“තවද නුඹ මා තුළත්, මා නුඹ තුළත් වාසය කරන්නෙහිය; එමනිසා මා සමඟ ගමන් කරපන්න”

ස්වාමීන් වන යේසුස් ක්‍රිස්තුස්වහන්සේ අප සෑම කෙනෙකුටම උන්වහන්සේ තුළ වාසය කිරීමට ආරාධනා කරනවා.⁵ නමුත් අපි ඇත්තටම එසේ ඉගෙන ගෙන උන්වහන්සේ තුළ වාසය කරන්නේ කොහොමද?

වාසය කිරීම යන වචනයෙන් අදහස් කරන්නේ ස්ථිරව හෝ ස්ථාවරව සිටීම සහ යටත් නොවී විඳදරාගැනීමයි. වැඩිහිටි ජෙෆ්‍රි ආර්. හොලන්ඩ් ක්‍රියාවක් ලෙස “වාසය කරනවා” යන්නෙන් අදහස් වන්නේ කුමක්ද කියා පැහැදිලි කළා, “‘නැවතී සිටීමට—නමුත් සදහටම නැවතී සිටීමට.’ ලොව සිටින සියලු දෙනාටම ශුභාරංචියේ පණිවිඩය එයයි. එන්න, නමුත් රැඳී සිටීමට එන්න. විශ්වාසයෙන් සහ විඳදරාගැනීමෙන් එන්න. ඔබ උදෙසාත්, ඔබව අනුගමනය කරන සියලු පරම්පරාවන් උදෙසාත් ස්ථිරවම එන්න.”⁶ මේ අනුව, යහපත් සහ අයහපත් යන කාලවල් දෙකේදීම, ගැලවුම්කරුවාණන් තුළ සහ උන්වහන්සේගේ ශුද්ධ වූ අරමුණු කෙරෙහි අපගේ භක්තිය තුළ අපි ස්ථිරව සිටින නිසා අපි ක්‍රිස්තුස්වහන්සේ තුළ වාසය කරනවා.⁷

නැවත පිහිටුවන ලද ශුභාරංචියේ ගිවිසුම් සහ නියෝග හරහා උන්වහන්සේගේ වියගහ⁸ අප මතට ගැනීමට අපගේ ලෞකික තෝරාගැනීමේ නිදහස ක්‍රියාත්මක කිරීමෙන් අපි ස්වාමින්වහන්සේ තුළ වාසය කරන්නට පටන් ගන්නවා. අපට අපගේ ස්වර්ගීය පියාණන්වහන්සේ සහ උන්වහන්සේගේ මරණයෙන් නැවත නැගිටි සහ ජීවමාන පුත්‍රයාණන් සමඟ ඇති ගිවිසුම් සම්බන්ධය යනු ඉදිරිදර්ශනයේ, බලාපොරොත්තුවේ, බලයේ, සාමයේ සහ කල්පවත්නා ප්‍රීතියේ උත්තරීතර මූලාශ්‍රයයි; එය අපගේ ජීවිත ගොඩනගා ගත යුතු ශක්තිමත්ම පදනමයි⁹.

පියාණන්වහන්සේ සහ පුත්‍රයාණන්වහන්සේ සමඟ අපගේ පුද්ගලික ගිවිසුම් බැඳීම ශක්තිමත් කිරීමට අපි අඛණ්ඩව උත්සාහ කිරීමෙන් අපි උන්වහන්සේ තුළ වාසය කරනවා. නිදසුනක් වශයෙන්, සදාකාලික පියාණන්වහන්සේගේ ආදරණීය පුත්‍රයාණන්ගේ නාමයෙන් අපි උන්වහන්සේට අවංකව යාච්ඤා කිරීම මගින් උන්වහන්සේලා සමඟ අපගේ ගිවිසුම් සම්බන්ධය ගැඹුරු කර ශක්තිමත් කරනවා.

ක්‍රිස්තුස්වහන්සේගේ වචන සැබවින්ම භුක්ති විඳීම තුළින් අපි උන්වහන්සේ තුළ වාසය කරනවා. ගැලවුම්කරුවාණන්ගේ දහම, ගිවිසුමේ දරුවන් ලෙස අපව උන්වහන්සේ වෙතට සමීප කරන¹⁰ අතර අප කළ යුතු සියල්ල එය අපට කියනවා.¹¹

සක්‍රමේන්තු නියෝගයට සහභාගී වීමට උනන්දුවෙන් යුතුව සූදානම් වීමෙන්, අපගේ ගිවිසුම් පොරොන්දු සමාලෝචනය කිරීමෙන් සහ ආවර්ජනය කිරීමෙන් සහ අවංකව පසුතැවිලි වීම මගින් අපි උන්වහන්සේ තුළ වාසය කරනවා. සක්‍රමේන්තුවට සුදුසු ලෙස සහභාගී වීම, අපි යේසුස් ක්‍රිස්තුස්වහන්සේගේ නාමය අප මත ගැනීමට කැමැත්තෙන් සිටින බවත්, එම පූජනීය නියෝගයට සහභාගී වීමට අවශ්‍ය කෙටි කාලයෙන් පසු “සැමවිටම උන්වහන්සේව සිහි කිරීමට”¹² උත්සාහ කරන බවටත්, අපි දෙවියන්වහන්සේට ලබාදෙන සාක්ෂියක්.

ඒවගේම අපි උන්වහන්සේගේ දරුවන්ට සේවය කරන විට සහ අපගේ සහෝදර සහෝදරියන්ට දේවසේවය කරන විට එමගින් දෙවියන්වහන්සේට සේවය කිරීමෙන් අපි උන්වහන්සේ තුළ වාසය කරනවා.¹³

ගැලවුම්කරුවාණන් මෙසේ කිව්වා, “මම මාගේ පියාණන්වහන්සේගේ ආඥා රක්ෂාකොට උන්වහන්සේගේ ප්‍රේමයෙහි යම්සේ පවතිම්ද, එසේම ඔබ සැමත් මාගේ ආඥා රක්ෂාකරවුනම් මාගේ ප්‍රේමයෙහි පවතින්නහුය.”¹⁴

අපට ගැලවුම්කරුවාණන් තුළ රැඳී සිටිය හැකි බොහෝ ආකාරවලින් කිහිපයක් මම කෙටියෙන් විස්තර කර තිබෙනවා. ඒවගේම උන්වහන්සේගේ ගෝලයන් වශයෙන් ඉල්ලා සිටීමටත්, සෙවීමටත්, තට්ටු කිරීමටත්, අප කරන සෑම දෙයකදීම ක්‍රිස්තුස්වහන්සේව අපගේ ජීවිතයේ කේන්ද්‍රස්ථානය බවට පත් කළ හැකි වෙනත් අර්ථවත් ක්‍රම ශුද්ධාත්මයාණන්ගේ බලයෙන් ඉගෙන ගැනීමටත් මම දැන් අපි සෑම කෙනෙකුටම ආරාධනා කරනවා.

ගැලවුම්කරුවාණන් උන්වහන්සේගේ අනුගාමිකයන්ට දෙන පොරොන්දුව දෙයාකාරයි: අපි උන්වහන්සේ තුළ වාසය කරන්නේ නම්, උන්වහන්සේ අප තුළ වාසය කරනවා. නමුත් ඇත්ත වශයෙන්ම ක්‍රිස්තුස්වහන්සේට ඔබ සහ මා තුළ තනි තනිව සහ පෞද්ගලිකව රැඳී සිටින්න පුළුවන්ද? මෙම ප්‍රශ්නයට පිළිතුර තමයි, ඇත්තෙන්ම ඔව්!

ඔවුන්ගේ පීඩා නිසා නිහතමානී වීමට සලස්වා තිබූ දුප්පතුන්ට ඇල්මාගේ ඉගැන්වීම් සහ සාක්ෂි දැරීම් අපි මොර්මොන්ගේ පොතේ ඉගෙන ගන්නවා. ඔහුගේ උපදෙස් තුළ, ඔහු වචනය රෝපණය කළ යුතු හා පෝෂණය කළ යුතු බීජයකට සමාන කළ අතර, ඔහු “වචනය” විස්තර කළේ යේසුස් ක්‍රිස්තුස්වහන්සේගේ ජීවිතය, ධර්මදූතය සහ වන්දිගෙවීමටයි.

ඇල්මා මෙසේ කිව්වා, “දෙවියන්වහන්සේගේ පුත්‍රයාණන් තුළ විශ්වාස කිරීමට පටන් ගන්න, එනම් උන්වහන්සේ තමන්වහන්සේගේ ජනතාව මුදා ගැනීමට පැමිණෙන සේක, තවද එනම් ඔවුන්ගේ පාපයන් වෙනුවෙන් වන්දිගෙවීම සඳහා උන්වහන්සේ වේදනා විඳ මරණයට පත්වන සේක, එය මරණයෙන් නැවත නැගිටීම ගෙන එන්නේය, අවසාන සහ විනිශ්චය දවසේදී ඔවුන්ගේ ක්‍රියාවන් අනුව විනිශ්චය කරනු ලැබීමට සියලු මනුෂ්‍යයෝ උන්වහන්සේ ඉදිරියේ සිට ගන්නෝය.”¹⁵

ඇල්මා විසින් “වචනය” පිළිබඳ මෙම විස්තරය ලබා දීමෙන්, ඉන්පසු ඔහු හඳුනා ගන්නා ආශ්වාදජනක සම්බන්ධතාවය කරුණාකර සලකා බලන්න.

“තවද දැන් … නුඹලා මෙම වචන නුඹලාගේ හදවත් වල පැල කරනවාට මම ආශා වන්නෙමි, තවද එය වැඩි වීමට පටන් ගත් විට එසේම නුඹලාගේ ඇදහිල්ලෙන් පෝෂණය වන්නේය. තවද බලන්න, එය ගසක් බවට පත්වන්නේය, සදාකාල ජීවිතය වෙතට නුඹ තුළ පැන නගින්නේය. තවද එවිට එනම් නුඹගේ බර සැහැල්ලු වීමට දෙවියන්වහන්සේ උන්වහන්සේගේ පුත්‍රයාණන්ගේ ප්‍රීතිය තුළින් අවසර දෙන සේක්වා. තවද මේ සියල්ල වුවත් කළ හැක්කේ, නුඹලා කැමති නම් පමණි.”¹⁶

අපගේ හදවත් තුළ රෝපණය කිරීමට අප උත්සාහ කළ යුතු බීජය තමයි ඒ වචනය—යේසුස් ක්‍රිස්තුස්වහන්සේගේ ජීවිතය, ධර්මදූතය සහ දහම. ඒවගේම ඒ වචනය ඇදහිල්ලෙන් පෝෂණය වන විට එය සදාකාල ජීවනය දක්වා අප තුළ හටගන්නා ගසක් බවට පත්වෙන්න පුළුවන්.¹⁷

ලෙහිගේ දර්ශනයේ එම ගසේ සංකේතය කුමක්ද? මෙම ගස යේසුස් ක්‍රිස්තුස්වහන්සේගේ නිරූපණයක් ලෙස සලකන්න පුළුවන්.¹⁸

මගේ ආදරණීය සහෝදර සහෝදරියනි, එම වචනය අප තුළ තිබෙනවාද? ගැලවුම්කරුවාණන්ගේ ශුභාරංචියේ සත්‍යයන් අපගේ හදවත් වල මාංසමය වගු වල ලියා තිබෙනවාද?¹⁹ අපි උන්වහන්සේ වෙතට පැමිණ ක්‍රම-ක්‍රමයෙන් උන්වහන්සේ හා සමාන වෙමින් සිටිනවාද? ක්‍රිස්තුස්වහන්සේගේ ගස අප තුළ වැඩෙනවාද? අපි උන්වහන්සේ තුළ “නව [ජීවින්]”²⁰ වීමට උත්සාහ කරනවාද?²¹

සමහරවිට මෙම ආශ්චර්යමත් විභවය ඇල්මාව මෙසේ ඇසීමට පොළඹවන්නට ඇති: “නුඹලා ආත්මිකව දෙවියන්වහන්සේගෙන් ඉපදී සිටින්නෙහු ද? නුඹලා උන්වහන්සේගේ ස්වරූපය නුඹලාගේ මුහුණේ ලබා ඇත්තෙහු ද? මෙම බලවත් වෙනස නුඹලා නුඹලාගේ හදවත් තුළ අත්දැක ඇත්තෙහු ද?”²²

“තවද නුඹ මා තුළත්, මා නුඹ තුළත් වාසය කරන්නෙහිය” යන ස්වාමින්වහන්සේ ඒනොක්ට දුන් උපදෙස අප සැමවිටම මතක තබා ගත යුතුයි.²³ ඒවගේම, අප තුළ වාසය කරන බවට වූ ගැලවුම්කරුවාණන්ගේ පොරොන්දුව සත්‍ය බවත්, එය නැවත පිහිටුවන ලද උන්වහන්සේගේ සභාවේ ගිවිසුම් රකින සෑම සාමාජිකයෙකුටම ලබා ගත හැකි බවත් මම සාක්ෂි දරනවා.

ප්‍රේරිත පාවුල් ස්වාමින්වහන්සේව පිළිගත් ඇදහිලිවන්තයන්ට මෙසේ අවවාද කළා: “උන්වහන්සේ තුළ ගමන් කරපන්න.”²⁴

ගැලවුම්කරුවාණන් තුළ සහ උන්වහන්සේ සමඟ ගමන් කිරීම අනුගාමිකත්වයේ වැදගත් පැති දෙකක් ඉස්මතු කරනවා: (1) දෙවියන්වහන්සේගේ ආඥාවලට කීකරු වීම, සහ (2) අපව පියාණන්වහන්සේට සහ පුත්‍රයාණන්වහන්සේට සම්බන්ධ කරන පරිශුද්ධ ගිවිසුම් සිහි කිරීම සහ ඒවාට ගෞරව කිරීම.

යොහන් මෙසේ ප්‍රකාශ කළා:

“අපි උන්වහන්සේගේ ආඥා පවත්වමු නම්, අපි උන්වහන්සේ අඳුනන බව එයින් දනිමුව.

“උන්වහන්සේ අඳුනමියි කියා උන්වහන්සේගේ ආඥාවන් නොපවත්වන තැනැත්තේ බොරුකාරයෙක්ය, සැබෑවද ඔහු තුළ නැත.

“නුමුත් යමෙක් උන්වහන්සේගේ වචනය පවත්වන්නේද, ඔහු තුළ සැබෑවටම දෙවියන්වහන්සේගේ ප්‍රේමය සම්පූර්ණ වී තිබේ. අපි උන්වහන්සේ තුළ සිටින බව එයින් දනිමුව.

“උන්වහන්සේ තුළ පවතිමියි කියන තැනැත්තා විසින් උන්වහන්සේ හැසුරුණාක්මෙන් හැසිරිය යුතුය, උන්වහන්සේ ගමන් කළ ආකාරයටම ගමන් කළ යුතු වන්නේය.”²⁵

“එන්න, මා අනුගමනය කරන්න”²⁶ සහ “මා සමඟ ඇවිද යන්න”²⁷ යනුවෙන් යේසුස්වහන්සේ අප සෑම කෙනෙකුටම ආරාධනා කරනවා.

අප ඇදහිල්ලෙන් ඉදිරියට යන විට සහ ස්වාමින්වහන්සේගේ ආත්මයේ²⁸ නිහතමානිකම තුළ ගමන් කරන විට, අපට බලය, මගපෙන්වීම, ආරක්ෂාව සහ සාමයෙන් ආශිර්වාද ලැබෙන බව මම සාක්ෂි දරනවා.

සියලුම ජීවමාන ප්‍රාණයන්ට ස්වාමින්වහන්සේ කරන ලද ආදරණීය ආයාචනයක් ඇල්මා මෙසේ විස්තර කරනවා:

“බලන්න, උන්වහන්සේ සියලු මනුෂ්‍යයන්ට ආරාධනාවක් යවන සේක, මක්නිසාද ඔවුන් දෙසට කරුණාවේ හස්තය දිගුව ඇත්තේය, තවද උන්වහන්සේ කියන සේක: පසුතැවිලි වන්න, තවද මම නුඹව බාරගන්නෙමි.

“… මා වෙතට එන්න, තවද නුඹලා ජීවනයේ ගසෙහි ඵල භුක්ති විඳින්නෙහුය; එසේය නුඹලා ජීවනයේ ආහාරද, ජීවනයේ ජලයද නොමිලේ කන්නාහුය, බොන්නාහුය.”²⁹

ගැලවුම්කරුවාණන්ගේ ආයාචනයේ පරම විස්තීර්ණ බව මම අවධාරණය කරන්නම්. දැන් ජීවත් වන, මෙතෙක් ජීවත් වූ, සහ ඉදිරියට පොළොවේ ජීවත් වන සෑම පුද්ගලයෙකුටම උන්වහන්සේගේ කරුණාවෙන් හා දයාවෙන් ආශිර්වාද කිරීමට උන්වහන්සේ අපේක්ෂා කරනවා.

සමහර සභා සාමාජිකයන් විසින් මෙම දහම, මූලධර්ම, සහ මෙම සම්මන්ත්‍රණ මධ්‍යස්ථානයේ දේශනා කූඩුව මත සහ ලෝකය වටා දේශීය සභාවන් තුළ නැවත නැවතත් ප්‍රකාශ කෙරෙන සාක්ෂි සත්‍ය බව පිළිගන්නවා—ඒත් තවමත් මෙම සදාකාලික සත්‍යයන් ඔවුන්ගේ ජීවිතවලට සහ ඔවුන්ගේ තත්වයන්ට විශේෂයෙන් අදාළ වන බව විශ්වාස කිරීමට අරගල කරන්න පුළුවන්. ඔවුන් අවංකව විශ්වාස කරන අතර වගකීමෙන් යුතුව සේවය කරනවා, නමුත් පියාණන්වහන්සේ සහ උන්වහන්සේගේ මිදුම්කාර පුත්‍රයාණන්වහන්සේ සමඟ ඔවුන්ගේ ගිවිසුම් සම්බන්ධය තවමත් ඔවුන්ගේ ජීවිතවල ජීවමාන සහ වෙනස් කරවන යථාර්ථයක් බවට පත්ව නෑ.

ශුද්ධාත්මයාණන්ගේ බලයෙන්, මා විස්තර කිරීමට උත්සාහ කර ඇති ශුභාරංචි සත්‍යයන් ඔබ වෙනුවෙන් බව—තනි තනි වශයෙන් සහ පුද්ගලිකව ඔබ වෙනුවෙන් බව දැනගැනීමට සහ එලෙස දැනීමට හැකි වන බව මම පොරොන්දු වෙනවා.

යේසුස් ක්‍රිස්තුස්වහන්සේ අපගේ ප්‍රේමණීය සහ ජීවමාන ගැලවුම්කරුවාණන් සහ මිදුම්කරුවාණන් බව මම ප්‍රීතියෙන් යුතුව සාක්ෂි දරනවා. අපි උන්වහන්සේ තුළ වාසය කරන්නේ නම්, උන්වහන්සේ අප තුළ වාසය කරයි.³⁰ ඒවගේම අපි උන්වහන්සේ තුළ සහ උන්වහන්සේ සමඟ ගමන් කරන විට, බොහෝ ඵල ගෙන ඒමට අපට ආශිර්වාද ලැබෙයි. මම සාක්ෂි දරන්නේ යේසුස් ක්‍රිස්තුස්වහන්සේගේ ශුද්ධ වූ නාමයෙන්, ආමෙන්.