Hisitōlia ʻo e Siasí
Kau Taní

“Kau Taní,” Ngaahi Tefito ʻi he Hisitōlia ʻo e Siasí

“Kau Taní”

Kau Taní

ʻI he 1838, naʻe hola ʻa Siosefa Sāmita mo e kāingalotu kehe ʻo e Siasí mei he kau fakatanga ʻi ʻOhaioó ʻo hiki ki Mīsuli, ʻa ia ne ʻosi fokotuʻu ai ʻe he Kāingalotu ʻi he Ngaahi ʻAho Kimui ní ha ngaahi nofoʻanga. Naʻe tui ʻa Siosefa Sāmita naʻe hanga ʻe he ngaahi fakafepaki mei he niʻihi ne angatuʻu mo fakafili ki he Siasí ʻo holoki pea iku pē ʻo fakaʻauha honau kolo ʻi Ketilani, ʻOhaioó. ʻI he faʻahitaʻu māfana ʻo e 1838, naʻe mamata ʻa e kau taki ʻo e Siasí ki he fakalalahi ʻa e faʻahinga fakamanamana tatau ki honau kolo ʻi Mīsulí.

ʻI he nofoʻanga ʻo e Kāingalotú ʻi Hihifo Mamaʻó, naʻe fokotuʻu ʻe ha niʻihi ʻo e Kāingalotu ʻo e Siasí ha kulupu naʻe ʻiloa ko e “Ngaahi ʻOfefine ʻo Saioné” pe ko e “Kau Taní,” ʻa ia naʻa nau taumuʻa ke maluʻi e koló mei he niʻihi ne angatuʻu ki he Siasí kae pehē ki he kakai Mīsulí. Naʻe fakailifiaʻi ʻe he kau Taní ʻa e niʻihi ne angatuʻu ki he Siasí mo e kakai Mīsulí; hangē ko ʻení, naʻa nau fakatokanga ki he kau angatuʻu ʻe niʻihi ke nau mavahe mei he Vahefonua Kolotiuelá. Lolotonga e faʻahitaʻu fakatōlau ʻo e 1838, ʻi he fakaʻau ke fakalalahi e fekeʻikeʻi ʻi he Tau ʻa e Māmongá mo Mīsulí, naʻe hoko ʻa e kau Taní ko ha konga ʻo e kulupu fakakautau naʻe tokolahi taha aí ko e Kāingalotu ʻo e Siasí. Naʻe tau ʻa e ngaahi kulupu fakakautau ko ʻení mo e kau Mīsulí, pea iku ai ki he tokolahi ʻa e kau maté ʻi he ongo faʻahí fakatouʻosi. ʻIkai ngata aí, naʻe hanga ʻe he kau fakaaoao ʻa e Māmongá, kau ai ha kau Tani tokolahi, ʻo ʻohofi ha ongo kolo ʻe ua naʻe pehē ko e uhouhonga ia ʻo e kau fakafepaki ki he Māmongá, pea nau tutu ai e tukui ʻapí mo kaihaʻasi ha ʻū koloa.1 Neongo ne fakatefito e ʻoho mo e tāmate ʻa e kau fakafepaki ki he Māmongá ki he Kāingalotu ne ʻikai ke nau kau ki ha kulupú, ka naʻe meimei fakataumuʻa ʻa e kau Taní ia ke faʻao pe fakaʻauha ʻa e koloa ne nau manavasiʻi ʻe fakaʻaongaʻi ʻe honau ngaahi filí.2

ʻOku faʻa pehē ʻe he kau faihisitōliá naʻe loto lelei pē ʻa Siosefa Sāmita ki he kau Taní kae mahalo naʻe ʻikai fakamatalaʻi kiate ia ʻa ʻenau ngaahi palaní pea ʻoku ngalingali naʻe ʻikai ke ne fakangofua ʻenau ngaahi angafaí. Naʻe māhina pē ʻe nima ʻa e ngāue ʻa e kau Taní, mei Sune ki ʻOkatopa ʻo e 1838, pea naʻe toki mālohi pē ia ʻi ha vahefonua ʻe ua ʻi he fakatokelau-hihifo ʻo Mīsulí. Neongo ne taimi nounou pē e ngāue ʻa e kau Taní, ka naʻe hoko ia ko ha talatupuʻa tuʻuloa fekauʻaki mo ha kautaha fufū ʻa e kau fakaaoao ʻa e Māmongá.

Ngaahi Tefito Fekauʻakí: Mormon-Missouri War of 1838; Tuʻutuʻuni ke Fakaʻauhá; Fakapō Fakatokolahi ʻi he Fahiʻanga Papa Hauní

Maʻuʻanga Fakamatalá

  1. Alexander L. Baugh, A Call to Arms: The 1838 Mormon Defense of Northern Missouri (Provo, Utah: Joseph Fielding Smith Institute for Latter-day Saint History and BYU Press, 2000), 36–43.

  2. Historical Introduction to “Part 2: 8 July–29 October 1838,” in Mark Ashurst-McGee, David W. Grua, Elizabeth A. Kuehn, Brenden W. Rensink, and Alexander L. Baugh, eds., Documents, Volume 6: February 1838–August 1839. Vol. 6 of the Documents series of The Joseph Smith Papers, edited by Ronald K. Esplin, Matthew J. Grow, and Matthew C. Godfrey (Salt Lake City: Church Historian’s Press, 2017), 169–75. Naʻe fuofua ui ʻa e kautahá ko e Sosaieti ʻo e ʻOfefine ʻo Saioné. ʻOku fakatou fekauʻaki ʻa e ongo hingoá mo ha potufolofola ʻi he Tohi Tapú. Vakai, Maika 4:13 mo e Fakamaau 18.