Sila

ʻI he talangofua ʻa Siosefa Sāmita ki he ngaahi fakahā naʻá ne maʻú, naʻá ne fakafeʻiloaki ai ʻa e ngaahi akonaki mo e ouau foʻou ʻi Nāvū, ʻIlinoisi, ʻo fakalahi ai e mahino ʻa e Kāingalotú ki he silá. Naʻá ne akoʻi ko e “laumālie mo e mālohi ʻo ʻIlaisiaá” ʻoku kau ai ʻa e mālohi ke “fokotuʻu ʻa e ngaahi sila ʻo e Lakanga Taulaʻeiki Faka-Melekisētekí ʻi he fale ʻo ʻIsilelí.” Naʻá ne toe akoʻi foki kuo fakamafaiʻi ia ke fakaʻaongaʻi ʻa e mālohi faisila ko ʻení ke fakafofongaʻi ʻa e niʻihi naʻe ʻofa aí mo e Kāingalotu kotoa pē ʻo e Siasí ʻo fakafou ʻi he ngaahi ouau ʻo e temipalé.⁴

Naʻe kamata ʻa e ngaahi lave ko ʻeni ki he mālohi ʻa ʻIlaisiā ke faisilá mei he mata meʻa-hā-mai ʻa Siosefa Sāmita mo ʻŌliva Kautele kia ʻIlaisiā ʻi he 1836 ʻi he temipale Ketilaní. Neongo naʻe ʻikai lea ʻaki ʻe Siosefa ʻa e aʻusia ko iá ʻi he kakaí, ka ʻoku lekooti ʻi he tohinoa ʻa Siosefá ʻa e fakamatala ki he haʻu ʻa ʻIlaisiā ke “liliu ʻa e loto ʻo e ngaahi Tamaí ki he fānaú, pea mo e fānaú ki he ngaahi tamaí.” Naʻe fakahā ʻe he palōfita ʻi he kuonga muʻá kia Siosefa ʻo pehē, “ʻOku tuku ki hoʻo nimá ʻa e ngaahi Kī ʻo e kuonga ko ʻení.”⁵

Ko e taimi naʻe kamata ke fakafeʻiloaki ai ʻe Siosefa Sāmita ʻa e ngaahi ouau fakatemipalé ʻi Nāvuú, naʻá ne lea kau ki honau mālohi ke haʻi, pe silaʻi fakataha e kakai ʻi he ngaahi toʻu tangatá. ʻI he ngaahi tohi ʻa Siosefa ki he Siasí ne kau ai e ngaahi akonaki fakalaumālie fekauʻaki mo e papitaiso maʻá e kau pekiá, naʻá ne lave ai ki he papitaiso fakafofongá ko ha ouau naʻá ne fokotuʻu ha “fehokotakiʻanga mālohi” ʻi he ngaahi toʻu tangatá ʻaki ʻene fakaaʻu ʻa e fakamoʻuí ki he kau pekiá. Naʻá ne toe fakamatala ʻo pehē, naʻe maʻu ʻe he ouaú ha “mālohi ke silaʻi mo haʻi.”⁶ Ko e taimi ne fou ai e Kāingalotú ʻi he ngaahi vai ʻo e papitaisó maʻa honau fāmili kuo pekiá, naʻa nau haʻi fakataha e ngaahi toʻu tangatá ʻi loto ʻi he fāmili fuakava ʻoku toe lahi ange.

ʻI ha fakahā kia Siosefa naʻe fuofua lekooti ʻi he 1843, naʻe fakamatalaʻi ai ʻa e ouau sila ʻo e malí. Naʻe folofola ʻe he ʻEikí ʻo pehē, “Ko e ngaahi fuakava, ngaahi aleapau, ngaahi palōmesi, ngaahi fatongia, ngaahi fakapapau, ngaahi lea fakapapau, ngaahi ngāue, ngaahi fetuʻutaki, ngaahi kautaha, pe ko e ngaahi ʻamanaki kotoa pē, ʻa ia ʻoku ʻikai ke fai mo fakahoko mo fakamaʻu ia ʻaki ʻa e Laumālie Māʻoniʻoni ʻo e talaʻofá, ʻo ia ʻa ia kuo paní … ʻoku ʻikai ke ʻi ai hano ʻaonga, pe ivi, pe mālohi ʻi he toetuʻú pe hili ʻa e toetuʻu mei he maté.” ʻE lava ʻe he mālohi faisilá ʻo haʻi ʻa e ngaahi nofo-malí ke taʻengata, pea ʻe toki lava pē ke “fakafou ʻi heʻeku paní” ʻa hono fakahoko ʻa e ngaahi ouau silá, ko e ʻuhinga ki he Palōfita ko Siosefa Sāmitá.⁷ Naʻe pehē ʻe he fakahaá “he ʻikai ʻaupito ka ko ha toko taha pē ʻi he māmaní” te ne maʻu ʻa e ngaahi kī ki he mālohi ko ʻení. Ko ia, kuo maʻu ʻe he niʻihi ne nau fetongi ʻa Siosefa Sāmita ʻi he lakanga ko e Palesiteni ʻo e Siasí ʻa e ngaahi kī mo e mafai ke puleʻi ʻa hono fakahoko ʻo e ngaahi ouau silá.

Hili ha meimei māhina ʻe taha mei hono fakahā ʻo e ngaahi sila ki he nofo-malí, naʻe akoʻi ʻe Siosefa ʻe lava ʻe he mālohi tatau pē ko ʻení ʻo silaʻi ʻa e fānaú ki heʻenau mātuʻá. Naʻá ne akoʻi ʻo pehē, “ʻI he taimi ʻoku silaʻi ai ha tamai mo ha faʻē, ʻokú ne maluʻi ai hona hakó ke ʻoua naʻa nau mole, ka ʻe fakahaofi kinautolu ʻe he angamāʻoniʻoni ʻo e fuakava ʻenau tamaí mo e faʻeé.”⁸ Naʻe fakapapauʻi ʻe Pilikihami ʻIongi naʻe fekauʻi ia ʻe Siosefa ke ne fakahoko ʻa e sila ko ʻení ʻi he taimi pē ʻe maau ai ʻa e Temipale Nāvuú.⁹

Hili e pekia ʻa Siosefa Sāmitá, naʻe fakaʻosi ʻe he Kāingalotú ʻa e Temipale Nāvuú koeʻuhí kae lava ke nau maʻu ʻa e ʻenitaumení mo silaʻi kinautolu. Naʻe fakahoko ʻe Pilikihami ʻIongi mo e Kōlomu ʻo e Kau ʻAposetolo ʻe Toko Hongofulu Mā Uá ha ngaahi ouau sila ʻe laui afe. Naʻa nau silaʻi ha ngaahi hoa-mali pea silaʻi e fānaú ki he mātuʻá ʻi he taimi naʻe silaʻi ai ʻa e mātuʻá hili hono fanauʻi ʻena fānaú. Ka ʻi he taimi ko ʻení, naʻe teʻeki silaʻi ʻa e Kāingalotu ʻo e Siasí ki heʻenau mātuʻa ne pekia ʻoku teʻeki ke nau kau ki he Siasí ʻi he moʻui ní. Ka naʻe kau ha Kāingalotu ʻe niʻihi ʻi he sila “ohí” ʻa ia naʻá ne haʻi ai kinautolu ki he Kāingalotu lalahi kehé, ʻo meimei lahi maʻu pē ki he kau taki māʻolunga ʻo e Siasí. Naʻe fakafehokotaki ʻe he ngaahi sila ko ʻení kinautolu ki he niʻihi naʻa nau ʻilo kuo nau tali ʻa e ngaahi fuakava ʻo e ongoongolelei kuo toe fakafoki maí. ʻI he taʻu ʻe 50 ne hoko maí, naʻe tupu ha ngaahi pīkinga kehekehe ʻo e ohí mei he ngaahi sila ʻi he temipalé, ʻo ne fakafehokotaki ai e ngaahi kaungāmeʻá mo e mahení ke hangē pē ha ngaahi fāmili kuo fakalahí.

Naʻe fai pehē pē ʻo aʻu ki he 1894, ko e taimi ia naʻe maʻu ai ʻe Palesiteni Uilifooti Utalafi ha fakahā ke fakangatangata ʻa e ngaahi sila ohí kae fakatefito pē ki he sila ki he nofo-malí mo e ngaahi fehokotaki he matuʻa mo e fānaú. Naʻe naʻinaʻi ʻe Palesiteni Utalafi ki he Kāingalotú ke nau fakatotoloʻi ʻenau tohi hohokó “ki he mamaʻo taha te nau lavá, pea fakamaʻu kinautolu ki heʻenau ngaahi tamaí mo ʻenau ngaahi faʻeé.” Naʻá ne tapou ki he Kāingalotú ke nau sila ki he ngaahi hoamali mo e mātuʻa kuo pekiá, ʻo aʻu ki he niʻihi ne ʻikai ke nau kau ki he Siasí, peá ne talaʻofa “ʻe tokosiʻi pē ha niʻihi he ʻikai ke nau tali ʻa e Ongoongoleleí.”¹⁰

Hili e pekia ʻa Siosefa Sāmitá, naʻe fakahoko ʻe Pilikihami ʻIongi mo e kau mēmipa ʻo e Toko Hongofulu Mā Uá ʻa e ngaahi sila ʻi he temipalé ʻi Nāvū pea kimui ange ʻi Soleiki Siti. ʻI he 1877 naʻe kole ai ʻe he palesiteni ʻo e temipale foʻou ne toki fakatapui ko e Temipale St. Siaosí, ʻa ia ko Uilifooti Utalafi, ha ngofua mei he Palesiteni ʻo e Siasí, Pilikihami ʻIongi, ke vaheʻi mo ha niʻihi kehe ke nau fakahoko ʻa e silá. Naʻe fakamafaiʻi ʻe ʻIongi ʻa Utalafi ke ne vaheʻi ʻa e tokolahi taha te ne lavá, pea naʻe ʻikai fuoloa mei ai naʻe fakahoko maʻu pē ʻe he kau faisila he temipalé ʻa e ngaahi ouau silá maʻá e kakai moʻuí mo e maté fakatouʻosi. ʻI he konga kimuʻa ʻo e senituli 20, naʻe fakaleleiʻi ai ʻe he Kau Palesitenisī ʻUluakí ʻa e ngaahi founga ki hono uiuiʻi mo vaheʻi ʻe he kau palesitenisī temipalé ʻa e kau faisilá.¹¹Naʻe kei ngāue ʻa e kau faisila ko ʻení ʻi he malumalu ʻo e mafai mo e fakahinohino ʻa e Palesiteni ʻo e Siasí.