“Siosefa Sāmita mo e Mali Tokolahí,” Ngaahi Tefito ʻi he Hisitōlia ʻo e Siasí
“Siosefa Sāmita mo e Mali Tokolahí”
Siosefa Sāmita mo e Mali Tokolahí
ʻOku tui e Kāingalotu ʻo e Siasí ko e mali tautau toko tahá—ʻa e mali ʻi he vahaʻa ʻo ha tangata ʻe taha mo ha fefine ʻe tahá—ko e fono tuʻu pau ia ʻa e ʻEikí.1 Naʻe fekau ʻe he ʻEikí ki ha niʻihi ʻo Hono kakaí ʻi he kuonga fakatohitapú ke nau fakahoko e mali tokolahí—ko e mali ʻa ha tangata ʻe toko taha ki ha kau fefine tokolahi.2 Naʻe maʻu foki ʻe ha niʻihi ʻo e kāingalotu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi he kuonga muʻá ʻa e fekau ko ʻení ʻo fakafou ʻi he kau palōfita ʻa e ʻOtuá, pea ne nau talangofua ki ai.
Hili hono maʻu ʻe Siosefa Sāmita ha fakahā naʻe fekauʻi ai ke ne fakahoko ʻa e mali tokolahí, naʻá ne mali mo ha ngaahi uaifi tokolahi pea naʻá ne fakahā ia ki hono ngaahi kaungāngāue ofí. Naʻe kau ʻa e tefitoʻi moʻoni ko ʻení ʻi he ngaahi konga faingataʻa taha ʻo hono Toe Fakafoki Mai ʻo e Siasí—kia Siosefa pea mo e kāingalotu kehe ʻo e Siasí. Naʻe siviʻi ʻe he mali tokolahí ʻa e tuí mo fakatupu ʻa e fakakikihí mo e fakafepakí. Ko ha Kāingalotu tokosiʻi pē ʻo e Siasí naʻa nau ʻuluaki tali ʻa hono toe fakafoki mai ʻo ha tōʻonga fakatohitapu naʻe matuʻaki fehangahangai mo ʻenau ongó. Ka naʻe toki fakamoʻoni ʻe ha tokolahi kimui ange ki he mālohi ʻo e ngaahi aʻusia fakalaumālie ne tokoniʻi kinautolu ke nau ikunaʻi ʻenau veiveiuá pea nau maʻu ai ha loto-toʻa ke tali ʻa e angafai ko ʻení.
ʻOku ʻikai lahi ha fakamatala fakaikiiki ki hono fakahoko ʻo e mali tokolahí ʻi he kuonga muʻá, he ko e tokolahi ʻo kinautolu ne kau ki aí naʻe kole ke ʻoua naʻa fakahā holo ʻenau angafaí. ʻOku manifi leva ʻa e lekooti fakahisitōlia ki he mali tokolahi ʻi he kuonga muʻá: ʻoku siʻisiʻi ha ngaahi lekooti ʻi he taimi ko iá te ne ʻomi ha fakaikiiki, pea ʻoku ʻikai ke faʻa falalaʻanga ʻa e ngaahi fakalaulauloto kimui aí.ʻOku toe fakamatala ʻe he Kāingalotú ha ngaahi talanoa mahuʻinga ʻoku felāveʻi mo hono fakahoko ʻo e mali tokolahí ʻe Siosefa Sāmita mo e Kāingalotu kimuʻá. Ki ha fakamatala lahi ange kau ki he mali tokolahi ʻi he kuonga muʻá, vakai ki he “Plural Marriage in The Church of Jesus Christ of Latter-day Saints,” Gospel Topics Essays, topics.lds.org.
Ngaahi Tefito Fekauʻakí: Joseph Smith Jr. [Siosefa Sāmita ko e Siʻí], Emma Hale Smith [ʻEma Heili Sāmita], Fanny Alger [Fane ʻAlisa], Nauvoo Expositor