Li xtzolman chire li yo’leb’aal ha’

Xb’aan li xSusan H. Porter

Xb’een aj tenq’ aj k’ehol na’leb’ sa’ li Jolomil Awa’b’ejil re li Tzoleb’aal reheb’ li Kok’al

Laa’o naru taqataaqe li Kolonel re naq a’an tooxkawob’resi ut tooxk’irtesi re naq tooruuq chixb’aanunkil chixjunilli xootaqlaak chixb’aanunkil.

Nasaho’ inch’ool chi wank eerik’in sa’ li ch’utam reheb’ li ixq re li jolomil ch’utub’aj-ib’!

Kink’i sa’ xjayal li rokeb’aal saq’e sa’ li ch’och’ Nueva York ut kinwulak sa’ jun uq’ej re li Iglees li 32 kiloom xnajtil. Chi chunchuukin sa’ li Dominkil Tzoleb’aal wochb’een li wamiiw, xPatti Jo, sa’ li ch’ina ch’utleb’aal kab’l to’ninb’il, maamin kinru chixk’oxlankil naq komono sa’ jun ch’uut chi ixq k’iila millon rajlankileb’ chiru li ruchich’och’.

Oob’ chihab’ chaq, lin b’eelom, laj Bruce, q’axal kiyajer naq yooko chi k’anjelak rik’ineb’ laj santil paab’anel aran sa’ li Area Europa Oeste. Kooq’aj sa’ qochoch ut yal wiib’ oxib’ xamaan chirix a’an kikam. Kijala inyu’am chi jun waakaj. Kiraho’ inch’ool ut kiweek’a naq maak’a’ chik inmetz’ew ut xkolb’al wix. Kintz’aama chiru li Qaawa’ naq tixk’am inb’e: “K’a’ taawaj naq tinb’aanu?”

Wiib’ oxib’ xamaan chirix a’an, yookin chirilb’al li xink’ul sa’ correo, ut xink’e reetal jun jalam-uuch. Xink’e reetal naq a’an xjalam-uuch li ixq aj Samaria rochb’een li Jesus sa’ li yo’leb’aal ha’. Sa’ tz’aqal li hoonal a’an li Musiq’ej xye we: “A’an a’an li tento taab’aanu.” Lin Choxahil Yuwa’ li nikinixra yoo chinb’oqb’al chi chalk rik’in li Kolonel ut chi tzolok.

Nawaj xwotzb’al eerik’in oxib’ chi na’leb’ li yookin chixtzolb’al sa’ ruk’b’al lix yo’leb’aal ha’ li “yo’yookil ha’.”¹

Xb’een: Maak’a’ naxye li ak xqak’ul ut li yooko chixk’ulb’al, naru naq jalanaq li taqak’ul chalel.

Ex inkomon ixq, ninnaw naq naab’al eere nekereek’a li xweek’a laa’in, ink’a’ nekenaw chan ru teenumsi li ch’a’ajkilal ut li sachk—li sachk nekereek’a xb’aan naq moko yoo ta chi uxk lee yu’am jo’ xeroyb’eni, xepatz’, ut xek’uub’.

Maak’a’ naxye li wanko wi’, wan xloq’al ut rajb’al li qayu’am. Chiqajunilo laa’o jun xraarookil rab’in li Dios, yo’lajenaqo rik’in choxahilal sa’ li qaam.

Sa’ xk’ab’a’ li qaKolonel Jesukristo ut lix mayej aj tojol-ix, tooruuq chi santob’resiik ut chi k’irtesiik, re naq taqatz’aqob’resi ru li qak’anjel sa’ ruchich’och’, maak’a’ naxye li xsik’omeb’ ru li qakomon, ma sumsuuko, ma wan qayajel sa’ tib’elej malaj sa’ k’a’uxlej, malaj yalaq k’a’ chik ru.

K’oxlahomaq li ixq sa’ li yo’leb’aal ha’. Chan chaq ru xyu’am? Li Jesus kixk’e reetal naq ak oob’eb’ chaq lix b’eelom, ut naq moko sumsu ta rik’in li winq nawan rik’in sa’ li hoonal a’an. A’ut, us ta li ch’a’ajkilal wan sa’ xyu’am, re li ixq a’an li Kolonel kixyaab’asi chi k’utk’u naq a’an li Mesias. A’an kixye, “Laa’inin, li yookin chi aatinak aawik’in.”²

Li ixq kixk’ul xnawom xch’ool, kixch’olob’ chiruheb’ li wankeb’ sa’ xtenamit naq li Jesus a’an li Kristo. “Naab’aleb’ aj Samaria ke’xpaab’ li Jesus sa’ li tenamit a’an, xb’aan raatin li ixq li xch’olob’.”³

Li ak xk’ulum ut li toj yoo chixk’ulb’al li ixq ink’a’ kixram li truuq tixk’ul chalel. Jo’ a’an, laa’o naru taqasik’ ru xtaaqenkil li Kolonel anajwan re naq a’an tooxkawob’resi ut tooxk’irtesi re naq tooruuq chixtz’aqob’resinkil ru chixjunil li xootaqlaak chixb’aanunkil.

Xkab’: Wan wankilal qik’in

Sa’ li Tzol’leb’ ut Sumwank, li Kolonel naxk’e xch’ooleb’ li ixq ut li winq “chixk’eeb’aleb’ rib’ chi anchaleb’ xch’ool sa’ jun chaab’il k’anjel, ut te’xb’aanu k’iila k’a’aq re ru chi yal ajb’il xb’aaneb’, ut te’xk’e chi uxliik naab’al li tiikilal; xb’aan naq wan wankilal rik’ineb’.”⁴

Ex inkomon ixq, wan wankilal qik’in re xk’eeb’al chi uxliik naab’al li tiikilal!

Li Awa’b’ej Russell M. Nelson kixye, “Chixjunqaleb’ li ixq ut winq li neke’ok sa’ sumwank rik’in li Dios ut neke’xpaab’eb’ li sumwank a’an, ut li neke’tz’aqon chi k’ulub’ej sa’eb’ li k’ojob’anb’il k’anjel re li tijonelil, naru te’xk’ul lix wankil li Dios.”⁵

Ninnaw chik naq wi yalb’il qaq’e chiroxloq’inkileb’ li qasumwank naqab’aanu sa’ li kub’iha’ ut sa’ li santil ochoch, li Qaawa’ toorosob’tesi rik’in “lix wankilal aj k’irtesinel ut aj kawob’resinel” ut rik’in “li musiq’ejil na’leb’ ut rajsinkil qu jo’ maajun wa chaq.”⁶

Rox: “Rik’in li k’a’ru ka’ch’in na’el chaq li k’a’ru xnimal li ru”⁷

Sa’ li aatin jultikanb’il chiru tzuul, li Jesus kixk’ut chiruheb’ lix tzolom, “Laa’ex li ratz’amil li ruchich’och’,”⁸ ut “Laa’ex lix kutan li ruchich’och’.”⁹ Moqon kixjuntaq’eeta lix k’iijik li awa’b’ejihom rik’in lix yu li q’em, li kixchap jun ixq “ut koxk’e sa’ jun aroow chi k’aj, toj reetal kisipook chixjunil.”¹⁰

Atz’am
Xyu li q’em
Saqen

Us ta ka’ch’in wan, wan xwankil rik’in chixjunil sa’ xsutam. Li Kolonel nokoxb’oq chiroksinkil lix wankil a’an re toowanq jo’ li atz’am, xyu li q’em, ut li saqen.

Atz’am

Sachso inch’ool naq jun tz’uqul ajwi’ li atz’am jwal naxsahob’resi li qawa. A’ut, ink’a’ terto li atz’am ut moko ch’a’aj ta roksinkil.

Sa’ li hu 2 Reyes wan jun “ch’ina ixq”¹¹ li kik’ame’ xb’aaneb’ aj Siria re taawanq jo’ xmoos li rixaqil laj Nahaman, aj taqlanel reheb’ li teep aj pleet reheb’ laj Siria. A’an chanchan li atz’am; toj saaj, maak’a’ aj-e chiru li ruchich’och’, ut ink’a’ kiroyb’eni wank jo’ moos sa’ jalanil tenamit.

A’b’anan, kixyaab’asi wiib’ li ch’ol aatin rik’in xmetz’ew li Dios naq kixch’olob’ li yaal chiru li rixaqil laj Nahaman: “Us raj naq lin wa’chin taaxik chixk’utb’al rib’ chiru li profeet wan Samaria. Chi jo’kan taak’irtesiiq raj lix saqlepil.”¹²

Li aatin paab’ajel kixye li saaj ixq kinumsiman re laj Nahaman, li kixpaab’, ut chi jo’kan naq kik’irtesiik sa’ tib’elej ut sa’ musiq’ej.

Chi kok’ aj xsa’ naqak’e reetal li moos li kixq’unob’resi xch’ool laj Nahaman chi atink sa’ li nima’ Jordan, jo’ kixye laj Eliseo, a’b’an maajun wa wulajenaq raj laj Nahaman sa’ rokeb’aal laj Eliseo chi maak’a’ “li ch’ina ixq” a’an.

Maare nakaweek’a naq jwal saajat malaj naq maak’a’at aj-e, a’b’an naru naq laa’aqat li ratz’amil laa junkab’al, laa tzoleb’aal, ut laa tenamit.

Xyu li q’em

Ma xayal li kaxlan wa maak’a’ xyu? Chan raj ru taach’olob’ a’an? Pim? Aal? Kaw? Us ta yal ka’ch’in xyu li q’em, li kaxlan wa nasiipo toj reetal naq naseeb’o’ ut naq’una.

Naq naqab’oq lix wankil li Dios sa’ li qayu’am, naru taqak’e ruuchil “li rahil ch’oolej”¹³ li musiq’anb’il na’leb’ li nawaklesin, ut naru taqak’e xna’aj naq te’k’iraaq li aamej.

Toje’, jun li wamiiw yokyo sa’ xch’aat sa’ li eq’la re Ralankil xb’aan xrahil xch’ool. Eb’ lix kok’al ke’relaji naq taawakliiq; a’b’an tz’aqal naraho’ xch’ool xb’aan li jachok-ib’ rik’in xsum aatin li chalk re. Chi yokyo chi yaab’ak, kixhoy li raam sa’ tijok chiru lix Choxahil Yuwa’, kixyaab’asi lix rahil xch’ool re.

Naq yoo chixchoyb’al lix tij, li Musiq’ej kixhasb’a re naq li Dios naxnaw naq wan xrahilal. Kinujak rik’in xtoq’ob’ahom li Dios choq’ re. Lix loq’laj k’ulum kixtuqub’ xch’ool ut kixk’e xyo’onihom naq moko xjunes ta rib’ naraho’ xch’ool. Kiwakli, ki’el sa’ kab’l, ut kixyiib’ jun winq re saqb’ach rik’ineb’ lix kok’al, kixjal ru li rahilal xwan wi’ rik’in li se’ek ut li sahilal.

Saqen

Jo’ nimal li saqen na’ajman re xkutanob’resinkil jun na’ajej aak’ab’ ru? Yal b’ab’ay ajwi’ li saqen. Ut li ch’ina raqal chi saqen a’an sa’ li aak’ab’ naru na’el chaq aawik’in rik’in li wankilal naxk’e aawe li Dios.

Us ta aajunes nakaweek’a aawib’ sa’eb’ li kaq-sut-iq’ re li yu’am, naru taak’e chi lemtz’unk li saqen sa’ raak’ab’il li sachok k’a’uxlej, li choqink, ut xmaak’a’il li paab’aal. Lix saqen laa paab’aal chirix li Kristo naru taalemtz’unq chi kaw, ut tixk’am xb’eheb’ li wankeb’ chasutam rik’in li kolb’a-ix ut li tuqtuukilal.

Ex inkomon ixq, naru te’jale’q li aamej ut te’osob’tesiiq li yu’amej naq naqayeechi’i jun tz’uqul atz’am, jun aroow yu, ut jun raqal li saqen.

Ninch’olob’ xyaalal naq li Kolonel a’an li ratz’amil li qayu’am; nokoxb’oq laa’o chixyalb’al lix sahilal ut lix rahom.¹⁴ A’an li yu naq jo’q’e ch’a’aj li qayu’am; naxk’e qayo’onihom¹⁵ ut naxseeb’ob’resi li qiiq¹⁶ rik’in lix wankilal maak’a’ xjuntaq’eetankil ut lix rahom li natojok-ix.¹⁷ A’an li qasaqen;¹⁸ naxkutanob’resi li qab’e re sutq’iik rik’in.

Nintz’aama naq toochalq rik’in li Kolonel, jo’ li ixq sa’ li yo’leb’aal ha’, ut naq taquk’ lix yo’yookil ha’. Qochb’eeneb’ laj Samaria, tooruuq chixyeeb’al, “Anajwan naqapaab’, … [xb’aan naq] tz’aqal xqab’i ut naqanaw naq a’an tz’aqal laj Kolol re li ruchich’och’.”¹⁹ Sa’ xk’ab’a’ li Jesukristo, amen.