Te aroha o te Atua : te mea ’oa’oa roa a’e nō te vairua

Te mau taea’e ’e te mau tuahine, ’ua ’ite ānei ’outou i te aroha fāito ’ore o te Atua, tō tātou Metua i te ao ra, nō ’outou ? ’Ua ’itea ānei ia ’outou tōna aroha i roto i te papa o tō ’outou vairua ?

’Ia ’ite ’e ’ia hāro’aro’a ’outou i te aroha fāito ’ore nō ’outou ’ei tamari’i nā te Atua, e taui te mau mea ato’a. E taui tō ’outou mana’o nō ni’a ia ’outou iho i te taime e hape ’outou. E taui tō ’outou mana’o i te taime e tupu te mau ’ati. E taui tō ’outou hi’ora’a i te mau fa’auera’a a te Atua. E taui tō ’outou hi’ora’a ia vetahi ’ē ’e tō ’outou ’aravihi ’ia fa’atupu i te ’ohipa ta’a ’ē.

’Ua ha’api’i ’o Elder Jeffrey R. Holland ē : « Te fa’auera’a rahi mātāmua mure ’ore, ’o te herera’a ïa i te Atua ma tō tātou ’ā’au ato’a ’e te pūai ’e te mana’o ’e te itoito—’o te fa’auera’a rahi mātāmua ïa teie. Te parau mau rahi mātāmua rā o te mure ’ore, ’o te herera’a ïa te Atua ia tātou ma tōna ’ā’au ato’a ’e te pūai ’e te mana’o ’e te itoito. »¹

Nāhea tātou tāta’itahi e ’ite ai i roto i te hōhonu o tō tātou vairua i te reira parau mau mure ’ore ?

’Ua fa’a’ite-’ōrama-hia i te peropheta Nephi te ha’apāpūra’a rahi roa a’e nō te aroha o te Atua. I tōna hi’ora’a i te tumu rā’au nō te ora, ’ua ani Nephi ’ia ’ite i te aura’a nō te reira. ’Ei pāhonora’a, fa’a’ite mai nei te hō’ē melahi ia Nephi, te hō’ē ’oire, te hō’ē metua vahine ’e te hō’ē ’aiū. ’A hi’o ai Nephi i te ’oire nō Nazareta ’e i te metua vahine parauti’a ra ’o Maria i te hi’ira’a i te ’aiū i tāna rima, parau a’e ra te melahi : « ’A hi’o na i te ’Ārenio a te Atua, ’oia ïa, te Tamaiti a te Metua mure ’ore ! »²

I taua taime mo’a ra, ’ua māramarama mai ’o Nephi ē, i roto i te fānaura’a o te Fa’aora tē fa’a’ite ra te Atua i tōna here ateate ’e te hope roa. ’Ua parau Nephi nō te aroha o te Atua ē ’ua « nīni’ihia mai i te mau vāhi ato’a i roto i te ’ā’au o te mau tamari’i a te ta’ata nei. »³

Hōho’a

Te tumu rā’au nō te ora

E nehenehe e fa’ahoho’a i te aroha o te Atua mai te māramarama nō roto mai i te tumu rā’au nō te ora ’o tē nīni’i ra nā te ao ato’a nei i roto i te ’ā’au o te mau tamari’i a te ta’ata nei. E fa’ararirari te māramarama ’e te aroha o te Atua i tāna mau hāmanira’a ato’a.⁴

I te tahi mau taime, tē mana’o hape nei tātou ē, e ’ite tātou i te aroha o te Atua i muri noa i tō tātou ’āpe’era’a i te ’āuri ’e i te ’amura’a i te hotu ra. Terā rā, e fāri’ihia te aroha o te Atua e te feiā tei haere i te tumu rā’au ra, e ’ere noa rā terā, ’o te mana iho e tūra’i nei ia tātou ’ia ’imi i taua tumu rā’au ra.

« Nō reira, e mea hina’aro-roa-hia ïa i ni’a a’e i te mau mea ato’a ra », ’o tā Nephi ïa ha’api’ira’a, hurō atu ra te melahi : « ’Oia ïa, ’e te mea ’oa’oa roa a’e nō te [vairua]. »⁵

’A piti ’ahuru matahiti i ma’iri, ’ua fa’aātea te hō’ē melo ’utuāfare i herehia i te ’Ēkālesia. E rave rahi āna ’uira’a ’aita e pāhonora’a. Tāna rā vahine, tei fa’afāriuhia, ’ua tāpe’a ïa i te fa’aro’o. ’Ua fa’aitoito rāua i te fa’aherehere i tō rāua fa’aipoipora’a noa atu te mau fifi i tupu mai.

I te matahiti i ma’iri a’e nei, ’ua pāpa’i ’oia e toru uira’a nō ni’a i te ’Ēkālesia ’o tei tāfifi i tōna fērurira’a ’e ’o tāna i fa’atae i te tahi nā pea fa’aipoipo, e hoa māoro nōna. ’Ua ani ’oia ia rātou ’ia fēruri i te reira nau uira’a ’e ’ia haere mai e tāmā’a i te pō nō te tahi matutura’a.

I muri a’e i te reira fārereira’a ’e te mau hoa, haere atu ra i tōna piha nō te ha’a i ni’a i te hō’ē ’ōpuara’a. ’Ua māna’ona’o ’oia nā mua roa i te ’āparaura’a nō taua ’āru’i ra ’e te here o tōna mau hoa. ’Ua pāpa’i ’oia i muri iho ē, ’ua fa’aea roa ’oia i tāna ’ohipa. ’Ua nā ’ō ’oia : « ’Ua ’ī roa tō’u vairua i te hō’ē mōrī ’ana’ana […] ’Ua ’ite a’e na vau i teie mana’o tūramara’a hōhonu, ’āre’a rā teie, ’ua tāmau noa ïa i te pūaira’a mai tei ’ore ā i ’itehia a’e nei, e rave rahi minuti te maoro. ’Ua pārahi au ma te hau ’e ma teie mana’o au, ’o tā’u i ’itea iho nei mai te hō’ē fa’a’itera’a nō te aroha o te Atua iā’u nei… E ’itera’a pae varua tei parau mai ’ia ho’i i te purera’a e fa’a’ite i teie aroha o te Atua i roto i te mea tā’u e rave i reira. »

I reira, ’ua uiui ’oia nō ni’a i tāna mau uira’a. ’Ua ’itea iāna ē, ’ua fāri’i poupou te Atua i tāna mau uira’a, ’e noa atu te pāpū ’ore o te mau pāhonora’a, ’aita te reira i ha’amarirau i tōna haerera’a i mua.⁶ ’A fa’a’ite ’oia i te here o te Atua i te tā’āto’ara’a ’a tāmau noa ai i te feruri. ’A ha’a ai ’oia i ni’a i te reira mana’o i tae mai, ’ua huru piri te mea tāna i ’ite i te parau a Iosepha Semita i muri a’e i te ’Ōrama Mātāmua : « ’Ua ’ī tā’u [vairua] i te aroha. ’E nō te mau mahana e rave rahi, ’ua ’oa’oa vau i te ’oa’oa rahi. »⁷

Te mea māere, tau ’āva’e noa i muri mai, ’ua fāri’i teie ’utuāfare nō te ’Ēkālesia i te pi’ira’a iho i mauhia na e ana ’a 20 matahiti i mua ra. Te taime mātāmua ’a pi’ihia ai ’oia i terā pi’ira’a, ’ua amo ’oia i tāna mau hōpoi’a ’ei melo itoito nō te ’Ēkālesia. I teienei te uira’a e ’ere atu ra ïa « Nāhea vau ’ia amo i teie pi’ira’a ? » maori rā « Nāhea vau ’ia fa’a’ite i te aroha o te Atua i roto i tā’u tāvinira’a ? » Nā roto i teie hi’ora’a ’āpī, ’ua ’itea iāna te ’oa’oa rahi, te hāro’aro’a ’e te tumu mau nō te mau tuha’a ato’a o tōna pi’ira’a.

Te mau tuahine ’e te mau taea’e, nāhea tātou e fāri’i ai i te mana fa’ataui o te aroha o te Atua ? Tē tītau nei te peropheta Moromona ia tātou ’ia « pure atu i te Metua ma te pūai hope roa o te ’ā’au ’ia ’ī ’outou i teie nei here, ’o tāna i hōro’a mai i te mau ta’ata ato’a ’o tei pe’e mau i tāna Tamaiti ia Iesu Mesia, ».⁸ ’Aita ’o Moromona e tītau noa nei ia tātou ’ia pure ’ia ’ī tātou i te aroha o te Atua nō vetahi ’ē ’ia pure ato’a rā, ’ia ’ite tātou i te aroha mau o te Atua nō tātou iho.⁹

’A fāri’i ai tātou i tōna here, e ’ite tātou i te ’oa’oa rahi a’e i roto i te tūtavara’a ’ia aroha ’e ’ia tāvini mai iāna ra, nō te riro mai ’ei feiā « pe’e mau i tāna Tamaiti ia Iesu Mesia. »¹⁰

’Aita te aroha o te Atua e ’itehia i roto i te vaira’a o tō tātou orara’a, i roto rā i tōna ti’ara’a mai i roto i tō tātou orara’a. E ’ite tātou i tōna here ’ia fāri’i tātou i te pūai i’ō atu i tō tātou iho nei ’e ’ia ’āfa’i mai te Vārua i te hau, te tāmahanahana ’e te arata’ira’a. I te tahi mau taime, e mea rave ’atā ’ia ’ite i tōna aroha. E nehenehe tātou e pure ’ia ’ara’ara tō tātou mata nō te hi’o i tāna rima i roto i tō tātou orara’a, ’e nō te hi’o i tōna aroha i roto i te nehenehe o tāna mau hāmanira’a.

’A fēruri ai tātou i te orara’a o te Fa’aora ’e i tāna tusia tā’ōti’a ’ore, e ha’amata tātou i te hāro’aro’a i tōna aroha nō tātou. Tē hīmene fa’atura nei tātou i tei pāpa’ihia e Eliza R. Snow : « Ha’amani’ihia tōna ra toto, tōna ora i pūpūhia mai. »¹¹ ’A mamae ai Iesu nō tātou, e mani’i mai tōna ha’eha’a i ni’a i tō tātou vairua, ma te ha’amahora i tō tātou ’ā’au ’ia ’imi i te fa’a’orera’a hara i tāna rima ’e ma te fa’a’ī ia tātou i te hia’ai ’ia ora mai tāna i ora na.¹²

’Ua pāpa’i te peresideni Russell M. Nelson : « Onoono noa atu ā tātou i te tarai i tō tātou orara’a mai tōna ra, ’ū’ana noa atu ā te ateate ’e te hanahana o tō tātou aroha. »¹³

’Ua fa’ati’a tā māua tamaiti : « I te 11ra’a o tō’u matahiti, ’ua ’ōpua mātou tō’u mau hoa ’ia tāpuni i tō mātou ’orometua ’e ’ia ma’iri i te ’āfa hora mātāmua o te piha Paraimere. I tō mātou taera’a atu, ’ua māere mātou, ’ua fāri’i-poupou-hia mai mātou e te ’orometua. I muri iho, ’ua pure ’oia ma tōna ’ā’au ato’a ma te fa’a’ite i tōna māuruuru mau i te Fatu i te mea ē, nā mātou iho i ho’i i te piha Paraimere i taua mahana ra. ’Aita vau e ha’amana’o ra i te ha’api’ira’a i terā mahana, ’aore rā te i’oa o tō mātou ’orometua, i teienei rā, ’a toru ’ahuru matahiti i muri mai, tē putapū noa nei ā vau i tōna here ateate nō’u i taua mahana ra ».

’A pae matahiti i teienei, ’ua ’ite au i te here o te Atua ’a haere ai au i te Paraimere i te hō’ē pāroita i Rūtia. ’Ua ’ite au i te hō’ē tuahine fa’aro’o i te tūturira’a i mua e piti nā tamari’i ’e i te ha’apāpūra’a ia raua ē, noa atu ’o rāua ana’e te ta’ata ora i ni’a i te fenua nei, e mamae ’e e pohe Iesu nō rāua ana’e iho.

Tē fa’a’ite pāpū nei au ē, ’ua pohe mau te Fatu, tō tātou Fa’aora nō tātou tāta’itahi. E fa’a’itera’a te reira nō tōna aroha tā’ōti’a ’ore nō tātou ’e nō tōna Metua.

« ’Ua ’ite au tē ora nei tō’u Tāra’ehara. ’Auē ïa parau tāmāhanahana ! […] Tē ora nei ’oia nō te ha’amaita’i ia [tātou] i tōna here. »¹⁴

’A mata na i te ha’amahora i tō tātou ’ā’au i te aroha ateate o te Atua nō tātou ’e ’ia nīni’i atu i tōna aroha i roto i te mau mea ato’a ’o tā tātou e rave nei ’e i roto i tō tātou huru. Nā roto i te i’oa mo’a o Iesu Mesia, ’āmene.