Tutu Ma le Le Pona i Luma o le Atua

I tausaga ua mavae, sa ma malaga ai ma lo’u atalii sogasoga, i se pasi saalutulutu i se auala lauleaga i Amerika Tutotonu i le 1:00 i le taeao. Sa ma o i le pasi usupo, ona e na o le pau lena o le pasi i lena aso. I se afa itula mulimuli ane, sa tu le pasi mo ni faifeautalai se toalua. Ina ua feosofi mai i la’ua i luga, sa ma fesili atu pe o fea a saga usupo i ai. I le konafesi faalesone! Ma sa naunau i la’ua e o i soo se mea lava e mafai ona oo ai i [le konafesi]. Ina ua ta le 2:00 i le taeao, sa tulioso mai nisi faifeau i le pasi, ma sa feiloai atu ma le naunau i a la paaga faifeautalai. O le vaaiga lava lea e tasi i ta’i afa itula uma, a o a’ea’e atu le pasi i le auala maugā. E ta ifo le 5:00 i le taeao, ua 16 ni pasese o faifeautalai a le Ali, ma sa fiafia i le Agaga sa latou aumaia i le pasi.

Na faafuase’i ona tu le pasi. Ua tanumia le auala i se mauga solo. Fai mai Jeff “O le a la le mea a fai, Papa?” Sa faapena foi ona popole ia a ma uo o Stan, Eric ma Allan. O le taimi lena sa valaau mai ai le taitai sone,“Tatou o alii, e leai se mea na te taofia i tatou!” Ma sa latou tulioso i fafo! Sa tilotilo le tasi i le isi ma faapea, “Ta mulimuli i faifeau”, ma sa matou asaasa uma i le solo ma taumafai e o faatasi ma faifeautalai. Sa i ai se loli i le isi itu ma sa matou feosofi uma i luga [o le loli]. Ina ua mavae se maila, sa matou toe tau atu foi i se isi mauga solo. Sa toe tauasa atu foi faifeau i le solo ma faapena ona matou mulimuli atu ai. Ae o le taimi la lea, ua leai se loli i le isi itu. Sa lototele le taitai sone ma faapea mai, “O le a tatou taunuu i le mea e tatau ona tatou i ai, tusa lava pe tatou te savavali.” I ni tausaga mulimuli ane, sa ta’u mai e Jeff ia te au le ala na matua musuia ai ma faatosina o ia e na faifeautalai ma le ata lenei, a o auauna i le Alii i Atenitina.

E ui ina sa matou pasia mauga solo, ae sa pisipisia uma i matou i le palapala. Sa popole faifeautalai e tutu atu i luma o lo latou peresitene i le aso o le latou konafesi faalesone, a o iloilo totoa e [le peresitene ma lona faletua] o latou foliga.

A o tatou tauasa atu i mauga solo o le olaga, e le mafai ona tatou le pisipisia i luga o le ala. Tatou te le mananao foi e tutu atu i luma o le Alii ma foliga palapala.

Ina ua afio ifo le Faaola i Amerika anamua, sa Ia fetalai atu, … Ina salamo ia outou, tuluiga uma o le lalolagi ma o mai ia te au, ma ia papatisoina i lo’u igoa, ina ia faapaiaina outou i le Agaga Paia tou te talia, ina ia outou tutu ma le le pona i o’u luma i le aso gataaga (3 Nifae 27:20).

Sa lapata’ia i tatou e Alema i nisi o auala tatou te pisipisia ai i palapala: “Aua o a tatou upu e ta’usalaina ai i tatou, ioe, e ta’usalaina i tatou i a tatou galuega uma; e le maua foi i tatou ma le le pona, a e ta’usalaina i tatou i o tatou manatu” (Alema 12:14).

Na fai mai foi Alema:

“E le mafai ona faaolaina se tagata e toatasi, sei iloga ua faamamaina ona ofu ia sisina, ioe, e ao ina faamamaina ona ofu seia te’a ma le leaga uma i le toto …

“Se a ea so outou manatu, afai tou te laulaututu i luma o le nofoa faamasino o le Atua, o loo pisia o outou ofu i le toto ma mea leaga uiga eseese uma?” (Alema 5:21–22).

Sa ia fai mai foi, “o perofeta paia uma, o e ua faamamaina o latou ofu, o loo ua leai se ila, a ua mama ma sisina” (Alema 5:24).

Ona ia fesili mai ai lea, pe o faapefea mai i tatou a o tatou asaina mauga solo o le olaga: “Po ua outou savavali ma le le pona i luma o le Atua? E mafai ea ona outou fai ifo i o outou loto, pe afai e valaauina outou e oti i le aso nei … ua faamamaina ea o outou ofu ma faasinasinaina i le toto o Keriso? …” (Alema 5:27)

O le salamo ma le Togiola a Iesu Keriso, o le a mafai ai ona lē pona, atoatoa, ma sinasina o tatou ofu, po o “pa’u”, faapea foi o tatou loto ma agaga. Ua aioi mai Moronae, “O lenei, o outou o e le faatuatua, ina liliu mai ia outou i le Atua, ia valaau atu ma le faatauanau i le Tama i le suafa o Iesu, pe mafai ona maua outou i lena aso tele ma le gataaga ua le pona, ma ua mama, ma lalelei, ma pa’epa’e, ina ua faamamaina i le toto o le Tamai Mamoe” (Mamona 9:6).

O loo tusia i le Samuelu, “Aua e te vaai i lona tino, po o le maualuga o lona tino; … aua e vaai tagata i le tino, a e vaai Ieova i le loto (1 Samuelu 16:7).

Sa vaavaai sa Nifae i tino o sa Lamana, aua sa tautino atu e Iakopo, “O lenei, ou te avatu le poloaiga ia te outou, o le afioga lea a le Atua, aua tou te toe faifai atu ia te i latou ona o le uliuli o latou pa’u” (Iakopo 3:9).

E silafia ma alofa lo tatou Tama i Lana fanau i le lalolagi atoa, mai Boston i Okinawa i le Iunaite Setete, mai San Antonio i Sepania, mai Italia i Costa Rica. I Ghana, sa faafetai talu ai nei Peresitene Gordon B. Hinckley i le Alii, “…mo la tatou mafutaga faauso, ma e le mafai e se lanu o le pa’u po o se nuu na fanau mai ai ona tuueseeseina i tatou o Ona atalii ma afafine” (Tatalo o le faapaiaga o le Malumalu o Accra Ghana, i le Brotherhood Exists, Church News, 17 Ianuari, i. 11).

Tatou te valaaulia alii ma tamaitai i soo se mea, pe o le a lava le gagana po o le aganuu, “ina ia o mai ia [Keriso] ma ia tofu i latou i lona agalelei; ua le faafiti o Ia i se tasi e sau ia te Ia, o tagata uli ma tagata papa’e, o e pologa ma e saoloto, o tane atoa ma fafine … [aua] e tutusa tagata uma i le Atua” (2 Nifae 26:33).

Tatou te fananau mai i lenei lalolagi, ma le tele o ituaiga o lanu o pa’u, o foliga, o fuaitino ma tulaga. E le faapea e tatau ona tatou mauoa, uumi, paeee, atamamai, pe aulelei ona faasaoina lea o i tatou i le malo o le Atua; e na o le mama atoatoa lava. E tatau ona tatou usiusitai i le Alii o Iesu Keriso, ma tausi Ana poloaiga. Ma e mafai ona tatou filifili uma e fai lena mea, tusa lava pe o fea tatou te nonofo ai ma pe o a foi o tatou foliga.

Ina ua talai atu e atalii e toafa o Mosaea le talalelei i le au sa Lamana ‘aivao, ma le fasi tagata, sa tupu se suiga tele o le loto:

“O sa Lamana uma o e na talitonu i la latou talaiga, ma ua faaliliuina i le Atua, ua le toe liliu ese lava.

“Aua ua avea i latou ma nuu amiotonu; ua latou lafoai ia latou auupega o lo latou fouvale, ua le toe tau ai ma le Atua, po o se tasi o latou uso” (Alema 23:6–7).

O le taimi nei, e toatele o latou suli [sa Lamana], o loo faitau i nei mea ia latou lava kopi o le Tusi a Mamona, ma ua latou filifili e mulimuli ia Keriso. Ou te fiafia tele e feiloai i fanau [suli] a Liae, i o latou ofu papa’e atoatoa i le tele o malumalu i le Eria o Mekisiko i Saute, i le mea o loo ou galue auauna ai nei. Ou te lagona foi e faapei o Peresitene Gordon B. Hinckley i le faapaiaga o le Malumalu o Guatemala City:

“O oe o le Tama alofa ma agalelei, ua tutumu o matou loto i le faafetai ona o Lou manatuaina o ou atalii ma afafine o Liae, le tele o augatupulaga o o matou tama ma tina, sa matua mafatia ma savavali mo se taimi umi i le pogisa. Ua e faafofogaina a latou tagi ma ua e silasila foi i o latou loimata. O lea ua tatalaina mo i latou ia faitotoa o le faaolataga ma le ola e faavavau” (Tatalo o le faapaiaga, Guatemala City Guatemala Temple, i le “Their Cries Heard, Their Tears Seen,” Church News, 23 Tesema, 1984, i. 4).

Ua ou vaaia suli lotomaulalo o Liae, o malaga mai atumauga i lena malumalu ma fetagisi ai, a o tutu ma le maofa. Sa “fusi” [abrazo] a’u e se tasi ma talosaga mai, ia ou aveina atu lena fusi o le alofa, faafetai ma le faauso, i faifeautalai pele uma lava sa aumaia le talalelei ia i latou ma tagata uma o le Au Paia, o ē sa totogiina ma le faamaoni a latou sefuluai, ua mafai ai ona maua lenei malumalu ina ia latou sapi ai foi i ona faamanuiaga. O le Togiola a Iesu Keriso, e mafai ai ona tatou tutu uma atu ma le le pona, ma le mama atoatoa i luma o le Alii.

Ma le agaga faafetai tele, ou te sii a’e ai lo’u leo faatasi ma Nifae: “Ua matou tautalatala ia Keriso, ua matou olioli ia Keriso, ua matou tala’i atu Keriso, ua matou vavalo atu foi ia Keriso, ua matou tusitusi e tusa ma a matou valoaga, ina ia iloa e a matou fanau, [ma fanau a a matou fanau], le mea latou te faamoemoe ai mo le faamagaloga o a latou agasala” (2 Nifae 25:26).

E ese lo ma fiafia ma lo’u toalua i lenei mau, ma o lea sa ia valiina ai i luga o se puipui o le matou potu malolo, i lalo ifo o se faatagata omea o Keriso. O se faamanatu faifai pea mo i ma’ua e faatotonugalemu Keriso i o ma’ua olaga.

I se tasi aso, sa faitau ai e lo’u atalii ma lo latou aiga ia tusitusiga paia. Sa faitau e lona atalii e fitu tausaga le matua o Clatie ” ‘Ua matou tautalatala ia Keriso, ua matou olioli ia Keriso’—E, o le mea lea la e i le puipui o le fale o Tinamatua ma Tamamatua!” Ua avea nei ma ana mau e fiafia i ai.

O se tasi aso, sa matou i ai i le nofoaga mo tagata asiasi Atu i le Lotoa o le Malumalu ma fanau lava nei a le ma fanau. Sa le lava Ashley e lua ona tausaga, ma sa manao e alu ese. Sa fesili i ai Sister Mask pe fia matamata i se Iesu lapoa e pei o le ata la e i le ma fale. Sa fesili o ia, “E tele pei o au?” “E tele atu,” o le tali lea a Sister Mask. Ina ua tilotilo atu lena teineitiiti i le Keriso malualii, sa tamoe o ia ma tu i lalo, ma faataupupula atu i ai ma le faaaloalo mo ni nai minute. Ina ua fai atu i ai lona tama ua tatau ona o, ae fai mai o ia, “Leai, Papa, e alofa o Ia ia te au ma e manao e fusi au!”

Ua tumu le auala o le olaga i mauga solo faaleagaga. Pe o a lava a tatou agasala ma faaletonu, ia tatou osofa’ia i le naunautai lea sa faaalia e na faifeau ina ua latou osofa’ia mauga solo. Ma ia tatou faafetai atu i lo tatou Tama i aso taitasi, i le auina mai o Lona Alo o Iesu Keriso e faamagalo i tatou mai o tatou pisipisia, ina ia mafai ona tatou tutu atu ma le le pona i Ona luma. E sa’o lava Ashley. E alofa o Ia ia te i tatou uma, ma o le a fetalai mai o Ia i lena aso tele, “Ua lelei ia, le auauna lelei e ma le faamaoni: … ina ulufale mai ia i le fiafia o lou alii” (Mataio 25:21).

Ou te molimau atu o loo soifua o Ia, ma e alofa o Ia ia te i tatou. O Ia o lo tatou Faaola ma lo tatou Togiola. I le suafa o Iesu Keriso, amene.