Talitonu!
Talitonu ia te outou lava. Talitonu e le tuulafoa’ia outou. Talitonu e taialaina outou i taimi uma.
I ni nai masina talu ai, sa valaaulia ai au ou te lauga i tamaitai talavou i le siteki sa ou ola a’e ai. Sa ou sagisagi fiafia ma popole i lenei avanoa. Sa ma o ma lo’u tina, ma sa ma vave taunuu. Sa faia lea sauniga i le fale sa ou lotu ai seia oo ina ou alu i le iunivesite. Ua leva ou te le i toe foi mai i ai, ma ou te le i iloaina se mea o le a tupu ina ua ou savali atu i totonu o faitotoa i le pito i luma. Sa lofituina au i mea ua ou toe manatua, ona amata ai lea ona ou tagi. Sa tilotilo mai lo’u tina ma faapea mai, “Elaine, aua le amataina le mea lena i le taimi nei.” Ae sa tatafe o’u loimata ina ua ou vaai atu i le ofisa i le pito i luga o faasitepu maamora mananaia, i le mea sa galue ai lo’u tama o se epikopo. Ina ua ou taunuu i le pito i luga o le faasitepu, sa matala le ofisa o le epikopo. Sa ou alu atu i totonu ma sa vaaia ai ua suia i se tamai potuaoga, ma sa toe lolofi mai foi lo’u manatua. Sa ou manatua le nofo mai o lo’u tama i tua o le kesi, a o ou teineitiiti, ou te nofo i le nofoa i ona luma ma totogi la’u sefuluai, ma faia foi o’u faatalanoaga ma faamanuiaga faaleperisitua a o ou teine talavou. O lo’u alofa mo lena fale, sa matua soofaatasi ma aafiaga ma lagona faaleagaga sa ou maua ai.
E tele taimi a o ou teine talavou ma te o ai ma lo’u tama epikopo i le falelotu ma ou faatalitali ai seia uma ana fonotaga po o ni faatalanoaga. Ou te faaaluina lo’u taimi e matamata solo ai. Sa ou iloaina potu uma o lena fale. O se tasi o potu ou te fiafia lava i ai, o le potu pito i luga. O se potu telē e i le pito i luga o se faasitepu tifato. O totonu sa i ai se ata o le Faaola, sa tautau i luga a’e o le magalafu. E tosina lava a’u i lena potu i taimi uma. Ou te a’ea’e i faasitepu ona ou savali lea ma le faaaloalo i totonu. Ou te nofo i se nofoa ma tilotilo i le ata o le Faaola ma ou tatalo i le Tama Faalelagi. O ni tatalo faigofie foi. Ae o taimi uma lava ou te tatalo ai, e pei ai lava e lofituina au i se lagona faapitoa, ma sa ou iloaina ai sa faafofoga mai o Ia i a’u tatalo faateineitiiti. O iina na amata ai ona ou talitonu.
Ua folafola mai e le Alii ia te i tatou a tatou “sailiili ma le filiga, ma tatalo e le aunoa, ma talitonu lava foi, … [o le a] galulue faatasi mea uma mo lo [tatou] lelei” (MFF 90:24; faamamafa faaopoopo). E le faapea la o le a atoatoa mea uma pe faapea foi o le a leai ni o tatou tofotofoga, ae o lona uiga o le a lelei mea uma pe afai tatou te “tumau e oo i le iuga.” Ua tatou maua le avanoa e “fai ai … tatou ma se faaa’oa’o i e ua faatuatua” (1 Timoteo 4:12), ma ua folafola mai e le Faaola “e mafaia mea uma lava i le faatuatua” (Mareko 9:23). O lea talitonu ia te outou lava. Talitonu e le tuulafoa’ia outou. Talitonu e taialaina outou i taimi uma.
Talitonu ia Te Outou Lava
Sa saunoa Elder David B. Haight o le Korama a Aposetolo e Toasefululua e uiga ia te outou: “Matou te talitonu ia te outou, e talitonu foi o outou uso ma tuagane ia te outou, ma o loo faamoemoe le Atua i le mea sili mai ia te outou. E tatau ona e talitonu ia te oe lava. Aua e te fiu pe a sou le vasa, aua o loo e faataatia le faavae o se galuega tele, ma o lena galuega tele o lou olaga lea” (“O Se Taimi mo Sauniuniga,” Liahona, Ian. 1992, 38).
Sa ta’u mai foi ia i tatou e Peresitene Gordon B. Hinckley: “Ou te talitonu ia te a’u lava. E le o se manatu faapito. Ae ou te talitonu ou te gafatia, ma tou te gafatia foi ona fai mea lelei, e fai ai so tatou sao i nuu tatou te o mai ai, ia ola ma atiina ae, ma faia mea atonu tatou te manatu i lenei taimi e le mafai… . Ou te talitonu i le mataupu faavae e mafai ona ou faia se eseesega i lenei lalolagi. Atonu o se mea e matua itiiti lava. Ae o le a taulia mo le lelei e sili atu” (”I Believe,“ Liahona, Mat. 1993, 8).
O outou o se tasi o augatupulaga silisili o tamaitai talavou ua soifua ai i luga o lenei fogaeleele. Ae tou te le i o mai i lenei lalolagi, sa aoaoina outou e lo outou Tama. Sa faapolopoloina outou e o mai i le lalolagi mo se faamoemoega faapitoa. E tofu outou taitoatasi ma se mea e tatau ona fai, ma e le mafai ona faia e se isi. Ua i ai sou taunuuga e ao ona faataunuu.
O lau faataitaiga amiotonu i le avea ai o oe ma se tasi o ē talitonu, o le a faia ai se eseesega i le lalolagi, ma o lea la “aua ne’i lotovaivai i le faia o mea lelei, aua o loo [e] faataatia le faavae o le galuega tele” (MFF 64:33).
Talitonu E Le O Tuulafoa’ia Oe
A o e taumafai e fai ma faaa’oa’o i e ua faatuatua, e te ono faalogoina o loo e tu na o oe. E te ono faalogoina e na o oe o loo taumafai malosi ia amiotonu ma atoatoa. E te ono faalogoina e na o oe o loo taumafai ia tausaafia au amioga, o tala, ma foliga vaaia. Ae e le na o oe. E faitau fia afe tamaitai talavou e pei o oe i le lalolagi atoa o loo taumafai ia avea ma faaa’oa’o i e ua faatuatua po o e ua talitonu.
O Kamalita ma Rosario, o ni tamaitai talavou i Ialapa, Mekisiko, o nisi o e ua talitonu. E na o la’ua tagata o le Ekalesia i lo latou aiga, ma e nonofo foi na o i la’ua. Ina ua ou asiasi atu i lo la’ua aiga, sa fai mai i la’ua, ua la iloa e alofa tele le Tama Faalelagi ia te i la’ua aua sa Ia auina atu faifeautalai e aoao i la’ua i le talalelei. E ui lava ina faigata o la tulaga, ae o aso taitasi la te faalagolago atu ai i le tausiga agalelei ma le taitaiga a lo la Tama Faalelagi.
Ou te fai atu ia oulua Kamalita ma Rosario ma outou uma taitoatasi, ou te molimau atu e le o tuulafoaiina outou. Ua folafola mai e le Alii: “Ou te muamua atu i o outou luma. Ou te i ai foi i lo outou itu taumatau ma lo outou itu tauagavale, a o lo’u Agaga o le a i o outou loto, e siomia foi outou e a’u agelu, e lagolagoina outou” (MFF 84:88).
Talitonu O Le A Taialaina Oe
A e saili ma le filiga i tusitusiga paia ma tatalo e le aunoa, o le a taialaina oe e le Alii. Sa faalogologo se tamaitai talavou o Monokolia, i upu a perofeta, a o faitau atu ia te ia e faifeautalai ni fuaitau mai le Tusi a Mamona. E le i faaliliuina le Tusi a Mamona i lana gagana, ae a o faaliliu e faifeautalai ia upu mo ia, sa talitonu o ia ma sa papatiso loa. Sa avea o ia ma se faataitaiga i e ua talitonu i Monokolia.
I se taimi mulimuli ane, sa tofia o ia i se misiona i le Aai o Sate Leki. Oka se tele o lona olioli! Sa ia aoaoina le Igilisi ma sa ia faatau foi ana lava tusitusiga paia. Ina ua asiasi mai o ia i lo matou aiga, sa ia faitau ma le migao mai ana tusitusiga paia fou. E ese le fiafia i ai. Sa ou matauina e toetoe lava o mea uma i itulau taitasi, sa vasevase i le lanu samasama. Sa ou fai atu, “Sister Salaniseki, pei au tusitusiga paia o ni papatusi auro.” Sa ia tali mai, “E na o mea lava ou te fiafia i ai, lea e vasevase.”
E aoga mea uma lava o i tusitusiga paia i o tatou olaga. E tali mai e tusitusiga paia a tatou fesili, o loo ta’u mai ai tagata lelei tatou te faataitai i ai, ma e fesoasoani ia te i tatou ia malamalama pe faapefea ona taulima luitau ma tofotofoga. E tele taimi e avea ai mau e te faitauina, ma tali i au tatalo.
A o ou pei o outou, sa ma’i tigaina lo’u tama. Sa matou manatu ai lava ua na o se fulu, ae a o gasolo pea aso, sa faatetele lona tigaina. O le taimi lena na ou aoao moni ai le uiga moni o le “tatalo e le aunoa” (2 Nifae 32:9). Sa i ai se tatalo i lo’u loto i taimi uma, ma ou te su’eina se pa’usisi paganoa e momoli atu ai lo’u loto, e ala i le tatalo i lo’u Tama Faalelagi ina ia faamalolo lo’u tama. Ina ua mavae ni nai vaiaso o lona ma’i, sa maliu lo’u tama. Sa ou te’i ma sa ou fefe foi. O le a nei le mea a fai e le matou aiga e aunoa ma lo matou tama sa matou alolofa i ai? E mafai faapefea ona matou ola? Sa ou lagona e le i faafofogaina e le Tama Faalelagi a’u tatalo faatauanau ma e le i tali mai foi. Sa luitauina lo’u faatuatua. Sa ou toe alu i le Tama Faalelagi ma ou fesili i ai—“Tama Faalelagi e, pe o e i ai moni ea iina?”
Ina ua mavae ni masina se tele, sa ou tatalo mo se fesoasoani ma se taitaiga. Sa ou tatalo mo lo’u aiga, ma sa ou tatalo ia ou malamalama i le mafuaaga na le faamaloloina ai lo’u tama. E umi sina taimi, sa foliga mai ia te au, ua gugu le lagi, ae sa faaauau pea ona matou tatalo o se aiga ina ia maua se faamafanafanaga ma se taitaiga. Sa faaauau pea foi ona ou tatalo. Ona oo lea i se tasi aso, ina ua mavae le tele o masina, a o ou nofo i se sauniga faamanatuga, sa oo mai le tali ia te au i se mau. Fai mai le failauga: “Ia e faatuatua ia Ieova ma lou loto atoa, ae aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala” (Faataoto 3:5–6). Sa oo mai se lagona o le toafilemu ma sa ou lagona ua pei lava ua na o au sa i ai i le falelotu. O la’u tali lena. Ua faafofogaina e le Tama Faalelagi au tatalo!
E tele tausaga ua mavae talu ona tupu lena mea, ae o loo mafai pea lava ona ou manatuaina lelei, ma ou te molimau atu sa Ia taitaiina o’u ala. Ou te iloa a tatou talitonu ma faatuatua ia te Ia, “[o le a] galulue faatasi mea uma mo lo [tatou] lelei.”
O lea, o le apoapoaiga mo outou taitoatasi, e tutusa lelei lava ma le apoapoaiga na fai atu e le Aposetolo o Paulo i lana uo taulealea o Timoteo: “Ia fai oe ma faaa’oa’o i e ua faatuatua” (1 Timoteo 4:12). E a pe a e faia lena mea? E a pe a e faaali atu i le lalolagi ma le Alii ua e talitonu, e ala i le faiga o ou lavalava, o au upu ma tala, o lou faaaloalo i lou tino, ma le mama atoatoa o outou olaga? E manaomia e le lalolagi ni tamaitai talavou ua talitonu ma faatuatua.
Talitonu i le Faaola. E alofa o Ia ia te oe, ma ou te molimau atu Na te le tuulafoaiina lava oe. Ua uma ona Ia folafola mai:
Ia aua le fefe, Ou te i ai ia te oe,
O A’u lou Atua e fesoasoani pea.
Ou te faamalosi, faamanuia ia oe, …
I lou aao ua amiotonu; lou aao amiotonu mamana na’ua.
(“Le Faavae Malosi” Viiga, nu. 45; tagai foi Isaia 41:10; 43:2–5)
Ou te talitonu ua tofu outou ma le mana e suia ai le lalolagi. Ia outou talitonu ia te outou lava. Talitonu e le tuulafoaiina lava outou. Talitonu o le a taialaina outou. I le suafa o Iesu Keriso, amene.