Anajwan xhoonalil
Anajwan xhoonalil li tzolok. Anajwan xhoonalil naq taqajal qak’a’uxl. Anajwan xhoonalil naq tooruuq chirosob’tesinkileb’ li qas qiitz’in
Ex was wiitz’in, sa’ li jolomil ch’utub’aj-ib’ a’in naab’al li na’leb’ xqatzol. Xoo’osob’tesiik rik’ineb’ li tij, li aatin, ut li b’ich. Xoo’musiq’aak xb’aaneb’ lix moos li Qaawa’.
Xqak’ul jun li saqen aajel ru choq’ re li chalel. Li woyb’enihom a’an naq li Musiq’ej xexraatina raj chirix li k’a’ru taaraj li Qaawa’ naq teeb’aanu.
Ink’a’ rajlal nanawman li k’a’ru chalel. Li kutan neke’jala. Li jalan jalanq chi k’ay neke’jala. Li jar paay chi hiik, tiq’e’k, ut yajel naru neke’xjal li qayu’am sa’ junpaat. Eb’ li k’a’aq re ru a’in ink’a’ nokoru chixb’eresinkileb’. A’b’anan wan li k’a’aq re ru nokoru chixb’eresinkil, jo’ chan ru naqoksi li qahoonal wulaj wulaj.
Nawulak chiwu li utz’u’ujinb’il aatin a’in re laj Henry Van Dyke li tz’iib’anb’il sa’ li tzoleb’aal Universitario Wells aran Nueva York. Naxye chi jo’ka’in:
Lix muhel li ru’uj li wuq’ nak’utun
Naxjach ru li toj taachalq rik’in li ak xnume’:
Rub’elaj a’an, yoo chi wark li hoor maji’ nayo’la
Sa’ aak’ab’ ut najt rik’in laa wankil:
Chirix li tiikil juch’ maak’a’ roso’jik,
Li hoonal nasach, moko aawe ta chik:
Jun hoor ajwi’ nawan sa’ aawuq’,—
Li anajwan nawakli wi’ li muhel.1
Relik chi yaal, tento tootzoloq chirix li ak xnume’, ut hehe’, tento taqakawresi qib’ choq’ re li chalel. A’b’anan ka’ajwi’ anajwan naru naqab’aanu. Anajwan xhoonalil li tzolok. Anajwan xhoonalil naq taqajal qak’a’uxl. Anajwan xhoonalil naq tooruuq chirosob’tesinkileb’ li qas qiitz’in ut “chixwaklesinkileb’ li uq’ej lub’luukeb’.”2 Jo’ kixye laj Mormon re laj Moroni, li ralal: “Chiqayal qaq’e chi k’anjelak; … xb’aan naq wan jun k’anjel chiqab’aanu naq wanko choq’ muheb’aal ch’och’ a’in, re taaruuq toonumtaaq sa’ xb’een laj xik’ ilonel re chixjunil li tiikilal ut taqahiltesi li qaam sa’ li rawa’b’ejihom li Dios.”3
Laj tza maajun wa nawar. Rajlal taawanq li ka’pak’alil sa’ li yaal. Ninka’suti lin b’oqom xinb’aanu eq’la naq teeb’aanu li k’a’aq re ru li taatiikisinq eere chi uub’ej sa’ musiq’ej, li taqe’k x’aatinak wi’ li Elder Dieter F. Uchtdorf, re naq tex’elq chi uub’ej chiru chixjunil li ch’a’ajkilal ut chiru chixjunil li k’a’aq chik re ru.
Li tiikisiik chi uub’ej sa’ musiq’ej natam naq nokoloq’onink sa’ li santil ochoch ut naq naqak’e reetal lix chaq’al ru ut xninqal li osob’tesiik naqak’ul aran. Nintz’aama cheru naq teeq’ax ru lix na’leb’ li ruchich’och’ naq teek’e lee rilob’aal sa’eb’ li junelik osob’tesink re li santil ochoch. Lee hoonal aran texrosob’tesi chi junelik.
Naq li Iglees yoo chi k’iik, naqayal qaq’e chixkab’lankileb’ li santil ochoch. Anajwan yookeb’ chi kab’laak 44 chi santil ochoch. Wankeb’ chik li yookeb’ chi ak’ob’resiik. Nintijok chirixeb’ li neke’k’anjelak sa’eb’ li k’anjel a’an sa’ chixjunil li ruchich’och’.
Rik’in b’antioxink, nawaj xyeeb’al resil naq te’kab’lamanq li santil ochoch sa’eb’ li na’ajej a’in: Wellington, Nueva Zelanda; Brazzaville, República del Congo; Barcelona, España; Birmingham, Reino Unido; Cuzco, Perú; Maceió, Brasil; Santos, Brasil; San Luis Potosí, México; Benemérito de la Ciudad de México, México; Tampa, Florida; Knoxville, Tennessee; Cleveland, Ohio; Wichita, Kansas; Austin, Texas; Missoula, Montana; Montpelier, Idaho; ut Modesto, California.
Ink’a’ naru rajlankileb’ li te’osob’tesiiq sa’ xka’pak’alil li tz’apleb’ t’ikr xb’aaneb’ li 17 chi santil ochoch a’in. Nekexinra, ex was wiitz’in. Ut jwaj aajel wi’chik ru, li Qaawa’ nekexxra. A’an aj Kolol eere ut aj Tojol eerix. Naxjolomi ut naxb’eresi lix Iglees. Nintz’aama naq laa’aqo jun tiikil tenamit choq’ re li Qaawa’, li kixye: “Laa’aqex lin tenamit, ut laa’inaq lee Dios.”4
A’an a’in li nintz’aama, sa’ lix loq’laj k’ab’a’ li Jesukristo, amen.