Ewiei Nsɛm

Enuanom na nkyerɛbaa adɔfo, yɛaba ehyiadzi yi a ɔayɛ atsenkã yi n’ewiei, yɛda Ewuradze ase wɔ nkenyan nsɛm na ndwom a wɔama hɛn ntowdo. Yɛamee wɔ sunsum mu ampaara.

Yenyim dɛ Jesus Christ asɛmpa a wɔdze asan-ananmu aba no dze enyidado na enyigye bɛba nkorɔfo a wɔbɛtse na wɔbɛyɛ aso ama Ne nkyerɛkyerɛ no. Yenyim so dɛ fie kor biara botum abɛyɛ gyedzi krɔnkrɔn bea, a asomdwee, ɔdɔ, na Ewuradze no Sunsum botum atsena.

Nokwar, Nsan-ananmu no n’egudzi a ɔkrɔn no nye temple krɔnkrɔn no. N’ayɛdze krɔnkrɔn na ahyɛmudzi no hia tsitsir ma wɔdze esiesie nkorɔfo a wɔayɛ krado dɛ wɔbɛgye Agyenkwa no wɔ Ne Mbae a Otsĩa Ebien no. Sesei yɛwɔ temple dodow 166 [ɔha eduosia esia] a woetu ahyɛ Nyame nsa, na pii so reba.

Wɔbɛyɛ fi mbuei ansaana woetu temple fofor anaa ma woesiesie biara no ahyɛ Nyame nsa. Anyɛnkofo pii a wonnyi hɛn som no mu no bɛba dɛm temple nserahwɛ no na wobosũa biribi afa temple nhyira horow ho. Na ahɔho yinom mu binom benya nkenyan dɛ wobohu bi akã ho. Binom bebisa efi hɔn akoma mu mbrɛ wobesi bɛfata temple nhyira horow no.

Dɛ yɛyɛ Asɔrmba yi, obehia dɛ yɛyɛ ahoboa dɛ yebeyi hɔn nsɛmbisa no ano. Yebotum akyerɛkyerɛmu dɛ temple nhyira no wɔ hɔ ma obiara na nkorɔfo nyina a wɔbɛyɛ ahosiesie no. Naaso ansaana wɔbɛhɛn temple a woetu ahyɛ Nyame nsa no, ɔsɛ dɛ wɔfata ana. Ewuradze pɛ dɛ Ne mba nyina dze hɔnho hyɛ onnyiewiei nhyira no a nsa kã no wɔ Ne temple krɔnkrɔn mu no mu. Ɔakyerɛ dza nyimpa kor biara otwar dɛ ɔyɛ dze fata dɛ ɔbɛhɛn Ne fi krɔnkrɔn no mu.

Bea pa a ibotum ahyɛ dɛm adzekyerɛ kwan yi ase nye dɛ ibɛma wɔahyɛ nsɛm a woekrukye no temple no ho no nsew: “Krɔnkrɔnyɛ ma Ewuradze; Ewuradze ne Fi.” President Henry B Eyring n’asɛm ndɛ na binom pii hɔn dze no ekenyan hɛn dɛ yɛbɛyɛ krɔnkrɔn ara yie. Temple kor biara yɛ krɔnkrɔn bea; temple ayɛdzegyenyi biara bɔ mbɔdzen dɛ ɔbɛyɛ krɔnkrɔn ara yie.

Ahwehwɛdze nyina a wohia dze ahɛn temple mu no fa ankorankor krɔnkrɔnyɛ ho. Ama wɔdze esusu dɛm kradoyɛ no, obiara a ɔpɛ dɛ onya temple nhyira no bɛyɛ kokoamu mpɛnsapɛnsamu ebien: odzi kan ɔnye bishop, bishop ɔpamfo, anaa nkorbata president; otsĩa ebien no, ɔnye stake anaa asɛmpakã president anaa n’apamfo no mu kor. Dɛm kokoamu mpɛnsapɛnsamu no, wobisa nsɛmbisa horow.

Wɔayɛ nsesã kakra wɔ nsɛmbisa no mu ndaansa yi ama ne ntseasee no aayɛ pefee. Mebɛpɛ dɛ menye hom bɔbobɔ do sesei.

1. Ana ewɔ gyedzi na dasegye wɔ Nyame, Onnyiewiei Egya no; Ne Ba, Jesus Christ, na Sunsum Krɔnkrɔn no mu a?

2. Ana ewɔ dasegye wɔ Jesus Christ No Werdambɔ no mu na Ne dzibew dɛ w’Agyenkwa na Pomfo?

3. Ana ewɔ dasegye wɔ Jesus Christ asɛmpa ne Nsan-ananmu ho?

4. Ana ema Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no ne President no tsipia dɛ nkɔnhyɛnyi, adzehunyi, nye nyikyerɛfo na dɛ ɔno nko nye nyimpa a ɔwɔ tumdzi dɛ ɔdze asɔfodzi nsaafee no nyina dzi dwuma?

   Ana ema Apamfo a wɔwɔ President a Odzi Kan na n’Apamfo mu, nye Asomafo Duebien no tsipiã dɛ, nkɔnhyɛfo, adzehufo, nye nyikyerɛfo?

   Ana ema Wiadze Mfɛndzanan Etumdzifo Etsitsir na sɔn mu Asɔr baanodzifo no tsipia?

5. Ewuradze ase dɛ ɔwɔ dɛ “[wɔ]yɛ ndzɛmba nyina wansawansa” wɔ N’enyim (Nkyerɛkyerɛ na Ahyɛmudzi 42:41).

   Ana ebɔ mbɔdzen dɛ w’adwendwen na wo ndzeyɛɛ bɛyɛ wansawansa su?

   Ana isie ahosan mbra no?

6. W’ebusua mu mba na binom mu no ana wo kokoamu na bagua mu suban kyerɛ dɛ idzi Jesus Christ N’Asɔr ne nkyerɛkyerɛ do?

7. Ana ifua anaa idzi adzekyerɛ, ndzeyɛɛ, anaa nkyerɛkyerɛ binom ekyir a ɔnye Jesus Christ N’Asɔr a ɔwɔ hɔ ma Nda a Odzi Ekyir Ahotseweefo dze no bɔ ebira a?

8. Ana ebɔ mbɔdzen dɛ ibesie Ahomgyeda no krɔnkrɔn, wɔ fie na asɔr nyina mu, ekɔ wo nhyiamu horow no, na eyɛ ahosiesie na idzi sacrament no emudzi mu; na ebɔ bra a ɔnye asɛmpa mbra na mbransɛm no saa?

9. Ana ebɔ mbɔdzen dɛ ibedzi nokwar wɔ dza eyɛ nyinara mu?

10. Ana eyɛ nyimpa a otua n’ebupɛn-du emudzi mu?

11. Ana etse Enyansasɛm no ase na idzi do a?

12. Ana ewɔ sikasɛm anaa asɛdze bi ma ɔhokãfo dadaw anaa mba a?

    Sɛ nyew a, ayɛ w’asɛdze yinom pɛpɛɛpɛ besi ndɛ?

13. Ana isie ahyɛmudzi a iyɛɛ no wɔ temple mu, a temple atar ne nhyɛe dɛ mbrɛ wɔkyerɛkyerɛɛ wo wɔ endowment mu no tse?

14. Ana bɔn akɛse wɔ w’abrabɔ mu ohia dɛ enye asɔfodzi tumdzifo siesie a, ɔkã wo nnuhu ho?

15. Ana esusu woho dɛ idzi mu dɛ ihɛn Ewuradze ne fi mu na ekɛyɛ temple ayɛdze horow?

Ɔkyena, temple recommend nsɛmbisa yinom no wɔbɛkyekyɛ ama Asɔr baanodzifo a wɔwɔ wiadze nyina mu.

Dza ɔkã wobeyiyi dɛm nsɛmbisa yinom ano nokwar mu nye dɛ, yɛtse ase dɛ temple ayɛdzegyenyi panyin biara bɛhyɛ asɔfodzi krɔnkrɔn atar no wɔ hɔn ntar a wɔhyɛ no ase. Iyi yɛ ngyinahɔmadze ma w’enyimpi si dɛ ebɔbɔ mbɔdzen dabiara ayɛ tse dɛ Ewuradze ara yie. Ɔkaa hɛn so dɛ yendzi nokwar mma ahyɛmu a yɛayɛ no da biara na yɛnantsew ahyɛmu anamɔn kwan no do da biara wɔ kwan kɔnkrɔn a ɔkrɔn mu.

Afei, mber kumabaa mu, mebɛpɛ dɛ menye hɛn mbaabun kasa. Yɛhyɛ hom nkuran dɛ hom mfata limited-use temple recommend. Wobebisa wo dɛm nsɛmbisa no a ɔfa wo ananmusinyi enuma na pisi ayɛdze ahoboaboa ho. Hɛn enyisɔ hom emudziyɛ na ɔpɛ dɛ hom dze homho bɛhyɛ temple edwuma krɔnkrɔn no mu. Yɛda hom ase!

Ankorankor emudziyɛ a wɔdze ba Ewuradze ne fi no hia ankorankor sunsum mu ahosiesie ara yie. Yɛdze Ewuradze no mboa no, biribiara nnyi a wonnkotum ayɛ. Akwan bi do, ɔyɛ mberɛw dɛ ibesi temple kyɛn ibesiesie nkorɔfo ama temple. Ankorankor emudziyɛ hia adwen na akoma a wɔasakyer emudzi mu dɛ ɔbɛyɛ tse dɛ Ewuradze ara yie, dze ayɛ kuromanyi nokwafo, ayɛ fasusu pa, na a nyimpa krɔkrɔn ara yie?

Megye dase dɛ dɛm ahosiesie dwuma dze nhyira a wonnkotum akan pii ba abrabɔ yi mu na nhyira a yennkotum esusu ho wɔ abrabɔ a ɔreba no mu, a ebusua tɔw no nsɔwdo daapem nyina “wɔ enyigye a onnyi ewiei da tsebea no mu” no kã ho.¹

Afei mebɛdan akɔ asɛngyinado fofor do: afe no ɔreba no mu nhyehyɛɛ. Fefɛw ber afe 2020 mu no, ɔbɛyɛ mfe 200 pɛpɛɛpɛ a Nyankopɔn yii Noho kyerɛɛ Joseph Smith, dza yenyim dɛ ɔyɛ Enyido-adzehu a Odzi Kan no. Nyankopɔn Egya no na No Dɔba, Jesus Christ, puei Joseph, ɔbabun a oedzi mfe 14 do. Dɛm asɛm no na ɔhyɛɛ Jesus Christ asɛmpa Nsan-ananmu ne mãhyɛ no ase, tse dɛ mbrɛ wodzii kan kãa no wɔ Bible Krɔnkrɔn no mu no.²

Nkyii ɔsor asomafo toatoaa do bae, a Moroni, John Onumanyi, na asɔpɔkan Asomafo Peter, James, na John. Binom so dzii do, a Moses, Elias, na Elijah kã ho. Kor biara dze ɔsor tumdzi a wɔdze hyira Nyame ne mba wɔ asaase do bio no, bae.

Anwanwadze mu ara, yeenya Mormon Nwoma no so: Jesus Christ N’Ahyɛmu kor so, a ɔyɛ kyerɛwsɛm a ɔkã Bible Krɔnkrɔn no ho. Nyikyerɛ a wɔdze epue guado dɛ Nkyerɛkyerɛ na Ahyɛmudzi na Bota a Ɔsom Bo Mapã no so atow hɛn ntseasee mu kɛsenara wɔ Nyankopɔn ne mbrasɛm na onnyiewiei nokwar ho.

Wɔdze asɔfodzi nsaafee na dzibew horow no asan ananmu aba a, Ɔsomafo, Eduosuon, patriarch, ɔsɔfo panyin, elder, bishop, kyerɛkyerɛnyi na deacon dzibew kã ho. Na mbaa a wɔdɔ Ewuradze no som akokodur mu wɔ Relief Society, Primary, Young Women, Kwesida Skuul, na Asɔr ɔfrɛ binom mu—a ne nyina yɛ Jesus Christ asɛmpa Nsan-ananmu wɔ ne mãhyɛ mu no n’afã tsitsir.

Dɛm ntsi, afe 2020 no wɔbɛfrɛ no afe aha ebien afrɛnhyia. Ebɔbira a ɔreba no, wiadze mfɛndzanan ehyiadzi no bɛyɛ soronko efi ehyiadzi nkaa no nyina ho. Abosoom esia a odzi do yi, mowɔ enyidado dɛ asɔrba na ebusua biara bɛyɛ ahoboa ama ehyiadzi soronko yi a ɔbɛkaa nsan-ananmu asɛmpa ne fapem no.

Bia hom bɛpɛ dɛ hom kenkan Joseph Smith n’asɛm a ɔfa Enyido-adzehu a Odzi Kan no a wɔakyerɛw no wɔ Bota a Ɔsom Bo Mapã no bio dze ahyɛ hom ahoboaboa ase. Afe a ɔreba no hɛn adzesũa wɔ Come, Follow Me mu no bɛyɛ Mormon Nwoma no. Bia hom bɛpɛ dɛ hom dwendwen nsɛmbisa etsitsir ho, tse dɛ, “M’abrabɔ besi dɛn asesã sɛ awerɛfir mu woyi nyimdzee a meenya efi Mormon Nwomaa no mu no fi hɔ a? anaa “Dza osisii wɔ Enyido-adzehu a Odzi Kan n’ekyir no, esi dɛn dze nsesã aba emi na m’adɔfo do. Nna afei so, nsa rutum akã Mormon Nwoma video horow no, bia hom bɛpɛ dɛ hom dze bɛkã hom ankorankor na ebusua adzesũa ho.

Yiyi wankasa wo nsɛmbisa. Yɛ ɔwoara wo nhyehyɛɛ. Fa woho hyɛ Nsan-ananmu enyimnyam kan no mu. Ereyɛ dɛm no, Ebɔbira a ɔreba no mu ehyiadzi no rennyɛ nwanwa nko; ɔbɛyɛ dza werɛ nnkefir da.

Afei muruwie no, migya hom mo dɔ na me nhyira dɛ hom mu kor biara nnya ahomkã na ɔnyɛ krɔnkrɔn ara yie, da kor biara rutwa mu no. No mu no, hom nkaa dɛ nyikyerɛ kɔ do wɔ Asɔr no mu na ɔbɔkɔ do wɔ Ewuradze no kwankyerɛ ase kɛpem dɛ “ “Nyame no botae nyina bɛhyɛ mã, na Jehovah Kokroko no ase dɛ woewie edwuma no yɛ.”³

Medze dɛm hyira hom, misi modɔ pi ma hom, na me dasegye dɛ Nyame tse ase! Jesus nye Christ no! Iyi nye N’Asɔr na yɛyɛ No nkorɔfo. Wɔ Jesus Christ ne dzin krɔnkrɔn no mu, amen.