Mau temeio o te ’evanelia a Iesu Mesia
’Ua ’ite au ē, e hōpoi mai tāna ’evanelia ia tātou te tīa’ira’a, te hau ’e te ’oa’oa, ’eiaha noa i teienei, e ha’amaita’i ato’a rā ia vetahi e rave rahi o te mau ui nō ananahi.
Mabuhay ! Tē fa’atae atu nei au i te tāpa’o here ’e te mata ’ata’ata o te feiā mo’a fa’ahiahia o te fenua Firipino. E tāpa’ohia teie matahiti te 60ra’a o te matahiti te taera’a mai te mau misiōnare mātāmua i te mau motu Firipino I teie mahana, tē vai nei e 23 misiōni ’e ’ua hau i te 800 000 melo o te ’Ēkalesia i roto e 123 titi. Tē vai nei e 7 hiero e ’ohipa nei, e hāmanihia ra ’aore rā tei fa’aarahia. E temeio mau teie. ’Ua riro tātou ’ei ’ite nō te tupura’a o te tohu i roto i te 2 Nephi 10:21 : « ’Ua rahi tā te Fatu mau fafaura’a ia rātou ’o tei pārahi i ni’a i te mau motu o te moana ».
’Ua riro ato’a teie temeio ’ei tupura’a nō te tohu tei hōro’ahia i roto i te pure a Elder Gordon B. Hinckley i Manila i te matahiti 1961. I roto i taua pure ra, ’ua parau Elder Hinckley : « Tē ti’aoro atu nei mātou i tā ’oe mau ha’amaita’ira’a i ni’a i te nūna’a o teie fenua, ’ia riro rātou ’ei feiā autaea’e ’e te fāri’i maita’i ’e te hāmani maita’i ’e te au maita’i i te feiā e haere mai i’ōnei, ’e tera rahira’a, ’oia, e te Fatu, tē pure nei mātou ’ia [rahi] atu ā rātou, ’ia tauatini atu ā ’o tē fāri’i i teie poro’i ’e ’ia ha’amaita’ihia. ’Ia hina’aro ’oe e ha’amaita’i ia rātou ma te mana’o fāri’i ’e te māramarama o te ’ā’au, ’e ma te fa’aro’o nō te fāri’i, ’e ma te itoito nō te ora i te mau parau tumu o te ’evanelia » (pure ha’amo’ara’a i te American War Memorial Cemetery, Philippines, 28 nō ’Ēperēra 1961).
I ni’a a’e i tera rahira’a, te rahira’a tauatini feiā mo’a ha’apa’o o te mau mahana hope’a nei, ’ua ’āfa’i mai te temeio o te ’evanelia i te mau tauira’a maita’i i te fenua ’e i tōna nūna’a. ’O vau te hō’ē ’ite ora nō te reira. E ono matahiti tō’u, i ’āmui mai ai tō’u nā metua i te ’Ēkalesia i te motu apato’a nō Mindanao. I te reira tau, hō’ē ana’e misiōni nā te fenua Firipino tā’ātoa, ’e ’aita e titi. E māururu mure ’ore tō’u nō te itoito ’e te fafaura’a a tō’u nā metua nō te pe’e i te Fa’aora. Tē fa’atura nei au ia rāua ’e te mau pionie ato’a o te ’Ēkālesia nō Firipino. ’Ua ’īriti rātou i te ’ē’a ’ia ha’amaita’ihia te hua’ai nō ananahi.
’Ua parau te ari’i Beniamina i roto i te buka a Moromona : « ’E ’oia ato’a, ’ua hina’aro ho’i au ’ia ha’amana’o ’outou i te huru ha’amaita’ihia ’e te ’oa’oa o te feiā e ha’apa’o i te mau fa’auera’a a te Atua. Inaha ho’i, ’ua ha’amaita’ihia rātou i roto i te mau mea ato’a, i te pae tino ’e te pae vārua ato’a ho’i » (Mosia 2:41).
’A ora ai ’e ’a ha’apa’o ai tātou i te mau parau tumu ’e te mau ’ōro’a o te ’evanelia, e ha’amaita’ihia tātou, e tauihia ’e e fa’afāriuhia nō te riro hau atu mai ia Iesu Mesia. Mai te reira tō te ’evanelia tauira’a ’e te ha’amaita’ira’a i te feiā mo’a Firipino, ’oia ato’a i tō’u ’utuāfare. Te ’evanelia ’o te ’ē’a mau ïa nō te hō’ē orara’a ’oa’oa ’e te hotu.
Te parau tumu mātāmua o te ’evanelia ’o te fa’aro’o ïa i te Fatu ia Iesu Mesia. Rave rahi Firipino e ti’aturi mau iho ā i te Atua. E mea ’ōhie nō mātou ’ia ti’aturi ia Iesu Mesia ’e ’ia ’ite ē e fāri’i mātou i te mau pāhonora’a i tā mātou pure.
’Ua riro te ’utuāfare Obedoza ’ei hi’ora’a rahi nō te reira. ’O te taea’e Obedoza te peresideni ’āma’a i tō’u ’āpīra’a. Te hina’aro rahi o te taea’e ’e te tuahine Obedoza ’ia tā’atihia rāua i tō rāua ’utuāfare i roto i te hiero nō Manila. Tē ora ra rātou i te ’oire nō General Santos, e 1 600 kirometera te ātea i te ’oire nō Manila. Nō te hō’ē ’utuāfare e iva ta’ata, e riro ’ei ’ohipa tupu ’ore nō te rātere atu i te hiero. Teie rā, mai te ta’ata ho’o tao’a tei haere e ho’o atu i tāna mau mea ato’a nō te ho’o mai i te hō’ē poe tao’a rahi (hi’o Mataio 13:45–46), ’ua fa’aoti teie nā ta’ata fa’aipoipo e ho’o atu i tō rāua fare nō te aufau i te rāterera’a. ’Ua pe’ape’a ri’i te tuahine Obedoza nō te mea ’aita tō rātou e fare fa’ahou ’ia ho’i mai rātou. ’Ua ha’apāpū atu rā te taea’e Obedoza iāna ē, na te Fatu e ha’apa’o i te reira.
’Ua tā’atihia rātou ’ei ’utuāfare nō teie tau ’e nō te tau a muri noa atu i roto i te hiero i te matahiti 1985. I roto i te hiero, ’ua ’ite mai rātou i te ’oa’oa fāito ’ore—tā rātou poe tao’a rahi. ’E ’ia au i te mau parau a te taea’e Obedoza, ’ua ha’apa’o mai te Fatu. I tō rātou ho’ira’a mai na Manila mai, ’ua hōro’a te tahi mau hoa i te mau vāhi nohora’a nō rātou, ’e i te hope’a ’ua fāri’i fa’ahou rātou i tō rātou iho fare E aupuru maita’i te Fatu i te feiā e fa’a’ite i tō rātou fa’aro’o iāna.
Te piti o te parau tumu o te ’evanelia, ’o te tātarahapa ïa. Te tātarahapara’a ’o tē fāriu-’ē-ra’a ïa i te hara ’e te fāriura’a i ni‘a i te Atua nō te fa’a’orera’a i te hara. ’O te tauira’a ïa i te ferurira’a ’e te ’ā’au. Mai tā peresideni Nelson i ha’api’i, ’o te « ha’amaita’i-atu-ā-ra’a i tā tātou ’ohipa ’e ia tātou iho nei, i te mahana tāta’itahi » (« E nehenehe tātou e rave maita’i a’e ’e e ha’amaita’i ia tātou », Liahona, Mē 2019, 67).
E au roa te tātarahapa mai te pu’a. ’Ei taure’are’a ’ī’ite i te pae o te tārā’aura’a [chimie], ’ua rave au i te ’ohipa i roto i te hō’ē pū hāmanira’a pu’a i te fenua Firipino. ’Ua ha’api’i mai au e nāhea e hāmani i te pu’a ’e te fa’anahora’a e nāhea te reira ’ia fa’a’ohipa. ’Ia ’ānoi ana’e ’outou i te mau hinu ’e te hō’ē fāito alcalin ’e e tu’u atu ai i te tahi mau ha’aviri ’ahavai, e fa’atupu te reira i te hō’ē tao’a pūai nō te fa’a’ore i te mau pātēria ’e te mau tirotiro. Mai te pu’a, ’ua riro te tātarahapa ’ei hō’ē tao’a tāmāra’a. E fa’ati’a te reira ia tātou ’ia tāmāhia i tō tātou reporepo ’e tō tātou mau pehu tahito, ’ia riro mai tātou ’ei mea ti’amā nō te pārahi ’e te Atua, « e ’ore roa te hō’ē mea vi’ivi’i e ō i te bāsileia o te ao ra » (Alama 11:37).
Nā roto i te tātarahapa e fa’a’ohipa tātou i te mana tāmā, te ha’amo’ara’a o Iesu Mesia. ’O te hō’ē tuha’a tumu nō te fa’anahora’a o te fa’afāriura’a. ’O te mea ïa tei tupu i te mau Aniti-Nephi-Lehi i roto i te Buka a Moromona. E mau ’āti Lamana rātou ’o tei fa’afāriu-pāpū-maita’i-hia ē « ’aita roa ïa rātou i tāiva » (hi’o Alama 23:6–8). ’Ua huna rātou i tā rātou mau mauiha’a tāma’i ’e ’aore roa rātou i fa’a’ohipa fa’ahou i te reira. Maita’i a’e na rātou e pohe i te ’ōfatira’a i teie fafaura’a. ’E ’ua fa’a’ite iho ā rātou i te reira. ’Ua ’ite tātou ē, ’ua ’āfa’i mai tā rātou tusia i te mau temeio ; te tauatini tei aro ia rātou tei fa’aru’e i tā rātou mauiha’a tāma’i ’e tei fa’afāriuhia. Tau matahiti i muri mai, tā rātou mau tamari’i tamāroa, ’o tā tātou i ’ite ’ei ’aito pūai, tei pāruruhia i roto i te arora’a tei ’ore i mana’ohia e upo’otia rātou !
Mea nā roto ato’a mai tō’u ’utuāfare ’e e rave rahi feiā mo’a Firipino i teie huru fa’anahora’a o te fa’afāriura’a. ’Ia fāri’i ana’e tātou i te ’evanelia a Iesu Mesiae ’e te ’āmuira’a atu i roto i te ’Ēkālesia, e taui tātou i tō tātou ’ē’a ’e tā tātou ta’ere nō te fa’atano i ni’a i te ’evanelia. E tītauhia ia tātou ’ia vaiiho i te mau peu hape. ’Ua ’ite au te reira i ni’a i tō’u metua tāne i tōna ha’api’ira’a mai i te ’evanelia ’e tei tātarahapa. E ta’ata pūpuhi ’ava’ava roa ’oia, ’ua fa’aru’e ’oia i tāna ’ava’ava ’e ’aita roa i tāpe’a fa’ahou. Nō te mea ’ua fa’aoti ’oia e taui, e maha u’i mai iāna tei ha’amaita’ihia.
E arata’i te tātarahapa ia tātou ’ia rave ’e ’ia ha’apa’o i te mau fafaura’a nā roto i te mau ’ōro’a mo’a. Te ’ōro’a mātāmua nō te fa’aorara’a ’e te fa’ateiteira’a ’o te bāpetizo-utuhi-ra’a ïa ’ia mātara te hara. E fa’ati’a te bāpetizora’a ia tātou ’ia fāri’i i te hōro’a o te Vārua Maita’i ’e ’ia rave i te hō’ē fafaura’a ’e te Fatu. Tē faʼaʼāpī nei tātou i teie fafaura’a o te bāpetizora’a i te mau hepetoma atoʼa ’a rave ai tātou i te ʼōro’a mo’a. E temeio ato’a te reira !
Te mau taeaʼe ʼe te mau tuahine, tē ani nei au ia ’outou ’ia ’āfa’i atu i teie temeio i roto i tō ’outou orara’a. ’A haere mai ia Iesu Mesia ra ’e ’a mā’iti i te fa’a’ohipa i tō ’outou fa’aro’o iāna, ’a tātarahapa ’e ’a rave ’e ’a ha’apa’o i te fafaura’a e ’itehia i roto i te mau ’ōro’a nō te fa’aorara’a ’e te fa’ateiteira’a. E fa’ati’a te reira ia ’outou ’ia nātihia i te Mesia ’e ’ia fāri’i i te mana ’e te mau ha’amaita’ira’a o te atuara’a (hi’o Te Ha’api’ira’a Tumu ’e te mau Fafaura’a 84:20).
Tē fa’a’ite pāpū nei au i te huru mau o Iesu Mesia ’e tē ora nei ’oia ’e ’ua here ’oia ia tātou tāta’itahi. ’Ua ’ite au ē e hōpoi mai tāna ’evanelia ia tātou te tīa’ira’a, te hau ’e te ’oa’oa, ’eiaha noa i teienei, e ha’amaita’i ato’a rā ’ia vetahi e rave rahi o te mau ui nō ananahi. ’O teie te tumu nō te nehenehe ’e te māhanahana o te mata ’ata’ata o te feiā mo’a Firipino. ’O teie te temeio nō te ’evanelia ’e te ha’api’ira’a tumu a te Mesia Tē fa’a’ite pāpū nei au i te reira i te i’oa mo’a o Iesu Mesia, ’āmene.