Li k’anjelak jo’ misioneer kirosob’tesi lin yu’am chi junelik

B’antiox, Awa’b’ej Nelson, naq xawotz wi’chik li na’leb’ a’in chirix li k’anjelak jo’ misioneer.

Ex was wiitz’in, k’iila chihab’ chaq, jun sut yookin chaq chi aatinak sa’ li jolomil ch’utub’aj-ib’, ki’ok xrahilal xsa’ lin tz’e u xb’aan ajwi’ li cheekelal, li kiniman chik chirix a’an toj reetal naq ink’a’ chik nin’ilok rik’in li xsa’ wu a’an.

Naq ninnumsi li ch’a’ajkilal a’an, jwal ninb’antioxin chirix li jalan jalanq paay chik ru li ilok, jo’ li ilok chi ixej. Naq nin’ilok chi ixej, nink’eheb’ reetal junjunq li na’leb’ li ke’xjal inwanjik. Jun reheb’ li na’leb’ a’an, a’an chan ru naq lin k’anjel jo’ misioneer naq saajin chaq aran Inglaterra kirosob’tesi lin yu’am ut kixk’ojob’ b’ar tinwulaq sa’ musiq’ej.

Nintz’il ajwi’ rix chan ru naq li ch’a’ajkilal chirix tumin sa’ li nimla majelal sa’ chaq li chihab’ 1930 kixk’am lin junkab’al ut eb’ lin na’ inyuwa’ sa’ jun li nimla jalaak. Lin yuwa’ kixk’e xch’ool chixkolb’al rix lix k’ayib’aal b’eleb’aal ch’iich’ ut chixtenq’ankil xjunkab’al sa’eb’ li kutankil a’an toj reetal naq ke’xkanab’ xik sa’ li Iglees.

Us ta ink’a’ nokowulak sa’ li Iglees jo’ junkab’al, moko ramb’ilin ta chaq chi xik jo’q’ehatq wochb’eeneb’ li wamiiw.

Sa’eb’ li kutan a’an, wan chaq sa’ inch’ool li xik sa’ jun mision, a’b’an moko nin’aatinak ta chaq chirix a’an rik’ineb’ lin na’ inyuwa’.

Naq wankin chaq sa’ li universidad, junjunqeb’ wamiiw ut laa’in kiqaye naq tooxik sa’ jun mision. Kiwaatina lin obiisp, kinnujob’resi lin hu naq eb’ lin na’ inyuwa’ maak’a’eb’ sa’ li tenamit. Naq ke’q’aj chaq lin na’ inyuwa’, kinsacheb’ xch’ool naq kinye resil reheb’ naq kinb’oqe’ chi k’anjelak aran Gran Bretaña. Ninb’antioxin xb’aaneb’ lix tenq’ sa’ xb’aanunkil a’in ut xb’aaneb’ li chaab’il amiiw li ke’tenq’ank we chixsik’b’al ru xik chi k’anjelak.

Lin k’anjel sa’ li mision kinixkawresi re wank choq’ chaab’il b’eelomej ut yuwa’b’ej, ut re elk chi uub’ej sa’ li yakok. Kinixkawresi ajwi’ re naq chiru chixjunil li yu’am tink’anjelaq chiru li Qaawa’ sa’ lix Iglees.

Sa’ li jolomil ch’utub’aj-ib’ re abril sa’ 1985, kipatz’man we naq tin’aatinaq sa’ li ch’utam re li tijonelil. Kiwaatinaheb’ li saaj winq. Kin’aatinak chirix li kawresink-ib’ re xik chi k’anjelak jo’ misioneer. Kinye, “Re chixjunil li kawresiik ink’ulum sa’eb’ lin k’anjel sa’ li Iglees, maajun chik jwal aajel wi’chik ru chiru li kink’ul chaq naq yookin chaq chi k’anjelak jo’ misioneer naq wan chaq we 19 chihab’.”¹

Li Qaawa’ naxnaw eeru. Naq wanqex chaq sa’ lee mision, teetaw eena’leb’ li texxtenq’a chixnawb’al ru chi us. Texk’iiq sa’ musiq’ej naq texk’anjelaq chiru. Sa’ xk’ab’a’ a’an, textaqlaaq choq’ ruuchil re naq texk’anjelaq chiruheb’ lee ras eeriitz’in. A’an tixk’e eena’leb’ rik’in lix wankil li Santil Musiq’ej. Li Qaawa’ tixk’ojob’ eewankil re naq tex’aatinaq sa’ xk’ab’a’. Texruuq chixk’utb’al chiru naq paab’ajel eere ut naq naru naxteneb’ lix k’anjel sa’ eeb’een.

Maare b’ab’ay xnume’ oob’ po anajwan, li Elder Jeffery R. Holland ut li Elder Quentin L. Cook, li ke’k’anjelak chaq jo’ misioneer sa’ Islas Britanicas, ke’xjunaji rib’ wik’in ut kiqula’aniheb’ li komon ut eb’ li misioneer sa’ li xchaq’al ru na’ajej a’an. Naq wankin chaq aran, kintz’il rix li na’leb’ kintzol chaq jo’ misioneer. Ninch’olob’ xyaalal naq sa’ lin mision kinwulak chixnawb’al naq lin Choxahil Yuwa’ ut laj Kolol we, li Jesukristo, neke’xnaw wu ut nikine’xra.

Kin’osob’tesiik rik’ineb’ wiib’ li awa’b’ej re mision, laj Selvoy J. Boyer ut laj Stayner Richards, rochb’eeneb’ lix chaab’il ixaqil xGladys Boyer ut xJane Richards. Naq nin’ilok chi ixej, nink’e reetal chi tz’aqal naq kaweb’ chaq xch’ool chiwix ut kine’xra. Ke’xk’ut li evangelio chiwu. Naab’al li ke’royb’eni wik’in. Naab’al li k’anjel ch’a’aj ke’xk’e we ut ke’xk’e inhoonal re jolomink re intenq’ankil chi k’iik ut chixkawresinkil wib’ re k’anjelak chiru chixjunil inyu’am.

Nintz’il ajwi’ rix lin b’oqb’al xb’aan li Awa’b’ej Spencer W. Kimball re xjolominkil li Mision Canada Toronto wochb’een lin raarookil ixaqil xBarbara ut eb’ li qalal qak’ajol. Li Awa’b’ej Kimball kooxb’oq chi k’anjelak sa’ abril re 1974, b’ab’ay chik chirix naq kixwotz li xchaq’al ru raatin “Naq li ruchich’och’ taajalaaq.”² Sa’ li raatin a’an, li Awa’b’ej Kimball kixch’olob’ chan ru naq taak’ame’q li evangelio sa’ chixjunil li ruchich’och’. Kixb’oqeb’ naab’al chik li misioneer sa’ chixjunil li ruchich’och’. Kixjultika qe k’a’ru naroyb’eni li Qaawa’ “naq li junjunq chi winq … tixtaqsi jun xyaab’ kuxej re xtijb’aleb’ li wankeb’ sa’ li ruchich’och’.”³ Lix k’utum li Awa’b’ej Kimball chirix naq eb’ li saaj winq tento te’xik chi k’anjelak sa’ jun mision kiwulak jo’ jun na’leb’ li ke’aatinak wi’ chixjunileb’ sa’ kab’l sa’ chixjunil li ruchich’och’. Toj maji’ najala a’an anajwan. Ninb’antioxi naq li Awa’b’ej Russell M. Nelson chiru li q’ela a’in kixjultika wi’chik li k’a’ru naroyb’eni li Qaawa’.

Xnume’ haye’ lajeeb’ chihab’ chalen naq li Awa’b’ej Thomas S. Monson kixye resil naq taak’osmanq lix chihab’eb’ li saaj ixq ut winq re naq te’xik sa’ jun mision.⁴ Jo’ ink’a’uxl laa’in, jun reheb’ xyaalal li jalok a’an, a’an re xwaklesinkileb’ xch’ool li saaj re naq te’xik chi k’anjelak jo’ misioneer.

Jo’ x’apostol li Qaawa’ Jesukristo, anajwan nekexinb’oq laa’ex, saaj winq—ut laa’ex li saaj ixq li nekeraj xik chi k’anjelak sa’ jun mision—naq chetikib’ aatinak rik’ineb’ lee yuwa’ chalen anajwan chirix li xik chi k’anjelak sa’ jun mision. Nekexinb’oq ajwi’ chi aatinak rik’ineb’ lee ramiiw chirix li k’anjelak sa’ jun mision, ut wi junjunq reheb’ lee ramiiw ink’a’ jwal ch’olch’o chiruheb’ ma te’xik, waklesi xch’ooleb’ chi aatinak rik’in li obiisp.

Teneb’omaq eerib’ laa’ex ut chiru lee Choxahil Yuwa’ chi xik sa’ jun mision ut naq chalen anajwan teeyal eeq’e chixkanab’ankil lee raam, lee ruq’, ut lee k’a’uxl chi saq ru. Nekexinb’oq chixsik’b’al xnawom eech’ool chirix lix evangelio li Jesukristo li k’ojob’anb’il wi’chik.

Ex na’b’ej yuwa’b’ej reheb’ li chaab’il saaj a’in, nim xwankil lee k’anjel sa’ li kawresink-ib’ a’in. Tikib’omaq chalen anajwan aatinak rik’ineb’ lee kok’al chirix li k’anjelak sa’ jun mision. Naqanaw naq nim xwankil li junkab’al sa’ xtenq’ankileb’ li saaj winq ut ixq chixkawresinkileb’ rib’.

Wi toj wan eechihab’ re xik sa’ jun mision, a’b’an toj maji’ nekexru chi xik xb’aan li nimla yajel malaj jalan chik xyaalal, nekexinb’oq chi xik anajwan. Aatinanqex rik’in lee obiisp ut kawresihomaq eerib’ re k’anjelak chiru li Qaawa’.

Nekexinb’oq laa’ex, li obiisp, chixtenq’ankileb’ chixkawresinkileb’ rib’ chixjunileb’ li saaj winq ut ixq li yookeb’ chi wulak xchihab’ re xik sa’ jun mision, ut ninwaklesi ajwi’ eech’ool laa’ex chixk’eeb’aleb’ reetal li ani ak ninqeb’ chik xchihab’ a’b’an toj maji’ neke’k’anjelak sa’ jun mision. B’oqomaqeb’ chixjunileb’ li saaj chi xik chi k’anjelak jo’ misioneer, jo’eb’ ajwi’ li saaj ixq li neke’raj xik chi k’anjelak.

Nokob’antioxin chiruheb’ li misioneer yookeb’ chi k’anjelak anajwan. Lee mision yoo chi nume’k sa’ xyi li nimla yajel. Ut xb’aan a’an, lee mision jalan chiru lin mision laa’in malaj chiru xmision anihaq chik li xk’anjelak chaq rub’elaj li chihab’ 2020. Ninnaw naq ch’a’aj. A’b’an chiruheb’ ajwi’ li kutan a’in ch’a’aj, li Qaawa’ xk’e jun k’anjel choq’ eere ut chaab’il naq yookex chixb’aanunkil. Yookex chiroksinkil li tecnologia re xtawb’aleb’ li ak kawresinb’ileb’ chik chi tzolok chirix lix k’ojob’ankil wi’chik lix evangelio li Jesukristo. Naq nekeyal eeq’e chi k’anjelak ut a’ yaal chan ru lee metz’ew, ninnaw naq li Qaawa’ sa xch’ool chirix lix xyalb’al eeq’e. Ninnaw naq lee k’anjel taarosob’tesi lee yu’am.

Naq taaraqe’q lee k’anjel jo’ misioneer, jultikaq eere naq moko naraqe’ ta lee k’anjel sa’ li Iglees. K’ojob’amaq eeyu’am sa’ xb’een li chaab’il na’leb’ teetzol sa’ lee mision, kawob’resihomaq chi us lix nawom eech’ool, k’anjelanqex chi kaw, tijonqex, ut chex’ab’inq chiru li Qaawa’. Oxloq’ihomaq li sumwank kex’ok wi’. Osob’tesihomaq ut k’anjelanqex chiruheb’ lee ras eeriitz’in.

Nintz’aama naq laa’ex, li saaj winq ut ixq, ut eb’ lee na’ eeyuwa’, teeril ut teenaw chan ru naq li k’anjelak sa’ jun mision taarosob’tesi lee yu’am chi junelik. Nintz’aama naq teenaw sa’ lee k’a’uxl ut teereek’a sa’ lee raam lix wankil li b’oqom kixk’e li Qaawa’ reheb’ li ralal xk’ajol laj Mosiah. A’an kixye, “Ayuqex … ut xaqab’omaq xwankil li waatin; a’ut aj kuyunelaqex sa’ li najtil oyb’enink ut li ch’a’ajkilal, re naq chaab’ilaq eeb’aanuhom li teek’ut chiruheb’ sa’ ink’ab’a’, ut laa’in texink’e choq’ k’anjeleb’aal sa’ wuq’ choq’ re xkolb’al k’iila aamej.”⁵

Nintz’aama naq li Dios taarosob’tesiheb’ li saaj re li Iglees re naq te’xkawresi rib’ ut te’k’anjelaq chiru, a’an a’in lin tuulanil tz’aam sa’ li eq’la a’in, sa’ lix loq’laj k’ab’a’ li Qaawa’ Jesukristo, amen.