E Maeu le Poto ma le Alofa
E moni le talalelei. Ua ou iloaina; O a’u o se molimau o lena mea.
Ou te tu atu iinei, ma lo’u lotomaulalo—o se loto ua tumu i le alofa mo lenei galuega, [alofa] mo outou ua potopoto mai iinei, ma o loo faafofoga mai. I le tatou konafesi talu ai, i le ono masina ua mavae, sa ou tu atu ai iinei i tafatafa o Peresitene Gordon B. Hinckley, sa ia faamalosiau mai ia te au ou te talotalo atu ia te outou, ma sa uma lo’u malosi sa i ai i lena taimi i le na ona talotalo atu. Sa ou faalogo o faapea nisi tagata o la’u toe talotalo atu lena. Peitai, ua ou toe sau i le aso, e ta’u atu ia te outou o lea ua ou toe foi mai. Ma e leai se isi o tuleia lo’u lima mo a’u.
Ua ou malamalama i le mana o tatalo ma le faatuatua, ma le faamaoni, ma ua ou iloa ua oo mai molimau taua mai le lagi. Ma o lea ou te tu atu ai iinei i le aso, tau lava ina tuuina atu la’u molimau ma faatalofa atu ia te outou. Ou te faamoemoe, o le isi konafesi, o le a atoatoa ai lo’u malosi ma mafai ai ona ou faia mea ua poloaiina a’u e fai.
O loo soifua le Atua. O Ia o lo tatou Tama—o lo tatou Tama oi le Lagi.
O Eliza R. Snow, sa tusia nisi o a tatou musika lauiloa, aemaise lava o musika mo faamanatuga, na ia tusia upu nei:
Maeu le poto ma le alofa
I afioaga o i luga.
Se’i mafaufau lava i lena mea mo sina minute. Aua sa tatou i ai iina.
Maeu le poto ma le alofa,
I afioaga oi luga
Na auina mai ai le Faaola,
E maliu ma puapuaga!
(“Maeu le Poto ma le Alofa, Viiga, nu. 109)
Sa tatou filifili e o mai i le lalolagi. Ma o lenei ua tatou potopoto i lenei maota tele, ua mafai ai ona tatou talatalanoa o le tasi i le isi, ma molimauina ma tuuina atu foi molimau. Ou te tautino atu, o na po sa le mafai ai ona ou moe, a o outou taumafai e foia a outou faafitauli uma ma faia ni faaiuga fou o mea e tatau ona faia, sa ou maua na mafaufauga faalelagi e siitia ai i tatou. E alofa le Atua lo tatou Tama Faalelagi ia te i tatou, e tatau foi ona faapena ona tatou alolofa ia te ia. Sa Ia filifilia Lona Alo e afio mai i le lalolagi, ma aumaia le talalelei a Iesu Keriso, lea ua faaigoa ai lenei Ekalesia, lea foi tatou te molimauina. Ua faamamaluina lava a’u, e tu atu ma tuuina atu la’u molimau i le aso i le faavae o lenei Ekalesia, ma lo tatou alolofa mo Peresitene Hinckley, o loo taita’ia i tatou i nei ona po.
E moni le talalelei. Ua ou iloaina; o a’u o se molimau o lena mea. I le suafa o lo tatou Alii ma le Faaola o Iesu Keriso, amene.