“Ia Tumau ia te Au”

I uluai tausaga o le Ekalesia sa masani ona lipotiina mai ai e le Au Pulega Aoao a latou misiona i konafesi aoao. Ua ou iloaina o le 2004 lenei, ae le o le 1904, ae ou te fia mulimuli i lena uluai faiga ma tomanatu ai i nisi o mea matagofie o loo ma oo i ai ma Sister Holland i Amerika Latina. O le faia o lea mea ou te faamoemoe o le a outou maua ai se mea e faatatau i olaga o outou uma, i soo se mea o loo mafai ona outou ola ma auauna atu ai.

E muamua lava ou te fia faafetai atu i faifeautalai uma o e sa galulue ai i lenei galuega ofoofogia o aso e gata ai lea ua tuuina mai ia i tatou. O le faasalalauina atu o le talalelei toefuataiina o se vavega lava i soo se vaega o le upu, ma o se vaega tele o le vavega o le pitolaau taua lena i le alualu i luma o se taunuuga lea o taumafaiga a le au ta’i 19 tausaga le matutua! A o tatou vaavaai atu i o outou atalii ma afafine, o fanau tama a fanau ma fanau teine a fanau, (ma o nisi tulaga o o outou matua ma matua o matua) o galulue ma le faamaoni i Chile, ou te mafaufau ai i le fiasefulu afe o isi e pei o i latou ua matou feiloai i ai i le lalolagi atoa. O faifeautalai ua avea ma se faailoga ola o lenei Ekalesia i soo se mea e ala i le mama, atoatoa, ma fiafia, e galulue taitoalua. O i latou lava o savali muamua o le talalelei e fetaiai ma a latou tagata sailiili—ma o se savali ofoofogia lena. Ua iloa e tagata uma po o ai i latou, ae o i tatou o e ua iloa lelei i latou, e sili atu ona alolofa ia i latou.

Ou te moomoo maimau pe ana mafai ona outou feiloai i le tamaitai faifeau na valaauina e auauna atu ma i matou mai lona atunuu moni o Atenitina. O le manao e faia mea uma e mafaia ina ia faatupeina ai lana lava misiona, sa ia faatauina atu ai lana vaiolini, o lana meatotino sili ona taua ma e atonu e na o le pau lava lea o lana meatotino sa i ai. Sa na ona ia faapea mai, “O le a faamanuia a’u e le Atua i se isi vaiolini pe a uma ona ou faamanuiaina Ana fanau i le talalelei a Iesu Keriso.”

Ou te moomoo maimau pe ana mafai ona outou feiloai i le alii faifeau mai Chile o le sa nofo ese mai lona aiga i se aoga nofotumau, na mauaina se Tusi a Mamona ma amata ona faitauina i lena lava afiafi. E pei o le aafiaga na oo ia Parley P. Pratt, sa ia faitauina ma le naunau tele i ai—e aunoa ma se taofi i le po atoa. Ina ua tafa mai ata o le aso fou, sa lofituina o ia i se lagona malosi o le filemu ma se lagona fou o le faamoemoe. Sa ia fuafua e saili po o fea na sau ai lenei tusi ae po o ai na tusia ona itulau ofoofogia. Na alu o ia i se misiona i le sefulutolu masina mulimuli ane.

Ou te moomoo maimau pe ana mafai ona outou feiloai i se alii talavou o le na malaga atu ia i matou mai Polevia, na taunuu atu e aunoa ma ni lavalava e fetaui faapea ma seevae e faatoluina le lapopoa atu mo ia. Sa fai si ona matua aua e na o ia le tagata faigaluega i lona aiga ma sa umi se taimi sa ia sailia ai se tupe mo lana misiona e ala lea i le faia o se lafumoa ma faatau atu fuamoa mai lea aiga i lea aiga. Ae, i le taimi lava ua taunuu atu ai lona valaauga, ae feagai loa si ona tina ua maliu lona toalua ma se togafitiga faanatinati e aveese ai lona pitogaau. Sa tuuina atu e la matou uo talavou ia le tupe atoa sa ia teuina mo lana misiona e totogi ai le taotoga o lona tina faapea ma le tausiga ina ua maea, ona ia faaputuina mai lea ma le filemu ia lavalava ua faaaoga na ia maua mai uo ma faapea ona taunuu atu i le MTC i Santiago i le taimi na fuafuaina. E mafai ona ou faamautinoa atu ia te outou ua fetaui nei ona lavalava, ua ofi ona seevae, ma o loo saogalemu ma maloloina o ia ma lona tina, i le faaletino e faapea foi i le faaleagaga.

Ma latou te o mai, mai o outou aiga, i le lalolagi atoa. O loo aofia ai i se lisi umi o auauna maelega a le Alii ia se aofaiga faateleina o ulugalii matutua o e o loo tuuina atu se sao taua i le galuega. E maeu lo matou alolofa ma moomia ia ulugalii i soo se misiona lava a le Ekalesia! O outou na o e e mafai ona tuuese ia ato ta polo, aua le popole i le tele o tupe ua e maua, ia iloa o le a avea pea ia fanau a le lua fanau ma a oulua fanau pe a oulua foi atu—ae o e ave se misiona! Matou te folafola atu ia te outou se aafiaga sili ona maofa ai i lou olaga.

Se’i ou tuuina atu se faamatalaga i tagata ofoofogia o le Ekalesia lava latou. I le toe faatulagaina talu ai nei o se siteki maotua ma vāvā mamao, sa ou lagonaina ai uunaiga a le Alii ina ia tofia se alii i le au peresitene o le siteki, o le, sa ta’uina mai ia te au faapea e i ai sana uila vilivae ae leai se taavale. O le toatele o taitai i le Ekalesia atoa e leai ni taavale, ae ui i lea ou te lei popole e uiga i lena mea i lenei alii. I si a’u faaSipaniolo tau panupanu sa ou faia ai le faatalanoaga, ma ou faapea atu, “Hermano, no tiene un auto?” Sa na o sina ataata ma e lei atoa se sekone ae tali mai o ia, “No tengo un auto; pero, yo tengo pies, yo tengo fe.” (“E leai sa’u taavale, ae i ai o’u vae ma lo’u faatuatua.”) Ona ia fai mai lea e mafai ona ia tietie i le pasi, tietie i lana uila, po o le savali, “como los misioneros,” sa ia ataata—“e pei lava o faifeautalai.” Ma o le mea lena na te faia.

I le valu vaiaso ua tuanai sa ou faia ai se konafesi faaleitu i le motu o Chiloe, e tu i le talafatai i le ogatotonu o le itu i Saute o Chile lea e tau leai ni tagata asiasi e o atu i ai. Manatunatu i le tiutetauave sa ou lagonaina i le lauga atu i nei tagata lelei ina ua faailoa mai ia te au e faapea o se alii matua lava o loo nofo latalata i luma o le falesa sa amata ona savali mai mo le fa itula ina ia nofo i lona nofoa a o lei taina le iva, mo se sauniga sa fuafuaina faatoa amata i le sefulutasi. Fai mai o ia sa manao ina ia maua sona nofoaga lelei. Sa ou vaai atu i ona mata, ma mafaufau i taimi o lo’u olaga sa ou faaleano ai po o le matuai tuai atu lava, ma mafaufau i le fetalaiga a Iesu, “Ou te leiloa ia Isaraelu lava se faatuatua e faapea ona tele.”¹

O le Siteki o Punta Arenas Chile o le siteki sili lea ona mamao a le Ekalesia i le itu i saute i soo se vaega o lenei paneta, o ona tuaoi i le itu i saute e tau atu i le Anetatika. Soo se siteki lava e mamao atu i le itu i saute o le a tumu i penguins. Aua o le au paia i Punta Arenas e tusa ma le 4,200-maila le alu ma toe foi mai i le pasi e agai atu ai i le malumalu i Santiago. Mo se tane ma se ava, e mafai ona alu ai le tusa ma le 20 pasene o tupe maua i le tausaga mo na o le feoaiga lava ia. E na o le 50 tagata e mafai ona ofi i luga o le pasi, ae mo soo se malaga lava e tusa ma le 250 isi e o atu e faia se sauniga puupuu faatasi ma i latou i le taeao latou te malaga ese atu ai.

Sei faatali lava mo sina minute ma mafaufau po o ana fea le taimi mulimuli na e tutu ai i luga o se paka mo taavale i le savili malulu e sosoo ma le Strait o Magellan e na o le pese, ma tatalo, ma faamalosiau ia i latou o e o le a o atu i le malumalu, ma faamoemoe o le a lava au tupe teu ina ia alu atu ai i le isi taimi? E selau sefulu itula, o 70 o na itula e i ai i luga o na auala pefu ma omoomo, e lei maea e ui atu i vaomatua o Patagonia i Atenitina. E faapei se lagona e maua i luga o se pasi i le 110 itula? Ou te ta’u atu ma le faamaoni, ou te leiloa, ae ou te iloa e popole nisi o i tatou pe a tatou nonofo e sili atu ma le 110 maila mai se malumalu pe afai foi o sauniga e faia iina e sili atu ma le 110 minute e faia ai. A o matou aoaoina atu le mataupu faavae o le sefuluai i tagata e nonofo mamao ma le malumalu, tatalo ma i latou, ma fausia nisi malumalu mo au paia faapenei i saute o Chile, ae atonu o le toatele o i tatou o loo mafai ona faia ni mea e sili atu ina ia olioli soo ai ma le maofa i faamanuiaga o le malumalu a o faapea ona faateleina ia malumalu o loo tatou taulalata atu i ai.

Ma o lea ou te oo atu ai i lo’u manatu mulimuli. Aua o le Ekalesia atoa lava ia, ua tele naua mea ua o i o tatou mafaufau i le taitaiga loloto a Peresitene Gordon B. Hinckley, e aofia ai (atonu e faapitoa lava) ia le matuai faatupulaia lava o malumalu ma le fausia o malumalu. Ae peitai, o i matou o loo i luga o lenei tulaga, e foliga mai o le a patino lava ona matou manatuaina o ia mo lona naunautai ina ia faatumauina ia le toaaga o tagata liliu mai ua auai i lenei Ekalesia. E leai se perofeta o ona po nei ua sili atu ona lauga tuusa’o lenei mataupu po o le faamoemoeina foi o ni mea se tele mai ia i tatou ina ia vaai ai o tupu. Faatasi ai ma si ana pupula malie ma sona lima e tu’i ai le laulau sa i ona luma sa ia faapea atu ai i le Toasefululua i se taimi ua mavae, “Uso e, afai e uma lo’u ola ma faaiuina ia toe sauniga, a o tuua e lo’u agaga lenei lalolagi, o le a ou vaai atu taitoatasi ia te outou, ma faapea atu, ‘O a mai le tatou faatumauina o tagata liliu mai?’”

O le mataupu i le faatumauina e toe avatu ai i tatou i le galuega faafaifeautalai, e fesootai ma le ituaiga liua moni ma le loto lea o loo taumafai ia faifeautalai e aumaia faatasi ai ma se tautinoga malosi ma le naunautai o loo vaaia i tagata lelei i le Ekalesia atoa.

Na fetalai Keriso, “O au nei o le vine moni, ae … o la outou.”² “Ina tumau ia o outou ia te au, o a’u foi ia te outou. Faapei o le la e le mafai ona fua pe a na o ia, pe afai e le mau i le vine; e faapea foi outou, pe afai tou te le tumau ia te au.”³

O le “tumau ia te au” o se manatu ua malamalama ma lava lona mamalu matagofie i le gagana Igilisi i le Tusi Paia o le King James, ae o le “abide” o se upu e le o toe faaaogaina tele i le faaIgilisi. O lea sa ou mauaina ai se lagona talisapaia sili atu mo lenei apoapoaiga mai le Alii ina ua faailoa atu ia te au le faaliliuga o lenei faaupuga i se isi gagana. I le faaSipaniolo o lena lava faaupuga e tasi e taua o le “permaneced en mi.” E pei o le veape Igilisi o le “abide,” o le permanecer o lona uiga “ia tumau ai, ia nofo ai,” ae oo lava i tagata e le ni Sipaniolo e pei o au e mafai lava ona lagonaina le uiga tutusa ma le upu “permanence.” O le uiga o lenei mea o le “tumau—ae ia tumau e faavavau.” O le valaau lena a le savali o le talalelei i tagata o Chile ma tagata uma lava i le lalolagi. Ia o mai, ae ia o mai ma tumau ai. O mai ma le talitonuga ma le mausali. O mai e tumau ai, mo lo outou lelei ma le lelei o augatupulaga uma o e e tatau ona mulimuli atu ia te outou, ma o le a tatou fesoasoaniai ina ia malolosi e oo i le iuga.

“O le na te siiina i luga le isi pito o le laau ua sii ai foi i luga ma le isi itu,” na aoao mai la’u peresitene ofoofogia o le misiona i lana uluai savali ia i matou.⁴ Ma o le auala lena e tatau ona i ai pe a tatou auai i lenei Ekalesia moni ma le ola a le Atua moni ma soifua. Afai e auai se tasi i le Ekalesia a Iesu Keriso o le Au Paia o Aso e Gata Ai ua tatou folau i le Vaa Lelei o Siona ma folau atu ai i soo se mea e alu i ai seia oo lava ina taunuu i lena taunuuga e faavavau. Ia tatou nonofo i totonu o le vaa, i taimi o matagi malolosi po o le mate o se savili, i taimi o afa ma le la aua e na o le pau lena o le auala e tau atu i le nuu folafolaina. O lenei Ekalesia o le taavale lea a le Alii mo aoaoga autu taua, sauniga, feagaiga, ma ki ia e moomia i le faaeaga, ma e le mafai e se tasi ona faamaoni atoatoa i le talalelei a Iesu Keriso e aunoa ma le tauivi ina ia faamaoni i le Ekalesia, o lana faalapotopotoga lea ua faavaeina i le lalolagi. I le tautala atu i tagata fou ua liliu mai e faapea foi ia i latou ua leva ona auai, matou te folafola atu i le saunoaga faamavae mamana a Nifae: “Ua ulu atu outou i le faitotoa; … [ae] o lenei, … ona ua maua e outou lenei ala sa’o ma le lauitiiti, ou te fesili atu, po ua faia mea uma? Faauta, ou te fai atu ia te outou, e leai; … ia fetaomi atu i luma ma le faamaoni ia Keriso, … ma tumau lava e oo i le iuga, faauta, … tou te maua le ola faavavau.”⁵

Na fetalai Iesu, “Aua e le mafaia e outou ona faia o se mea e tasi pe a a’u le i ai,”⁶ ma ia tatou talitonu ia te Ia. E ao ona tatou “tumau” ia te Ia e faavavau, ia mausali, e le liliu, e faavavau. Aua ina ia fua mai o fua o le talalelei ma faamanuiaina ai o tatou olaga, e tatau ona tatou pipii atu i le Alii o Iesu Keriso, le Faaola o i tatou uma, faapea ma Lana Ekalesia lea o loo tauaveina ai Lona suafa paia. Talu ai ona o Ia o le vine o lo tatou punaoa moni lea o le malosi ma e na o le pau lea o le punaoa o le ola faavavau, o le a le gata ina tatou tumau ae o le a tatou manumalo ma faaeaina i Lona afioaga i lenei galuega paia lea o le a le toilalo ai i tatou. Ia aua lava nei o tatou toilalo pe faatoilaloina o Ia ou te tatalo atu ai i le suafa paia o Iesu Keriso, amene.