Fa’ahereherehia e te Fatu i tō’u mau mahana
Nāhea tātou ’ia pāhono i tō tātou mau ’ati ? Tē māuruuru ra ānei tātou nō te mea ’ua fa’atumu rahi a’e tātou i ni’a i tō tātou mau ha’amaita’ira’a ’eiaha rā i ni’a i tō tātou mau fifi ?
’Ua riro te ma’i pe’e Tovi-19 ’ei hō’ē o te mau tāmatara’a ’e te mau tītaura’a e rave rahi ’o tā te mau tamari’i a te Atua i fa’aruru i roto i te ’ā’amu o te ao nei. I te ’ōmura’a o teie matahiti, ’ua fa’aruru tō’u ’utuāfare here ’e ’o vau iho i te mau mahana pōuri. ’Ua fa’atupu te ma’i pe’e ’e te tahi atu mau fifi i te pohe ’e te māuiui i tō’u ’utuāfare nā roto i te fa’aru’era’a mai te tahi mau ta’ata herehia. Noa atu te rapa’aura’a maita’i, te ha’apaera’a mā’a ’e te pure, i te roara’a e pae hepetoma, ’ua reva atu tō’u taea’e ’o Charly, tō’u tuahine ’o Susy ’e tō’u tao’ete tāne ’o Jimmy i tera pae mai o te pāruru.
I te tahi taime ’ua uiui tō’u mana’o nō te aha pa’i te Fa’aora i ta’i ai i te taime ’a ’ite ai ’oia ia Maria i te hepohepora’a nō te pohera’a tōna taea’e, ’o Lazaro, noa atu ’ua ’ite ’oia ē e mana tōna nō te fa’ati’a mai ia Lazaro, ’e ’aita i maoro roa ’ua fa’a’ohipa ’oia i taua mana ra nō te fa’ati’a mai i tōna hoa mai te pohe mai.1 ’Ua fa’ahiahia vau i te aumihi ’e te auma’i o te Fa’aora nō Maria ; ’ua ta’a iāna te māuiui fāito ’ore tā Maria e fa’aruru ra nō te pohe o tōna taea’e, ’o Lazaro.
E fāri’i ato’a tātou i taua ’oto fāito ’ore ra ’ia ora ana’e tātou i te ta’a-’ē-ra’a poto o te hō’ē tei herehia. E aumihi maita’i roa tō te Fa’aora nō tātou. ’Aita ’oia e fa’ahapa nei i tā tātou hi’ora’a poto ’aita ato’a tā tātou hi’ora’a tā’ōti’a o tō tātou tere mure ’ore. ’Aita, e aumihi rā tōna i tō tātou ’oto ’e te māuiui.
Tē hina’aro nei te Metua i te ao ra ’e tāna Tamaiti, ’o Iesu Mesia ’ia ’oa’oa tātou.2 ’Ua ha’api’i te peresideni Russell M. Nelson : « Te ’oa’oa e tae mai, ’aore re’a nō te mea e fa’aruruhia nei, pauroa rā nō te mea i ni’a iho e fa’atumuhia ai tō tātou orara’a. Tei ni’a te fa’atumura’a o tō tātou orara’a i te fa’anahora’a nō te fa’aorara’a a te Atua, … ’ei reira te ’oa’oa e tae mai ai noa atu te mea e tupu ra—’aore rā ’aita e tupu ra—i roto i tō tātou orara’a ».3
’Ei taure’are’a misiōnare, tē ha’amana’o nei au i te hō’ē misiōnare māere tā’u i fa’ahiahia i muri iho, tei fāri’i i te tahi parau ’āpī ’ino mau. ’Ua fa’aru’e mai tōna metua vahine ’e tōna tua’ane ’āpī i roto i te hō’ē ’ati purūmu. ’Ua fa’ati’a te peresideni misiōni i teie misiōnare ’ia ho’i i te fare nō te ’ōro’a hunara’a. Teie rā, i muri a’e i te paraparaura’a i tōna metua tāne i ni’a i te niuniu, ’ua fa’aoti teie misiōnare e fa’aea mai ’e e fa’aoti i tāna misiōni.
Ma’a taime i muri mai, tei roto māua i te hō’ē ā tuha’a ’oire, ’ua fāri’i māua tō’u hoa misiōnare i te hō’ē niuniu rū ; ’ua ’eiāhia te pere’o’o ta’ata’ahi o taua misiōnare ra ’e ’ua ha’apēpēhia ’oia i te tipi. ’Ua haere rāua tōna hoa misiōnare nā te ’āvae i te fare ma’i fātata, i reira tō māua fārereira’a ia rāua. I ni’a i te purūmu nō te fare ma’i, ’ua ’oto vau nō teie misiōnare. ’Ua feruri au, e ’ore roa paha tōna ’ana’anatae, mea pāpū roa ē i muri iho i teie fifi teimaha, e hina’aro roa ’oia e ho’i i te fare i teienei.
’Ātīrā rā, i tō māua taera’a atu i te fare ma’i, ’ua ’ite atu vau i teie misiōnare e tārava ra i ni’a i te ro’i, e tīa’i ra ’ia tāpūhia ’oia—e mata ’ata’ata tōna. ’Ua feruri au : « Nāhea ’oia e nehenehe e ’ata’ata i roto i teie huru fifi ? » I roto i tōna taime fa’aoraorara’a i te fare ma’i, ’ua ’ōpere ’ana’anatae ’oia i te mau buka ’iti ’e te mau nene’i nō te Buka a Moromona, nā te mau taote, te mau utuutu ma’i ’e te tahi feiā ma’i. Noa atu teie mau tāmatara’a, ’aita roa ’oia i hina’aro e ho’i i te fare. ’Aita, ’ua tāvini ’oia ē tae roa i te mahana hope’a o tāna misiōni ma te fa’aro’o, te ’itoito, te pūai ’e te ’ana’anatae.
I te ’ōmuara’a o te Buka a Moromona, tē nā ō ra Nephi : « ’ua ’ite au i te mau ’ati e rave rahi i tō’u ra pu’e mahana, ’āre’a rā ’ua fa’ahereherehia vau e te Fatu i tō’u mau mahana ato’a ».4
Tē feruri nei au i te mau tāmatara’a e rave rahi tā Nephi i fa’aruru, e rave rahi tāna i pāpa’i. Tē tauturu nei tōna mau tāmatara’a ia tātou ’ia māramarama ē, tē vai ra tō tātou pā’āto’a mau mahana pōuri. Hō’ē o teie mau tāmatara’a, ’ua tupu ïa i te taime ’a fa’auehia ai Nephi e ho’i i Ierusalema nō te ti’i mai i te mau ’api veo e vai ra ia Labana ra. Vetahi o tōna mau tua’ane e mau ta’ata fa’aro’o paruparu ïa, ’e ’ua tā’iri roa ato’a rātou ia Nephi i te rā’au. ’Ua ’ite Nephi i te tahi atu tāmatara’a i te fatira’a tāna fana ’e ’aita i roa’a te mā’a nā tōna ’utuāfare. I muri iho, i te taime ’a fa’auehia ai ’oia e hāmani i te hō’ē pahī, ’ua fa’a’o’ō’o tōna mau tua’ane iāna ’e ’ua pāto’i i te tauturu iāna. Noa atu teie mau tāmatara’a ’e te tahi atu mau tāmatara’a e rave rahi i roto i tōna orara’a, ’ua tāmau noa Nephi i te ’ite i te maita’i o te Atua.
’A rātere ai tōna ’utuāfare nā te moana i te fenua i parauhia ra, ’ua ha’amata te tahi mau melo o te ’utuāfare o Nephi « i te fa’a’ārearea ia rātou iho », i te parau i te mau parau tano ’ore ’e ’ua mo’ehia ia rātou ē, nā te mana o te Fatu i fa’aherehere ia rātou. I tō Nephi tama’ira’a ia rātou, ’ua ’ino’ino roa rātou ’e ’ua tā’amu’amu iāna i te taura ’eiaha ’oia ’ia hā’uti’uti fa’ahou. Tē nā ō ra te Buka a Moromona nō tōna mau taea’e ē « ’ua hāmani ’ino mai ra iāna » ; tōna mau ’apu’apurima ’e tōna mau mōmoa ’āvae « ’ua ’oru’oru roa … ’e ’ua māuiui roa ho’i ».5 ’Ua māuiui roa Nephi nō te ’ā’au ’eta’eta o tōna mau tua’ane ’e i te tahi taime ’ua hepohepo i te ’oto.6 ’Āre’a rā, ’ua parau Nephi, « ’ua ti’aturi noa vau i tō’u Atua, ’e ’ua ha’amaita’i noa vau iāna i te tā’āto’ara’a nō te mahana ; ’e ’aita vau i amuamu i te Fatu nō tō’u ra mau ’ati ».7
E tō’u mau taea’e ’e mau tuahine here, nāhea tātou ’ia pāhono i tō tātou mau ’ati ? E amuamu ānei tātou i te Fatu nō te reira ? ’Aore rā, mai ia Nephi ’e tō’u hoa misiōnare tahito ānei tātou, i te fa’a’itera’a i te māuruuru nā roto i tā tātou mau parau, tō tātou mana’o ’e te ’ohipa, nō te mea ’ua fa’atumu rahi a’e tātou i ni’a i tō tātou mau ha’amaita’ira’a ’eiaha rā i ni’a i tō tātou mau fifi ?
’Ua hōro’a mai tō tātou Fa’aora, Iesu Mesia ia tātou i te hi’ora’a maita’i i te roara’a o tāna misiōni i te tāhuti nei. I roto i te mau tau fifi ’e te tāmatara’a, e mea iti roa te mau mea e rahi a’e te hau ’e te māuruuru i te tāvinira’a i tō tātou ta’ata tupu. Tē fa’ati’a nei te buka a Mataio i te ’ohipa i tupu i tō te Fa’aora ’itera’a ē, ’ua tāpūhia te upo’o o tōna taea’e fēti’i ’o Ioane Bāpetizo e te ari’i Heroda, nō tōna hina’aro i te tamāhine a Herodia :
« ’Ua ti’i atu ra tāna mau pipi i te tino, hōpoi atu ra e tanu, ’e ’ua haere mai ra e fa’a’ite ia Iesu.
« E ’ite a’era Iesu i taua parau ra, haere huna atu ra ’oia i ni’a i te hō’ē pahī reva atu ra i te tahi vāhi mo’emo’e ; ’e ’ite a’era te ta’ata ’ua pe’e atu ra iāna nā uta, nō roto i te mau ’oire.
« ’E tei tē tīpaera’a ra ’ite atu ra Iesu te ta’ata e rave rahi, aroha atu ra ’oia ia rātou e fa’aora iho ra i tō rātou feiā ma’i.
« E tōihoiho atu ra te mahana, ’ua haere mai ra tāna mau pipi, ’ua nā ’ō mai ra iāna, e vāhi mo’emo’e teie, ’e ’ua poto te mahana, e tu’u atu i teie nei feiā rahi ’ia haere na i te mau vila e ho’o i te mā’a nā rātou.
« ’Ua parau atu ra Iesu ia rātou, ’eiaha rātou e haere, nā ’outou e hōpoi atu i te mā’a nā rātou ».8
’Ua fa’a’ite Iesu Mesia ia tātou ē, i roto i te mau taime tāmatara’a ’e te ’ati, e nehenehe tātou e ’ite i te mau fifi o vetahi ’ē. Ma te aumihi, e nehenehe tātou e toro i te rima ’e e fa’ati’a mai ia rātou. ’E ’a nā reira ai tātou, e fa’ati’a-ato’a-hia mai tātou nā roto i tā tātou tāvinira’a huru Mesia. ’Ua parau te peresideni Gordon B. Hinckley : « Te rā’au maita’i roa a’e tā’u i ’ite nō te mana’o pe’ape’a ’o te ’ohipa ïa. Te rā’au maita’i roa a’e nō te hepohepo ’o te tāvinira’a ïa. Te rā’au maita’i roa a’e nō te rohirohi ’o te ’ōpuara’a ïa e tauturu i te tahi ta’ata tei hau atu i te rohirohi ia ’outou ».9
I roto i teie, te ’Ēkālesia a Iesu Mesia, ’ua rahi tā’u mau rāve’a nō te aupuru ’e nō te tāvini i tō’u ta’ata tupu. I te reira mau taime vau e ’ite ai i tō te Metua i te ao ra ha’amāmāra’a i tā’u mau hōpoi’a. ’O te peresideni Russell M. Nelson te peropheta o te Atua i ni’a i te fenua nei, ’o ’oia te hi’ora’a maita’i rahi nō te aupurura’a ia vetahi ’ē i roto i te mau tāmatara’a fifi rahi. Tē tāhō’ē nei au i tō’u ’itera’a pāpū i tō te feiā mo’a e rave rahi ē, ’o te Atua tō tātou Metua here i te ao ra. ’Ua ’ite au i tōna here fāito ’ore i roto i tō’u mau mahana pōuri. ’Ua ta’a maita’i i tō tātou Fa’aora, Iesu Mesia, i tō tātou mau māuiui ’e tō tātou mau ’ati. ’Ua hina’aro ’oia e ha’amāmā i tā tātou mau hōpoi’a ’e e tāmāhanahana ia tātou. E mea ti’a ia tātou ’ia pe’e i tōna hi’ora’a nā roto i te tāvinira’a ’e te aupurura’a i te feiā tei hau atu te teimaha o te hōpoi’a i tā tātou nei. I te i’oa o Iesu Mesia, ’āmene.