Te fa’aro’o nō te ani ’e i muri iho nō te ’ohipa

E au mau taea’e ’e mau tuahine here, tē ’oa’oa nei au nō teie taime nō te paraparau atu ia ’outou i roto i teie tuha’a purera’a nō te ahiahi mahana mā’a o te ’āmuira’a rahi. I roto i tāna ’ōmuara’a i te ’āmuira’a i teie po’ipo’i, ’ua parau te peresideni Russell M. Nelson ē, « nā te heheura’a vi’ivi’i ’ore nō te mau uira’a i roto i tō ’outou ’ā’au e fa’ariro i teie ’āmuira’a ’ei ’āmuira’a ho’ona rahi ’e te mo’e-’ore-hia ». Mai te mea ’aita ā ’outou i ani i te aupurura’a a te Vārua Maita’i nō te tauturu ia ’outou ’ia fa’aro’o i te mea tā te Fatu e hina’aro ’ia fa’aro’o ’outou i te roara’a o teie nā mahana e piti, tē ani nei au ia ’outou ’ia rave i teienei ».¹ ’Ua ’imi au i teie ha’amaita’ira’a ’a fa’aineine ai au nō te fāri’i i te heheura’a nō teie fārereira’a ’e o ’outou. Tā’u pure ’ū’ana ’oia ho’i, ’ia fāri’i ’outou i te heheura’a nō ’ō mai i te Atua ra.

’Aita i taui te fa’anahora’a nō te fāri’i i te heheura’a nō ’ō mai i te Atua ra mai ia Adamu ’e ’o Eva mai ā. Mai te reira ato’a nō te mau tāvini ato’a a te Fatu tei pi’ihia, mai mūta’a ra e tae roa mai i tō tātou nei ’anotau. Hō’ē ā huru nō ’outou ’e nō’u. E rave-noa-hia te reira nā roto i te fa’a’ohipara’a i te fa’aro’o.²

’Ua rava’i te fa’aro’o o te tamaiti ’āpī o Iosepha Semita nō te ui i te hō’ē uira’a i te Atua, ma te ti’aturi ē, e pāhono mai te Atua i te hina’aro o tōna ’ā’au. Te pāhonora’a tei tae mai ’ua taui i te ao nei. ’Ua hina’aro ’oia ’ia ’ite ē, e aha te ’ēkalesia tāna e ’āmui atu nō te tāmā iāna i te hara. Nā te pāhonora’a tāna i fāri’i i fa’aitoito iāna ’ia tāmau noa i te ui i te mau uira’a maita’i atu ā ’e ’ia ’ohipa i te mau heheura’a tāmau e ha’amata ra.³

E nehenehe tō ’outou ’itera’a e tupu mai te reira i roto i teie ’āmuira’a. E mau uira’a tā ’outou ’o tā ’outou e ’imi nei i te pāhonora’a. ’Ua nava’i tō ’outou fa’aro’o nō te ti’aturi ē, e fāri’i ’outou i te mau pāhonora’a nō ’ō mai i te Fatu ra nā roto mai i tōna mau tāvini.⁴ ’Aita tō ’outou e taime nō te ani ma te reo pūai i te mau pāhonora’a a te feiā a’o, e nehenehe rā tā ’outou e ani i tō ’outou Metua here nā roto i te pure.

’Ua ’ite au nā roto i te ’ohipa tā’u i rave ē, e tae mai te mau pāhonora’a ’ia au i tō ’outou mau hina’aro ’e tō ’outou fa’aineinera’a pae vārua. Mai te mea e hina’aro ’outou i te hō’ē pāhonora’a e riro ’ei mea faufa’a nō tō ’outou aumaita’i mure ’ore ’aore nō tō vetahi ’ē, e mea pāpū te pāhonora’a i te tae mai. Noa atu rā i te reira, e nehenehe ’outou e fāri’i—mai tā Iosepha Semita—i te pāhonora’a ma te fa’a’oroma’i.⁵

Mai te mea ’ua tāmarū tō ’outou fa’aro’o ia Iesu Mesia i tō ’outou ’ā’au maoti tāna tara’ehara, e rahi atu tō ’outou ti’ara’a ’ia fāri’i i te mau muhumuhu o te Vārua ’ei pāhonora’a i tā ’outou mau pure. Tō’u iho ’itera’a ’oia ho’i, e mea māramarama maita’i te reo iti ha’iha’i—’e te pāpū—i roto i tō’u vārua ’ia fāri’i ana’e au i te hau nō roto ’e te hō’ē fa’aha’eha’ara’a i mua i te hina’aro o te Fatu. E nehenehe teie mana’o ha’eha’a e fa’ata’a-maita’i-hia mai teie « ’ia tupu rā tō ’oe hina’aro, ’eiaha tō’u ».⁶

Teie fa’anahora’a nō te heheura’a, ’o tē tumu ïa ’outou e fa’aro’o ai i te feiā a’o ’ia ha’api’i i roto i teie ’āmuira’a, i te mea tei parauhia, te ha’api’ira’a tumu a te Mesia.⁷ E tae mai te heheura’a ’ia au i te fāito o te ha’api’ira’a tumu a te Mesia tā tātou e tu’u i roto i tō tātou ’ā’au ’e tā tātou fa’a’ohipara’a i te reira.

Tē ha’amana’o ra ’outou i roto i te Buka a Moromona, ’ua ha’api’i Nephi ia tātou ē, te fa’aro’o ia Iesu Mesia ’o te tāviri ïa o te heheura’a o te parau mau ’e te tāviri nō te ha’apāpū ē, tē pe’e nei tātou i te arata’ira’a a te Fa’aora. ’Ua pāpa’i Nephi i te mau parau i muri nei e rave rahi tenetere hou te fānaura’a o Iesu Mesia i te tāhuti nei :

« Tē parau atu ra te mau melahi nā roto i te mana o te Vārua Maita’i ; nō reira e parau ai rātou i te parau a te Mesia. « Nō reira, ’a pōpou na ’outou i te parau a te Mesia ; inaha ho’i, e fa’a’ite te parau a te Mesia ia ’outou i te mau mea tā ’outou e ha’apa’o.

« E teienei, parau a’enei au i teie nei mau parau, ’aita i ti’a ia ’outou ’ia ’ite i te reira, nō te mea ’aore ïa ’outou i tītau, ’aore ho’i i pātōtō ; nō reira e ’ore ai ’outou e arata’ihia ai i roto i te māramarama, ’ia pohe rā ’outou i roto i te pōuri e ti’a ai.

« Inaha ho’i, tē parau fa’ahou atu nei au ia ’outou ē, ’ua tae ana’e ’outou i taua ’ē’a ra, ’e e fāri’i ho’i i te Vārua Maita’i, nā te reira e fa’a’ite ia ’outou i te mau mea ato’a tā ’outou e rave.

« Inaha, ’o te parau ïa teie a te Mesia, ’e e ’ore e hōro’ahia atu ā te parau ’e ’ia fa’a’ite ’oia iāna iho ia ’outou i roto i te tino nei. ’E ’ia fa’a’ite ’oia iāna iho ia ’outou i roto i te tino nei, te mau mea tāna e fa’a’ite ia ’outou ra, ’ia ha’apa’o ’outou i te reira e ti’a ai ».⁸

E parau mai te Fatu i te mau mea nā roto mai i tōna mau tāvini ia ’outou ’e iā’u i teie mahana ’e i te mau mahana i muri nei. E parau mai ’oia ia tātou i te ’ohipa tā tātou e rave.⁹ E’ita te Fa’aora e tuō mai i te mau fa’auera’a ia ’outou ’e iā’u. Mai tāna i ha’api’i ia Eliaha :

« ’Ua nā ’ō mai ra ’oia, ’a haere, ’ei ni’a i tō mou’a ti’a noa ai i te aro o Iehova. « ’E inaha, ’ua haere ihora Iehova nā reira iho, ’o te mata’i rahi ihora ’e te ’eta’eta, i te ha’apararīra’a i te mou’a, ’e te vāvāhira’a i te mato i mua i te aro o Iehova ; ’aita rā Iehova i roto i taua mata’i ra ; e mure a’era te mata’i, ’o te ’āueue fenua ihora ; ’aita rā Iehova i roto i taua ’āueuera’a fenua ra :

« ’E oti a’era te ’āueuera’a fenua, e auahi ; ’aita rā Iehova i roto i taua auahi ra : e oti a’era te auahi, e reo iti ha’iha’i mai ra ».¹⁰

Te fa’aro’ora’a i teie reo e tae mai nā roto i tō tātou fa’aro’o iāna. Ma te nava’i te fa’aro’o, e ani tātou i te arata’ira’a ma te hina’aro e haere ’e e rave i tāna e ani mai.¹¹ E fa’ananea ïa tātou i te fa’aro’o nō te ’ite ē, te mau mea ato’a tāna e ani mai e riro ïa ’ei ha’amaita’ira’a nō vetahi ’ē, ’e e nehenehe tātou e tāmāhia i roto i te fa’anahora’a maoti tōna here ia tātou.

Nā roto i tō tātou fa’aro’o ia Iesu Mesia, e arata’ihia tātou e ani i te mau pāhonora’a i te Metua, e hōro’a ato’a mai te reira fa’aro’o i te hō’ē tāmarūra’a a te Fa’aora, ’ia ti’a ia tātou ’ia fa’aro’o i tāna arata’ira’a ’e ’ia hina’aro mau ’e ’ia ’oa’oa i te ha’apa’o. ’Ei reira tātou e hīmene ai i te mau parau o te hīmene ma te ’oa’oa, noa atu te teimaha o te ’ohipa : « ’Auē te ’oa’oa e ».¹²

Rahi noa atu te vaira’a te ha’api’ira’a tumu a te Mesia i roto i tō tātou orara’a ’e tō tātou ’ā’au, rahi noa ato’a atu tō tātou ’itera’a i te here ’e te aumihi nō te feiā tei ’ore ā i fāri’i i te mau ha’amaita’ira’a o te fa’aro’o ia Iesu Mesia ’aore rā ’o tē tauto’o nei nō te tāpe’a i te reira. E ’ere i te mea ’ōhie ’ia ha’apa’o i te mau fa’auera’a a te Fatu ma te fa’aro’o ’ore ’e te ti’aturi ’ore iāna. ’Ia mo’e ana’e te fa’aro’o o vetahi i roto i te Fa’aora, e nehenehe rātou e ’aro i tāna parau a’o, ma te parau i te maita’i e ’ino ’e te ’ino e maita’i.¹³ Nō te ’ape i te reira hape rahi, e mea faufa’a ’ia tū’ati te heheura’a tā te ta’ata iho e fāri’i i ni’a i te mau ha’api’ira’a a te Fatu ’e a tāna mau peropheta.

E te mau taea’e ’e te mau tuahine, tītauhia te fa’aro’o nō te ha’apa’o i te mau fa’auera’a a te Fatu. Tītauhia te fa’aro’o ia Iesu Mesia nō te tāvini ia vetahi ’ē nōna. Tītauhia te fa’aro’o nō te haere e ha’api’i i tāna ’evanelia ’e ’ia pupu i te reira i te mau ta’ata e’ita e nehenehe e fāri’i i te reo o te Vārua ’aore rā e nehenehe e pāto’i i te parau mau o te poro’i. Terā rā, mai te mea e fa’a’ohipa tātou i tō tātou fa’aro’o i te Mesia—’e e pe’e i tōna peropheta ora—e rahi atu ā te fa’aro’o nā te ao nei. Nā roto i te ’ihianoha’a (technologie), penei a’e e rahi atu ā te mau tamari’i a te Atua e fa’aro’o ’e e ’ite i te parau a te Atua i teie hope’a hepetoma i te tahi atu nā mahana e piti o te ’ā’amu.

Nā roto i te fa’aro’o e tupu noa i te rahi, ’o teie te ’Ēkālesia ’e te bāsileia o te Fatu i ni’a i te fenua nei, e rahi atu te mau melo e ’aufau i te tuha’a ’ahuru ’e te ō nō te tauturu i te feiā nava’i ’ore, noa atu ē, tē fa’aruru nei teie mau melo i tō rātou iho mau tāmatara’a. Ma te fa’aro’o ē, nā Iesu Mesia rātou i pi’i, ’ua ’itehia i te mau misiōnare nā te ao nei i te mau rāve’a nō te fa’aruru i te mau tāmatara’a tei fa’atupuhia e te hō’ē ma’i pe’e, ma te ravera’a i te reira ma te itoito ’e te ’ana’anatae. ’E i roto i tā rātou tauto’ora’a rahi a’e, ’ua pūai fa’ahou tō rātou fa’aro’o.

’Ua riro te pāto’ira’a ’e te mau tāmatara’a ’ei repo ora nō te tupura’a i te rahi o te fa’aro’o. ’Ua vai parau mau noa te reira, mai te ’ōmuara’a mai ā o te fa’aho’i-fa’ahou-ra’a mai ’e te fa’ati’ara’ahia te ’Ēkālesia a te Fatu.¹⁴

Te mea tā peresideni George Q. Cannon i parau e rā ’ē te tau, e parau mau ïa i teie mahana, e vai noa te reira e tae roa atu i te taime e ho’i mai ai te Fa’aora iho e fa’atere i tāna ’Ēkālesia ’e tōna nūna’a : « Nā te ha’apa’o i te ’evanelia e arata’i i te [ta’ata] i roto i te hō’ē autā’atira’a fātata roa ’e te ’āfaro i te Fatu. E ha’amau te reira i te hō’ē tū’atira’a piri roa i rotopū i te ta’ata i ni’a i te fenua nei ’e tō tātou Rahu Nui i ni’a i te ra’i. E hōro’a mai te reira i te vārua ta’ata i te hō’ē mana’o ti’aturi pāpū i te Manahope ’e i tōna hina’aro ’ia fa’aro’o ’e ’ia pāhono i te mau tāparura’a a te feiā e ti’aturi iāna. I te mau taime tāmataraʼa ’e te ʼati, ’aita e ho’o tō teie ti’aturira’a. E nehenehe te mau fifi e tupu mai i ni’a i te ta’ata hō’ē ’aore rā i ni’a i te nūna’a, e nehenehe te ’ati e ha’ape’ape’a, ’e i reira e ta’ahuri ai te ti’aturira’a o te ta’ata, terā rā, i te vāhi ’ua fāna’o te ta’ata i te mau maita’i tā te ’evanelia i hōro’a mai, e pārahira’a pāpū ïa tō rātou, ’e tei ni’a tō rātou ’āvae i te hō’ē papa ’āueue ’ore ».¹⁵

Tē fa’a’ite pāpū nei au ē, te papa e ti’ahia nei e tātou, tō tātou ïa ’itera’a pāpū ē, o Iesu te Mesia, nāna teie ’Ēkālesia, nāna iho e fa’atere nei, ’e te peresideni Russell M. Nelson, ’o tōna ïa peropheta ora i teie mahana.

Tē ’imi nei ’e tē fāri’i nei te peresideni Nelson i te arata’ira’a nō ’ō mai te Fatu. ’Ua riro ’oia ’ei hi’ora’a nō’u nō te ’imira’a i taua arata’ira’a ra ma te hina’aro pāpū ’ia pe’e i te reira. Taua ā hina’aro pāpū ’ia ha’apa’o i te arata’ira’a a te Fatu tei roto ïa i te ’ā’au o te feiā ato’a i paraparau mai, ’aore rā ’o tē paraparau mai, ’o tē pure mai ’aore rā ’o tē hīmene mai i roto i teie ’āmuira’a rahi a tāna ’Ēkālesia.

Tē pure nei au ’ia ’ite te mau ta’ata nā te ao ato’a nei e māta’ita’i mai nei ’aore rā e fa’aro’o mai nei i teie ’āmuira’a, i te here o te Fatu nō rātou. ’Ua pāhono mai tō tātou Metua i te ao ra i tā’u pure ’ia ti’a iā’u ’ia ’ite a’e i te hō’ē tuha’a iti o te here o te Fa’aora nō ’outou, ’e tōna here i tōna Metua i te ao ra, tō tātou Metua i te ao ra.

Tē fa’a’ite pāpū nei au ē, tē ora nei Iesu Mesia. ’O ’oia tō tātou Fa’aora, ’e tō tātou Tāra’ehara. Teie tāna ’Ēkālesia. ’O ’oia te upo’o o te reira. ’Ua fā tino roa mai ’oia ’e tōna Metua i te ao ra ia Iosepha Semita i roto i te hō’ē uru rā’au i New York. ’Ua fa’aho’i-fa’ahou-hia mai te ’evanelia a Iesu Mesia ’e tōna autahu’ara’a nā roto i te mau ve’a nō te ra’i.¹⁶ Nā roto i te mana o te Vārua Maita’i ’ua ’ite au ē, e parau mau te reira.

Tē pure nei au ’ia roa’a ato’a ia ’outou te reira ’itera’a pāpū. Tē pure nei au ē, ’ia ani ’outou i te Metua i te ao ra i te fa’aro’o ia Iesu Mesia, tā ’outou e tītau nei nō te rave ’e nō te ha’apa’o i te mau fafaura’a ’o tē fa’ati’a i te Vārua Maita’i ’ia riro ’ei hoa tāmau nō ’outou. Tē vaiiho atu nei au i tō’u here ’e tō’u ’itera’a pāpū ia ’outou na, nā roto i te i‘oa o Iesu Mesia, ’āmene.