Laa’o Lix Iglees li Jesukristo rehebʼ laj Santil Paabʼanel saʼ Rosoʼjikebʼ li Kutan

Chirix naq xink’ul li b’oqom re “chalk ut ilok,”¹ kin’ok chi wulak sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan naq wan chaq we 26 chihab’. Toj b’ab’ayaq chaq injachb’al wib’ rik’in li xb’een inb’eelom. Wan chaq jun inka’ch’in aj oxib’ chihab’. Ut k’a’jo’ chaq li xiw naweek’a. Naq kin’ok sa’ li kapiiy, kiweek’a xsahil inch’ool xb’aan lix paab’aaleb’ ut lix sahileb’ xch’ool li kristiaan wankeb’ chinsutam. Chi yaal naq kiwan “choq’ jun kolb’a-ib’ na’ajej.”² Oxib’ xamaan chik chirix a’an, kin’ok sa’ sumwank rik’in lin Choxahil Yuwa’ rik’in li kub’iha’ ut kintikib’ lin b’eenik jo’ xtzolom li Kristo, us ta lin yu’am moko tz’aqal ta re ru chiru li b’eek a’an.

Re naq xeb’ink’ul li junelikil osob’tesiik a’an, naab’al li k’a’aq re ru sa’ ruchich’och’ ut sa’ musiq’ej tento naq ke’uxman. Lix evangelio li Jesukristo kik’ojob’aak wi’chik ut kijultikaak; li kapiiy a’an kikab’laak ut kisaab’esiik; k’uub’anb’ileb’ ru laj jolominel, chalen chaq li profeet ut eb’ laj jolominel sa’ li na’ajej a’an; ut jun li uq’ej b’ar wi’ k’iheb’ li komon re li sumwank li kawresinb’ileb’ chinq’alunkil laa’in ut lin yum naq kook’ame’ aran xb’aan li Kolonel, kooch’olaniik “xb’aan lix chaab’il aatin li Dios,”³ ut kik’ehe’ qahoonal re k’anjelak.⁴

Chalen sa’ xtiklajik, li Dios naxyal xq’e chixch’utub’ankileb’ ut chixk’uub’ankileb’ ru li ralal xk’ajol⁵ re “xk’eeb’al chi uxmank li [qakolb’al] chiru li kamk ut li [qayu’am] chi junelik.”⁶ Rik’in li ajom a’an sa’ qak’a’uxl, naxk’am qab’e chixkab’lankileb’ na’ajej re loq’onink,⁷ b’ar wi’ taqataw qanawom ut eb’ li k’ojob’anb’il k’anjel re kolb’a-ib’ ut taqenaqil loq’al; b’ar wi’ too’ok sa’ ut te’qapaab’ li sumwank li nokohe’xjunaji rik’in li Jesukristo;⁸ b’ar wi’ tootiqib’aaq rik’in “li wankilal re choxahilal”;⁹ ut b’ar wi’ taqach’utub’ qib’ chi kok’ aj xsa’ re xjultikankil li Jesus ut taqakawob’resi qach’ool chiqib’il qib’ chirix a’an.¹⁰ Lix k’uub’lajik li Iglees ut eb’ li kapiiy wankeb’ re naq toochaab’ilo’q sa’ musiq’ej. “Li Iglees … a’an li ch’iich’ naqakab’la wi’ li junelikil junkab’al.”¹¹

Naq yookin chaq chi aatinak rik’in jun wamiiw li yoo chi nume’k sa’ jun hoonal ch’a’aj, kinpatz’ re k’a’ru naxb’aanu re xtawb’al li tumin. Rik’in xyaab’, kixye we naq yoo chi tenq’aak xb’aan lix obiisp rik’in lix tuminal li mayej. A’an kixye, “Ink’a’ ninnaw b’ar wan lin junkab’al anajwan wi maak’a’ raj li iglees.” Kinye re, “Li Iglees a’aneb’ li komon. A’aneb’ li neke’tenq’an ut li neke’xk’e xmayej chi saheb’ xch’ool re xtenq’ankileb’ li wankeb’ rajom ru. Yookex chixk’ulb’al ruuchinihomeb’ lix paab’aal ut li rajomeb’ chixtaaqenkil li Jesukristo.

Ex wech aj k’anjel chiru li Kristo, miqak’os xwankil li xchaq’al ru k’anjel yoo chixb’aanunkil li Qaawa’ rik’in li qatenq’, a’ lix Iglees, us ta toj wan li qapaaltil. Wan naq laa’o li nokok’ehok ut wan naq laa’o li nokok’uluk, a’b’an chiqajunilo xcha’alo lix junkab’al li Kristo. Lix Iglees a’an li k’anjeleb’aal xk’e chaq qe re qab’eresinkil ut qosob’tesinkil naq naqaloq’oni ut naq naqatenq’a qib’ chiqib’il qib’.

Junjunqeb’ li komon ixq neke’xpatz’ xkuyb’al xmaak chiwu, neke’xk’oxla naq moko yookeb’ ta chi tz’aqonk sa’ li Komonil re Tenq’ank xb’aan naq neke’k’anjelak b’an sa’ li Tzoleb’aal reheb’ li Kok’al malaj rik’ineb’ li Saaj Ixq. Eb’ li komon ixq a’an, a’aneb’ xcha’al li jwal neke’k’anjelak sa’ li Komonil re Tenq’ank xb’aan naq yookeb’ chixtenq’ankileb’ li qaraarookil kok’al ut saaj chixkawresinkileb’ lix paab’aal chirix li Jesukristo.

Li Komonil re Tenq’ank moko a’an ta yal jun ch’utleb’aal, jun tzolok sa’ domingo, jun ch’ina k’anjel malaj junaq awa’b’ejil. Li Komonil re Tenq’ank a’an li ixq re li sumwank sa’ li Iglees; a’ano laa’o—li junjunq qe laa’o ut chiqajunilo laa’o. A’an li “qach’uut aj rahonel ut aj tenq’anel sa’ chixjunil li ruchich’och’.”¹² A’ yaal b’ar, ut yalaq ta b’ar tooxik, junelik komono sa’ li Komonil re Tenq’ank naq naqayal qaq’e chixtz’aqob’resinkil ru li choxahil ajom, a’an naq eb’ li ixq te’xb’aanu lix k’anjel li Dios chi junjunqal ut sa’ ch’uut¹³ naq neke’tenq’an: “tenq’ank sa’ li neb’a’il, tenq’ank sa’ li yajel, tenq’ank sa’ li xkab’ rix ch’oolej, tenq’ank sa’ xmaak’a’il li nawom—tenq’ank sa’ chixjunil li naramok … sahil ch’oolejil ut chaab’ilo’k.”¹⁴

Chanchan ajwi’ a’an li wank sa’ li xmolameb’ li xb’eenil ut sa’eb’ xkomon chik lix k’uub’ankil ru li Iglees choq’ reheb’ chixjunil, jo’ ajwi’ choq’ reheb’ li kok’al ut eb’ li saaj. Li Iglees moko yal kab’leb’ ta re loq’onink; li Iglees a’ano laa’o, li komon. Laa’o Lix Iglees li Jesukristo rehebʼ laj Santil Paabʼanel saʼ Rosoʼjikebʼ li Kutan, rik’in li Kristo sa’ xjolomil ut li profeet jo’ aj k’amol re li xyaab’ xkux. Li Qaawaʼ kixye:

“Kʼehomaq reetal, aʼin lin tzolʼlebʼ—ani naxjal xkʼaʼuxl ut nachal wikʼin, aʼan ajwiʼ lin iglees. …

“Ut … li ani re lin iglees, ut nakuyuk sa’ lin iglees toj sa’ roso’jik, a’an tinxaqab’ sa’ xb’een insaqoonaq.”¹⁵

Ex was wiitz’in, chiqak’ehaq reetal li qosob’tesinkil naq laa’o komon sa’ lix Iglees li Jesukristo, b’ar wi’ naru naqajunaji ru li qapaab’aal, li qaam, qakawilal, qak’a’uxl, ut eb’ li quq’ choq’ re, re xk’eeb’al chi uxmank li xninqal ru sachb’a-ch’oolej. “Jo’ ajwi’ naq li tz’ejwalej moko yal jun ta xcha’al wank, naab’al b’an.”¹⁶

Jun li saaj kixye re lix na’, “Naq toj ka’ch’inin chaq, rajlal naq kink’e jun dolar jo’ li lajetqil, kink’oxla naq rik’in ka’ajwi’ li jun chi dolar a’an taayiib’amanq junaq li kapiiy. Ma ink’a’ ta b’i’ se’el a’an?

Chi toch’b’il xch’ool, kixsume, “K’a’jo’ xchaq’al ru a’an! Ma kak’oxla sa’ laa k’a’uxl?”

“Hehe’!” chan. “K’a’jo’ xchaq’aleb’ ru ut wankeb’ k’iila millon!”¹⁷

Ex inraarookil amiiw, chiwanq qapaab’aal jo’ jun ch’ina al ut chisaho’q qach’ool xb’aan xnawb’al naq li xyalb’al qaq’e us ta kok’ yookeb’ chi k’anjelak sa’ li rawa’b’ejihom li Dios.

Li qajom sa’ li rawa’b’ejihom tento naq a’anaq xk’amb’al qib’ chiqib’il qib’ rik’in li Kristo. Naq naqileb’ li loq’laj hu, naqil naq li Kolonel kixk’e li b’oqom a’in reheb’ laj Nefita:

“Ma wan ani yaj sa’ eeyanq? Kʼamomaqebʼ chaq. Ma wan … ani tawasinb’il chi yalaq chan ru? Kʼamomaqebʼ chaq, ut tebʼinkʼirtesi, xbʼaan naq nintoqʼobʼa eeru; nujenaq chi uxtaan xsaʼ inchʼool.

“ … Nawil naq tz’aqal eepaab’aal re texink’irtesi.”¹⁸

Ma ink’a’ ta b’i’ chiqajunil wan qatoch’olal li naru neke’k’ame’ rub’el roq li Kolonel? Us ta junjunq qe laa’o wan qarahilal sa’ tib’elej, naab’al chik qe naqayal qaq’e sa’ k’a’uxlej, wan chik qe naqayal qaq’e rik’in li k’ulub’aak ut chiqajunil naqasik’ qahiilal naq na’ok xch’a’ajkil li qamusiq’. Chiqajunil wan qach’a’ajkilal.

Naqil naq “chixjunil li ch’utch’uukil tenamit sa’ junajil xkoheb’ rochb’eeneb’ lix yaj … ut rochb’een chixjunileb’ lix tawasinb’ileb’ chi yalaq chan ru; ut a’an kixk’irtesi chixjunjunqaleb’ naq ke’k’ame’ rik’in.

“Ut chixjunileb’, li ani k’irtesinb’ileb’ ut li ani kaweb’ rib’, ke’xkub’si rib’ chiroq, ut ke’xloq’oni.”¹⁹

Chalen jun ch’ina al li naxtoj xlajetqil rik’in paab’aal, toj reetal jun na’b’ej maak’a’ xb’eelom li naraj ru xwankil li rusilal li Qaawa’, toj ajwi’ jun yuwa’b’ej li naxyal xq’e chixk’amb’al re lix junkab’al li k’a’ru aajel ru choq’ reheb’, toj reetal ajwi’ eb’ li qaxe’ qatoon neke’raj ru li k’ojob’anb’il k’anjel re li kolb’a-ib’ ut li taqenaqil loq’al, ut toj reetal ajwi’ laa’o li naqa’ak’ob’resi li qasumwank rik’in li Dios rajlal xamaan, naqaj qu chiqib’il qib’, ut naru naqak’am qib’ chiqib’il qib’ sa’ lix k’irtesihom lix tojb’al rix li maak xb’aan li Kolonel.

Ex was wiitz’in, chiqataaqe lix b’oqom li Jesukristo naq chiqak’am qib’ chiqib’il qib’ rik’in a’an ut chiqak’am ajwi’ li qach’a’ajkilal. Naq nokochal rik’in a’an ut neke’qak’am chaq li ani neke’qara, a’an naril li qapaab’aal. A’an tixk’irtesiheb’, ut tooxk’irtesi.

Jo’ “li neke’taaqenk re li Kristo sa’ tuqtuukilal,”²⁰ naqayal qaq’e chi wulak chi “junaj qach’ool ut junaj qak’a’uxl”²¹ ut wank chi tuulan qach’ool, ut chi kub’enaq qatawom ut chi q’un qach’ool; chi chaab’il rik’in li tz’aamanb’il; chi nujenaq rik’in kuyuk ut najtil oyb’enink; ut chixkuyb’al qib’ chiru chixjunil li k’a’aq re ru; rik’in xyalb’al qaq’e chixpaab’ankil lix taqlahom li Dios rajlal; chi nujak rik’in paab’aal, li yo’onink, ut li rahok, ut chi numtaak sa’ li chaab’il k’anjel.²² Naqayal qaq’e re wulak jo’ li Jesukristo.

Ninch’olob’ xyaalal naq jo’ x’Iglees li Kristo, laa’o li k’anjeleb’aal, jo’ kixye li Awa’b’ej Russell M. Nelson, ut q’ikin “laj Kolol qe ut laj Tojol qix, li Jesukristo, tixb’aanu xkomoneb’ lix k’anjel q’axal ninqeb’ chalen chaq anajwan toj taak’ulunq wi’chik.”²³

Li Qaawaʼ kixye:

“Kʼehomaq reetal, laaʼin tinseebʼa lin kʼanjel saʼ xqʼehil.

“Ut ninkʼe eere laaʼex … jun taqlahom naq teechʼutubʼ eeribʼ ut teekʼuubʼ eeribʼ, ut teekawresi eeribʼ, ut teesantobʼresi eeribʼ; relik chi yaal, saqobʼresihomaq ru lee chʼool, ut chʼajobʼresihomaq lee ruqʼ ut lee roq chiwu, re naq texinchʼajbʼilobʼresi.”²⁴

Chiqak’ulub’a li choxahil b’oqom a’in ut taqach’utub’ qib’, taqak’uub’ qib’, taqakawresi qib’, ut taqasantob’resi qib’ rik’in sahil ch’oolejil, a’an a’in lin tz’aam sa’ xk’ab’a’ li Jesukristo, amen.