Nsesã a Ɔbɛhyɛ Mbabun Dzen

Mbɔdzembɔ yinom, nye dza wɔbɔɔ ho dawur wɔ mfe kakra a abasen mu no, nnyɛ nsesã a wɔaatsew hɔn ho. Nsesã yi kor biara yɛ nhwɛdo a osisi enyim n’afa a ohia tsitsir dze behyira Ahotseweefo na woesiesie hɔn ma woehyia Nyankopɔn.

Nhwɛdo no n’afã kor fa ebusuasantsen a wɔreba no hɔn ho. Yɛreserɛ hɛn mbabun no dɛ wɔbɛbɛfa hɔnankasa hɔn ankorankor asodzii ato hɔn do wɔ mber a wosusoar no mu—a awofo na baanodzifo nnkɛgye dza mbabun botum ayɛ ama hɔnara hɔnho no ayɛ.⁵

Ndɛ yɛbɔ kuw mu nsesã ho dawur ma mbabun wɔ ward na stake mpɛnpɛndo ahorow mu. Dɛ mbrɛ President Nelson kyerɛkyerɛɛ mu no, Akyerɛbaa Bonnie H. Cordon bɛpɛnsapɛnsa nsesã mu ama Young Women ewimbir yi. Botae kor ma nsesã a mebɛpɛnsampɛnsamu sesei nye dɛ ɔbɛhyɛ hɔn a wokitsa Aaron Asɔfodzi, quorumfo, na quorum presidencyfo dzen. Nsesã yinom bata hɛn nyɛe wɔ Nkyerɛkyerɛ na Ahyɛmudzi 107:15 ho, a yɛkenkan dɛ, “Bishop na n’apamfo no nye asɔfodzi yi [Aaronic] ne, president na n’apamfo, na wokura dɛm asɔfodzi yi ho nsaafee anaa dɛ tumdzi.’’

Kyerɛwsɛm mu asɛdze kor ma bishop nye dɛ ɔbɔhwɛ priestfo hɔn do na ɔnye hɔn atsena ase wɔ baguabɔ mu, akyerɛkyerɛ hɔn hɔn ɔfese mu asɛdze horow no.⁶ Dza ɔkã ho no, ɔpamfo a odzi kan wɔ bishopric mu no benya asodzii tsitsir dze ama akyerɛkyerɛfo na ɔpamfo a otsĩa ebien no dze yɛ deaconfo.

Dɛm no ntsi, yɛdze bɛbata nyikyerɛ yi ho wɔ Nkyerɛkyerɛ na Ahyɛmudzi mu no, Young Men presidencyfo wɔ ward mpɛnpɛndo no begyae. Enuanom anokwafo yinom ayɛ papa dodow, na yɛkyerɛ hɛn enyisɔ ma hɔn.

Ɔyɛ hɛn enyidado dɛ bishopricfo bɛgyen hɔn enyi na hɔn mber yie ama young men hɔn asɔfodzi horow na wɔaboa hɔn wɔ hɔn quorum asɛdzi horow mu. Wɔbɛfrɛ Young Men mpanyimfo afotufo a wobotum no ma wɔaboa Aaron Asɔfodzi quorum presidencyfo na bishop na n’apamfo wɔ hɔn asɛdze horow mu.⁷ Yɛwɔ awerɛhyɛmu dɛ mberantsɛ na nkataasia beberee botum edzi dwuma yi konyimdzi mu na wɔaka ahyɛmudzi anamɔn kwan no do a hɔn enyi tsim hɛn mbabun no do ara yie.

Ewuradze ne nkenyan nhwɛdo mu no, bishop no wɔ asodzi ma obiara wɔ ward hɔ. Ohyira mbabun hɔn awofo dɛmara dɛ mbabun no. Bishop bi hun dɛ ber a ɔnye aberantsɛba bi a ɔnye ehuhu mfonyin ridzi aper bɔmu fa apam no, otumii boa aberantsɛba no wɔ no nnuho mu, nko ber a ɔboaa awofo no so ma wɔdze ɔdɔ na ntseasee dze maa no. Nna aberantsɛba no n’ayarsa yɛ ayarsa ma n’ebusua na ɔnam bishop a ogyina ebusua no nyina ananmu na otumii yɛɛ yie. Sesei aberantsɛba no abɛyɛ nyia odzi mu dɛ okitsa Melchizedek Asɔfodzi na etuhoakyɛ asɛmpasomafo.

Dɛ mbrɛ asɛm yi kyerɛ no, nsesã yinom:

• Boa bishopfo na hɔn apamfo ma woetsim wɔ hɔn asodzi a ohia dodoodow do ma mbabun na Primary mbofra.

• Ma aberantsɛba biara dze Aaron Asɔfodzi tum na dwumadzi horow no etsim wɔ nankasa n’abrabɔ na botae do.

Nsesã yinom san so:

• Tsĩ Aaron Asɔfodzi quorum presidencyfo no hɔn asodzi horow na kwan a wɔdze report ma bishopric no mu.

• Hyɛ mpanyimfo baanodzifo nkuran dɛ wɔmboa na wɔnyɛ nhwɛdofo mma Aaron Asɔfodzi quorum presidencyfo wɔ wɔrokrɔnn hɔn ɔfese mu tum na tumdzi no.

Dɛ mbrɛ yɛahyɛ no nsew no, nsesã yinom nnhuan bishop na n’apamfo no hɔn asodzi do mma nkataasia. Dɛ mbrɛ President Nelson kyerɛkyerɛɛ seseiara no, “[Bishop no n’] asodzii a dzi kan papaapa nye dɛ ɔhwɛ no ward mberantsɛ na nkataasia hɔn do.’’⁸

Hɛn bishopfo adɔfo edwumadzen yɛfo yinom besi dɛn bɛyɛ asodzi yi? Dɛ mbrɛ hom kaa no, wɔ afe 2018 mu no, wɔsesaa Melchizedek Asɔfodzi quorumfo dɛ wɔnye Relief Societyfo no mbɔmu yie mpo ndzi dwuma ama elderfo quorum horow na Relief Societyfo no, wɔ bishop n’akwankyerɛ ase no, etum aboa agye asodzii ahorow no a ohia a nnkyɛ nkaano no nna wodzi mber dodow no bi no. Asɛmpasomafo edwuma na temple na ebusua abakɔsɛm edwuma wɔ ward⁹—dɛmara dɛ erosom wardmba no dodow kã asodzii ahorow yinom ho.

Mfonyin

Bishop n’asodzii horow

Bishop no nnkotum dze asodzii ahorow yinom, tse dɛ mbabun, ɔdodow ɔtsɛmbuafo, ɔrohwɛ hɔn a wohia do, na ɔrohwɛ sikasɛm na honandua mu ndzɛmba do no ahyɛ obi ne nsa. Naaso, iyinom, yɛ kakra ara kyɛn dza nkaano no yɛtsee ase no. Dɛ mbrɛ Elder Jeffrey R. Holland kyerɛkyerɛɛ mu mfeda no mber a wɔdze Melchizedek Asɔfodzi quorumfo nsesã too gua no: “Nokwar, bishop no da ho yɛ ward no ne asɔfompanyin do ɔhwɛfo. [Elderfo quorum na Relief Societyfo] hɔn nkabɔmu fofor yi wɔdɛ ɔma ɔhwɛ Melchizedek Asɔfodzi na Relief Society hɔn edwuma do a onnkehia dɛ ɔno bɛyɛ kuw kor biara n’edwuma.’’¹⁰

Mfatoho, Relief Society president na elderfo quorum president, dɛ mbrɛ edwuma a wɔdze ama hɔn tse no, botum agye asɛdze kɛsenara dɛ ɔnye mpanyimfo fa apam—dɛ mbrɛ Young Women prsident so botum nye nkataasia afa apam. Ber a bishop no nko botum asom dɛ ɔdodow ɔtsɛmbuafo no, baanodzifo yinom so fata dɛ wonya nyikyerɛ fi sor a ɔbɔboa ɔhaw a onnhia ɔdodow ɔtsɛmbuafo anaa ma atseetsee kɛse biara nnkã ho.¹¹

Ɔno nnkyerɛ dɛ akataasiaba bi nnkotum anaa onnyi dɛ ɔnye bishop anaa n’awofo dzi nkɔmbɔ. Hɔn adwen no tsim mbabun do! Mbom ɔkyerɛ dɛ Young Women banodzinyi bi ne nsa botum ama ankorankor akataasiaba bi n’ehiadze yie. Nkataasia no hɔnho hia bishop na n’apamfo dɛmara dɛ mberantsɛ no so hɔnho hia, mbom yehu dɛ ahoɔdzen no fi ibenya Young Women baanodzifo a wɔyɛ dzen, wɔwɔ mber, na wɔwɔ botae a wɔdɔ dɛ wɔkyerɛkyerɛ a, wɔnngye adzesua presidencyfo hɔn asɛdze nnyɛ, mbom wɔboa mbabun no ma wodzi hɔn asɛdze no do konyim.

Akyerɛbaa Cordon nye hɛn bɛkyɛ enyigye nsesã ma nkataasia anafua yi. Naaso, emi, medze to gua dɛ afei ward Young Women presidentfo dze report bɛma ward no ne bishop pɛɛ na ɔnye no afa apam. Nkaano no, nna wobotum dze dwumadzi yi ahyɛ ɔpamfo bi nsa, naaso yɛrokɔ kan no, nkataasia no bɛyɛ nyia a okitsa nhwɛdo nsaafee ma ward no n’asodzii pɛɛ. Relief Society president no bɔkɔdo dze report ama bishop no akwantsen.¹²

Wiadze mfɛndzanan na stake mpɛnpɛndo dze, yɛbɔkɔdo enya Young Men presidencyfo. Stake mpɛnpɛndo no, high councilor na ɔbɛyɛ Young Men president¹³ na ɔnye high councilorfo a wɔhwɛ Young Women na Primary no, bɛkã Stake Aaron Asɔfodzi–Young Women Abaguafo no ho. Enuanom yinom nye stake Young Women president na n’apamfo bɛyɛ edwuma wɔ abaguafo yi mu. Stake president ne ɔpamfo tsena egua mu no, abaguafo yi hɔnho hia bɔdɔr osiandɛ wɔbɛyɛ nhyehyɛɛ na dwumadzi ahorow pii a wɔwɔ Mbofra na Mbabun nhyehyɛɛ mu no wɔ stake mpɛnpɛndo.

Stake president na n’apamfo hɔn akwankyerɛ ase no, high councilorfo yinom, botum asom dɛ aboafo ama bishop na Aaron Asɔfodzi quorum horow no wɔ kwan a ɔtse dɛ som no a high councilorfo no dze ma ward elderfo quorum horow no.

Dza ɔfa ho no, high councilor bi so botum asom dɛ Sunday Skuul president na, dɛ mbrɛ ohia no, obotum asom wɔ stake Aaron Asɔfodzi–Young Women abaguafo no do.¹⁴

Wɔbɔkɔ do akyerɛkyerɛkyerɛ kuw nsesã a ɔkã ho mu wɔ nkrataa a wɔdze bɛbrɛ baanodzifo no. Iyinom ho kã nsesã no ho:

• Ward mbabun baguabɔ bɛhyɛ bishop na n’apamfo mbabun baguabɔ ananmu.

• Yɛrennkã kasafua “Mutual’’ bio na ɔbɛyɛ “Young Women dwumadzi ahorow,’’ “Aaron Asɔfodzi quorum dwumadzi ahorow,’’ anaa “mbabun dwumadzi ahorow’’ na sɛ ɔbɛyɛ yie a wobɛyɛ no adapɛn dapɛn.

• Wɔbɛkyɛ ward sika no mu pɛpɛɛpɛr dze ama mberantsɛ na nkataasia dɛ mbrɛ mbabun no hɔn dodow yɛ wɔ kuw biara mu. Wɔdze dza oye ara bɛma Primary dwumadzi ahorow no.

• Mpɛnpɛndo nyinara no—ward, stake, na wiadze mfɛndzanan no—yɛdze dzin “kuw’’ bedzi dwuma akyɛn dzin “ekuwekuw’’ no. Wɔbɛfrɛ hɔn a wodzi Wiadze Mfɛndzanan Relief Society, Young Women, Young Men, Primary, na Sunday Skuul kuw horow no “Wiadze Mfɛndzanan Edzibewdzifo.’’ Wɔbɛfrɛ hɔn a wodzi kuw horow baano wɔ ward na stake mpɛnpɛndo no dɛ “ward edzibewdzifo’’ na “stake edzibewdzifo.’’¹⁵

Nsesã a wɔabɔ ho dawur no botum ahyɛ ase ntsɛmara a nkorbata, ward, district, na stake ahorow no ayɛ krado, mbom ɔwɔ dɛ Sanda 1, 2020 na wɔahyɛ ase. Sɛ wɔdze nsesã dadaw no kã nsesã yinom ho na wɔdze hyɛ mu a, ogyina hɔ ma sunsum mu na nhyehyɛɛ mbɔdzembɔ a ɔnye nkyerɛkyerɛ dɛ obehyira na wɔahyɛ banyin, ɔbaa, mbabun, na abofra biara dzen saa, dɛ ɔbɔboa kor biara ma oedzi hɛn Agyenkwa, Jesus Christ ne fasusu do, ber a yɛkɔ kan wɔ ahyɛmudzi anamɔn kwan no do.

Enuanom na nkyerɛbaa adɔfo, mobɔ anohoba na megye dase dɛ nsesã yinom a ntseasee wɔ mu no, wɔ President na nkɔnhyɛnyi, Russell M. Nelson ne nkenyan akwankyerɛ ase no bɛma Asɔrba biara tum na ɔahyɛ no dzen. Hɛn mbabun benya gyedzi kɛsenara wɔ Agyenkwa no mu, wobenya bambɔ efi abɔnsam no nsɔhwɛ mu, na woegyina a wɔayɛ krado dɛ wobehyia abrabɔ ne taferbanyinmbɔmu. Jesus Christ ne dzin krɔnkrɔn no mu, amen.