Hi’o i te hope’a o te purūmu
Te rōtahira’a i ni’a i te mau mea faufa’a roa a’e—te mau mea iho ā rā « i te hope’a o te purūmu », te mau mea mure ’ore—’o te tāviri ïa nō te rātere nā roto i te orara’a.
I te 15ra’a o tō’u matahiti, ’ua fāri’i au i tā’u parau ta’ata ha’api’ipi’i, ’ua ti’a atu ra iā’u ’ia fa’ahoro i te hō’ē pere’o’o nā muri i te hō’ē o tō’u nā metua. I te anira’a mai tō’u metua tāne ē, ’ua hina’aro ānei au e haere e fa’ahoro, ’ua ’ana’anatae roa vau.
’Ua fa’ahoro ’oia ma’a maile nō te haere i rāpae i te ’oire, i ni’a i te hō’ē purūmu piti rēni ’aore re’a ta’ata e haere—e parau roa vau, ’o te vāhi noa paha e’ita ’oia e ri’ari’a. ’Ua tāpe’a ’oia i te hiti purūmu, ’e ’ua taui māua. ’Ua fa’ata’a mai ’oia i te tahi mau mea e rave ’e ’ua parau mai ra : « Haere marū i ni’a i te purūmu ’e e fa’ahoro ’oe ē tae roa i te taime e parau vau ia ’oe e tāpe’a. »
’Ua ha’apa’o maita’i au i tāna mau parau. E 60 noa tetoni te maoro, i nā ’ō ai ’oia : « ’A haere i te hiti. E piha’e tē noa’a mai. Tīoi haere noa te pere’o’o i ni’a i te purūmu. » ’Ua ani mai ’oia : « E aha tā ’oe e hi’o ra ? »
Ma te riri ri’i, ’ua parau atu vau : « Tē hi’o ra vau i te purūmu. »
’Ua parau mai ra ’oia : « Tē hi’o ra vau i tō ’oe mata, ’e tē hi’o ra ’oe i mua noa mai i te muara’a pere’o’o. Mai te mea e hi’o noa ’oe i te muara’a, e’ita ’oe e fa’ahoro ’āfaro. » Parau mai nei ’oia : « ’A hi’o i te hope’a o te purūmu. Nā reira ’oe e tere ’āfaro ai. »
Iā’u nei, ’ei tamāroa 15 matahiti, e mea maita’i terā ha’api’ira’a fa’ahorora’a pere’o’o. ’Ua mana’o ato’a vau i muri iho ē e ha’api’ira’a rahi te reira nō te orara’a. Te rōtahira’a i ni’a i te mau mea faufa’a roa a’e—te mau mea iho ā rā « i te hope’a o te purūmu », te mau mea mure ’ore—’o te tāviri ïa nō te rātere nā roto i te orara’a.
I te hō’ē taime i roto i te orara’a o te Fa’aora, ’ua hina’aro ’oia e fa’aea ’ōna ana’e, nō reira « haere atu ra ’oia ana’e ra i ni’a i te hō’ē mou’a e pure. »1 ’Ua tono ’oia i tāna mau pipi ma te fa’aue ia rātou e fano i te tahi atu pae o te miti. I terā pō pōiri, ’ua fa’aū teie pahī o te mau pipi i te hō’ē vero pūai. ’Ua haere atu Iesu e fa’aora ia rātou, e rāve’a mātau ’ore rā. Tē tai’o nei te pāpa’ira’a mo’a ē : « E tae a’ra’a i te maha o te arara’a o te ru’i ra, haere atu ra Iesu ia rātou ra i nā ni’a i te ’are. »2 I te ’itera’a rātou iāna, ’ua ha’amata rātou i te ri’ari’a, ’ua mana’o ho’i rātou te mea e haere mai ra, ’o te tahi ïa tūpāpa’u ’aore rā vārua. Nō te ’itera’a Iesu i tō rātou mata’u ’e nō tōna hina’aro e tāmarū i tō rātou ferurira’a ’e te ’ā’au, ’ua pi’i mai ra ia rātou : « ’A fa’aitoito, ’o vau, ’eiaha e mata’u. »3
’Aita te ’ā’au o Petero i māmā noa, ’ua itoito roa rā. ’O Petero ho’i tē itoito noa ’e tē hitahita pinepine, ’ua pi’i a’era ia Iesu : « E te Fatu, ’o ’oe ra, e parau mai iā’u ’ia haere atu vau ia ’oe na nā ni’a i te ’are. »4 Pāhono a’era Iesu ma teie anira’a mātauhia ’e te mōrohi ’ore : « ’A haere mai. »5
’Ua ’ana’anatae roa paha Petero, fa’aru’e a’era i te poti ’aita rā i topa i roto i te pape, ’ua nā ni’a rā i te haere. ’A rōtahi noa ai ’oia i ni’a i te Fa’aora, ’ua ti’a roa iāna i te rave i te mea e’ita e roa’a ’ia rave, ’oia ho’i e haere nā ni’a i te pape. I te ha’amatara’a ’aita Petero i taiā i te vero. I te « ’ū’ana » rā6 o te mata’i, ’ua fa’a’ōnevaneva atu ra, ’e ’ua mo’e i tāna fa’atumura’a. Tupu fa’ahou a’enei te mata’u. ’E i te fa’ahope’ara’a, ’ua tāpetepete tōna fa’aro’o, ’e ’ua ha’amata ’oia i te paremo. « ’Ua pi’i atu ra, E te Fatu, ’ia ora vau. »7 ’O te Fa’aora ho’i tei hina’aro noa e fa’aora, ’ua toro atu ’oia i te rima ’e ’ua huti mai ra iāna i te vāhi maita’i.
Hope ’ore ’ia tai’o i te mau ha’api’ira’a mai roto mai i teie fa’ati’ara’a temeio, e fa’ahiti rā vau e toru.
Rōtahi i ni’a i te Mesia
Te ha’api’ira’a mātāmua : Rōtahi i ni’a ia Iesu Mesia. ’A vai noa ai te mata o Petero i ni’a ia Iesu, ’ua haere ’oia nā ni’a i te pape. ’Aita tā te vero, tā te mau ’are ’e tā te mata’i nō te fa’ataupupū iāna ’a rōtahi noa ai tōna mata i ni’a i te Fa’aora.
Nā te hāro’aro’ara’a i tā tātou fā hope’a e tauturu mai e fa’aoti e aha te fa’atumura’a e ti’a ai. E’ita e nehenehe ha’uti manuia i te hō’ē ha’uti ’aita ana’e tātou i ’ite i te fā, nā reira ato’a ’aita e orara’a pāpū ’aita ana’e tātou i ’ite i tō te reira fā. Hō’ē ha’amaita’ira’a rahi nō te ’evanelia a Iesu Mesia i fa’aho’ihia mai, te hō’ē a’e, ’o te pāhonora’a ïa i te uira’a « E aha te fā o te orara’a ? » « Tō tātou fā i roto i teie orara’a, ’o te fāri’ira’a ïa i te ’oa’oa ’e te fa’aineinera’a nō te ho’i i mua i te aro o te Atua. »8 Nā te ha’amana’ora’a ē tei ’o nei tātou i te fenua nei nō te fa’aineine nō te ora ’e te Atua, e tauturu ia tātou ’ia rōtahi i ni’a i te mau mea e arata’i ia tātou i te Mesia ra.
Nō te rōtahira’a i ni’a i te Mesia, tītauhia ïa te tītī’aifaro, i roto iho ā rā i te mau ’ohipa ri’i pae vārua ’ōhie ’o tē tauturu i te ha’amaita’i ia tātou ’ei pipi. ’Aita e ti’ara’a pipi ’aita ana’e te tītī’aifaro.
E pāpū mai tā tātou rōtahira’a i ni’a i te Mesia ’ia hi’o tātou i te hope’a o te purūmu, i reira tātou e hina’aro e haere ’e ’o vai tā tātou e hina’aro e riro mai, ’ei reira e fa’ata’a ai i te taime i te mau mahana ato’a nō te rave i terā mau mea e tauturu ia tātou ’ia tāpae atu. E nehenehe te rōtahi i ni’a i te Mesia e fa’a’ōhie i tā tātou mau fa’aotira’a ma te fa’afāna’o mai i te arata’i e nāhea tātou e ha’amāu’a maita’i i tō tātou taime ’e tā tātou mau rāve’a.
E mau mea e rave rahi e mea maita’i ia rōtahi atu, terā rā tē ha’api’i nei tātou i roto i te hi’ora’a o Petero i te faufa’a rahi e tāpe’a noa i te Mesia i te pū o tā rātou rōtahira’a. E mea nā roto noa i te Mesia tātou e nehenehe ai e ho’i e ora i pīha’i iho i te Atua. E tūru’i tātou i ni’a i te maita’i rahi o te Mesia ’a tūtava noa ai i te riro mai iāna te huru ’e i te ’imi i tāna fa’aorera’a hara ’e i tōna mana ha’apūai ’ia hape tātou.
Hi’o maita’i i te mau fa’anevanevara’a
Te piti o te ha’api’ira’a : hi’o maita’i i te mau fa’anevanevara’a. I te fāriu-’ē-ra’a Petero i tōna mata mai ni’a ia Iesu ’e i ni’a atu i te mata’i ’e te mau ’are tei fa’ahuehue noa i tōna ’āvae, ’ua ha’amata ’oia i te paremo.
E rave rahi mea « i mua noa mai i te muara’a pere’o’o » e nehenehe e fa’a’ōnevaneva ia tātou i te rōtahira’a i ni’a i te Mesia ’e te mau mea mure ’ore e vai ra « i te hope’a o te purūmu. » ’O te diabolo te fa’a’ōnevaneva rahi. Tē ha’api’i nei tātou i roto i te ’ōrama a Lehi ē, ’ua ’imi te mau reo nō te fare rahi ’e te ’ā’ano ra ’ia paru ia tātou i ni’a i te mau mea e arata’i ’ē ia tātou i te ’ē’a nō te fa’aineinera’a nō te ho’i e ora i pīha’i iho i te Atua.9
E mau fa’anevanevara’a rā tei ’ore e ’ite-pāpū-hia ’o tē nehenehe ato’a e riro ’ei ataatara’a. Mai terā parau ē : « Te mea noa e upo’oti’a ai te ’ino, ’o te rave-’ore-ra’a ïa te ta’ata maita’i i te ’ohipa. » E au ē, ’ua fa’aoti te ’enemi e tūra’i i te ta’ata maita’i ’eiaha e rave i te hō’ē mea, ’aita rā, ’ia pau a’e tō rātou taime i roto i te mau mea e fa’a’ōnevaneva ia rātou i tā rātou mau ’ōpuara’a teitei ’e te mau fā teitei. ’Ei hi’ora’a, e nehenehe te raverave-tano-ra’a i te mau mea au nō te fa’ataui i te mana’o ’ia riro mai ’ei fa’anevanevara’a au ’ore ’aita ana’e e tītī’aifarora’a. ’Ua ta’a i te ’enemi ē ’aita i tītauhia te fa’anevanevara’a ’ino ’e te vi’ivi’i nō te manuia.
E nehenehe tātou e fa’aorahia mai
Te toru o te ha’api’ira’a : E nehenehe tātou e fa’aorahia mai. I te paremora’a Peteo, ’ua pi’i atu ’oia : « E te Fatu ’ia ora vau. ’Ua fa’atoro mai ra Iesu i tāna rima i reira ra, haru mai ra iāna. »10 ’Ia hi’o tātou ē tē paremo ra tātou, ’ia fa’aruru tātou i te ’ati ’aore rā ’ia turori tātou, e nehenehe ato’a tāna e fa’aora mai.
I mua i te ’ati ’e te fifi, e tīa’i ato’a paha ’outou mai iā’u nei ’ia fa’aorahia mai i reira ra. ’A ha’amana’o rā ē ’ua haere mai te Fa’aora e tauturu i te mau ’āpōsetolo ’ia tae a’era i te maha o te arara’a o te ru’i ra—’o te roara’a o te pō rātou i te tāfifira’a i te vero.11 E pure tātou ē mai te mea e’ita te tauturu e tae mai i reira ra, e tae mai paha ïa i te piti o te arara’a ’aore rā i te toru o te arara’a o taua pō ra nō te pāpa’ira’a mo’a. Tītau-ana’e-hia ’ia tīa’i, ’ia vai pāpū te mana’o ē, tē hi’o noa mai ra te Fa’aora, ’eiaha te teimaha o te ’ohipa tā tātou e fa’aruru ’ia rahi a’e i tē noa’a ia tātou ’ia fa’a’oroma’i.12 ’Outou e tīa’i ra i roto i te maha o te arara’a o te ru’i ra, penei a’e tei roto noa ā i te mamae, ’eiaha e ha’aparuparu i te mana’o. E tae mai iho ā te fa’aorara’a i tei ha’apa’o maita’i, i te tāhuti nei ’aore rā i te tau mure ’ore.
I te tahi taime e paremo tātou nō tā tātou mau hape ’e te mau ’ōfatira’a ture. Mai te mea tē ’ite ra ’outou tē paremo ra ’outou nō teie nau tumu, ’a rave i te mā’itira’a ’oa’oa ’ia tātarahapa.13 Tē ti’aturi nei au e ma’a mea noa tē fa’a’oa’oa rahi a’e i te Fa’aora maori rā te fa’aorara’a ia rātou e fāriu ’aore rā e fāriu fa’ahou iāna ra.14 ’Ua ’ī te mau pāpa’ira’a mo’a i te mau ’ā’amu nō te mau ta’ata tei hi’a ’e tei hape i te hō’ē taime, terā rā ’ua tātarahapa rātou ’e ’ua pāpū roa mai i roto i te fa’aro’o i te Mesia. I tō’u mana’o, tei roto teie mau ’ā’amu i te mau pāpa’ira’a mo’a nō te fa’aha’amana’o ia tātou ē, e mea tā’ōti’a ’ore te here o te Fa’aora nō tātou nā reira ato’a tōna mana nō te fa’aora ia tātou. E ’ere te Fa’aora noa tē ’oa’oa ’ia tātarahapa tātou, e fāri’i ato’a tātou i te ’oa’oa rahi.
Pū’ohura’a
Tē ani nei au ia ’outou ’ia rave ma te mana’o pāpū i « te hi’ora’a i te hope’a o te purūmu » ’e i te fa’arahira’a i tā tātou rōtahira’a i ni’a i terā mau mea faufa’a a’e. ’Ia tāpe’a na tātou i te Mesia i te pū o tā tātou rōtahira’a. I roto i te mau fa’anevanevara’a ato’a, te mau mea « i mua noa mai i te muara’a pere’o’o », ’e te mau pūāhiohio ’ati a’e ia tātou, tē parau pāpū nei au ē, ’o Iesu tō tātou Fa’aora ’e tō tātou Tāra’ehara ’e tō tātou Ora. I te i’oa o Iesu Mesia, ’āmene.