Hōro’a i te mo’ara’a i te Fatu
Te tusia ’o tē fa’aitira’a mai i te « fa’aru’era’a » ’e hau atu i te « hōro’ara’a » i te Fatu.
I te matahiti i ma’iri, ’a tāvini ai au i roto i te peresidenira’a ārea nō ’Ātia Apato’erau, ’ua fāri’i au i te niuniu a te persideni Russell M. Nelson tei ani iā’u ’ia tāvini ’ei Tauturu Piti i roto i te ’Episekōpora’a Fa’atere Rahi. ’Ua ani manihini ato’a mai ’oia i tā’u vahine ia Lori i roto i teie ’āparaura’a. I muri mai i te niuniu, tē māere noa ra māua, i ui mai nei tā’u vahine : « E aha ïa tā te ’Episekōpora’a fa’atere rahi e rave ? » ’Ua feruri ri’i au, ’e ’ua pāhono atu ra : « ’Aita ato’a i pāpū iā’u ! »
Hō’ē matahiti i muri iho—’e te mana’o ha’eha’a rahi ’e te māuruuru—e nehenehe tā’u e pāhono i te uira’a a tā’u vahine ma te māramarama rahi a’e. I roto i tāna mau ’ohipa e rave rahi, e hi’o te ’Episekōpora’a Fa’atere Rahi i te ’ohipa tōtauturu ’e te tauturura’a a te ’Ēkālesia i te ao nei. ’Ua ’ā’ano roa teie ’ohipa i teienei ’e ’ati a’e te ao nei, ’e tē ha’amaita’i nei e rave rahi atu ā tamari’i a te Atua, ’aita te reira e rae’ahia a’enei.
’Ei ’Episekōpora’a Fa’atere Rahi, ’e tauturuhia mātou e te mau rave ’ohipa fa’ahiahia o te ’Ēkālesia ’e vetahi ’ē, nā reira ato’a te peresidenira’a rahi o te Sōtaiete Tauturu, e tāvini nei nā muri ia mātou i roto i te Tōmite fa’atere nō te ’ohipa tōtauturu ’e te fa’arava’ira’a iāna iho a te ’Ēkālesia. qI roto i tō mātou ti’ara’a ’ei melo nō terā tōmite, ’ua ani mai te Peresidenira’a Mātāmua iā’u—mai tāna i ani i te tuahine Eubank tei paraparau mau ia tātou inapō ra—’ia fa’a’ite ia ’outou i te parau ’āpī nō te mau tauto’ora’a tauturura’a i te ao nei i ravehia a’enei. ’Ua ani ta’a ’ē ato’a mai rātou ’ia fa’a’ite atu i tō rātou māuruuru rahi—inaha ho’i, te mau taea’e ’e te mau tuahine, nā ’outou i nehenehe ai i teie mau tauto’ora’a tauturu i te ao nei ’ia tupu.
Mai tā tātou i hi’o ma te pe’ape’a nō te mau ’ohipa mātāmua i te pae faufa’a nō te COVID-19 ’ati a’e te ao nei, ’ua mana’o roa mātou ē, e topa mai te fāito moni tauturu tā te feiā mo’a e hōro’a nei. ’Aita ho’i tō tātou mau melo i pāruru-a’e-hia i te mau taupupūra’a nō te pararera’a o te ma’i pe’e. E’ita e nehenehe ’ia parau i tō mātou mana’o i te ’itera’a ē ’aita roa atu ! ’Ua mara’a roa mai te mau ō tauturu i te ao nei nō 2020 ’aita i ’itehia a’e nei—’e mai te huru ra ē, e mara’a hau atu ā i teie matahiti. ’E maoti tō ’outou ’ā’au hōro’a i ti’a ai i te ’Ēkālesia ’ia hōro’a i tāna pāhonora’a rahi roa a’e i ’itehia mai te ha’amatara’a mai ā o te ’āfata moni tauturu i te ao nei, ’e ’ua hau i te 1 500 ’ōpuara’a tāmarū COVID tei ravehia i roto e 150 fenua ’e hau atu. ’Ua fa’arirohia teie mau ō tā ’outou i hōro’a ma nounou ’ore i te Fatu, ’ei mā’a, ’ei mata’i ora, ’ei mātēria rapa’aura’a ’e ’ei pātia ārai nō rātou ’aita tā rātou te reira mau mea.
Mai te rahi o te hōro’ara’a tao’a e rahi ato’a ïa te taime ’e te itoito tā te mau melo o te ’Ēkālesia i hōro’a nō te mau ’ōpuara’a tauturura’a i te ao nei. Noa atu te ’ū’anara’a o te pararera’a o te ma’i pe’e, te mau ’ati nātura, te mau fifi tīvira ’e te tāfifira’a i te pae faufa’a e ’aita e fa’aeara’a ’e ’ua tāmau noa i te tīahi i te ta’ata i rāpae i tō rātou fare. Tē parau nei te Hau ’Āmui ē, ’ua hau i te 82 mirioni ta’ata tei fa’anu’u-fa’ahepo-hia i roto te ao nei.1 ’Āmuihia atu i te reira te mau mirioni ta’ata tei mā’iti e horo ’ē i te orara’a veve ’aore rā i te ha’avīra’a, i roto i te ’imira’a i te orara’a maita’i a’e nō rātou ’e nō tā rātou mau tamari’i, ’ei reira ïa ’outou e ha’amata ai i te ta’a ri’i mai i te vaira’a o te mau mea ’ati a’e i te ao nei.
Tē ’oa’oa nei au i te fa’a’ite atu ē, ’aua’a a’e te feiā e rave rahi roa tei hōro’a i tō rātou taime ’e te tārēni, tē fa’atere nei te ’Ēkālesia i te mau pū fāri’ira’a tītīhoria ’e te feiā nō te tahi atu fenua, i te mau vāhi rau i te Fenua Marite ’e i Europa. ’E ’aua’a a’e tā ’outou mau ō, tē fa’afāna’o nei tātou i te mau tao’a, te moni ’e te feiā e hōro’a i tō rātou taime nō te tauturu i te mau fa’anahora’a mai te reira nā te ao nei, tei fa’aterehia e te tahi atu mau fa’anahora’a.
Tē hina’aro nei au e fa’a’ite atu i tō’u māuruuru rahi i te feiā mo’a tei toro i te rima nō te fa’atāma’a, nō te fa’a’ahu, nō te fa’ahoa i teie mau tītīhoria ’e i te tauturu ia rātou ’ia ha’amau mai ia rātou ’e ’ia fa’arava’i ia rātou iho.
Inapō ra, ’ua fa’a’ite te tuahine Eubank i te tahi o te mau tauto’ora’a fa’ahiahia a te feiā mo’a nō te reira. ’Ia feruri au i teie mau tauto’ora’a, e puta pinepine mai te parau tumu nō te fa’atusiara’a tei tū’ati ’āfaro i te parau tumu nō nā fa’auera’a rahi e piti ’ia here i te Atua ’e ’ia here i tō tātou ta’ata tupu.
I tō tātou nei tau, e fa’atū’atihia te ta’o ra tusia i te parau nō te « fa’aru’era’a » i te mau mea nō te Fatu ’e tōna bāsileia. I te tau tahito rā, te aura’a nō te ta’o tusia e mea piri roa ïa i te aura’a rātino o nā ta’o tumu ra : sacer, ’oia ho’i « mo’a » ’aore rā « ra’a » facere, te aura’a « ’ia rave ».2 Nō reira, te aura’a tahito nō te tusia ’o « te fa’arirora’a ïa i te hō’ē tao’a ’aore rā i te hō’ē ta’ata ’ei mea mo’a ».3 ’Ia hi’ohia te reira, te tusia e ’ohipa tau maoro ïa nō te riro mai ’ei mea mo’a ’e nō te mātau mai i te Atua, e ’ere i te hō’ē tupura’a ’ohipa ’aore rā i te ’ōro’a « fa’aru’era’a » i te mau mea nō te Fatu.
’Ua parau te Fatu : « Hina’aro ho’i au i te aroha ’eiaha te tusia ; ’e te ’ite i te Atua ’eiaha te mau tusia tāauahi ».4 ’Ua hina’aro te Fatu ia tātou ’ia riro ’ei mea mo’a,5 ’ia noa’a te aroha,6 ’e ’ia mātau mai iāna.7 Mai tā te ’āpōsetolo Paulo i ha’api’i : « ’E ’ia hōro’a noa vau i tā’u mau tao’a ato’a ’ei fa’a’amu i te ta’ata ri’i, ’e ’ia tu’u noa atu vau i ta’u tino ’ia tahuhia i te auahi, ’e ’aita ’ō’u e aroha, ’aita roa ’ā’u e faufa’a i reira ».8 I te hope’a, ’ua hina’aro te Fatu i tō tātou ’ā’au ; ’ua hina’aro ’oia ia tātou ’ia riro mai ’ei ta’ata ’āpī i te Mesia ra.9 Mai tāna i ha’api’i i te mau ’āti Nephi : « E pūpū mai ’outou iā’u nei i te tusia nō te ’ā’au ’oto ’e te vārua tātarahapa ».10
Te tusia ’o tē fa’aitira’a mai ïa i te « fa’aru’era’a » ’e hau atu i te « hōro’ara’a » i te Fatu. I te tomora’a ato’a o tā tātou mau hiero, tē vai ra te mau parau : « Ha’amo’ahia i te Fatu ; te fare o te Fatu ». ’A ha’apa’o ai tātou i tā tātou mau fafaura’a nā roto i te tusia, e ha’amo’ahia tātou nā roto i te aroha o Iesu Mesia, ’e i ni’a i te mau fata o te hiero mo’a, ma te ’ā’au ’oto ’e te vārua ha’eha’a, e hōro’a tātou i tō tātou mo’ara’a i te Fatu. ’Ua ha’api’i Elder Neal A. Maxwell : « Te fa’aaurarora’a i tō tātou hina’aro [’aore rā ’ā’au11] o te mea mau hō’ē roa ïa ’o tā tātou e tu’u i ni’a i te fata a te Atua… ’Ia ha’amata rā tātou i te hope’a i te fa’aauraro ia tātou, ma te vaiiho i tō tātou iho mau hina’aro ’ia horomi’ihia i roto i te hina’aro o te Atua, ’ei reira ïa tātou e hōro’a mau ai i te hō’ē mea iāna ra ! »12
’Ia hi’o tātou i tā tātou mau tusia nō vetahi ’ē mai te hi’ora’a « fa’aru’era’a », e hi’o paha tātou i te reira ’ei hōpoi’a ’e e paruparu paha tō tātou mana’o ’ia ’ore ana’e tā tātou tusia e ’itehia ’aore rā ’ia ho’onahia. Mai te mea rā e hi’o tātou mai te hi’ora’a « hōro’a » i te Fatu, ’ua riro atu ra ïa tā tātou tusia nō vetahi ’ē ’ei hōro’a, ’e e ho’onahia tātou i te ’oa’oa nō te hōro’ara’a ma te rima here. Nō te mea ’aita fa’ahou terā tītaura’a ’ia herehia mai, ’ia fāri’ihia ’aore rā ’ia māuruuruhia, ’ua riro mai ïa tā tātou tusia ’ei fa’a’itera’a mā roa a’e ’e te hōhonu roa a’e nō tō tātou māuruuru ’e tō tātou here i te Fa’aora ’e i tō tātou ta’ata tupu. Te mau mana’o te’ote’o ato’a nō te fa’atusiara’a iāna iho, e monohia ïa e te māuruuru, te ’ā’au hōro’a, te nava’i roa ’e te ’oa’oa.13
E mea tei ha’amo’ahia—tō tātou orara’a ānei, tā tātou mau faufa’a, tō tātou taime ’aore rā tā tātou mau tārēni—e ’ere nō te fa’aru’e-noa-ra’a i te reira, nō te ha’amo’a14 rā te reira i te Fatu. E tao’a hōro’a mau te tauturu i te ao nei a te ’Ēkālesia. E hotu te reira nō te mau ō ’āmui ’e te ha’amo’ahia a te feiā mo’a, e fa’a’itera’a nō tō tātou here i te Atua ’e i tāna mau tamari’i.15
E hi’ora’a ’o Steve ’e ’o Anita Canfield nō te feiā mo’a ’ati a’e te ao nei, ’ua ’ite ho’i rāua i te mau ha’amaita’ira’a ha’ataui nō te hōro’a i te Fatu. E misiōnare nō te ’ohipa tōtauturu ’e te fa’arava’ira’a iāna iho Canfield mā, tei anihia e tauturu i te mau pūhapara’a tītīhoria ’e te mau pū fāri’ira’a feiā nō te tahi atu fenua, nā Europa. Te tōro’a ’ohipa o te tuahine Canfield, e ’atu’atu fare tu’iro’o ïa nā te ao nei tei tihepuhia e te mau hoani moni rahi nō te fa’anehenehe i tō rātou mau fare moni rarahi. ’E i teienei, ’ua tūra’i-tā’ue-hia ’oia i roto i te hō’ē ao ’ē, i te tāvinira’a i te mau ta’ata tei ’ere fātata i tā rātou mau faufa’a ato’a i te tāhuti nei. Teie tāna mau parau, ’ua ’aitaui ’oia i tāna « mau tahua māpura ’ei tahua repo », ’e i te nā-reira-ra’a ’oia, ’ua ’itehia mai iāna te hō’ē mana’o ’āpī fāito ’ore ’a ha’amata ai rāua tāna tāne i te fa’ahoa—’e ’aita i maoro i te here ’e i te tauahi—i teie feiā tei hina’aro i te aupurura’a.
Tē nā ’ō ra Canfield mā ē : « ’Aita te mana’o ‘fa’aru’e’ i te hō’ē mea nō te tāvini i te Fatu i tae mai. Tō māua noa hina’aro, ’o te ‘hōro’a’ ïa iāna ra i tō māua taime ’e tō māua itoito nō te ha’amaita’i i tāna mau tamari’i i te rāve’a ato’a tāna e mana’o ra e fa’a’ohipa ia māua. ’A ’ohipa noa ai māua i pīha’i iho i tō māua mau taea’e ’e mau tuahine, ’ua tahe ’ē atu te hōho’a rāpae—te mau ta’a-’ē-ra’a ato’a nō te huru orara’a ’e te mau tao’a—’e ’ua ’ite noa atu māua i tō te tahi ’e tō te tahi ’ā’au. ’Aita e fāito manuiara’a i te pae nō te tōro’a ’ohipa ’aore rā te ’āpī e nehenehe ’ia ’aifāito i te ’āpī i noa’a mai nā roto i te tāvinira’a i rotopū i te mau tamari’i ha’eha’a roa a’e a te Atua ».
I te ’ā’amu nō Canfield mā ’e tē vai atu ra, ’ua ha’api’i mai au i te fa’ahiahia i te mau parau nō teie hīmene a te Paraimere, e mea ’ōhie, e mea hōhonu ato’a rā :
« Hōro’a », tē parau nei te atavai,
’A tahe ai i raro i te ’āivi ;
« ’Oia e mea na’ina’i au, i te vāhi rā e haere au
E ruperupe te mau ’āua. »
’Oia e mea na’ina’i tātou tāta’itahi, ’ia ha’ape’epe’e rā tātou i te hōro’a i te Atua ’e i tō tātou ta’ata tupu ; i te vāhi e haere tātou, e ’āpīhia ’e e ha’amaita’ihia te mau orara’a.
’Aita te ’īrava toru o teie hīmene i mātau-roa-hia, e anira’a here rā i te hope’a :
Hōro’a na mai tā Iesu e hōro’a ;
E nehenehe te tā’āto’ara’a e hōro’a i te hō’ē mea.
E rave mai te atavai, ’e e ’itehia te ’ūa’ara’a :
E ora nō te Atua ’e nō vetahi.16
E au mau taea’e, e au mau tuahine—’ia ora tātou nō te Atua ’e no vetahi ’ē nā roto i te hōro’a i tā tātou faufa’a, tō tātou taime, ’e ia tātou ato’a ho’i, e vaiiho tātou i te hō’ē ao ruperupe a’e, i te mau tamari’i ’oa’oa a’e a te Atua ’e, nā roto i te reira, e mo’a ri’i a’e tātou.
’Ia ha’amaita’i rahi roa te Fatu ia ’outou nō te mau tusia tā ’outou e hōro’a hua iāna ra.
Tē parau pāpū nei au ē tē ora nei te Atua. « ’O Ta’ata Mo’a tōna i’oa ».17 ’O Iesu Mesia tāna Tamaiti ’e ’o ’oia te ta’ata hōro’a nō te mau hōro’a maita’i ato’a.18 ’Ia ha’amo’ahia tātou nā roto i tōna maita’i rahi ’e te ha’apa’ora’a i tā tātou mau fafaura’a nā roto i te tusia, ’e ’ia rahi atu ā te here ’e te mo’ara’a tā tātou e hōro’a i te Fatu.19 Nā roto i te i’oa mo’a o Iesu Mesia, ’āmene.