Parau mau vi’ivi’i ’ore, ha’api’ira’a tumu vi’ivi’i ’ore, ’e heheura’a vi’ivi’i ’ore
E fa’ariro na i teie ’āmuira’a ’ei taime nō te fa’a’amu’a i te mau parau poro’i nō roto mai i te Fatu nā roto mai i tōna mau tāvini.
E au mau taea’e ’e mau tuahine here, mānava i te taera’a mai i te ’āmuira’a rahi ! ’Auē te ’oa’oa ’ia tae mai i rotopū ia ’outou ! ’Ua feruri au ia ’outou fātata i te mau taime ato’a i roto i nā ono ’āva’e i ma’iri a’e nei. ’Ua pure au nō ni’a ia ’outou ’e nō ’outou. I roto i te mau hepetoma i ma’iri a’e nei, ’ua pure tu’utu’u ’ore au ’ia riro teie ’āmuira’a ’ei taime nō te heheura’a ’e nō te ferurira’a nō te feiā ato’a e ’imi nei i te reira mau ha’amaita’ira’a.
Tē ’oa’oa nei mātou ’ia paraparau fa’ahou atu ia ’outou nā roto atu i te pū ’āmuira’a. ’Aita e ta’ata i ni’a i te rahira’a o te mau pārahira’a, terā rā ’ua riro te taera’a mai o te tahi mau melo nō te pupu hīmene a te fare menemene ’ei nu’ura’a fa’ahiahia mau i mua. Tē fāri’i pōpou atu nei mātou ia ’outou ato’a i roto i teie ’āmuira’a nā te ātea noa, i te mau vāhi ato’a te reira ’outou.
Tei roto noa ā tātou i te mau vāvāhira’a a te TOVI-19 ’e tōna mau aveave. Tē ha’amāuruuru atu nei mātou ia ’outou nō tō ’outou ha’apa’ora’a i tā mātou mau a’ora’a ’e te mau a’ora’a a te feiā ’aravihi i te pae rapa’aura’a ma’i ’e te mau ti’a nō te fa’aterera’a hau i roto i tō ’outou iho mau ’oire.
Tē fa’atupu nei tātou i te ’āmuira’a rahi tāta’itahi ’ia au i te mau arata’ira’a a te Fatu.1 ’Ua taui tōna fa’anahora’a i te roara’a o te mau matahiti. I tō’u ’āpīra’a, e toru ’aore rā e maha mahana te ’āmuira’a. I muri mai, ’ua fa’aitihia mai te ’āmuira’a e piti mahana. ’Ua riro te poro’i tāta’itahi—i terā ra tau ’e i teienei—’ei hope’ara’a nō te hō’ē pure tu’utu’u ’ore ’e nō te hō’ē fa’aineinera’a rahi i te pae vārua.
Te mau huimana fa’atere rahi ’e te mau ti’a fa’atere rahi o te ’Ēkālesia ’o tē paraparau mai, e fa’atumu rātou i tā rātou parau poro’i i ni’a i tō tātou Fa’aora, ’o Iesu Mesia, tōna aroha ’e tōna mana fa’aora hope ’ore. ’Aita i ’ite-noa-hia a’e hō’ē taime i roto i te ’ā’amu o te ao nei ’a riro ai te ’itera’a i tō tātou Fa’aora ’ei ’ohipa faufa’a ’e te tītauhia nō te vārua ta’ata tāta’itahi. ’A feruri nā i te vitiviti rahi o te fa’atītī’aifarora’a i te mau mārōra’a ’ino nā te ao nei—’e tō roto ato’a i tō tātou orara’a tāta’itahi—’āhiri te mau ta’ata ato’a e mā’iti ’ia pe’e ia Iesu Mesia ’e ’ia ha’apa’o i tāna mau ha’api’ira’a.
I roto te reira huru vārua, tē ani atu nei au ia ’outou ’ia fa’aro’o e toru ’ohipa i roto i teie ’āmuira’a : te parau mau vi’ivi’i ’ore, te ha’api’ira’a tumu vi’ivi’i ’ore a te Mesia, ’e te heheura’a vi’ivi’i ’ore. Ta’a ’ē a’e i te mau mana’o fē’a’a o vetahi, tē vai mau ra te maita’i ’e te ’ino. Tē vai mau ra te parau mau hope roa—te parau mau mure ’ore. Hō’ē o te mau ’ati ’o tō tātou ’anotau, ’oia ho’i, e mea iti roa te ta’ata tei ’ite e fāriu ti’a i hea nō te fāri’i i te parau mau.2 E nehenehe tā’u e ha’apāpū atu ia ’outou ē, te mau mea tā ’outou e fa’aro’o i teie mahana ’e ananahi ’o te parau mau vi’ivi’i ’ore ïa.
E pūai rahi tō te ha’api’ira’a tumu vi’ivi’i ’ore a te Mesia. E taui te reira i te orara’a o te feiā ato’a e hāro’aro’a i te reira ’e e ’imi ’ia fa’a’ohipa i te reira i roto i tōna orara’a. E tauturu te ha’api’ira’a tumu a te Mesia ia tātou ’ia ’ite ’e ’ia vai noa i ni’a i te ’ē’a o te fafaura’a. ’Ia fa’aea noa ana’e tātou i ni’a i te reira ’ē’a piriha’o ’e te pāpū o te fafaura’a, e fa’ati’a te reira ia tātou ’ia fāri’i i te mau mea ato’a a te Atua.3 ’Aore e mea faufa’a atu i te mau mea ato’a a tō tātou Metua !
’Ei fa’ahope’ara’a, e fa’ariro te hō’ē heheura’a vi’ivi’i ’ore nō te mau uira’a i roto i tō ’outou ’ā’au, i teie ’āmuira’a ’ei ’āmuira’a faufa’a rahi ’e e’ita roa atu e mo’ehia. Mai te mea ’aita ā ’outou i ani atu ra i te aupurura’a a te Vārua Maita’i nō te tauturu ia ’outou ’ia fa’aro’o i te mea tā te Fatu e hina’aro ’ia fa’aro’o ’outou i roto i teie nā mahana e piti, tē ani atu nei au ia ’outou ’ia rave i te reira i teie taime. E fa’ariro na i teie ’āmuira’a ’ei taime fa’a’amu’a i te mau parau poro’i nō roto mai i te Fatu nā roto mai i tōna mau tāvini. E ha’api’i mai nāhea ’ia fa’a’ohipa i te reira i roto i tō ’outou orara’a.
Teie Te ’Ēkālesia a Iesu Mesia i te Feiā Mo’a i te mau Mahana Hope’a nei. ’O tātou tōna mau ta’ata i fafauhia. ’Ua parau te Fatu ē, e ha’ape’epe’e ’oia i tāna ’ohipa i tōna ra tau,4 ’e tē nā reira nei ’oia, ’e tē mara’a noa atu ra te vitivitira’a o te reira. ’Ua fāna’o tātou ’ia ’āmui i roto i tāna ’ohipa mo’a.
Tē ti’aoro nei au i te hō’ē ha’amaita’ira’a i ni’a i te feiā ato’a e ’imi hau atu ā nei i te māramarama, te ’ite ’e te parau mau. Tē fa’a’ite atu nei au i tō’u here ia ’outou tāta’itahi, i te i’oa o Iesu Mesia, ’āmene.