Eb’ li tzolom kaweb’ xch’ool sa’ roso’jikeb’ li kutan

Li Dios naxk’e xtaql xch’ool li ralal xk’ajol chixjunjunqaleb’.¹ Laa’o “kanab’anb’ilo chixsik’b’al ru li ach’ab’aak ut li junelik yu’am, sa’ xk’ab’a’ li nimla aj b’aanuhom ruuchileb’ chixjunil li winq, malaj re taqasik’ ru li preexil ut li kamk, jo’ chanru lix preexil ut xwankilal laj tza.”² Li Dios ink’a’ tixmin qu chixb’aanunkil li us, ut laj tza ink’a’ naru chixminb’al qu chixb’aanunkil li ink’a’ us.³ Wankeb’ li neke’xk’oxla naq li yu’amej a’an jun yalb’a-ix rik’in li Dios ut laj tza, a’b’an rik’in yal junaq li raatin li Kolonel, “nach’anab’aak ut na’isiik laj Satanas. … A’an li qametz’ew laa’o li yalb’il rix—maawa’ li re li Dios.”⁴

Sa’ roso’jik taqaq’ol li awb’il xb’aan li xqasik’ ru chiru li qayu’am.⁵ Chi jo’kan, k’a’ru naxye chixjunil li qak’oxlahom, qajom, qaatin, ut qab’aanuohm chirix li qarahom choq’ re li Kolonel, eb’ lix sik’b’il ru moos, ut lix Iglees li k’ojob’anb’il wi’chik? Ma ninqeb’ xwankil choq’ qe li qasumwank re li kub’iha’, li tijonelil, ut li santil ochoch wi’chik chiru xnimankil qu xb’aan li ruchich’och’ ut xk’ihaleb’ li nokohe’xtaaqe sa’ internet? Ma q’axal nim li qarahom choq’ re li Qaawa’ ut eb’ lix taqlahom wi’chik chiru li qarahom choq’ re yalaq chik k’a’ru malaj ani sa’ li yu’am a’in?

Laj tza ut eb’ laj taaqehom re junelik neke’xsik’ xsachb’al xk’anjel li Kristo ut eb’ lix profeet. Wankeb’ naab’al sa’ li kutankil a’in li ink’a’ neke’xk’eheb’ reetal lix taqlahom li Kolonel, ut wankeb’ chik li neke’xye naq maak’a’eb’ aj-e. Rajlal tz’eqtaananb’ileb’ lix taql li Dios li neke’xk’ut li yaal “ch’a’aj xpaab’ankil.” Kiyehe’ chirix li Kolonel naq a’an “jun li winq junes wa’ak, junes uk’ak naxb’aanu,”⁶ ut kiyehe’ ajwi’ naq yoo chixjalb’ehinkil li tenamit chixpuktesinkil li ka’pak’alil. Eb’ laj takchi’ihom rib’ “ke’xch’utub’ rib’ chixk’uub’ankil chan raj ru naq te’xchap li Jesus sa’ aatin,”⁷ ut “lix jek’jookil paab’aal” aj Kristiano “xik’ ilb’il yalaq b’ar.”⁸

Li Kolonel ut eb’ laj taaqehom re ke’xk’ul xnimal li ka’pak’alil, jo’ naqak’ul ajwi’ laa’o. Sa’ li qakutankil moko naru ta xyu’aminkil li qapaab’aal rik’in kawil ch’oolej chi ink’a’ nokohe’reetz’u li ruchich’och’il kristiaan. Xtaaqenkil li Kolonel chi kaw qach’ool naxk’e qasahilal, a’ut wan naq nokopleetik ajwi’ xb’aaneb’ li “neke’wa’ak, neke’uk’ak, ut neke’saylan sa’ xch’ooleb’,”⁹ ut li neke’xtz’eqtaana li paab’aal chirix li Kristo, li ab’ink, ut li jalb’a-k’a’uxlej ut neke’xk’oxla naq li Dios tixtiikob’resi qu rik’in xb’aanunkil b’ayaq li maak xb’aan naq jwal nokoxra.

“Rik’in tz’aqal xyaab’ xkux malaj rik’in xyaab’ xkuxeb’ lix moos,”¹⁰ ma ink’a’ kixye li Kolonel naq “taawulaq xq’ehil naq eb’ li tenamit ink’a’ chik te’raj rab’inkil li chaab’il na’leb’ ut, xb’aan xrahinkil li k’a’ru neke’raj xch’ool, te’sute’q xb’aan jun tuub’ chi aj tzolonel” ut naq k’iheb’ li “te’xkanab’ rab’inkil li yaal ut a’ chik li seraq’ maak’a’ na’ok wi’ taawulaq chiruheb’ ”?¹¹ Ma ink’a’ kiraho’ xch’ool xb’aan naq “maak’a’ aj-e naq nikine’roxloq’i, xb’aan naq li k’a’ru neke’xk’ut chiruheb’ li tenamit yal xtaqlahomeb’ li winq”?¹² Ma ink’a’ kooxtij naq “sa’ eeyanq ajwi’ laa’ex wanqeb’ winq te’wakliiq chixyeeb’al k’a’aq re ru ink’a’ us re xk’amb’aleb’ laj paab’anel chirixeb’ ”?¹³ Ma ink’a’ kiril chi uub’ej naq “te’yehoq us re li ink’a’ us, ut moko us ta te’xye re li chaab’ilal,”¹⁴ ut naq “eb’ li xik’ te’iloq re li junjunq, a’anaqeb’ ajwi’ li wankeb’ sa’ li rochoch”?¹⁵

Ut laa’o? Ma tooxib’esiiq malaj tooxuwaq? Ma taqayu’ami li qapaab’aal chi muqmu? Ch’olch’o naq ink’a’! Rik’in qapaab’aal chirix li Kristo, miqaxuwa li ch’iilaak xb’aaneb’ li winq, chi moko li hob’ok neke’xb’aanu.¹⁶ Rik’in li Kolonel sa’ qajolomil ut eb’ li yo’yookil profeet jo’ aj k’amol qab’e, “ani truuq twanq sa’ xiik’ilal qik’in?”¹⁷ Kawaq qach’ool, mooxutanaak, kawaq qach’ool, mika’ch’ino’ qach’ool, nimaq qapaab’aal, mooxuwak sa’ xtaqsinkil lix saqen li Qaawa’ sa’ roso’jikeb’ li kutan a’in.¹⁸

Li Kolonel kixye naq “yalaq ani taayehoq chiruheb’ li tenamit naq naxnaw wu, tinye ajwi’ laa’in naq ninnaw ru chiru lin choxahil Yuwa’. … A’b’an li taatz’eqtaananq we chiruheb’ li tenamit, tintz’eqtaana ajwi’ laa’in chiru lin choxahil Yuwa’.”¹⁹

Us ta wankeb’ li te’raj jun li Dios maak’a’eb’ xtaqlahom, chiqach’olob’ xyaalal li raatin li Elder D. Todd Christofferson, naq “jun li Dios li maak’a’ naxpatz’, chanchan ajwi’ jun li Dios li maak’a’ ajwi’.”²⁰

Us ta wankeb’ li te’raj xsik’b’al ru b’ar wan reheb’ li taqlahom te’xpaab’, chiqak’ulub’a chi sa qach’ool lix b’oqom li Kolonel naq “taawanq eeyu’am rik’in li junjunq chi aatin li na’el chaq sa’ xtz’uumal re li Dios.”²¹

Us ta wankeb’ li neke’xpaab’ naq k’ulub’anb’ilo xb’aan li Qaawa’ ut lix Iglees chixb’aanunkil “jo’ k’ihal narataw qach’ool,”²² chiqajultika chi kaw qach’ool naq ink’a’ us “xik chirix q’axal naab’aleb’ li neke’xb’aanu li ink’a’ us,”²³ xb’aan naq “us ta naab’aleb’, ink’a’ neke’ru chixtiikob’resinkil li ch’olob’anb’il jo’ maa’usilal xb’aan li Dios.”²⁴

“Aay, chijultiko’q, chijultiko’q aawe … chanru xkawil [a’ut aj k’ehol ach’ab’aak] lix taqlahom li Dios.”²⁵ Li xk’utb’aleb’ li taqlahom chi saqen ru maare ilb’il jo’ ink’a’ xk’ulub’ankil chixjunil li kristiaan. Chiqak’ut b’an rik’in oxloq’ naq naru ut aajel ru xraab’al jun ralal li Dios li naxpaab’ jalan chik na’leb’ chiqu laa’o.

Naru xk’ulub’ankil ut roxloq’inkil li qas qiitz’in chi ink’a’ taqawaklesi lix paab’ahom ut lix b’aanuhom li moko naxk’am ta rib’ rik’in li rajom li Qaawa’. Maak’a’ rajb’al naq taqamayeja li yaal chiru lix artal li k’amok-ib’ sa’ usilal rik’in li wech aj kristiaanil.

Ink’a’ neke’xk’ul rib’ Sion ut Babilonia. “Maa’ani naruhank chi k’anjelak chiru wiib’aq aj eechal re.”²⁶ Chijultiko’q qe lix patz’om li Kolonel, “K’a’ut naq: “Qaawa’, Qaawa’,” nekeye we, ut ink’a’ nekeb’aanu li ninye eere?”²⁷

Chiqak’ut li qarahom choq’ re li Qaawa’ rik’in li ab’ink chiru a’an chi anchal qach’ool.

Wi nakaweek’a naq wankat sa’ xyi li tzolomil ut li ruchich’och’, chijultiko’q aawe naq laa Kolonel li nakatxra “naxtaqla aab’oqb’al … , xb’aan naq ye’b’il chawu ruq’ li uxtaan, ut a’an naxye: Jal aak’a’uxl, ut laa’in tatink’ul.”²⁸

Li Awa’b’ej Russell M. Nelson kixye naq li Jesukristo “tixb’aanu xkomoneb’ lix k’anjel q’axal ninqeb’ chalen chaq anajwan toj taak’ulunq wi’chik.”²⁹ A’ut kixye ajwi’ naq “eb’ li te’sik’oq re xb’e li Qaawa’ te’xnumsi li rahob’tesiik.”³⁰ Chi jo’q’ehaq laa’o ajwi’ “took’ehe’q chi tz’eqtaanaak sa’ xk’ab’a’ li Jesus,”³¹ naq “taqakanab’ naq lix yaab’ xkux a’an taawanq xwankil chi mas wi’chik chiru k’a’ruhaq chik chi xyaab’ kuxej.”³²

“Us xaq re,” chan li Kolonel, “li ink’a’ taaluktaaq xch’ool inb’aan.”³³ Naqatzol ajwi’ naq “jwal wankeb’ sa’ tuqtuukilal eb’ li neke’rahok re laa chaq’rab’; tik ink’a’ neke’tichk’ok.”³⁴ Ink’a’ te’tichk’oq! Jo’kan ut, taqapatz’ qib’, “Ma yookin chi kuyuk, a’ut naq nachal junaq raaxiik’ malaj rahob’tesiik sa’ xk’ab’a’ li aatin, ma sa’ junpaat nach’inan inch’ool?³⁵ Ma k’ojk’ookin sa’ xb’een li saqoonaq re li Jesukristo ut eb’ lix moos?”

Wankeb’ li neke’xye naq li yaal a’an pak’b’il, ut naq maa’ani naru nayehok k’a’ru us ut k’a’ru ink’a’ us. A’ut li neke’xye chi yaal, a’an naq maak’a’ li maak,³⁶ naq “yalaq k’a’ru naxb’aanu junaq winq moko maak ta,”³⁷ jun na’leb’ li nasaho’ wi’ xch’ool laj tza jo’ aj yoob’ahom re! Chiqil qib’ chiru li xojb’ naxb’aanu rib’ chanchan li karneer, li junelik naxsik’ xkomon ut “naroksi chi kok’ aj xsa’ xk’a’uxl re xtz’apb’al ru lix maak.”³⁸

Wi naqaj chi yaal xtaaqenkil li Kristo, taqataw chan ru xb’aanunkil. Wi ink’a’, laj tza nokoxq’unb’esi rik’in jalan chik b’ehil. A’ut jo’ tzolom tiik, “ink’a’ taqapatz’ qakuyb’al xb’aan li naqapaab’ chi moko too’eek’asiiq chirix li naqanaw naq yaal.”³⁹

Re xchoyb’al li waatin, nawaj xyeeb’al a’in chirixeb’ lix 15 moos li Dios chunchuukeb’ chiwix. Naq li ruchich’och’ “naxye reheb’ li neke’ilok moy u: “Mat-ilok chik moy u”; ut naxye reheb’ li profeet: “Maaye li yaal qe,”⁴⁰ li tiikeb’ chi paab’ank “neke’xk’ul choq’ xkorooneb’ li osob’tesink chalen chaq taqe’q, ut li taqlahom chi maaka’ch’in xk’ihal, ut li k’utb’esinb’il na’leb’ sa’ xq’ehil.”⁴¹

Jo’kan naq eb’ li winq a’in neke’xk’ul chi kok’ aj xsa’ xjosq’ileb’ li ink’a’ nawulak chiruheb’ li raatin li Dios jo’ jultikanb’il xb’aaneb’ li profeet. Eb’ li neke’tz’eqtaanank reheb’ li profeet ink’a’ neke’xk’e reetal naq “li raatin profeet li wan sa’ li Santil Hu maa’ani naruhan chixch’olob’ankil xyaalal yal xjunes rib’,” ut naq eb’ li “winq eek’asinb’ileb’ xb’aan li Santil Musiq’ej, neke’aatinak jo’ nayehe’ reheb’ xb’aan li Dios.”⁴²

Jo’ laj Pablo, eb’ li winq a’in re li Dios ink’a’ “neke’xutaanak chixyeeb’al li yaal chirix li Qaawa’,” ut “wankeb’ sa’ tz’alam sa’ xk’ab’a’ a’an,”⁴³ li naraj naxye naq li na’leb’ neke’xk’ut moko reheb’ ta a’an, re b’an li ani kib’oqok reheb’. Jo’ laj Pablo, “ink’a’ naru te’xkanab’ aatinak chirix li rilomeb’ ut li rab’ihomeb’.”⁴⁴ Ninch’olob’ xyaalal naq li Xb’eenil Awa’b’ejil ut lix Molameb’ li Kab’laju a’aneb’ chaab’il winq li neke’xra li Dios ut eb’ li ralal xk’ajol a’an, ut neke’rahe’ ajwi’ xb’aan li Dios. Tento taqak’ul li raatineb’ jo’ chanru naq na’el chaq rik’in xtz’uumal re li Qaawa’ “rik’in anchal li kuyuk ut paab’aal. Xb’aan naq rik’in xb’aanunkil li k’a’aq re ru a’in li rokeb’aal xb’alb’a ink’a’ taanumtaaq sa’ qab’een; … ut li Dios tixjek’i chaq chiqu li wankilal re q’ojyin.”⁴⁵

“Maajun uq’ej taaruuq chi ramok re li nimla k’anjel”;⁴⁶ taaxik chi uub’ej sa’ nimajwalil chi wanko malaj chi maak’a’o; chi jo’kan “sik’omaq ru anajwan ani chi aj-u teeraj k’anjelak.”⁴⁷ Mexb’alaq’iik ut mexxib’esiik xb’aan li choq’ink na’el chaq sa’ li nimla kab’l paapo xsa’. Li choq’ink a’an maajo’q’e taanumtaaq sa’ xb’een lix wankil li ch’ina xyaab’ kuxej li q’un na’aatinak reheb’ li yot’b’ileb’ xch’ool ut tuulaneb’ xmusiq’.

Ninch’olob’ xyaalal naq yo’yo li Kristo, naq a’an aj Kolol qe ut aj Tojol qix, ut naq a’an naxb’eresi lix Iglees rik’in li Xb’eenil Awa’b’ejil ut lix Molameb’ li Kab’laju chi Apostol, re naq ink’a’ “eek’asinb’ilaqo ut k’amb’ilaqo xb’aan li iq’ yalaq b’ar xb’aan k’a’aq re ru chi na’leb’il.”⁴⁸

“Lix tz’aqal tzolom li Jesukristo,” kixye li Awa’b’ej Nelson, “wan rajomeb’ chi xaqliik, aatinak, ut wank chi jalan rik’ineb’ li kristiaan re li ruchich’och’. Ink’a’ neke’xuwak, k’eek’ookeb’ xch’ool, ut kaweb’ xch’ool.”⁴⁹

Ex was wiitz’in, chaab’il li kutan a’in choq’ reheb’ li chaab’il xch’ool! Sa’ lix loq’laj k’ab’a’ li Jesukristo, amen.