Li choxahil rahok sa’ lix k’uub’anb’il na’leb’ li Yuwa’b’ej

Jun na’leb’ li paab’anb’il a’b’an li moko yaal ta chirix li raqb’a-aatin li taachalq chirix li yu’am a’in, a’an naq li tiikeb’ te’xik sa’ choxa ut naq li moko tiikeb’ ta te’xik chi junelik sa’ xb’alb’a. Sa’ li b’alaq’il na’leb’ a’in chirix yal wiib’eb’ li na’ajej truuq raj toowulaq wi’, tento raj naq yalaq ani ink’a’ naru chixpaab’ankil chixjunileb’ li taqlahom re xik sa’ choxa tento taaxik chi junelik sa’ xb’alb’a.

Li na’leb’ kixk’uub’ li qaChoxahil Yuwa’ aj rahonel choq’ qe jwal chaab’il wi’chik chiru a’an. Li k’utb’esinb’il na’leb’ re lix Iglees li Jesukristo naxk’ut naq chixjunileb’ li ralal xk’ajol li Dios—ka’ajeb’ wi’ junjunq li ink’a’—te’xtaw xna’ajeb’ sa’ jun awa’b’ejihom re loq’alil.² “Sa’ rochoch lin Yuwa’ k’iila ochoch wan,”³ chan li Jesus. Rik’in li k’utb’esinb’il na’leb’ re li qakutan naqanaw naq eb’ li ochoch a’an wankeb’ sa’ oxib’ chi awa’b’ejihom re loq’alil. Sa’ roso’jik taaraqmanq aatin chiqix a’ yaal li qab’aanuhom ut li rajom li qach’ool.⁴ Rub’elaj a’an, taqanumsi rahilal xb’aaneb’ li qamaak wi ink’a’ xqajal qak’a’uxl chirixeb’. K’utb’il a’an chi saqen ru sa’ li loq’laj hu.⁵ Chirix a’an li tiikil aj Raqol aatin chiqix tixk’e qana’aj sa’ jun reheb’ li oxib’ chi awa’b’ejihom re loq’alil. Ut, jo’ naqatzol sa’ li k’utb’esinb’il na’leb’ re li qakutan, chixjunil “taaraqmanq aatin chirixeb’ … , ut li junjunq chi winq tixk’ul jo’ chanru xk’anjel a’an, tz’aqal li rawa’b’ejil, sa’eb’ li ochoch li kawresinb’ileb’.”⁶

B’ayaq ajwi’ li xk’utb’esi li Qaawa’ chirix wiib’ reheb’ li awa’b’ejihom re loq’alil. A’ut, wan naab’al li xk’utb’esi li Qaawa’ chirix li taqenaqil awa’b’ejihom re loq’al, li ch’olob’anb’il jo’ “lix loq’al li saq’e”⁷ sa’eb’ li loq’laj hu.

Wan oxib’ xtasalil li “choxahil”⁸ loq’al.⁹ Li q’axal taqenaq a’an li taqenaqil loq’al sa’ li choxahil awa’b’ejihom, b’ar wi’ tooruuq chi wulak jo’ li qaYuwa’ ut li Jesukristo, li Ralal. Re qatenq’ankil chi wank jo’ li Dios ut chi jalaak jo’ na’ajman re truuq taqataw li qachoxahilal, li Qaawa’ kixk’utb’esiheb’ lix na’leb’ ut kixxaqab’eb’ lix taqlahom a’ yaal li junelikil chaq’rab’. A’an a’in li naqajultika sa’ lix Iglees li Jesukristo xb’aan naq li rajomeb’ li tzol’leb’ ut li chaq’rab’ re li Iglees a’in, a’an xkawresinkileb’ li ralal xk’ajol li Dios choq’ re li kolb’a-ib’ sa’ li choxahil loq’al, ut chi tz’aqal, li taqenaqil loq’al sa’ lix tasalil q’axal taqenaq.

Aajeleb’ ru li sumwank ut eb’ li osob’tesink k’eeb’il reheb’ li tiikeb’ chi paab’ank sa’eb’ lix santil ochoch li Dios. Xb’aan a’an naq yooko chixyiiib’ankileb’ chiru li ruchich’och’, jo’ xb’icha li coro. Wankeb’ li ink’a’ neke’xtaw ru naq eb’ li sumwank ut li k’ojob’anb’il k’anjel re li santil ochoch nokohe’xb’eresi sa’ li taqenaqil loq’al. Naru natawman ru a’in ka’ajwi’ rik’in xtawb’al ru li k’utb’esinb’il na’leb’ chirixeb’ li oxib’ chi tasal re loq’alil. Xb’aan xnimal lix rahom li qaChoxahil Yuwa’ choq’ re chixjunileb’ li ralal xk’ajol, kixk’e xkomoneb’ chik li awa’b’ejihom re loq’alil—jo’ kixch’olob’ li Elder Quentin L. Cook ewer—ut lix chaab’ilaleb’ naxq’ax ru chixjunil li natawman ru.¹⁰

A’an lix tojb’al rix li maak xb’aan li Jesukristo li naxk’e chi uxmank chixjunil a’in. A’an kixk’utb’esi naq a’an “naxnimob’resi xloq’al li Yuwa’b’ej, ut naxkol chixjunil lix yiib’ahom li ruq’.”¹¹ Li kolb’a-ib’ a’an nak’eeman sa’eb’ li awa’b’ejihom re loq’alil. Li k’utb’esinb’il na’leb’ re qakutan naxk’ut naq “sa’ chixjunileb’ li awa’b’ejihom wan jun chaq’rab’ k’eeb’il.”¹² Naxye li loq’laj hu:

“Ani ink’a’ naru chixkuyb’al xpaab’ankil lix chaq’rab’il jun choxahil awa’b’ejihom ink’a’ naru chixkuyb’al jun choxahil loq’alil.

“Ut ani ink’a’ naru chixkuyb’al xpaab’ankil lix chaq’rab’il jun terrestil awa’b’ejihom ink’a’ naru chixkuyb’al jun terrestil loq’alil.

“Ut ani ink’a’ naru chixkuyb’al xpaab’ankil lix chaq’rab’il jun teleestil awa’b’ejihom ink’a’ naru chixkuyb’al jun teleestil loq’alil.”¹³

Sa’ jalan chik aatin, li awa’b’ejihom re loq’alil li taqak’ul sa’ li raqb’a-aatin sa’ roso’jik taak’eemanq a’ yaal eb’ li chaq’rab’ te’qapaab’ sa’ lix k’uub’anb’il na’leb’ li qaChoxahil Yuwa’. Sa’ li na’leb’ kixk’uub’ wankeb’ k’iila awa’b’ejihom re naq chixjunileb’ li ralal xk’ajol te’ruuq chi ok sa’ li jun awa’b’ejihom naru “te’xkuy.”

Lix k’anjelankileb’ li junelikil yaal a’in xb’aaneb’ lix tzol’leb’ ut lix chaq’rab’il lix Iglees li Qaawa’ ka’ajwi’ natawman ru chi tz’aqal jo’ xcha’al lix k’uub’anb’il na’leb’ li qaChoxahil Yuwa’ choq’ re chixjunileb’ li ralal xk’ajol.

Chi jo’kan naqak’e roxloq’ li xtaql xch’ool li junjunq. Na’no ru lix nimla k’anjel li Iglees re xpuktesinkil li ach’ab’aak chirix li paab’aal. Li k’anjel a’an naxtiikisi chi uub’ej lix k’uub’anb’il na’leb’ li qaChoxahil Yuwa’. Naqayal qaq’e chixtenq’ankil chixjunileb’ li ralal xk’ajol—moko ka’aj ta wi’ li qakomon sa’ li Iglees—re naq ach’ab’anb’ileb’ chixsik’b’al ru xb’eheb’.

Wan naq napatz’man qe k’a’ut naq neke’qataqla k’iila misioneer sa’ chixjunil li tenamit, sa’eb’ ajwi’ li tenamit aj Kristiano. Napatz’man ajwi’ qe k’a’ut naq naqak’e chi numtajenaq li tumin ut tenq’ reheb’ li moko komoneb’ ta sa’ li qa’Iglees chi ink’a’ junajinb’il rik’in li qak’anjel re misioneerik. Naqab’aanu a’in xb’aan naq li Qaawa’ naxk’ut chiqu naq te’qil chixjunileb’ li ralal xk’ajol jo’ qas qiitz’in, ut naqaj xwotzb’al li naab’alil wan qe sa’ musiq’ej ut sa’ tib’elej rik’in chixjunileb’.

Li junelikil tzol’leb’ naxk’e ajwi’ qana’leb’ chirixeb’ li kok’al. Rik’in li na’leb’ a’an naqak’e reetal naq li k’iresink kok’al a’an xcha’al li choxahil k’uub’anb’il na’leb’. A’an jun loq’laj k’anjel re sahil ch’oolejil choq’ reheb’ li k’eeb’ileb’ xwankil chi tz’aqonk. Jo’kan ut, taqlanb’ilo chixk’utb’al ut chixk’uulankil chixjunil li na’leb’ li naxtenq’aheb’ li kok’al chi k’iik ut chi saho’k sa’ xch’ool a’ yaal lix k’uub’anb’il na’leb’ li Dios.

Na’no ru Lix Iglees li Jesukristo reheb’ laj Santil Paab’anel sa’ Roso’jikeb’ li Kutan jo’ jun Iglees reheb’ li junkab’al. A’ut ink’a’ na’no chi us naq li qawanjik sa’ junkab’al ink’a’ yal naxk’oxla li qawanjik sa’ ruchich’och’. Li komonil sa’ junelik q’e kutan wan ajwi’ sa’ qana’leb’. Li Iglees naxtenq’a chixjunileb’ li ralal xk’ajol li Dios chixk’ulb’al li naraj li Dios choq’ reheb’. Rik’in lix tojb’al rix li maak xb’aan li Kristo, chixjunileb’ naru te’xtaw li junelik yu’am (li taqenaqil loq’al sa’ li choxahil awa’b’ejihom), li “naxk’e li Dios re chixjunileb’ li neke’ab’in chiru,” jo’ kixye li xEva.¹⁴ A’an taqenaq wi’chik chiru li kolb’a-ib’. Li Awa’b’ej Russell M. Nelson kixye naq “sa’ lix k’uub’anb’il na’leb’ li Dios, li kolb’a-ib’ nak’ule’ qajunes; [a’b’an] li taqenaqil loq’al, nak’ule’ jo’ junkab’al.”¹⁵

Naqapaab’ lix k’utb’esinb’il na’leb’ li Dios naq naru xk’ulb’al li taqenaqil loq’al ka’ajwi’ rik’in xpaab’ankileb’ li sumwank re lix sumlajik jun winq rik’in jun ixq chi junelik.¹⁶ Li choxahil na’leb’ a’an nokoxk’e chixk’utb’al naq “li winqilal ut ixqilal a’an aajel ruhil eetalil chirix aniho ut k’a’ut naq wan li junjunq, naq maji’ nayo’la, sa’ li yu’am a’in, ut sa’ li junelik q’e kutan.”¹⁷

Chi jo’kan ajwi’ naq li Qaawa’ naxtaqla naq lix Iglees tixka’pak’ali li ruchich’och’il na’leb’ naq taqajal lix na’leb’ li Qaawa’ chirix li sumlaak rik’in ka’ajwi’ jun winq ut jun ixq, ut naq tixka’pak’ali yalaq na’leb’ nasachob’resink re xjalanileb’ li winq ut li ixq.

Naab’aleb’ neke’xka’pak’ali lix k’utum li Iglees chirix li na’leb’ a’in. Naqataw ru a’an. Wan “xka’pak’alil chixjunil li k’a’aq re ru”¹⁸ sa’ lix k’uub’anb’il na’leb’ li qaChoxahil Yuwa’, ut laj Satanas naxjayali lix k’ihal lix ka’pak’alil rik’in chixjunil li aajel ru sa’ li k’uub’anb’il na’leb’ a’an. Chi jo’kan naq a’an naxyal qaramb’al sa’ xtawb’al li taqenaqil loq’al rik’in xjalb’ehinkil li sumlaak, xk’ub’sinkil xchaab’ilal li k’iresink kok’al, malaj xsachb’al xjalanil li winqilal ut li ixqilal. A’b’anan, laa’o naqanaw naq sa’ roso’jik, ink’a’ taajalmanq lix choxahil ajom ut xna’leb’ li qaChoxahil Yuwa’ aj rahonel. Us ta najala li qayu’am, lix k’uub’anb’il na’leb’ li Dios toj naxyeechi’i reheb’ li tiikeb’ chixpaab’ankileb’ lix sumwank naq te’ruuq chixk’ulb’al chixjunileb’ lix yeechi’inb’il osob’tesihom.¹⁹

Jun na’leb’ jwal nokoxtenq’a chixkawresinkil qib’ choq’ re li junelik yu’am, “a’an xnimal ru reheb’ li maatan re li Dios,”²⁰ a’an li jek’inb’il aatin chirix li junkab’al li kipuktesiman sa’ 1995.²¹ Li jek’inb’il aatin a’in ink’a’ naxk’am rib’ rik’in junjunq lix chaq’rab’il tenamit, li na’leb’, ut li aatin yeeb’il sa’ li ruchich’och’, jo’ li laq’ab’ank-ib’ chi maak’a’ li sumlaak ut li sumlaak rik’in rech winqilal ut rech ixqilal. Eb’ li ink’a’ neke’xtaw ru chi tz’aqal lix k’uub’anb’il na’leb’ li Yuwa’b’ej choq’ reheb’ li ralal xk’ajol maare neke’xk’oxla naq li jek’inb’il aatin a’an yal jun tz’iib’anb’il reetalil li qachaq’rab’il li naru taajalmanq. A’b’anan, ;aa’o naqaye xyaalal naq li jek’inb’il aatin chirix li junkab’al, li k’ojob’anb’il sa’ xb’een li tzol’leb’ ink’a’ naru xjalb’al, naxch’olob’ chan ru li junkab’alej b’ar wi’ taa’uxq li qajunelikil k’iijik.

A’an tz’aqal li na’leb’ k’ojob’anb’ileb’ wi’ lix tzol’leb’ ut lix chaq’rab’il lix Iglees li Jesukristo li k’ojob’anb’il wi’chik.

Sa’ naab’aleb’ li qawanjik sa’ ruchich’och’, taawanq li ka’pak’aliik. Jo’ aj taaqehom re li Kristo rik’in rahok choq’ reheb’ li qas qiitz’in, tento toowanq sa’ xyaalalil rik’ineb’ li ink’a’ neke’xpaab’ li naqapaab’ laa’o. Chiqajunilo ralal xk’ajolo jun li qaChoxahil Yuwa’ li nokoxra. Choq’ qe chiqajunil, naxyeechi’i li qayu’am chirix li kamk, ut sa’ roso’jik, jun awa’b’ejihom re loq’alil. Li Dios naraj naq taqayal qaq’e chixk’ulb’aleb’ li osob’tesink q’axal taqenaqeb’ rik’in xpaab’ankileb’ lix taqlahom, lix sumwank, ut lix k’ojob’anb’il k’anjel q’axal taqenaqeb’, chixjunileb’ li neke’b’aanuman sa’eb’ lix santil ochoch li yookeb’ chi yiib’amank chiru li ruchich’och’. Tento taqayal qaq’e chixwotzb’al li junelikil yaal a’in rik’ineb’ li qas qiitz’in. A’ut rik’in li rahok li tento taqak’e re chixjunileb’, junelik taqak’ulub’a li neke’xsik’ ru xb’aanunkil. Jo’ kixye jun profeet sa’ lix Hu laj Mormon, tento taqatiikisi qib’ chi uub’ej “rik’in rahok choq’ re li Dios ut reheb’ chixjunil li winq.”²²

Li Awa’b’ej Russell M. Nelson kixye sa’ li jolomil ch’utub’aj-ib’ xnume’: “Maajun wa kik’ulman sa’ ruchich’och’ naq li nawom chirix li qaKolonel tz’aqal aajel ru ut nim xwankil choq’ re li junjunq chi aamej. … Lix saq ruhil tzol’leb’ li Kristo wan xwankil. Naxjal xyu’ameb’ chixjunileb’ li neke’tawok ru ut neke’xsik’ xyu’aminkil.”²³