Aatin re xtikib’ankil

Ex inkomon ixq, sa’ xtikib’ankil li ch’utam a’in reheb’ li ixq re li jolomil ch’utub’aj-ib’, nasaho’ inch’ool xwotzb’al li aatin re tikib’ank re li Xb’eenil Awa’b’ejil.

Li qach’utam re sabado wan jun seraq’ chirix, jalan li rajom ut jalaneb’ laj ab’inel. Chiru li q’ojyin a’in naqak’e jun chik seraq’ naq nokotz’aqon sa’ jun li ak’ ajom ut xkawresinkil qib’ choq’ re li kutan chalel. Lix evangelio li Jesukristo ink’a’ najala. Li tzol’leb’ re li evangelio ink’a’ najala. Eb’ li qasumwank ink’a’ neke’jala. A’b’anan, chiruheb’ li chihab’ a’in, eb’ li qach’utam neke’qab’aanu re xwotzb’al li esil neke’jala ut maare chi yaal naq toj yooqeb’ chi jalaak chiruheb’ li chihab’ te’chalq.

Anajwan, li ch’utam a’in re sabado sa’ q’ojyin a’an jun ch’utam re li jolomil ch’utub’aj-ib’, moko a’an ta jun ch’utam re yal junaq ch’uut. Jo’ chanchan chixjunil li ch’utam re li jolomil ch’utub’aj-ib’, k’uub’anb’il, ut sik’b’ileb’ ru laj tij ut eb’ li b’ich’ xb’aan li Xb’eenil Awa’b’ejil.

Xqapatz’ chiru li Awa’b’ej Jean B. Bingham, Jolomil Awa’b’ej re li Komonil re Tenq’ank, naq tixb’eresi li ch’utam a’in. Jun chik reheb’ li jolomil aj k’anjel re li Iglees, jo’ eb’ li komon re li Jolomil Awa’b’ejil re li Komonil re Tenq’ank, li Saaj ixq, malaj li Tzoleb’aal reheb’ li Kok’al, li sik’b’ileb’ ru xb’aan li Xb’een Awa’b’ejil, naru te’xb’eresi li ch’utam re sabado sa’ q’ojyin moqon.

Sa’ li ch’utam a’in re sabado q’ojyin re li jolomil ch’utub’aj-ib’ taa’uxq aatinak chirix lix k’a’uxleb’ li ixq aj santil paab’anel sa’ roso’jikeb’ li kutan. Taak’utmanq lix tzol’leb’ lix Iglees li Jesukristo reheb’ laj Santil Paab’anel sa’ Roso’jikeb’ li Kutan, lix chaq’rab’ li Iglees li na’aatinak chirixeb’ li ixq, ut lix teneb’ankileb’ ut chixjunil li k’anjel reheb’ li ch’uut b’ar wi’ neketz’aqon li ixq ut li kok’ saaj ixq re li Iglees. Us ta nanumsiman li ch’utam a’in choq’ re chixjunil li ruchich’och’ jo’ chixjunil li ch’utam re li jolomil ch’utub’aj-ib’, eb’ laj ab’inel b’oqb’ileb’ re te’wanq sa’ li ch’utam a’in a’aneb’ li ixq ut li kok’ saaj ixq li wan 12 chihab’ reheb’ toj chi uub’ej. Xqab’oqeb’ junjunq aj k’anjel li wan li tijonelil rik’ineb’ li neke’xjolomi li ch’uut te’tz’aqonq.

Li yooko chixtikib’ankil arin naxsume chixjunil li k’anjeleb’aal wan choq’ reheb’ laj k’amol b’e ut choq’ reheb’ li komon re lix Iglees li Qaawa’ sa’ chixjunil li ruchich’och’. Li tzol’leb’ re lix evangelio li Jesukristo wan choq’ reheb’ chixjunil, jo’kan b’i’ a’an li qajom ut rajom lix numsinkil. Naqoxloq’iheb’ lix rab’in li Dios sa’ li ch’utam a’in naq too’aatinaq chirixeb’ lix k’a’uxl ut lix k’a’uxl lix ch’uuteb’.

Naqab’antioxi naq li tecnologia anajwan naxtenq’aheb’ laj k’amol b’e re li Iglees chixb’aanunkil li ch’utam choq’ reheb’ li komon aj k’anjel. Jo’kan ajwi’ naqab’antioxi naq li k’anjeleb’aal re xik sa’ jalan chik na’ajej yoo chi tamk. A’an nokoxtenq’a chixtaqlankileb’ laj k’amol b’e re li Iglees naq te’xik chixtenq’ankileb’ laj k’amol b’e sa’ jalanq jalanq chi na’ajej.

A’an a’in lix k’anjel li Qaawa’ Jesukristo. Laa’o lix moos, ut b’eresinb’ilo xb’aan lix santil Musiq’. Naqatz’aama naq taakanaaq li rosob’tesihom li Qaawa’ sa’ xb’eeneb’ laj jolominel a’in ut sa’ xb’eeneb’ li ixq ut ixqa’al a’in li tiikeb’ xch’ool chi k’anjelak chiru li Qaawa’ sa’eb’ li ch’uut a’in ut sa’ xyu’ameb’. Sa’ xk’ab’a’ li Jesukristo, amen.