Te aumihi tāmau o te Fa’aora

Tē vai ra te tahi parau tumu ta’a ’ē tei ha’api’ihia e te Fa’aora i tōna tāvinira’a i te fenua nei ’o te faufa’a ïa ’o te aupurura’a ia vetahi ’ē ma te aumihi. ’A hi’o ana’e tātou i taua parau tumu ra ’e i tōna fa’a’ohipara’a ma te feruri i te ’ā’amu o te tere o Iesu i te fare o Simona, te pharisea.

Tē fa’a’ite ra te ’evanelia a Luka ē, ’ua tomo mai hō’ē vahine rave hara i roto i te fare o Simona tei reira Iesu. Ma te ha’eha’a, ’ua ha’afātata mai ra te vahine i pīha’i iho ia Iesu, ’ua horoi a’era i te ’āvae o Iesu i tōna roimata, ’ua tāmarō i tōna rouru ’e ’ua ’āpā atura ’e ’ua fa’atāhinu i te hō’ē hinu ta’a ’ē.¹ Teie fatu fare te’ote’o tei feruri ē, e mea teitei a’e ’oia i taua vahine ra, ’ua parau a’era i roto iāna iho ma te fa’ahapa ’e te ’ā’au teitei, « ’āhiri teie nei ta’ata e peropheta, e ’ite ïa ’oia i teie nei vahine e rave mai iāna nei, ’e tōna ro’o ; e rave hara ho’i ’oia ».²

Te peu mo’a a’e a te pharisea i tā ’oe, ’ua tūra’i te reira iāna ’ia ha’avā ti’a ’ore noa ia Iesu ’e teie vahine. I roto i tōna ’ite rau, ’ua ’ite te Fa’aora i te vārua o Simona ’e, i roto i te pa’ari rahi, ’ua pāto’i ’oia i te hi’o ’ino o Simona, ’e ’ua fa’ahapa iāna nō tōna fa’atura ’ore i te fāri’ira’a i te hō’ē manihini ta’a ’ē mai te Fa’aora i roto i tōna fare. Inaha, ’ua riro te fa’ahapara’a a Iesu i te pharisea ’ei fa’a’itera’a ē, tē vai ra i roto ia Iesu te hōro’a nō te tohu, ’e taua vahine ’ā’au ha’eha’a ra ’e te ’oto, ’ua tātarahapa ’oia ’e ’ua fa’a’orehia tāna mau hara.³

Mai te tahi atu mau ’ohipa e rave rahi i roto i te tāvinira’a a Iesu i ni’a i te fenua nei, te ha’apāpū fa’ahou nei teie ’ā’amu ē, ’ua ’ohipa te Fa’aora ma te aroha i ni’a i te feiā ato’a i haere mai iāna ra—ma te mā’iti-’ore—’e i ni’a iho ā rā i te feiā tei hina’aro rahi atu i tāna tauturu. ’Ua riro te ha’eha’a ’e te here fa’atura tā te vahine i fa’a’ite ia Iesu ’ei ha’apāpūra’a i tōna tātarahapa mau ’e tōna hina’aro ’ia fāri’i i te fa’a’orera’a o tāna mau hara. Terā rā, nā te huru fa’ateitei o Simona ’āpitihia i te pa’ari o tōna ’ā’au ’eta’eta,⁴ i tāpe’a iāna ’ia fa’a’ite i te aumāuiui i taua vārua tātarahapa ra, ’e ’ua parau ato’a ’oia nō te Fa’aora o te ao nei ma te tau’a ’ore ’e te fa’a’ino. ’Ua riro tāna peu ’ei fa’a’itera’a ē, tōna huru orara’a o te ha’apa’ora’a ’eta’eta ïa ’e te ha’avare i te mau ture ’e te mau fa’a’itera’a rāpae’au o tōna mau ’ite nā roto i te fa’ahanahanara’a iāna iho ’e te mo’ara’a ha’avarevare.⁵

I roto i teie ’ā’amu, tē fa’a’ite nei te aupurura’a aroha a Iesu i te hō’ē hōho’a ti’a mau, e nāhea tātou ’ia ’ohipa i pīha’i iho i tō tātou mau ta’ata tupu. Tē vai ra i roto i te mau pāpa’ira’a mo’a e rave rahi mau hi’ora’a e mea nāhea tō te Fa’aora ha’ara’a, ma te aumihi rahi ’e te tāmau i pīha’i iho i te mau ta’ata o tōna ra tau, ’e te tauturura’a i te feiā tei māuiui « ’e ’ua purara rātou ’e ’ua fa’aru’e-tā’ue-hia, mai te māmoe tīa’i ’ore ra ».⁶ ’Ua toro ’oia i tōna rima aroha i te feiā tei hina’aro ’ia ha’amāmāhia tā rātou mau hōpoi’a, i te pae tino ’e i te pae vārua.⁷

’Ua a’ahia te huru aumihi o Iesu i roto i te aroha,⁸ ’oia ho’i i roto i tōna here vi’ivi’i ’ore ’e te ti’a roa, ’o te tumu mau ïa nō tāna tusia tāra’ehara. Te aumihi ’o te huru niu ïa o te feiā e ’aro nei nō te ha’amo’ara’a ’e e tū’ati te reira i te tahi atu mau huru keretetiano, mai te ’otora’a ’e te feiā e ’oto ra ’e te fa’a’itera’a i te aumāuiui, te aroha ’e te maita’i.⁹ ’Oia mau, te fa’a’itera’a i te aumihi nō vetahi ’ē, ’o te tumu mau ïa o te ’evanelia a Iesu Mesia ’e te hō’ē tāpa’o fa’a’ite pāpū o tō tātou fātatara’a i te Fa’aora i te pae vārua ’e i roto i te ’ā’au. Hau atu ā, tē fa’a’ite ra te reira i te fāito o tōna mana i ni’a i tō tātou huru orara’a ’e tē vauvau ra i te ’ā’anora’a o tō tātou vārua.

E mea faufa’a ’ia ’ite ē, te mau ’ohipa aumihi a Iesu, e ’ere ïa i te mau fa’a’ite’itera’a nō te tahi noa taime ’e i te fa’ahepohia ’ia au i te hō’ē tāpura ’ohipa ’ia fa’aotihia, e mau fa’a’itera’a rā i te mau mahana ato’a i te vaira’a mau o tōna here mau i te Atua ’e i tāna mau tamari’i ’e tōna hina’aro tāmau ’ia tauturu ia rātou.

’Ua ti’a ia Iesu ’ia ’ite i te mau hina’aro o te ta’ata noa atu ē, tei te ātea ’oia. Nō reira, ’ei hi’ora’a, e ’ere ïa i te ’ohipa māere, inaha, i muri noa a’e i te fa’aorara’ahia te hō’ē tāvini a te keniturio,¹⁰ ’ua tere atu Iesu nā Kaperenaumi haere atu i te ’oire i parauhia o Naina. I reira tō Iesu fa’atupura’a i te hō’ē o te mau temeio here roa a’e nō tāna tau tāvinira’a i te fenua nei, ’a fa’aue ai ’oia i te hō’ē taure’are’a pohe, te tamaiti hō’ē roa a te hō’ē metua vahine ’ivi, ’ia ti’a i ni’a ’e ’ia ora. ’Aita Iesu i ’ite noa i te māuiui rahi o taua metua vahine ra, te mau huru fifi ato’a rā o tōna orara’a, ’e ’ua tupu te aroha rahi i roto iāna nō te reira vahine.¹¹

Mai te vahine hara ’e te vahine ’ivi nō Naina, e rave rahi ta’ata ’ati a’e ia tātou e ’imi nei i te tāmāhanahana, te ara-māite-ra’a, te fa’aōra’a mai, ’e te tā’āto’ara’a o te tauturu tā tātou e nehenehe e pūpū nō rātou. E nehenehe tātou pā’āto’a e riro ’ei mauha’a i roto i te rima o te Fatu ’e ’ia ’ohipa ma te aroha i te feiā nava’i ’ore, mai tā Iesu i nā reira.

’Ua ’ite au i te hō’ē tamāhine na’ina’i tei fānauhia mai ma te utu ’e te aroro vaha ’āfāfā. E piti mahana i muri mai i tōna fānaura’ahia, ’ua tāpūhia ’oia, ’o te tāpū mātāmua ïa nō te mau tāpū e rave rahi tāna e fāri’i atu. Ma te tūra’ihia e te hō’ē aumāuiui mau nō te feiā e fārerei ato’a nei i teie tāmatara’a, ’ua ’imi teie tamāhine ’e tōna nā metua ’ia pāturu, ’ia hāro’aro’a, ’e ’ia hōro’a i te tauturu i te pae ’ā’au. ’Ua pāpa’i mai rātou iā’u ’e ’ua fa’a’ite mai ē : « Maoti te tītaura’a a tā māua tamāhine, ’ua ti’a ia mātou ’ia fārerei i te mau ta’ata fa’ahiahia e hina’aro ra i te tāmāhanahana, te pāturura’a ’e te fa’aitoitora’a. ’Aita i maoro a’e nei, ’ua paraparau tā māua tamāhine, 11 matahiti i teienei, i nā metua o te hō’ē ’aiū tei fāri’i ato’a i taua fifi ra. I roto i te reira ’āparaura’a, ’ua tātara tā māua tamāhine nō te tahi taime poto i te pāruru vaha tāna e tāmau ra nō te ma’i pe’e ’ia nehenehe nā metua ’ia ’ite ē, tē vai ra te ti’aturira’a, noa atu e taime roa ā tē tītauhia i teie ’aiū e matara ai teie fifi. Tē māuruuru nei mātou i ti’a ho’i ia mātou ’ia fa’a’ite i tō mātou here i te feiā e māuiui nei, mai tā te Fa’aora i nā reira nō mātou. Tē ’ite nei mātou ē, tē tāmarū nei mātou i tō mātou māuiui i te mau taime ato’a e tāmarū ai mātou i te māuiui o te vetahi ».

E au mau hoa here, ’ia tūtava ana’e tātou e fa’aō i te hō’ē haere’a aroha i roto i tō tātou orara’a, e rahi a’e tō tātou hāro’aro’a i te mau hina’aro o te ta’ata. Nā roto i te reira hāro’aro’a rahi, e ’itehia te mau mana’o ’ana’anatae mau ’e te here i roto i tā tātou mau ’ohipa ato’a. E ’ite te Fatu i tā tātou mau tauto’ora’a, ’e e mea pāpū e fāri’i tātou i te mau ha’amaita’ira’a ’e te mau rāve’a ’ia riro ’ei mauha’a i roto i tōna rima nō te tāmarū i te mau ’ā’au ’e nō te hōro’a i te hau i te mau « rima tautau ra ».¹²

Tē fa’a’ite pāpū ato’a mai nei te fa’aitoitora’a a Iesu ia Simona te pharisea ē, ’eiaha roa atu tātou e ha’avā ’eta’eta ’e te teimaha i tō tātou ta’ata tupu, i te mea ē, e hina’aro tātou pā’āto’a i te hāro’aro’a ’e te aroha nō ’ō mai i te Metua i te ao ra nō tō tātou mau hapehape. E ’ere ānei teie mau te mea tā te Fa’aora i ha’api’i i te hō’ē taime ’a parau ai ’oia ē, « ’e e aha ’oe i hi’o ai i te pāpā’ā iti i roto i te mata o tō taea’e ra, e ’aore ’oe i ’ite i te rā’au rahi i roto i tō ’oe iho mata ? »¹³

E mea ti’a ia tātou ’ia feruri ē, e ’ere i te mea ’ōhie ’ia hāro’aro’a i te mau mea ato’a e fa’atupu i te peu a te hō’ē ta’ata. E nehenehe tātou e hape ’ia hi’o tātou i te huru rāpae’au, ’e e pinepine te reira i te ’ore e fa’a’ite mai i te huru mau o te hō’ē ta’ata. Ta’a ’ē atu ia ’outou ’e iā’u nei, e ti’a i te Mesia ’ia ’ite māramarama i te mau tuha’a ato’a o te hō’ē tupura’a ’ohipa.¹⁴ Noa atu te ’itera’a, mai iāna, i tō tātou mau paruparu ato’a, ’aita te Fa’aora e fa’ahapa ia tātou ma te feruri ’ore, e tāmau noa rā ’oia i te ’ohipa i pīha’i iho ia tātou ma te aroha i te roara’a o te tau, ma te tauturu ia tātou ’ia tātara i te rā’au rahi i tō tātou mata. E hi’o Iesu i te ’ā’au ’eiaha i te huru i rāpae’au.¹⁵ ’Ua a’o te Fa’aora iho, « ’eiaha e ha’apa’o i te huru i rāpae au a’e ».¹⁶

I teie nei, ’a feruri na i te a’o pa’ari a te Fa’aora i te mau pipi ’āti Nephi hō’ē ’ahuru ma piti nō ni’a i teie uira’a :

« ’E ’ua ’ite ānei ’outou ē, e riro ’outou ’ei feiā ha’avā i teie nei feiā, i te au i te parauti’a tā’u e hōro’a atu ia ’outou. « Nō reira, e aha tō ’outou huru e au ai ? ’Āmene, e parau atu vau ia ’outou, mai tō’u nei ïa ».¹⁷

« ’E teienei, tē hina’aro nei au ’ia maita’i roa ’outou mai tō’u ’e tō ’outou Metua i te ao e maita’i roa ra ».¹⁸

’Ia au i teie huru tupura’a, tē ha’avā nei te Fatu i te feiā e ha’avā ti’a ’ore nei i te mau hapehape mana’o-noa-hia o vetahi ’ē. Nō te fa’ati’a ia tātou iho ’ia hōro’a i te mau ha’avāra’a ti’a, e ti’a ia tātou ’ia tūtava ’ia riro mai te Fa’aora te huru, ’e ’ia hi’o i te mau hapehape o te ta’ata ma te aroha, ’e mai tā tōna mata hi’ora’a. Ma te feruri ē, e ’ē’a roroa tō tātou e tae ai i te maita’i roa, e mea maita’i a’e paha ïa ’ia pārahi tātou i raro i te ’āvae o Iesu ’e ’ia tāparu i tōna aroha nō tā tātou iho mau hapehape, mai tā te vahine tātarahapa i rave i roto i te fare o te pharisea, ’eiaha rā e ha’amau’a noa i te taime ’e te pūai i te hi’ora’a i te mau hapehape ’itehia o vetahi ’ē.

E au mau hoa here ē, te fa’a’ite pāpū nei au ē, ’ia fa’aō ana’e tātou i te hi’ora’a aroha o te Fa’aora i roto i tō tātou orara’a, e tupu i te rahi tō tātou ’aravihi ’ia ha’apoupou i te mau maita’i o tō tātou mau ta’ata tupu, ’e e iti mai tō tātou mana’o nātura ’ia ha’avā i tō rātou mau hapehape. E tupu i te rahi tō tātou ’āpitira’a i te Atua, ’e e mea pāpū roa ē, e au maita’i a’e tō tātou orara’a, ’e e hau roa atu i te marū tō tātou mau mana’o, ’e e ’itehia ia tātou te hō’ē puna hope ’ore o te ’oa’oa. E ’itehia tātou ’ei mau ta’ata fa’atupu hau,¹⁹ e tā tātou mau parau e au ïa i te hupe o te po’ipo’i.

Tē pure nei au ’ia riro mai tātou ’ei ta’ata fa’a’oroma’i māite ’e te hāro’aro’a a’e ia vetahi ’ē, ’e ’ia tāmarū mai te aroha o te Fatu i tō tātou fa’a’oroma’i ’ore i mua i te mau hapehape o vetahi ’ē. Teie te ani-manihini-ra’a a te Fa’aora ia tātou. Tē fa’a’ite pāpū nei au ē tē ora nei ’oia. ’Oia te hi’ora’a maita’i hope roa nō te pipi aroha ’e te fa’a’oroma’i. Tē fa’a’ite nei au i tō’u ’itera’a pāpū nō teie mau parau mau nā roto i te i’oa o Iesu Mesia, ’āmene.