Ma yoo chi k’anjelak li k’uub’anb’il na’leb’?

Ma yoo chi k’anjelak li k’uub’anb’il na’leb’?

Toje’ xin’aatinak rik’in jun saaj li wiib’ oxib’ chihab’ chaq xchoy lix mision ut yoo anajwan chi trab’ajik. Chaab’il xk’ihal xcha’al lix yu’am. A’b’an yoo chi lajk xpaab’aal. Yoo chi sub’e’k sa’ xwiib’al xch’ool chirix li Kolonel ut lix Iglees. Xye we naq ink’a’ na’osob’tesiik jo’ xk’oxla naq taa’osob’tesiiq xb’aan li evangelio. Nareek’a naq moko yoo ta chi k’anjelak li k’uub’anb’il na’leb’ re sahil ch’oolejil sa’ xyu’am.

Li aatin ninye anajwan, wan choq’ re chixjunileb’ li neke’reek’a ajwi’ a’an. Nin’aatinak rik’ineb’ li junxil “xe’reek’a xb’ichankil li b’ich re rahok li natojok ix” a’ut li ink’a’ chik “neke’reek’a anajwan.”¹

Li qaChoxahil Yuwa’ kixkawresi jun xchaq’al ru na’leb’ re taasaho’q qach’ool chi junelik. A’b’anan, naq ink’a’ na’ux li xqoyb’eni sa’ li qayu’am, maare taqak’oxla naq moko yoo ta chi k’anjelak li k’uub’anb’il na’leb’.

Maare naqeek’a li ke’reek’a lix tzolom li Jesus naq ke’wan sa’ jun jukub’ li “ak xnajto’k chi us rik’in li ch’och’, kaw na’eek’asiik xb’aan li xkaw oq li ha’, xb’aan naq sa’ xsak’om iq’ yookeb’ chi xik.”²

Moqon, ak saqewk chi re:

“Koho li Jesus chixtawb’aleb’, yoo chi b’eek chiru li palaw.

“Ut eb’ lix tzolom, naq ke’ril chi b’eek chiru li palaw, ke’sach xch’ool ut ke’xjap re … chi k’a’jo’eb’ xxiw.

“A’b’anan li Jesus tikto kiraatinaheb’ ut kixye: Kawaq eech’ool: laa’inin! Mexxiwak.

“Kichaq’ok laj Pedro ut kixye: Qaawa’, wi laa’at, taqlahin chi xik aawik’in chiru li ha’.

“Kim, chan li Jesus re. Ki’elk laj Pedro sa’ li jukub’, ki’ok chi b’eek chiru li ha’ ut koho wan wi’ li Jesus.

“A’b’anan, naq kiril li kawil iq’, kixiwak ut, naq ki’ok chi sub’e’k, kixjap re: Qaawa’, chinaakol, chan re.

“Li Jesus tikto kixye’ li ruq’, kixchap ut kixye re: Ka’ch’in laa paab’aal, at winq. K’a’ut naq xwiib’ank laa ch’ool?”³

Ma naru tinwotz eerik’in oxib’ li na’leb’ xintzol rik’in laj Pedro? Nawoyb’eni naq li na’leb’ a’in tixtenq’aheb’ li neke’reek’a naq moko yoo ta chi k’anjelak li k’uub’anb’il na’leb’ re sahil ch’oolejil sa’ xyu’ameb’.

Xb’een, k’anjela laa paab’aal chirix li Jesukristo.

Sachso inch’ool xb’aan lix paab’aal laj Pedro. Yal rik’in xb’oqom li Qaawa’ naq “taachalq,” ki’el sa’ li jukub’. Chanchan naq kixnaw naq wi ta li Jesus tixb’oq chixb’aanunkil k’a’ruhaq, naru raj tixb’aanu.⁴ Laj Pedro kixkanab’ rib’ sa’ ruq’ li Qaawa’ mas wi’chik chiru li jukub’. Ut li paab’aal a’an kixk’e xwankil chixb’aanunkil chi kaw xch’ool us ta xiwxiw li naxsuti rix.

Lix paab’aal laj Pedro naxk’e chinjultika jun seraq’ kixwotz li Elder José L. Alonso. Ka’ch’in chik chirix xkamik li ralal li Elder Alonso, b’ar wi’ kikana xjunkab’al ut xkok’al, li Elder Alonso kirab’iheb’ li xe’xye li kok’al.

“K’a’ru taqab’aanu?” chankeb’.

Li rab’inb’ej li b’eleeb’ chihab’ wan re kixye, “Sa wan li qayuwa’. Yoo chixjultikankil lix evangelio li Jesukristo.”

Jo’ laj Pedro, li ixqa’al a’in kixq’ax ru li ch’a’ajkilal wan wi’ ut kixpaab’ li Jesukristo ut lix mayej re xtojb’al rix li qamaak. Li paab’aal chirix li Jesukristo naxk’e li tuqtuukilal ut li kawilal re xik chi uub’ej.

Wi teek’oxla li ak xek’ul sa’ lee yu’am, nink’oxla naq teek’e reetal naq ak xek’anjela li paab’aal k’iila sut. Li ok sa’ li Iglees naraj paab’aal. Li tijok re aatinak rik’in li qaChoxahil Yuwa’ naraj paab’aal. Rilb’aleb’ li loq’laj hu naraj paab’aal. Rab’inkileb’ li waatin sa’ li jolomil ch’utb’aj-ib’ a’in naraj paab’aal. Jo’ kixye li Awa’b’ej Russell M. Nelson, “Meeka’ch’inob’resi li paab’aal ak wan eere.”⁵

Jun chik na’leb’ xintzol rik’in laj Pablo, a’an a’in:

Sa’ ch’a’ajkil hoonal, tikto taasutq’isi aawib’ rik’in li Jesukristo.

Naq kib’eek wan wi’ li Kolonel, kixuwak laj Pedro xb’aan li iq’, ut ki’ok chi sub’e’k. A’b’an naq laj Pedro kixk’e reetal li xk’ulman, ink’a’ kixyal numxik chi moko sutq’iik xjunes rib’ sa’ li jukub’. Ink’a’ kixkanab’ lix paab’aal chirix li Kristo, kixchap b’an chi kaw, kixjap re chixyeeb’al, “Qaawa’, chinaakol.”

“Li Jesus tikto kixye’ li ruq’, kixchap.”⁶

Chiqajunilo noko’eek’asiik xb’aan li kawil iq’ li naru tixka’ch’inob’resi li qapaab’aal ut chiqasub’b’al. Naq nak’ulman a’in, chijultiko’q eere naq wan jun chik xk’ab’a’ li na’leb’ re sahil ch’oolejil kixk’uub’ li qaChoxahil Yuwa’—a’ li k’uub’anb’il na’leb’ re li tojb’al-ix. Ink’a’ kik’uub’aman naq sa sa taqanumsi li yu’am, chi maak’a’ li tichk’ok ut li sub’e’k, chi se’se rajlal li qu. Li qaChoxahil Yuwa’ kixnaw naq tento tojb’ilaq qix. Chi jo’kan naq kixkawresi li k’uub’anb’il na’leb’ re li tojb’al-ix.⁷ Chi jo’kan naq kixtaqla jun aj Tojol qix. Xk’ulb’al li ch’a’ajkilal sa’ li qayu’am—maak’a’ naxye k’a’ut—ink’a’ naraj naxye naq moko yoo ta chi k’anjelak li k’uub’anb’il na’leb’. A’an b’an xhoonalil naq taqaj ru li k’uub’anb’il na’leb’!

Sa’eb’ li hoonal a’an, taaqehomaq xb’aanuhom laj Pedro. Tikto kixsutq’isi rib’ rik’in li Kolonel.

“Anajwan xqʼehil ut xkutankil lee kolbʼal. … Meebʼay xkutankil lix jalbʼal eekʼaʼuxl.”⁸

Yalaq b’ar wanko ut yalaq b’ar xoowan, li jalb’a-k’a’uxlej a’an li b’e chi uub’ej. Li Awa’b’ej Nelson kixye:

“Maak’a’ wan li q’axal na’ach’ab’ank, nachaab’ilob’resink, ut li q’axal aajel ru choq’ re li qab’eenik chi uub’ej, chiru xk’anjelankil rajlal, wulaj wulaj, li jalb’a-k’a’uxlej. …

“Maak’a’ naxye ma ak yalb’il aaq’e chi b’eek sa’ xb’ehil li sumwank, malaj maare xattichk’ok malaj xat-el sa’ xb’ehil li sumwank, malaj maare ink’a’ naru nakawil xb’ehil li sumwank sa’ li wankat wi’, nintz’aama chawu naq chajal aak’a’uxl. Chayal li wankilal ut metz’ew li nachal rik’in li jalok k’a’uxlej wulaj wulaj—xchaab’ilob’resinkil b’ayaq wulaj wulaj laa b’aanuhom ut laa wanjik.”⁹

Li chalk rik’in li Kristo maawa’ yal xk’oxlankil malaj xseraq’inkil a’an, chi moko yal xraab’al. A’an b’an xtaaqenkil. A’an b’an xyu’aminkil li na’leb’ naxk’ut chiqu. Ut choq’ qe chiqajunjunqal, a’an xjalb’al qak’a’uxl sa’ junpaat.

Jun reheb’ lin rab’in kiwan xtrab’aaj sa’ li CCM. Kixye we naq jun li misioneer xye re naq ink’a’ naxnaw ma yaal lix Hu laj Mormon. Kitijok chi naab’al re xk’ulb’al xnawom xch’ool sa’ musiq’ej, a’ut maak’a’ xsumenkil.

Lin rab’in kitijok re xnawb’al chan ru tixtenq’a li misioneer a’an. Kireek’a naq moko k’eeb’ileb’ ta li loq’laj hu qe ka’ajwi’ re rilb’aleb’ ut xk’ulb’al xnawom qach’ool; k’eeb’ileb’ aj b’an wi’ re xk’utb’al chiqu chan ru xpaab’ankileb’ lix taqlahom li Dios. Lin rab’in kixwotz lix na’leb’ rik’in li misioneer.

Moqon, kiril wi’chik li misioneer a’an, ut sa sa’ xch’ool. Li misioneer kixye re naq ak xk’ul xnawom xch’ool naq yaal lix Hu laj Mormon. Kixk’e reetal naq xchal xnawom rik’in xyalb’al xq’e chixyu’aminkil li na’leb’ k’utb’il sa’ lix Hu laj Mormon.

Chiqataaqe lix b’aanuhom laj Pedro naq kixsutq’isi rib’ rik’in li Kolonel sa’ xch’a’ajkilal. Chekanab’ eerib’ chiru li Jesukristo ruuchil lee nawom ut lee metz’ew laa’ex. Us ta chalen chaq junxil yookex chixyalb’al numxik eejunes eerib’, toj naru teeye’ lee ruq’ re a’an. Nak’anjelak li k’uub’anb’il na’leb’!

Li rox na’leb’ li xintzol rik’in laj Pablo ut lix numsihom, a’an a’in:

Tuulanob’resi aawib’ chiru li Qaawa’, ut a’an tatxwaklesi re taab’aanu li ninqi k’anjel.

Laj Pedro kixk’ut xpaab’aal naq kib’eek chiru li ha’ ut naq kixye’ li ruq’ re li Kolonel naq kiraj xtenq’. A’ut, li Kolonel kiril naq wan xkomon chik truuq tixb’aanu laj Pedro. “Ka’ch’in laa paab’aal, at winq,” chan, “k’a’ut naq xwiib’ank laa ch’ool?”¹⁰

Laj Pedro kiru raj chi josq’o’k xb’aan xtijom. A’b’an kixk’ul rik’in xtuulanil xch’ool. Kixsik’ xnimob’resinkil lix paab’aal chirix li Jesukristo. Kixnumsi naab’al li hoonal li ke’xkawob’resi xpaab’aal—ut jwal ch’a’ajeb’ a’an—ut a’in kixtenq’a laj Pedro chi wulak jo’ li kawil aj b’eresinel kiraj ru li Qaawa’. Kiru chixb’aanunkil xninqal ru k’anjel sa’ xk’ab’a’ li Qaawa’.

K’a’ruheb’ li ninqi k’anjel naraj li Qaawa’ naq teeb’aanu? Sa’ lix Iglees ut sa’ lix awa’b’ejihom, q’axal k’iheb’ li k’anjel naru taqab’aanu ut li kristiaan naru taqil jo’ kixb’aanu li Kolonel. A’an naraj naq textz’aqonq sa’ lix nimla k’anjel. Naq yooqex chixtenq’ankileb’ lee ras eeriitz’in chixyu’aminkil li k’uub’anb’il na’leb’ re sahil ch’oolejil, a’an naq teek’e reetal xyaalalil sa’ lee yu’am.

Sa’ xkawresinkil lin paab’aal, li raatin laj Alma kixjal inyu’am: “Osob’tesinb’ileb’ li neke’xtuulanob’resi rib’eb’ chi ink’a’ minb’ileb’ ru chi tuulano’k xch’ooleb’.”¹¹ Rik’in xtuulanil qach’ool, qaxaqab’aq qib’ b’ar wi’ li Jesus naru tooxwaklesi, tooxb’eresi, ut tooroksi.¹²

Ninch’olob’ xyaalal naq nak’anjelak li k’uub’anb’il na’leb’. A’ lee Choxahil Yuwa’ kik’uub’ank re, ut a’an nekexxra. Nak’anjelak xb’aan naq li Jesukristo kixq’ax ru li maak ut li kamk naq kixtoj rix li maak. Chalqex rik’in, chetaaqe, ut “sa’ junpaat taa’uxmanq choq’ eere li nimla k’uub’anb’il na’leb’ re li tojb’al-ix.”¹³ Sa’ xk’ab’a’ li Jesukristo, amen.