« Tē rahi na tō ’oe hina’aro iā’u i teie ? »

I te ’āva’e Novema 2019 ra, ’ua tere atu māua tō’u hoa i te Fenua Mo’a. I reira, ’ua hi’o tuatāpapa māua i te mau pāpa’ira’a mo’a nō ni’a i te orara’a o Iesu Mesia. I te hō’ē po’ipo’i ’ua ti’a māua i te pae tahatai, i te pae ’apato’erau hiti’a o te rā nō te Roto nō Galilea, penei a’e ’o te vāhi i fārerei ai Iesu i tāna mau pipi i muri iho i tōna ti’afa’ahoura’a.

I muri iho i te ti’afa’ahoura’a o Iesu, tē tai’o nei tātou i roto i te Ioane, i te pene 21, ’ua tai’a ’o Petero ’e te tahi atu mau pipi i terā pō e ao noa atu, ’aita rā i noa’a.¹ ’Ia po’ipo’i a’e, ’ua ’ite rātou i te hō’ē ta’ata tē ti’a ra i te pae tahatai tē parau ra ia rātou e taora i te ’ūpe’a i te tahi atu pae o te poti. ’Ua hitimahuta rātou i te temeio, ’ua ’ī tā rātou ’ūpe’a.²

’Ite ’oi’oi atu ra rātou ē, ’o te Fatu terā ta’ata, ’e ’ua tāpapa a’era nō te fārerei iāna.

’A huti noa ai rātou i tā rātou ’ūpe’a ’ī i tātahi, ’ua parau atu ra Iesu : « ’A haere mai ’a ’amu. »³ Tē fa’ati’a ra Ioane ē, « ’E pa’ia a’era rātou, ’ua parau atu ra Iesu ia Simona Petero, E Simona a Iona ē, tē rahi na tā ’oe hina’aro iā’u i teie ? »⁴

I te ti’ara’a vau i terā pae tahatai, ’ua puta mai ra i roto i tō’u ferurira’a ē, te uira’a tā te Fa’aora i ui, ’o te uira’a faufa’a rahi roa a’e ïa tāna e ui mai iā’u ’ia tae i te hō’ē mahana. Mai te huru ē, ’ua fa’aro’o vau i tōna reo i te uira’a mai : « E Russell, tē rahi na tā ’oe hina’aro iā’u i teie ? »

Tē uiui ra ānei ’outou i te uira’a a Iesu ia Petero ra : « Tē rahi na tā ’oe hina’aro iā’u i teie ? »

’Ia fa’aauhia teie uira’a ia tātou i tō tātou nei tau, e ui mai paha te Fatu nō ni’a i te rahi o tā tātou ’ohipa ’e nō ni’a i te mau mana e rave rahi, te mea maita’i ’e te mea ’ino, e ’ume’ume nei, ’ia tāu’a atu tātou ’e ’ia hōro’a atu i tō tātou taime. E ui paha ’oia ia tātou tāta’itahi e hau atu tō tātou here iāna i te mau mea o teie nei ao. E uira’a paha teie nō ni’a i te mea tā tātou e ha’afaufa’a mau nei i roto i te orara’a, ’o vai tā tātou e pe’e nei, ’e mai te aha tātou e hi’o nei i tō tātou tā’amura’a i te mau melo o tō tātou ’utuāfare ’e tō tātou ta’ata tupu. ’E penei a’e tē ui mai ra ’oia e aha mau te mea e fa’a’oa’oa ia tātou ’e ha’apōpou ia tātou.

Tē hōro’a mai ra ānei te mau mea nō teie nei ao i te ’oa’oa ’e te poupou ’e te hau tā te Fa’aora i hōro’a i tāna mau pipi ’e ’o tāna e hōro’a nei ia tātou ? ’O ’ōna ana’e tē nehenehe e hōro’a mai i te ’oa’oa mau, te pōpou mau ’e te hau mau nā roto i te herera’a iāna ’e te pe’era’a i tāna mau ha’api’ira’a.

E aha tā tātou e pāhono atu i te uira’a : « Tē rahi na tā ’oe hina’aro iā’u i teie ? »

’Ia ’ite tātou i te aura’a pāpū a’e i teie uira’a, e nehenehe tātou e ha’amaita’i ia tātou ’ei melo nō te ’utuāfare, ’ei ta’ata tupu, ’ei tino huira’atira, ’ei melo nō te ’Ēkālesia ’e e tamaiti ’e e tamāhine nā te Atua.

I tō’u fāito matahiti, e rave rahi hunara’a ma’i tā’u i haere. Pāpū roa iā’u ē, ’ua ’ite ato’a ’outou i te mea tā’u i ’ite. ’Ia fa’ahanahana tātou i te orara’a o te hō’ē fēti’i pohe, ’aore rā te hō’ē hoa, e mea varavara roa nō te ta’ata a’o ’ia paraparau nō te rahi o tōna fare, te rahira’a pere’o’o ’aore rā te tino moni i tāna fare moni. ’Aita rātou e paraparau rahi nei nō tā rātou mau poro’i i ni’a i te rāve’a tūreiara’a sōtiare. I te rahira’a o te mau hunara’a ma’i tā’u i haere, e rōtahi rātou i ni’a i tō te here iti mau tā’amura’a, tāna tāvinira’a ia vetahi ’ē, te mau ha’api’ira’a o te orara’a ’e te mau ’ohipa i tupu, ’e tō rātou here ia Iesu Mesia.

’Eiaha ’outou e fa’ahape i tā’u parau. ’Aita vau e parau nei ē, e mea hape te fāna’ora’a i te hō’ē fare nehenehe ’e te pere’o’o nehenehe, ’aore rā e mea ’ino te fa’a’ohipara’a i te mau rāve’a tūreiara’a sōtiare. Tā’u e parau nei, ’oia ho’i, i te hope’a, ’aita te reira e ha’apa’o-rahi-roa-hia ’ia fa’aauhia i tō tātou here nō te Fa’aora.

’Ia here tātou iāna ’e ’ia pe’e tātou iāna, e fa’aro’o tō tātou iāna. E tātarahapa tātou. E pe’e tātou i tōna hi’ora’a ’e e bāpetizohia tātou ’e e fāri’i tātou i te Vārua Maita’i. E tāpe’a tātou ē tae noa atu i te hope’a ’e e fa’aea tātou i ni’a i te ’ē’a nō te fafaura’a. E fa’a’ore tātou i te hapa a te fēti’i ’e a te ta’ata tupu ma te fa’aru’e i te mi’imi’i i roto ia tātou. E tūtava pāpū tātou i te ha’apa’o i te mau fa’auera’a a te Atua. E tūtava tātou i te ha’apa’o. E rave tātou ’e e tāpe’a tātou i te mau fafauraa. E fa’atura tātou i tō tātou metua tāne ’e te metua vahine. E ha’apae tātou i te mau ’umera’a ’ino a tō te ao nei. E fa’aineine tātou nō tōna Tae-Piti-Ra’a mai.

I roto i « Te Mesia Ora : Te ’itera’a pāpū o te mau ’āpōsetolo », tē tai’o nei tātou : « E ho’i mai [Iesu] i te hō’ē mahana i ni’a i te fenua […] E fa’atere ’oia ’ei Ari’i nō te mau Ari’i ’e e pārahi mai ’ei Fatu nō te mau Fatu, ’e e pi’o ho’i te mau ture o te mau ta’ata ato’a i raro ’e e fā’i ho’i te mau vaha ato’a i roto i te ha’amorira’a i mua iāna. E ti’a tātou tāta’itahi ’ia ha’avāhia e ana mai te au i tā tātou mau ’ohipa ’e te mau hina’aro o tō tātou mau ’ā’au. »⁵

’Ei ’āpōsetolo tei tu’urima i teie parau nō « Te Mesia Ora », e nehenehe tā’u e parau ē, tē ’ite nei au i te hina’aro rahi a’e nō te here iāna i te mau mahana ato’a maoti tō’u ’ite ē ’o Iesu « te māramarama, te ora ’e te ti’aturira’a o tō te ao nei. »⁶

Tē parau pāpū nei au ē, tē ora nei te Metua i te ao ra ’e Iesu Mesia. Tē parau pāpū nei au ē, ’ua here rāua ia tātou. Tē ha’api’i nei te mau pāpa’ira’a mo’a ē : « I aroha mai te Atua i tō te ao, ’e ’ua tae roa i te hōro’a mai i tāna Tamaiti fānau tahi, ’ia ’ore ’ia pohe te fa’aro’o iāna ra, ’ia roa’a rā te ora mure ’ore. »⁷ Tē ha’api’i ato’a nei te mau pāpa’ira’a mo’a ē, ’ua here roa Iesu « i tō te ao nei ’e ’ua hōro’a mai i tōna iho ora, ’ia riro rātou ato’a ’o tē ti’aturi mai ’ei mau tamaiti [’e te mau tamāhine] nā te Atua. »⁸

I aroha mai te Metua i te ao ra ia tātou ’e ’ua fa’aineine mai ’oia i tāna fa’anahora’a nō te fa’aorara’a ’e te hō’ē Fa’aora i te pū o te reira. ’E i aroha mai Iesu ia tātou ē, i roto i te ’Āpo’ora’a i te ra’i ra, i te anira’a te Metua i te ao ra : « ’O vai tā’u e tono ? » ’Ua pāhono mai Iesu, te matahiapo o te mau tamari’i vārua a te Metua : « Teie au, ’a tono iā’u. »⁹ ’Ua nā ’ō ’oia i te Metua : « E te Metua, ’ia ha’apa’ohia tō ’oe hina’aro, ’e nō ’oe te hanahana ē a muri noa atu. »¹⁰ ’Ua hōro’a Iesu iāna nō te riro ’ei Fa’aora ’e ’ei Tāra’ehara nō tātou ’ia ti’a ia tātou ’ia riro mai ia rāua te huru nō te ho’i i mua i tō rāua aro.

Tē ha’api’i ato’a nei teie nā ’īrava ē, nō te ho’i i mua i tō rāua aro, tītauhia ia tātou ’ia ti’aturi. Tītauhia ’ia ti’aturi ia Iesu ’e i te fa’anahora’a nō te ’oa’oa a te Atua. Te ti’aturira’a ’o te herera’a ïa ’e te pe’era’a i tō tātou Fa’aora ’e te ha’apa’ora’a i tāna mau fa’auera’a, noa atu tei roto tātou i te fifi ’e te mārō.

E mea pāpū ’ore te ao i teie tau. Tē vai nei te hepohepo, te mana’o tū’ati ’ore, te ’oto ’e e te fa’anevanevara’a.

I te matahiti 2017, ’ua parau te peresideni Dallin H. Oaks i teie mau parau : « E tau fifi mau teie, ’ua pu’e noa te mau pe’ape’a rahi : te tama’i ’e te parau tama’i, te mau ma’i parare ’e ha’apē, te pa’urā, te vaipu’e ’e te ve’ave’ara’a te fenua. »¹¹

E’ita e ti’a ia ha’amo’e i tō tātou here ’e tō tātou tīa’i ia Iesu, noa atu tē fa’aruru nei tātou i te mau fifi huru teimaha. E’ita roa atu te Metua i te ao ra ’e Iesu e ha’amo’e ia tātou. ’Ua here rāua ia tātou.

I te ’āva’e ’Ātopa i ma’iri, ’ua ha’api’i mai te peresideni Russell M. Nelson i te faufa’a rahi ’ia tu’u nā mua i te Metua i te ao ra ’e Iesu Mesia i roto i tō tātou orara’a. ’Ua ha’api’i mai te peresideni Nelson ē, te hō’ē aura’a nō te ta’o ’Īserā’ela ’oia ho’i « e vaiiho i te Atua ’ia upo’oti’a. »¹²

’Ua ’ui mai ’oia ia tātou tāta’itahi i teie mau uira’a : « E hina’aro ānei ’outou e vaiiho i te Atua ’ia upo’oti’a i roto i tō ’outou orara’a ? E hina’aro ānei ’outou e vaiiho i te Atua ’ia riro ’ei fa’aurura’a faufa’a roa a’e i roto i tō ’outou orara’a ? E vaiiho ānei ’outou i tāna mau parau, tāna mau fa’auera’a, ’e tāna mau fafaura’a ’ia fa’auru i te ’ohipa tā ’outou e rave i te mahana tāta’itahi ? E vaiiho ānei ’outou i tōna reo ’ia riro ’ei reo mātāmua nā ni’a a’e i te tahi atu ? E hina’aro ānei ’outou e vaiiho i te mau mea ato’a tāna e hina’aro ’ia rave ’outou, ’ia nā ni’a a’e i te tahi atu mau hina’aro ? E hina’aro ānei ’outou ’ia horomi’ihia tō ’outou hina’aro i roto i tōna ?¹³

E ha’amana’o noa tātou ē, tō tātou ’oa’oa mau, tei ni’a ïa i tō tātou tā’amura’a i te Atua ’e Iesu Mesia ’e ia vetahi ’ē.

Hō’ē rāve’a nō te fa’a’ite i tō tātou here ’o te ’āmuira’a ïa i te ’utuāfare, te mau hoa ’e te mau ta’ata tupu nō te rave i te tahi mau mea na’ina’i nō te tāvini maita’i a’e te tahi i te tahi. ’A rave i te mau ’ohipa e fa’ariro i teie ao ’ei vāhi maita’i a’e.

E aha te mau mea tā ’outou e nehenehe e rave i roto i tō ’outou iho orara’a nō te fa’a’ite ē ’ua here nā mua ’outou i te Fatu ?

’A rōtahi ai tātou i ni’a i te herera’a i tō tātou ta’ata tupu mai tāna e here nei ia rātou, e ha’amata tātou i te here mau i te feiā ’ati a’e ia tātou.¹⁴

Tē ui fa’ahou nei au, e aha tā tātou e pāhono atu i te uira’a a te Fa’aora, « Tē rahi na tā ’oe hina’aro iā’u i teie ? »

’Ia feruri ’outou i teie uira’a mai tā’u i nā reira, tē pure nei au ’ia pāhono atu ’outou mai ia Petero i muta’a ra : « E te Fatu ē, ’ua ’ite ’oe ē tē hina’aro atu nei au ia ’oe »,¹⁵ ’ei reira ’a fa’a’ite atu i te reira nā roto i te herera’a ’e te tāvinira’a i te Atua ’e te ta’ata ato’a ’ati a’e ia ’outou.

Tē parau pāpū nei au ē, ’ua ha’amaita’ihia tātou tē vai nei te ’evanelia a Iesu Mesia nō te arata’i ia tātou i roto i te huru orara’a e ora ’e te ravera’a te tahi i te tahi. I iāna, e ’ite mai tātou ē, e mea faufa’a rahi te mau tamāhine ato’a ’e te mau tamaiti a te Atua iāna.

Tē parau pāpū nei au ē, ’o Iesu Mesia tō tātou Fa’aora here. ’O te Tamaiti fānau tahi nā te Atua. ’E tē fa’a’ite nei au teie ’itera’a pāpū ma te haeha’a nā roto i te i’oa o Iesu Mesia, ’āmene.