Li jalok ch’oolej, a’an li qajayalihom

K’ehomaq reetal li aatin natawman sa xtiklajik li hu Kim, Taaqehin:

“Li na’ajman ru sa’ chixjunil li tzolok ut li k’utuk li na’uxman sa’ li evangelio, a’an xnimob’resinkil lix jalajik qach’ool rik’in li qaChoxahil Yuwa’ ut rik’in li Jesukristo. …

“… Li tzolok chirix li evangelio li naxkawob’resi li qapaab’aal ut naxk’e chi uxmank li sachb’a-ch’oolejil jalaak sa’ qach’ool, ink’a’ sa’ junpaat na’uxman. Ink’a’ ka’ajwi’ na’uxman sa’ li tzoleb’aal, a’b’an sa’ li qach’ool ut sa’ li qochoch. Na’ajman ru naq taqayal qaq’e rajlal ut wulaj wulaj re xtawb’al ru ut xyu’aminkil li evangelio. Li tzolok chirix li evangelio li naxjal chi tz’aqal qach’ool naraj xwankil li Santil Musiq’ej.”¹

A’an li sachb’a-ch’oolej naqasik’—naq junaq li kristiaan tixtaw xna’leb’ sa’eb’ li loq’laj hu² ut naq li na’leb’ a’an osob’tesinb’il xb’aan li Santil Musiq’ej. Eb’ li na’leb’ a’an a’aneb’ li jwal aajeleb’ ru choq’ xxe’el li qapaab’aal chirix li Kolonel. Ut jo’ kixye qe li Awa’b’ej Russell M. Nelson, eb’ li musiq’ejil xxe’el tento naq taach’olanimanq rajlal.³ Li jalok ch’oolej li nakana, a’an jun k’anjel re chixjunil li qayu’am.⁴ Li jalok ch’oolej a’an li qajayalihom.

Re naq jwal chaab’ilaq, laa k’ulb’il na’leb’ rik’ineb’ li loq’laj hu tento naq aawehaq.⁵ Rilb’al ru malaj rab’inkil lix k’ulum junaq li kristiaan naru natenq’an, a’b’anan a’an ink’a’ tixk’am chaq lix wankil li jalok ch’oolej. Maak’a’ xjalb’al li hoonal nakawoksi sa’eb’ li loq’laj hu, naq yooqat chirab’inkil li Santil Musiq’ej naq nakatraatina.

Rajlal xamaan naq ninte lin hu Kim, Taaqehin, nintz’iib’a li patz’om a’in sa’ xxuk lin hu: “K’a’ru yoo chixk’utb’al chiwu li Santil Musiq’ej chiru li xamaan a’in sa’ rilb’aleb’ li ch’ol a’in?”

Naq nintzoleb’ li loq’laj hu, nink’oxla rix li patz’om a’an rajlal. Ut ink’a’ napaalto’ naq tink’ul li musiq’anb’il na’leb’, ut nintz’iib’a sa’ lin hu.

Chan ru tinnaw naq li Santil Musiq’ej yoo chintzolb’al? Chi kok’ aj xsa’ nak’ulman rik’ineb’ kok’ na’leb’. Wan naq jun li raqal re li loq’laj hu naxtoch’ lin ch’ool. Wan naq naweek’a naq lin k’a’uxl naxtaw ru chi chaab’il junaq li raqal re li evangelio. Jo’kan ajwi’ naweek’a lix tenq’ li Santil Musiq’ej naq li wixaqil, xAnne Marie, ut laa’in noko’aatinak chirix li yooko chirilb’al. Li naxwotz rajlal naxk’am chaq li Musiq’ej.

Chiru li chihab’ a’in yooko chixtzolb’al li Najter Chaq’rab’—jun li loq’laj hu li naxnujob’resi li qaam rik’in saqen. Sa’ rilb’al ru li Najter Chaq’rab’, naweek’a naq wankin rik’ineb’ li chaab’il aj k’amol b’e: laj Adan, xEva, laj Enok, laj Noe, laj Abraham, ut naab’aleb’ chik.

Chiru li xamaan a’in, naq yooko chirilb’al Exodo ch’ol 7–13, xqatzol chan ru naq li Qaawa’ kirach’ab’eb’ li ralal laj Israel chiru li moosil aran Egipto. Naqil b’eleeb’ chi yajel—b’eleeb’ reetalil lix wankil li Dios—li ink’a’ kiru chixq’unob’resinkil xch’ool laj Farahon.

Jo’kan ut li Qaawa’ kixye re lix profeet, aj Moises, naq twanq jun chik li yajel— ut chan ru naru neke’xkawresi rib’ li junjunq chi junkab’alej aj Israelita chiru a’an. Jo’ xcha’al li k’anjel li te’xk’ab’a’in li Paswa, eb’ laj Israelita tento naq te’xmayeja jun li ch’ina karneer, jun li maak’a’ xpaaltil. Chirix a’an tento te’xb’on li rokeb’aaleb’ rik’in lix kik’el li karneer. Li Qaawa’ kixye naq chixjunileb’ li ochochnal b’onb’ilaqeb’ rik’in kik’ te’kole’q chiru li nimla yajel yoo chi chalk.

Eb’ li loq’laj hu neke’xk’ut, “Ut eb’ laj Israel … ke’xb’aanu li kitaqlaak wi’ laj Moises … xb’aan li Qaawa’ ” (Exodo 12:28). Wan jun li na’leb’ jwal nim xloq’al chirix li ab’ink a’an.

Xb’aan naq eb’ li ralal xk’ajol laj Israel ke’xb’aanu jo’ kixye laj Moises ut ke’k’anjelak rik’in paab’aal, ke’kole’ chiru li yajel ut, chirix a’an, ke’ach’ab’aak chiru li moosil.

Jo’kan ut, k’a’ru xk’ut chiwu li Santil Musiq’ej sa’eb’ li ch’ol a’an chiru li xamaan a’in?

A’ineb’ junjunq li na’leb’ nawaj xwotzb’al:

• Li Qaawa’ nak’anjelak rik’in lix profeet re xtenq’ankil ut xk’olb’al lix tenamit.

• Li paab’aal ut li tuulanil re xtaaqenkil li profeet kixk’am chaq li sachb’a-ch’oolej re kole’k ut ach’ab’aak.

• Li kik’ sa’ li okeb’aal a’an jun reetalil li qapaab’aal chirix li Jesukristo, lix karneer li Dios.

Nawulak chiwu chan ru naq li Qaawa’ kirosob’tesi lix tenamit sa’ li seraq’ a’in sa’ li Najter Chaq’rab’ ut chan ru naq narosob’tesi lix tenamit anajwan.

Naq lix yo’yookil profeet li Qaawa’, li Awa’b’ej Nelson, kixk’ut chiqu li hu Kim, Taaqehin choq’ re xtzolb’al li loq’laj hu, kooxb’oq chixtuqub’ankil li qochoch jo’ xna’aj li paab’aal ut na’jej b’ar wi’ taatzolmanq li evangelio.

Chirix a’an kixyeechi’i kaahib’ li osob’tesink:

1. lee hilob’aal kutan a’anaq jun sahil kutan,

2. lee kok’al te’raj raj xtzolb’al ut xyu’aminkileb’ lix k’utum li Kolonel,

3. taak’osq lix wankil laj tza sa’ lee yu’am ut sa’ lee rochoch, ut

4. nimaq xwankil li jalaak teek’ul sa’ lee junkab’al.”⁶

Anajwan b’i’, maak’a’ qik’in xtz’iib’ahomeb’ li ke’yu’amink re li Paswa rochb’een laj Moises aran Egipto. A’ut, naqanaw chirixeb’ naab’al laj santil paab’anel li neke’xwotz xnawomeb’ xch’ool, naq rik’ineb’ xpaab’aal, yookeb’ chixtaaqenkil li raatin li Awa’b’ej Nelson anajwan ut yookeb’ chixk’ulb’aleb’ li yeechi’inb’il osob’tesink.

Wahe’ junjunq reheb’ a’an:

Jun li saajil na’b’ej kixye: “Noko’aatinak chirix li Kristo ut nasaho’ qach’ool chirix li Kristo sa’ li qajunkab’al. Choq’ we laa’in a’an jun xnimal ru osob’tesiik—naq eb’ lin kok’al te’k’iiq chi aatinak chirixeb’ li na’leb’ a’in li taanach’ob’resinq reheb’ rik’in li Kolonel.”⁷

Jun li cheek kixk’ab’a’in li hoonal re xtzolb’al li loq’laj hu rik’in li hu Kim, Taaqehin “jun li b’e nujenaq rik’in choxahil saqen li nokoxtenq’a chirilb’al li tzol’leb’ re li evangelio li aajel ru choq’ re li qakawilal sa’ musiq’ej.”⁸

Jun li saajil ixaqilb’ej ki’aatinak chirix li osob’tesink naxk’ul sa’ lix sumlajik: “Xinru chixnawb’al xch’ool lin b’eelom chi chaab’il, ut xinru chixteeb’al li waam chiru a’an rajlal naq nokotzolok.”⁹

Jun li na’b’ej re jun li nimla junkab’alej kixk’e reetal chan ru naq lix yalb’al xq’e chixtzolb’aleb’ lix junkab’al kijala. Kixye: “Junxil chaq, chanchan tawi’ xtoch’b’al li piano rik’in li guante re li ke. Nintoch’ xyaab’ li son, a’b’anan li b’ich moko chaab’il ta na’el. Anajwan ink’a’ chik wan li guante chi wuq’, a’ut maare li b’ich ink’a’ tz’aqal tiik rab’inkil, nawab’i lix jalanil. Kim, Taaqehin kixte li wu, lin metz’ew, lin jayalihom, ut li wajom.”¹⁰

Jun saajil b’eelomej kixye: “Xinru chixk’eeb’al reetal k’a’ru li jwal aajel ru sa’ li wochoch chirix naq Kim, Taaqehin x’ok choq’ xcha’al lin kutan. Xtzolb’al a’an nikinixtenq’a chixk’eeb’al reetal li k’a’aq re ru aajel ru, jo’ li santil ochoch, lin wanjik rik’in li wixaqil, ut lin b’oqb’al sa’ li Iglees. Jwal ninb’antioxi naq li wochoch a’an jun li na’ajej b’ar wi’ li Dios wan sa’ xb’eenil na’ajej.”¹¹

Jun li komon ixq kixwotz: “Lin k’ulum rajlal rik’in Kim, Taaqehin wan naq ink’a’ jwal chaab’il, a’b’anan chirix naab’al hoonal nink’e reetal chan ru naq xtzolb’aleb’ li loq’laj hu rajlal yoo chinjalb’al. Li tzolok a’an nikinixtuulanob’resi, nikinixtzol, ut nikinixjal chi kok’ aj xsa’.”¹²

Jun li misioneer li ak kisutq’i chaq kixye: “Li hu Kim, Taaqehin kinixk’am wi’chik chixtzolb’aleb’ li loq’laj hu jo’ sa’ li mision, ut xinru chixjalb’al li tzolok rik’in tz’aqal xyalb’al xsahil re wulak chixnawb’al ru li Dios.”¹³

Jun li komon winq kixye: “Naweek’a naq li Santil Musiq’ej x’ok tz’aqal sa’ lin yu’am ut naweek’a lix b’eresihom li Dios naq ninsik’ ru li wajom. Ninru chik chi aatinak chirix lix ch’ina-usil tzol’leb’ li Kristo ut lix tojb’al rix li maak xb’aan a’an.”¹⁴

Jun li ch’ina al aj wuqub’ chihab’ kixye: “Taakub’eeq inha’ chi seeb’, ut Kim, Taaqehin yoo chinkawresinkil. Lin junkab’al ut laa’in noko’aatinak chirix li kub’iha’, ut anajwan maak’a’ chik inxiw re naq taakub’eeq inha’. Kim, Taaqehin naxtenq’a li Santil Musiq’ej chi ok sa’ li waam, ut naweek’a sahilal naq nawil ru li loq’laj hu.”¹⁵

Ut sa’ xraqb’al, jun li na’b’ej li naab’aleb’ xkok’al: “Sa’ xtzolb’al li raatin li Dios, a’an naxtenq’a li qajunkab’al chi elk sa’ li ch’a’ajkilal toj sa’ li wankilal; sa’ li yale’k ut li rahilal toj li ach’ab’aak; sa’ li choqink-ib’ toj sa’ li tuqtuukilal, ut chiru lix metz’ew laj xik’ ilonel toj sa’ li xmetz’ew li Dios.”¹⁶

A’ineb’ ut naab’aleb’ chik aj tiikil taaqehom re li Kristo ke’xk’e chi eetalinb’il lix kik’el lix Karneer li Dios sa’ rokeb’aaleb’ li rochoch. Yookeb’ chixk’utb’al li rajomeb’ re xtaaqenkil li Kolonel. Lix paab’aaleb’ nachal xb’een wa chiru li sachb’a-ch’oolej. A’an li sachb’a-ch’oolej naq junaq li kristiaan taawanq jun lix k’ulb’il na’leb’ sa’eb’ li loq’laj hu ut naq li k’ulb’il na’leb’ a’an osob’tesinb’ilaq rik’in li Santil Musiq’ej.

Naq naqatzol li loq’laj hu, maak’a’ li tzokaak sa’ musiq’ej sa’ xb’een li ruchich’och’. Jo’ kixye laj Nefi, “Ut ani teʼabʼinq chiru li raatin li Dios, ut teʼchapoq chiru chi kaw, maajoʼqʼe teʼosoʼq, chi moko taaruuq taanumtaaq saʼ xbʼeenebʼ li aleek ut li lochlookil tzimaj re li xikʼ naʼilok rehebʼ re teʼmutzʼeʼq ru, re xkʼambʼalebʼ xbʼe saʼ li sacheʼk” (1 Nefi 15:24).

Junxil chaq, naq eb’ li ralal xk’ajol laj Israel ke’xtaaqe lix k’utum li Qaawa’ k’eeb’il chaq xb’aan laj Moises, ke’osob’tesiik rik’in k’aak’aleek ut ach’ab’aak. Anajwan, naq naqataaqe lix b’e li Qaawa’ k’utb’il xb’aan li qayo’yookil profeet, li Awa’b’ej Nelson, osob’tesinb’ilo ajwi’ rik’in jalaak sa’ li qaam ut k’aak’aleek sa’ li qochoch.

Ninch’olob’ xyaalal naq yo’yo li Jesukristo. A’an a’in lix Iglees, k’ojob’anb’il wi’chik sa’ xb’een li ruchich’och’ rik’in li profeet aj Jose Smith. Li Awa’b’ej Russell M. Nelson, a’an lix yo’yookil profeet li Qaawa’ anajwan. Ninra ut ninxaqab’ xk’anjel. Sa’ xk’ab’a’ li Jesukristo, amen.