ, “nda a ɔreba mu no, yennkotum atsena ase sunsum mu a Sunsum Krɔnkrɔn ne bambɔ, n’akwankyerɛ. ne kyerɛpɛn, n’awerɛkyekyer, na ne daa daa nhyɛdo nnka ho.”¹

Mfe pii a abasen kɔ no, President Boyd K. Packer kãa nwansan kuw bi a, osian esukwankyɛba a ɔtɔ kɛse no ntsi, woenntum annsan akɔ hɔn tsenabea na ɔkɔm dzee hɔn ho asɛm. Nyimpa bi a wɔwɔ adwenpa, bɔɔ mbɔdzen dɛ wɔbɛgye nwansan no nkwa ntsi no, wobohueii nkyɛkyɛr a wɔawow ahɛn amaamã boguu bea no—ɔnnyɛ dza nwansan no taa dzi, naaso nna wɔwɔ enyidado dɛ annyɛ koraa no nwansan no dze botwa awɔw no. Awerɛhow mu ara, ekyir no wohun dɛ nwansan no dodowara ewuwu. Nna woedzi nkyɛkyer no, naaso wɔannyɛn hɔn, wɔkyeer kɔm dze wuwui a nna hɔn yafun ahyehyɛ.²

Nsɛm pii a wɔhyɛ hɛn do wɔ nkaabɔ ber mu no no sunsum mu sɛfo nye wɔdze nkyɛkyɛr reyɛn nwansan—yebotum edzidzi da mu no nyina naaso ɔrennyɛn hɛn.

Henfa na yenya nokwar sunsum mu edziban? Ɔtaa dɛ, ɔnnkɔdo wɔ ɔmamfo amandzɛɛbɔdze do. Yehu no ber a “yɛper [hɛn] kwan kɔ kan” wɔ ahyɛmu anamɔn kwan no do, “yɛkɔdo suo dadze poma no mu dzendzen, na yedzi nkwadua n’eduaba no bi.³ Iyi n’asekyerɛ nye dɛ otwar dɛ yɛhyɛdaa nya mber dabiara dze twe hɛnho fi wiadze ho na yɛnye sor dzi nkitaho.

N’adaa sõ mu no, Lehi hun nkorɔfo a wodzii eduaba no bi na mbom wogyaa mu osian dan kɛse pontonn, wiadze ahantan ne nhyɛdo ntsi.⁴ Ɔnnyɛ nwanwa ma hom mbabun dɛ wɔbɛtsetse hom wɔ Latter-day Saint fie, wɔbɔkɔ Asɔr nhyiamu na adzesũa horow nyina yie, mpo wɔbɛyɛ temple ayɛdze horow, na afei wɔbɛman akɛfa “akwan a wɔabra hɔn ho no do na [wɔ] bɛyew.”⁵ Ebɛn ntsi na iyi si? Mpɛn pii no ne siantsir nye dɛ, ber a nna ɔyɛ dɛ wɔreyɛ sunsum mu ndzɛmba no, nna nokwar mu ara wɔnnsakyeree. Wodzidzii naaso wɔannyɛn hɔn.

Mfonyin

Mbabun Dwumadzi

N’afã bi so, meehyia hom mu Latter-day Saintfo mbabun pii a wɔhyerɛn, wɔwɔ nyimdzee, na wɔyɛ anokwafo. Hom nyim dɛ hom yɛ Nyankopɔn ne mbambanyin na mbabaa na Ɔwɔ edwuma dze ma hom ma wɔayɛ. Hom dze hom, “akoma, ahom, adwen, nye ahoɔdzen nyina dɔ Ewuradze.”⁶ Hom sie hom ahyɛmudzi horow na hom som binom, a wɔhyɛ ase wɔ fie. Hom dze gyedzi dzi dwuma, hom nu homho na hom tu mpon dabiara, na iyi dze dɛwdzi a ɔmmbɔadze da brɛ hom. Hom reyɛ ahosiesie ama temple nhyira na akwanhorow bi so a hom benya dɛ Agyenkwa n’akadofo anokwafo. Na hom roboa esiesie wiadze no ama Mbae a Otsĩa Ebien no a, hom refrɛ obiara dɛ wɔmbra Christ hɔ na wommbenya No Werdambɔ tum no. Hom nye ɔsor dzi nkitaho.

Mfonyin

Mbabun temple akwantu

Nyew, hom hyia ɔhaw horow. Naaso dɛmara na mbasantsen biara so hyia. Nda yinom yɛ hɛn dze, na yehia dɛ yɛyɛ anokwafo, nnyɛ ekyingyefo. Megye dase dɛ Ewuradze nyim hɛn haw horow ho nsɛm, na ɔnam President Nelson ne banodzi dwuma do no, Orisiesie hɛn ma yeehyia hɔn. Megye dzi dɛ nkɔnhyɛnyi ne frɛ a ɔnnkyeree wɔ fie a asɔr yɛ ne fapem, dza yɛyɛ no wɔ hɛn asɔradan mu boa no no,⁷ wɔahyehyɛ no dɛ ɔbɔboa hɛn ma yɛatsena ase—mpo yeenyin yie—wɔ nda yi sunsum mu edziban kɔm atahye yi.

Fie fapem asɔr n’asekyerɛ nye dɛn? Efiefie tum yɛ asorɔtow koraa wɔ wiadze nyina. Ebia hom wɔ ebusua mu a wɔawɔ Asɔr no mu ebusuasantsen pii mu. Anaa hom nko nye Asɔr mu ba wɔ hom ebusua mu. Ebia hom yɛ awarfo anaa ɔhokwafo, hom wɔ mba anaa hom nnyi bi.

Hom gyinabew horow mmfa ho no, hom botum ayɛ hom fie asɛmpa suabea tsitsir na asetsena. N’asekyerɛ tsiabaa nye dɛ homankasa hom bɛfa hom nsakyeree na sunsum mu mpontu asodzi ato hom do. N’asekyerɛ nye dɛ hom bedzi President Nelson n’afotu do “dze [ bɛsesã hom] fie ma ayɛ gyedzi guandɔbea.”⁸

Abɔnsam bɔbɔ mbɔdzen adzɛfɛwdzɛfɛw hom dɛ sunsum mu edziban nnhia, anaa ndaadaa mu yie ara dɛ, obotum atweɔn. Ɔno nye enyidan wura na ber sɛɛ ne farbaa. Ɔbɔtwe hom adwen akɔ ndzɛmba a ɔyɛ dɛ no ho hia do, naaso nokwar no, no ho nnhia. Ɔbɛma hom “adwendwen na hom ahaw homho wɔ ndzɛmba pii ho” na hom egya “adze kor [a] ohia.”⁹

Mbrɛ m’enyi si sɔ me “abaatan pa,”¹⁰ a wɔdze sunsum mu edziban, ɔdɔ nkitahodzi, na agodzi dwumadzi a odzi mu, tsetsee hɔn ebusua daa daa wɔ fie. Nkyerɛkyerɛ a wɔdze maa me wɔ me mbabun mu no ama meegyina yie. Abaatan, meserɛ hom nye hom mba nnya nkitahodzi a no mu yɛ dzen. Wohia hom mber no dodow, nnyɛ kakra.

Sɛ hom yɛ a, Asɔr no wɔ hɔ dɛ ɔboa hom. Hɛn sũahu horow wɔ asɔr botum ahyɛ sunsum mu edziban a ɔwɔ fie no dzen. Ntsi afe yi mu no, yeehu Asɔr mboa yi a ɔtse dɛm wɔ Sunday Skuul na Primary. Yebohu no dodow so wɔ Aaron Asɔfodzi na Young Women nhyiamu horow so mu. Ɔhyɛ ase Sanda 2020 no, wɔbɛyɛ nsesã kakra wɔ nwomasua mu ama nhyiamu horow yinom. Ɔbɔkɔ do etsim wɔ asɛmpa nsɛngyinado a ohia do, mbom wɔdze nsɛntsir no bɔtoto Come, Follow Me—For Individuals and Familes ho. Iyi yɛ nsesã kakrabaa, naaso obotum enya nsunsuando kɛse wɔ mbabun hɔn sunsum mu edziban do.

Ebɛn mboa asorɔtow bi so na Asɔr no dze ma? Yɛkɔ asɔr a yedzi sacrament no, a ɔboa hɛn ma dapɛn biara no yɛsan yɛ hɛn enyimpi si ma Agyenkwa no fofor. Na yɛkɔ asɔr a yɛnye agyedzifo bi so a wɔayɛ ahyɛmudzi dɛmara no boa ano. Ɔdɔ nkitahodzi a yɛnye Jesus Christ n’esuafo mfɛfo nya no botum ayɛ tum mboa ama hɛnara hɛn fie-nhyiamu osuanyiyɛ.

Mber a midzii mfe 14 no, m’ebusua tuii kɛtsenaa beebi fofor. Afei, bia iyi nnyɛ dɛ ma ɔyɛ esian huhu ma hom, naaso wɔ m’adwen mu, dɛm aber no, nna ɔyɛ dzen papaapa. Nna ɔkyerɛ dɛ nkorɔfo a minnyim hɔn na wobotwa moho ehyia. Nna ɔkyerɛ dɛ young men a wɔwɔ mo ward no bɔkɔ skuul fofor asen medze. Na wɔ me mfe 14 adwen mu no, modwendween dɛ, “M’awofo besi dɛn botum ayɛ me dɛm?” Nna ɔyɛ dɛ wɔasɛɛ m’abrabɔ

Naaso, ɔnam hɛn Young Men dwumadzi horow do, mutumii nye mo quorumfo nkaafo no nyaa nkitahodzi, na wɔbɛyɛɛ m’anyɛnkofo. Dza ɔkã ho no, bishop na n’apamfo na Aaron Asɔfodzi afotufo hyɛɛ ase dɛ wɔrenya enyikadze tsitsir bi wɔ m’abrabɔ mu. Wɔbaa me mbirikatu akansidze. Wɔkyerɛɛw me nkurahyɛ nsɛnsin a medze esie bɛpem ndɛ. Wɔkɔr do nye medzii nkitaho ber a mokɔr kɔlegye na ber a mekɛyɛɛ asɛmpakãnyi. Nna hɔn mu kor mpo wɔ wimuhɛn gyinabea hɔ ber a mebaa fie. Mebɛda enuanom apapafo yinom ase daa wɔ hɔn dɔ na enyidadoadze a ɔwɔ sor nkabɔmu ho. Wɔkyerɛɛ me ɔsor kwan, na abrabɔ bɛyɛɛ ahomka, enyigye, na dɛwdzi.

Hɛn a yɛyɛ, awofo na baanodzifo, besidɛn aboa mbabun no ma woehu dɛ wɔnnyɛ ankonam ber a wɔnantsew ahyɛmu anamɔn kwan no do? Dza ɔkã yɛrekyekyer ankorankor nkitahodzi ho no, yɛto nsa frɛ hɔn wɔ mboano akɛse na nkakramba mu—ofi FSY ehyiadzi horow na mbabun asesebɔ dze kesi dapɛn dapɛn quorum anaa adzesũa dwumadzi horow mu. Mma hom mmbu ahoɔdzen a ofi wɔnye binom a hɔn so wɔrobɔ mbɔdzen dɛ wɔbɛyɛ dzen no aboa ano egyina etsipɛn no totooba. Bishopfo na baanodzifo nkaa no, meserɛ, hom enyi ntsim dɛ hom rema mbofra na mbabun a wɔwɔ hom ward no edziban do. Wohia hom mber no dodow, nnyɛ kakra.

Sɛ eyɛ baanodzinyi, fipamfonyi, quorumba, anaa ne tsiabaa Saint fɛfo o, sɛ ewɔ ho kwan dɛ inya nhyɛdo wɔ abofra bi n’abrabɔ mu, boa no ma ɔnye sor nnya nkitahodzi. Wo nhyɛdo no botum ayɛ pɛpɛɛpɛ dɛ “Asɔr mboa” no a dɛm abofra no hia no.

Enuanom na nkyerɛbaa, megye dase dɛ Jesus Christ na ɔda Asɔr yi ne tsir. Ɔrema hɛn baanodzifo no nkenyan na ɔrekyerɛ hɛn kwan kɔ sunsum mu edziban a yehia dze atsena ase ho na yeenyin yie wɔ nda a odzi ekyir mu. Sunsum mu edziban no bɔboa hɛn ma yɛayɛ anokwafo na nnyɛ ekyingyefo. Jesus Christ ne dzin mu, amen.