මගේ මනස යේසුස් ක්‍රිස්තුස්වහන්සේ පිළිබඳ මේ සිතුවිල්ලට නතු වුණා

යේසුස් ක්‍රිස්තුස්වහන්සේ පිළිබඳ මෙම ප්‍රමුඛ චින්තනය අපගේ අපගේ මනසට නිරන්තරයෙන් හා උනන්දුවෙන් ගලා යාමට ඉඩ සලසමින්,¹⁰ අප සිතන සහ කරන දේ සම්බන්ධයෙන් අපට මගපෙන්වමින්, සහ ගැලවුම්කරුවාණන්ගේ ප්‍රේමයේ මිහිරි ප්‍රීතිය ගෙන එමින්, එම සිතුවිල්ල අපගේ ප්‍රාණයේ කුටි තුළට දමා එය සවිඥානිකව හැඩගස්වා, ශක්තිමත් කර, සුරක්ෂිත කරනු කරනු ලැබේවා කියා මෙම පාස්කු සමයේ මම යාච්ඤා කරනවා.¹¹

යේසුස් ක්‍රිස්තුස්වහන්සේගේ බලයෙන් අපගේ මනස පුරවා ගැනීම යනු අපට ඇති එකම සිතුවිල්ල උන්වහන්සේ බව නොවේ. නමුත් එයින් අදහස් කරන්නේ අපගේ සියලු සිතුවිලි උන්වහන්සේගේ ප්‍රේමය, උන්වහන්සේගේ ජීවිතය සහ ඉගැන්වීම්, සහ උන්වහන්සේගේ වන්දිගෙවීමේ පූජාව සහ මහිමාන්විත නැවත නැගිටීම තුළ මායිම් කර ඇති බවයි. උන්වහන්සේ පිළිබඳ අපගේ සිතුවිලි සැමවිටම පවතින නිසා, සහ “[අප] තුළ ඇති සියල්ල උන්වහන්සේට නමස්කාර කරන නිසා, යේසුස්වහන්සේ කිසිදා අමතක වන මුල්ලක නෙවෙයි ඉන්නෙ!”¹² අපි යාච්ඤා කර, අපව උන්වහන්සේට ළං කළ අත්දැකීම් අපගේ මනසෙහි පෙරහුරු කරමු. අපගේ කාර්යබහුල ජීවිත හරහා වේගයෙන් දිවෙන ගණන් කළ නොහැකි දෛනික සිතුවිලි මෘදු ලෙස සමනය කිරීම සඳහා දිව්‍යමය රූප, ශුද්ධලියවිලි සහ දේවානුභාවයෙන් යුත් ගීතිකා අපි අපගේ මනසට සාදරයෙන් පිළිගනිමු. උන්වහන්සේ කෙරෙහි ඇති අපගේ ප්‍රේමය මේ ලෞකික ජීවිතයේ දුකෙන් හා ශෝකයෙන් අපව ආරක්ෂා කරන්නේ නෑ, නමුත් එය අපගේම ශක්තියෙන් ඔබ්බට ගිය ශක්තියකින් අභියෝග හරහා ගමන් කිරීමට අපට ඉඩ සලසනවා.

මතක තබා ගන්න, ඔබ ස්වර්ගික පියාණන්වහන්සේගේ ආත්මීය දරුවෙක්. ප්‍රේරිත පාවුල් පැහැදිලි කරන පරිදි, අපි තමයි “දෙවියන්වහන්සේගේ දරුවන්.”¹⁴ ඔබ පොළොවට පැමිණීමට බොහෝ කලකට පෙර ඔබේම පුද්ගල අනන්‍යතාවයෙන් ජීවත් වී තිබෙනවා. අපේ පියාණන්වහන්සේ අපට පොළොවට පැමිණීමට, ඉගෙනීමට සහ උන්වහන්සේ වෙතට ආපසු යාමට පරිපූර්ණ සැලැස්මක් නිර්මාණය කළා. උන්වහන්සේගේ අසීමිත වන්දිගෙවීමේ සහ මරණයෙන් නැවත නැගිටීමේ බලයෙන් අපි සොහොනෙන් ඔබ්බට ජීවත් වන පිණිස උන්වහන්සේ තම ආදරණීය පුත්‍රයාණන්ව එව්වා; ඒවගේම අප උන්වහන්සේ කෙරෙහි ඇදහිල්ල ක්‍රියා කිරීමට සහ අපගේ පව් ගැන පසුතැවිලි වීමට කැමැත්තෙන් සිටින විට,¹⁵ අපට සමාව ලැබෙන අතර සදාකාල ජීවනයේ බලාපොරොත්තුව ලැබෙනවා.¹⁶

මෙම ලෞකික ජීවිතයේදී, අපගේ මනසට සහ ආත්මයට සුවිශේෂී අවධානයක් අවශ්‍ය වෙනවා.¹⁷ අපට ජීවත් වීමට, තෝරා ගැනීමට සහ හොඳ සහ නරක හඳුනා ගැනීමට ඉඩ සලසන්නේ අපගේ මනසයි.¹⁸ දෙවියන්වහන්සේ අපගේ පියාණන් බවත්, යේසුස් ක්‍රිස්තුස්වහන්සේ දෙවියන්වහන්සේගේ පුත්‍රයාණන් බවත්, උන්වහන්සේලාගේ ඉගැන්වීම් මේ ලෝකයේ සහ සොහොනෙන් ඔබ්බට අපගේ සදාකාලික ජීවිතයේ ප්‍රීතිය සඳහා අපගේ මාර්ගෝපදේශය බවත් සනාථ කරන සාක්ෂිය ලබාගන්නේ අපේ ආත්මයයි.

ඇල්මාගේ මනස යේසුස් ක්‍රිස්තුස්වහන්සේ පිළිබඳ මේ සිතුවිල්ලට නතු වුණා. එය ඔහුගේ ජීවිතය වෙනස් කළා. ප්‍රධාන සම්මන්ත්‍රණය යනු ස්වාමින්වහන්සේ කැමති අප කුමක් කරනවාටද සහ අප කවුරුන් වනවාටද කියා තේරුම් ගැනීමට කාලයක්. එය අපගේ දියුණුව ගැන මෙනෙහි කිරීමට ද කාලයක්. මගේ පැවරුම් මාව ලෝකය පුරා ගෙන ගොස් ඇති නිසා, සභාවේ ධර්මිෂ්ඨ, කැපවූ සාමාජිකයන් තුළ වැඩි වන ආත්මික ශක්තියක් මම නිරීක්ෂණය කළා.

වසර පහකට පෙර, යේසුස් ක්‍රිස්තුස්වහන්සේගේ පසුදවස් වල ශුද්ධවන්තයන්ගෙන් යුත් සභාව යන සැබෑ නාමය භාවිතා කරමින් අප කරන සෑම දෙයකදීම ගැලවුම්කරුවාණන්ව වඩාත් ප්‍රමුඛස්ථානයට පත් කරන ලෙස අපෙන් ඉල්ලා සිටියා.¹⁹ අපි උන්වහන්සේගේ නම වඩාත් උනන්දුවෙන් කතා කරනවා.

වසර හතරකට පෙර, අපගේ සක්‍රමේන්තු රැස්වීමේ කාලය අඩු කිරීමෙන්, අපි ස්වාමින්වහන්සේගේ සක්‍රමේන්තුවට සහභාගී වීම කෙරෙහි අපගේ අවධානය වැඩි කළා. අපි යේසුස් ක්‍රිස්තුස්වහන්සේ ගැන වැඩිපුර සිතමින් සිටින අතර උන්වහන්සේව සැමවිටම මතක තබා ගැනීමට අපගේ පොරොන්දුව ගැන වඩාත් බැරෑරුම් ලෙස සිතනවා.²⁰

ලෝක ව්‍යාප්ත වසංගතය නිසා හුදකලා වීම සහ එන්න, මා අනුගමනය කරන්න යන ගැලවුම්කරුවාණන්ගේ ඉහැන්වීම් උපකාරයෙන්, සතිය පුරාවට ගැලවුම්කරුවාණන්ට අපගේ නමස්කාරයට උපකාර කරමින්, අපගේ නිවෙස් තුළ ගැලවුම්කරුවාණන්ගේ ඉගැන්වීම් වඩාත් ප්‍රමුඛතාවක් ගත්තා.

“උන්වහන්සේට සවන් දෙන්න”²¹ යන සභාපති රසල් එම්. නෙල්සන්ගේ උපදෙස් අනුගමනය කිරීමෙන්, අපි ශුද්ධාත්මයාණන්ගේ මිමිණුම් හඳුනා ගැනීමට සහ අපගේ ජීවිත තුළ ස්වාමින්වහන්සේගේ හස්තය දැකීමට අපගේ හැකියාව ශෝධනය කරගන්නවා.

දේවමාළිගා දුසිමක් පමණ පිළිබඳ නිවේදන සහ ඒවායෙහි නිම කිරීමත් සමඟ, අපි නිතර නිතර ස්වාමින්වහන්සේගේ ගෘහයට ඇතුළු වී උන්වහන්සේගේ පොරොන්දු වූ ආශිර්වාද ලබාගන්නවා. අපගේ ගැලවුම්කරුවාණන්ගේ සහ මිදුම්කරුවාණන්ගේ අතිවිශිෂ්ට සුන්දරත්වය අපට වඩා බලවත් ලෙස දැනෙමින් තිබෙනවා.

සභාපති නෙල්සන් මෙසේ පැවසුවා: “බලවත් [ගෝලයෙකු] වීමට පහසු හෝ ස්වයංක්‍රීය කිසිවක් නැත. අපගේ අවධානය යොමු කළ යුත්තේ ගැලවුම්කරුවාණන් සහ උන්වහන්සේගේ සුභාරංචිය මතය. සෑම සිතුවිල්ලක් තුළම උන්වහන්සේ දෙස බැලීම මානසිකව ප්‍රබල වෙන්න පුළුවන්.”²²

යේසුස් ක්‍රිස්තුස්වහන්සේ කෙරෙහි අපගේ අවධානය යොමු කිරීමෙන්, අප අවට සිටින අනෙක් සියලුම අය දෙස අපි උන්වහන්සේ කෙරෙහි ඇති අපගේ ප්‍රේමය තුළින් බලනවා. අවම වැදගත්කමින් යුත් බාධාවන් මැකී යනවා, ඒවගේම උන්වහන්සේගේ ආලෝකයට සහ චරිතයට නොගැලපෙන දේවල් අපි ඉවත් කරනවා. ඔබ යේසුස් ක්‍රිස්තුස්වහන්සේ පිළිබඳ මෙම සිතිවිල්ලට හොඳින් නතු වී දිගින් දිගටම සිටින විට, උන්වහන්සේ කෙරෙහි විශ්වාසය තබා, උන්වහන්සේගේ ආඥා පිළිපදින විට, ඔබට මගපෙන්වීමෙන් පමණක් නොව ස්වර්ගීය බලයෙන්ද—එනම් ඔබගේ ගිවිසුම්වලට ශක්තිය, ඔබගේ දුෂ්කරතාවලට සමාදානය, සහ ඔබේ ආශිර්වාද වලට ප්‍රීතිය ගෙන දෙන බලයෙන් ආශිර්වාද ලබන බවට මම ඔබට පොරොන්දු වෙනවා.

සති කිහිපයකට පෙර කැතී සහ මම, මැට් සහ සාරා ජොන්සන්ගේ නිවසට ගියා. බිත්තියේ ඔවුන්ගේ වටිනා පවුලේ පින්තූරයක්, ගැලවුම්කරුවාණන්ගේ අලංකාර රූපයක් සහ දේවමාළිගාවේ නිදර්ශණයක් තිබුණා.

ඔවුන්ගේ දියණියන් හතර දෙනා වන මැඩී, රූබි, ක්ලෙයාර් සහ ජූන් ඔවුන් තම මවට කොතරම් ආදරය කරනවාද යන්න ගැන සතුටින් කතා කළා.

ඉස්සර කාලයේ ජීවත් වූ පවුලේ සාමාජිකයන්ගේ බව්තීස්ම සඳහා ගැහැණු ළමයින්ට සහභාගී විය හැකි වන පරිදි, සාරා වසරකට වැඩි කාලයක් තිස්සේ පවුලේ සැමට දේවමාළිගාවට යාම සඳහා සෙනසුරාදා දිනයේ සහභාගී වීම් නිතිපතා සැලසුම් කර තිබුණා.

පසුගිය වසරේ නොවැම්බර් මාසයේදී, සාරා දෙසැම්බර් මාසයේ අවසාන සතිය සඳහා සෙනසුරාදා වෙනුවට බ්‍රහස්පතින්දා දිනයේ එම පවුලේ දේවමාළිගා ගමන සැලසුම් කළා. “මම හිතනවා ඔයාට ඒ ගැන ප්‍රශ්නයක් නෑ කියලා,” ඇය මැට්ට පැවසුවා.

සාරාට පිළිකාවක් ඇති බව හඳුනාගෙන තිබුණත් ඇය තව අවුරුදු දෙක තුනක් ජීවත් වනු ඇතැයි වෛද්‍යවරු අපේක්ෂා කළා. ඇයට ලැබෙන ප්‍රතිඵලය කුමක් වුවත්, ඇය මුළු හදවතින්ම ගැලවුම්කරුවාණන්ට ප්‍රේම කළ බවත්, “ජයග්‍රහණය දැනටමත් උන්වහන්සේ විසින් දිනාගෙන ඇති බවත්” පවසමින් සාරා ඇගේ ප්‍රබල සාක්ෂිය, සක්‍රමේන්තු රැස්වීමකදී බෙදාගෙන තිබුණා. දෙසැම්බර් මාසය ගෙවීගෙන යද්දි, අනපේක්ෂිත ලෙස සාරාගේ සෞඛ්‍යය වේගයෙන් පිරිහුණු අතර, ඇයව රෝහලට ඇතුළත් කළා. දෙසැම්බර් 29 වන දින, බ්‍රහස්පතින්දා හිමිදිරි පාන්දර, ඇය නිහඬව සිය ලෞකික ජීවිතය සම්පූර්ණ කළා. මැට් මුළු රාත්‍රිය පුරාම සාරාගේ ලඟ සිටියා.

ඔහුගේ හදවත බිඳී හා ශාරීරිකව හා චිත්තවේගීයව සම්පූර්ණයෙන්ම වෙහෙසට පත් වී තිබූ විට, ඔහු තම දියණියන් සමඟ ශෝක වෙමින් නිවසට පැමිණියා. මැට් ඔහුගේ දුරකථනය දෙස බැලූ විට, එදින සවස පැවැත්වීමට නියමිතව තිබූ අසාමාන්‍ය බ්‍රහස්පතින්දා දේවමාළිගා සහභාගී වීම පිළිබඳ සාරා සැලසුම් කර තිබූ මතක් කිරීම ඔහු දුටුවා. මැට් මෙසේ පැවසුවා, “මම එය මුලින්ම දුටු විට, මම හිතුවේ, මේක හරියන්නෙ නෑ කියලා.”

නමුත් පසුව මැට්ගේ මනස මෙම සිතුවිල්ලට නතු වුණා: “ගැලවුම්කරුවාණන් ජීවමානයි. අපිට පවුලක් ලෙස සිටීමට උන්වහන්සේගේ ශුද්ධ ගෘහයට වඩා වෙන කිසිම තැනක් නෑ.”

රූපය

ජොන්සන් පවුල

මැට්, මැඩී, රූබි, ක්ලෙයාර් සහ ජූන්, සාරා විසින් ඔවුන් සඳහා සැලසුම් කර තිබූ සහභාගි වීම සඳහා දේවමාළිගාවට ගියා. ඔහුගේ කම්මුල් දිගේ කඳුළු ගලමින් තිබියදී, මැට් තම දියණියන් සමඟ බව්තීස්මයන් ඉටු කළා. සාරා සමඟ ඔවුන්ගේ ආදරය සහ සදාකාලික බැඳීම ඔවුන්ට ගැඹුරින් දැනුණු අතර, ගැලවුම්කරුවාණන්ගේ අතිමහත් ආදරය සහ සැනසිලිදායක සාමය ඔවුන්ට දැනුණා. මැට් මුදු මොළොක් ලෙස මෙසේ බෙදාගත්තා, “මට ගැඹුරු ශෝකයක් සහ දුකක් දැනුනත්, මම මගේ පියාණන්වහන්සේගේ ගැලවීමේ අපූරු සැලැස්ම දැනගෙන ප්‍රීතියෙන් කෑගසනවා.”

මෙම පාස්කු සමයේදී, ගැලවුම්කරුවාණන්ගේ අසමසම වන්දිගෙවීමේ පූජාව සහ උන්වහන්සේගේ මහිමාන්විත මරණයෙන් නැවත නැගිටීම පිළිබඳ සම්පූර්ණ හා නිරපේක්ෂ සත්‍යය ගැන මම සාක්ෂි දරනවා. ඔබගේ මනස ස්ථිරව හා සදාකාලිකවම යේසුස් ක්‍රිස්තුස්වහන්සේගේ සිතුවිල්ල මත පවතින විට, සහ ඔබ ඔබගේ ජීවිතය වඩාත් සම්පූර්ණයෙන් ගැලවුම්කරුවාණන් වෙත යොමු කරන විට, උන්වහන්සේගේ බලාපොරොත්තුව, උන්වහන්සේගේ සාමය සහ උන්වහන්සේගේ ප්‍රේමය ඔබට දැනෙනු ඇතැයි මම ඔබට පොරොන්දු වෙනවා. යේසුස් ක්‍රිස්තුස්වහන්සේගේ නාමයෙන්, ආමෙන්.