Aua le Fefe

I nai vaiaso ua tuanai na afe mai ai le ma atalii laitiiti ma lona toalua ma le aiga e vaai maua. O le tagata na muamua alu ese mai ma le taavale o le atalii lea o le ma tama e lua tausaga le matua. Na tamoe mai ia te au ma ona lima o loo faaloaloa mai, ma tauvalaau, “Gwampa! Gwampa! Gwampa!”

Sa ia fusiina o’u vae, ma sa ou tilotilo ifo i lalo i na foliga ataata ma na mata mama lapopoa, ma manatu ifo, “O le a se ituaiga lalolagi o loo faatali mai mo ia?”

Sa ou lagona i sina taimi se faalogona o le popole, o le fefe i le lumanai lea e faailoa mai e le toatele o matua ia i matou o taitai. Soo se mea matou te o i ai e popole lava tama ma tina e uiga i le lumanai o a latou fanau i totonu o lenei lalolagi fesouaiina.

Ona oo mai lea o se lagona mautinoa ia te au. Ma mou malie ese atu ai lo’u fefe i le lumanai.

O lena Agaga taiala, ma faamafanafana, lea ua masani ai i tatou o loo i totonu o le Ekalesia, na faamanatuina mai ia te au le mea ua uma ona ou iloa. Ua leai se fefe i le lumanai. O lena tamaitiiti mata pupula e lua tausaga le matua e mafai ona maua se olaga lelei—se olaga e matuai lelei—ma e mafai foi e ana fanau ma fanau a ana fanau, e ui lava o le a latou ola i se lalolagi o loo tele ai le amioleaga.

O le a latou vaai i le tele o mea e tutupu e oo mai i vaitaimi o o latou olaga. O nisi o nei mea o le a luitauina ai lo latou lototele ma faalauteleina ai lo latou faatuatua. Ae afai latou te saili ma le agaga tatalo mo le fesoasoani ma le taiala, o le a tuuina atu ia i latou le mana e faatoilalo ai mea faigata. O faigata faapea e le tatau ona faatagaina e faalavelave i le auala o lo latou alualu i luma, ae ia avea ma se auala e maua ai se malamalama sili atu.

I le avea ai ma se tama matua ma o se tasi o le Toasefululua, o le a ou tuuina atu ia te outou nai fautuaga, nai lapataiga, ma le tele o le faamalosiauga. E mafai ona sili atu ona lelei lo’u faia o lenei mea pe ana fai o loo tu i o’u autafa le tinamatua i totonu o lo matou aiga, o lo’u toalua i le 57 tausaga. E sili atu le iloa o tina e uiga i le olaga nai lo tama, ae o le a ou faia le mea sili ou te mafaia.

Tatou te le fefefe i o tatou lava lumanai pe o lumanai o a tatou fanau. O loo tatou ola i ni taimi sili ona matautia le faigata. O tulaga faatauaina sa puipuia ai le tagata i uluai taimi ua lafoaiina.

E le tatau ona tatou le amanaiaina ia upu a Moronae ina ua ia vaai i o tatou aso ma faapea mai, “E [tatau] ona outou ala mai ma mafaufau i le mea faigata ua oo ia te outou” (Eteru 8:24).

E le mafai ona tatou manatu mama i lenei lapataiga mai le Tusi a Mamona:

“Ua faamanuiaina ma faauluolaina e le Atua, i lona agalelei tele e le mafuatia o i latou uma o e faalagolago ia te ia … ina o faia mea uma ina ia manuia ma fiafia ai lona nuu; e moni, o le aso lava lea latou te faamaaa ai o latou loto, ma faagalogalo foi ia te i latou le Alii lo latou Atua, ma soli i lalo o o latou vae Le paia—ioe, o lenei foi ona o lo latou filemu ma lo latou manuia matua tele.

“Ma ua faapea ona tatou iloa, sei iloga ua sasaina e le Atua lona nuu i puapuaga e tele, ioe, sei iloga e asiasi o ia ia te i latou i le oti, ma le mata’u, ma le oge, ma faama’i uiga eseese, latou te le manatua o ia” (Helamana 12:1–3; faaopoopo faamamafa).

Pe ua outou maitauina le upu mata’u i totonu o lena lapataiga faavaloaga i le Tusi a Mamona?

O uiga taua o amioga lea e tatau ona faalagolago i ai ia tagata ua matuai faatupulaia le leaga i se saoasaoa faateleina. Ae ui i lea, ou te le fefe lava i le lumanai.

Na maea le Taua I o le Lalolagi ae toe ono tausaga o’u fanau mai. A o matou laiti, sa i ai i soo se mea ia aafiaga o le taua. Na oo mai le Taua Lona II o le Lalolagi i le 15 tausaga mulimuli ane. Ma ua leva ona amata ona faamatau mai mea na tutupu.

Sa matou maua foi ia lagona popole lea o loo maua e le toatele o outou i le taimi nei. Sa matou manatunatu po o le a se mea o i le lumanai mo i matou i se lalolagi le mautonu.

A o o’u laitiiti, sa vaaia e le aunoa ia faama’i o tamaiti i soo se nuu. Afai e maua se tasi i le tanesusu po o le misela po o le mami, e asiasi atu le sui o le soifua maloloina i le fale ma tuu se faailoilo i luga o le faapaologa po o le faamalama ina ia lapataiina ai soo se tasi ina ia soso ese. I totonu o se aiga toatele e pei o matou o na faamai a oo atu e pei e tuufaasolo, e pisia le isi tamaitiiti mai le isi, atonu la o ni vaiaso e tu ai pea le faailoilo.

E le mafai ona lokaina i matou i totonu o o matou fale po o le lalafi foi ina ia aloese ai mai na faamai matautia le pipisi. E ao ona matou o i le aoga, i galuega, i le lotu—i le olaga!

E toalua o’u tuafafine na aafia i se tulaga matautia o le misela. O le taimi muamua na foliga mai ua manuia. I nai vaiaso mulimuli ane na tilotilo atu ai Tina i le faamalama ma iloa atu ai ia Adele, o le laitiiti o le toalua lea, o faalagolago agai i le taupega. Sa matapogia o ia ma vaivai i le fiva. O le fiva rumatika! Na maua ai ona o ni aafiaga mai le misela. O le isi tuafafine na maua foi i le fiva.

Sa laitiiti se mea sa mafai ona faia. E ui i talosaga uma a o’u matua, na maliu lava ia Adele. Sa valu ona tausaga.

E ui na toe manuia ia Nona, e lua tausaga le matua, ae sa ma’ale’ale lava lona soifua maloloina i le tele o lona olaga.

A o o’u i ai i le vasega fitu, i le vasega o le soifua maloloina, sa faitau ai e le faiaoga se tala. Na iloa e se tina o loo maua tamaiti o lo latou tuaoi i le tanesusu. Sa feagai o ia ma le tulaga e ono maua ai foi lana fanau, atonu e taitoatasi. Sa ia fuafua ina ia uma lelei i le taimi e tasi.

O lea sa ia auina atu ai lana fanau e taaalo ma fanau a le latou tuaoi ina ia pisia mai ai, ona uma ai lea. Mafaufau i lona popole ina ua taunuu atu le fomai ma faailoa atu i ai e le o le tanesusu lea o loo maua ai tamaiti; ae o le smallpox.

O le mea sili e fai i lena taimi ma le mea e tatau ona tatou faia nei o le aloese mai lea ma nofoaga o loo i ai ni tulaga matautia e pipisi mai ai faaletino po o le faaleagaga.

E ma te tau le popole i le maua o le fanau a le ma fanau i le misela. Ua uma ona fai o latou tui puipui ma e mafai ona feoai saoloto e aunoa ma le fefe i lena mea.

E ui lava o le tele o le lalolagi ua matuai fufulueseina ai lava le misela, ae o loo avea pea ma mafuaaga autu o le maliliu o tamaiti e leai ni tui puipui.

Mai tupe na foaiina atu ma le matamau e le Au Paia o Aso e Gata Ai, sa foaiina atu ai e le Ekalesia talu ai nei se miliona tala i se taumafaiga faifaatasi ina ia puipuia ai tamaiti o Aferika e tetee atu i le misela. E tasi le tala, e mafai ai ona puipuia le tamaitiiti e toatasi.

O loo popole nei matua e uiga i faamai o amioga ma le faaleagaga. O nei faamai e mafai ona matautia ia aafiaga pe afai e lafoaia ia faatulagaga ma mea e faatauaina. E tatau ona tatou faaaogaina uma lava ia laasaga e puipuia ai.

O se vailaau o loo i ai se puipuiga, o le a mafai ai e le tino ona puipuia mai faamai. E mafai foi ona tatou puipuia a tatou fanau mai faamai o amioga ma le faaleagaga.

O le upu inoculate e lua ona vaega: In—“ia i ai i totonu”—ma le oculate o lona uiga o le “mata e vaai ai.”

Pe a papatisoina fanau ma faamauina (tagai MFF 20:41, 43; 33:15), tatou te tuuina i totonu se mata i totonu ia i latou—le meaalofa e le matalatalaina a le Agaga Paia (tagai MFF 121:26). O le Toefuataiga o le talalelei na oo mai ai le pule e tuuina atu ai lenei meaalofa.

O loo tuuina mai e le Tusi a Mamona ia i tatou le ki:

“E tautala mai agelu i le mana o le Agaga Paia; o le mea lea, ua latou fetalai mai ai le afioga a Keriso… . Ia outou fiafia i afioga a Keriso; aua faauta, e faaalia mai ia te outou [e faapea foi i a outou fanau] i le afioga a Keriso mea uma tou te faia“ (2 Nifae 32:3).

Afai o le a e taliaina i totonu i lou mafaufau ma taofia i ou lagona, o se malamalama o le talalelei toefuataiina ma se molimau ia Iesu Keriso e mafai ona puipuia ai faaleagaga lau fanau.

E tasi le mea e matuai mautinoa lava: o le nofoaga sili ona saogalemu ma le puipuiga sili lava e tetee atu ai i faamai o amioga ma le faaleagaga o se fale ma se aiga lea e mautu. E moni lava lenei mea; o le a moni pea lava e faavavau. E tatau ona tatou teuina lena mea ia faamuamua i o tatou mafaufau.

O loo tautala ia tusitusiga paia i le “talipupuni o le faatuatua o le a mafai ai,” na fetalai ai le Alii, “ona outou tineia u fanafana mu uma lava a e amioleaga” (MFF 27:17).

O lenei talipupuni o le faatuatua e sili atu ona gaosia i totonu o se falegaosimea lea e gaosia ai e tagata faigaluega ia oloa i o latou fale ina ia faatauina atu. E ui lava e mafai ona faaiilaina le talipupuni i vasega i totonu o le Ekalesia faapea ma gaoioiga, ae ua faamoemoe e ao ona galueaiina i totonu o le aiga ma faafetaui i tagata taitoatasi.

Na fetalai le Alii, “Ia ofu outou i o’u ofu tau, ina ia outou mafai ona tetee atu i aso leaga, ona ua faia mea uma, tou te mafai ai ona tumau” (MFF 27:15).

E tele auala ua malolosi ma sili atu ai o tatou tagata talavou nai lo tatou. E le tatau ia i latou ma tatou ona fefefe i mea o i le lumanai.

Ia faamalosiau i o tatou talavou. E le moomia ona latou ola i le fefe (tagai MFF 6:36). O le fefe o le faafeagai lea o le faatuatua.

E ui e le mafai ona tatou tafiesea le amioleaga, ae mafai ona tatou gaosia ni talavou o le Au Paia o Aso e Gata Ai o e ua faafaileleina faaleagaga, ua puipuia e tetee atu i aafiaga leaga.

I le avea ai ma se tamamatua ua leva ona ola, ou te fautuaina outou ina ia faatuatua. E i ai lava le auala e galulue ai mea latou. Ia latalata i le Ekalesia. Ia faalatalata a outou fanau i le Ekalesia.

I aso o Alema “ua aoga tele le talaiga o le upu i le taitaiina o le nuu e fai mea tonu—e moni … sa sili ona aoga ai i manatu o le nuu ai le pelu, po o se tasi mea ua oo atu ia te i latou—o le mea lea sa faapea ai Alema, e tatau ona latou tofotofoina pe aoga i ai le afioga a le Atua” (Alema 31:5).

O mataupu autu moni, ua malamalama i ai, e suia ai uiga ma amioga. O le suesueina o mataupu autu o le talalelei o le a vave ona faaleleia ai le amio nai lo se suesuega o le amio lea o le a faaleleia ai le amio.

Ia maua le fiafia i mea e masani ai, ma ia tumau pea ou uiga malie.

Sa toe manuia ia Nona mai le misela ma le fiva rumatika. Sa umi ona ola o ia ma manuia mai se taotoga o le fatu ma fiafia ai tausaga e tele o le ola maloloina ua faaleleia. E talanoa isi i lona malosi fou ua maua. Fai mai lana tala, “Ua i ai so’u fatu fou i totonu o se tino tuai.”

Ia tumau pea ou uiga malie!

Aua e te fefe e aumai tamaiti i le lalolagi. Ua tatou osi feagaiga e saunia ni tino faaletino ina ia mafai e agaga ona oo mai i le olaga faaletino (tagai Kenese 1:28; Mose 2:28). O fanau o le lumanai lea o le Ekalesia toefuataiina.

Ia faatulaga lelei o outou aiga. Afai o loo faigaluega Tina i fafo o le fale, vaai pe i ai ni auala e suia ai lena mea, sina auala laitiiti. Atonu e faigata ona suia i le taimi nei. Ae ia iloilo faalelei ma ia tatalo (tagai MFF 9:8–9). Ona faamoemoe lea e maua se musumusuga, o se faaaliga lea (tagai MFF 8:2–3). Faamoemoe e oo atu le mana e mai tua atu o le veli e fesoasoani ai ia te oe ina ia e gaoioi, i le taimi tatau, i le mea e sili ona lelei mo lou aiga.

Na ta’ua e Alema le ata o le faaolataga “o le fuafuaga sili o le fiafia” (Alema 42:8; tagai foi 2 Nifae 11:5; Alema 12:25; 17:16; 34:9; 41:2; 42:5, 11–13, 15, 31; Mose 6:62).

Na tatou o mai uma i le olaga faaletino ina ia maua se tino motale ma ina ia suesueina (tagai Aperaamo 3:24–26).

O le a le saoloto le olaga mai luitau, o nisi o luitau e tiga ma faigata ona tauave. Tatou te momoo maimau pe ana faasaoina i tatou mai tofotofoga uma o le olaga, ae o le a feteenai lena ma le fuafuaga sili o le fiafia, “aua e ao lava ina i ai le faafeagai o mea uma” (2 Nifae 2:11). O lenei tofotofoga o le puna lena o lo tatou malosi.

I le avea ai ma se teineitiiti mama, sa matuai faalavelaveina lava le olaga o lo’u tuafafine o Adele i faamai ma mafatiaga. O loo faaauauina e ia faapea foi ma isi ua maliliu le galuega a le Alii i le isi itu o le veli. O le a le teenaina lava mai ia te ia soo se mea e moomia mo lona alualu i luma e faavavau.

Na maliu foi se afafine o le ma atalii a o pepe. Sa faaigoa o ia i a Emma, le igoa o lo’u tina. Na matou maua le faamafanafanaga mai tusitusiga paia.

“E le aoga i o latou tamaiti le salamo, po o le papatisoga… .

“… Ua ola tamaiti ia Keriso” (Moronae 8:11–12).

Ia manatua le Togiola a Keriso. Aua le lotovaivai pe faitaulia ua leiloloa e faavavau i latou o e na pauu atu i faaosoosoga a Satani. O le a latou, pe a uma ona totogiina le aitalafu “i tupe uma lava” (Mataio 5:26) ma pe a maea le faamalologa lea e i ai le salamo atoatoa, ona maua lea o le taui.

Mulimuli i taitai o e ua valaauina e pulefaamalumalu ia te outou, aua ua tuuina mai le folafolaga: “Afai foi e faalogo mai lo’u nuu i lo’u leo, ma le leo o au auauna ua ou tofia e taitaiina lo’u nuu, faauta, e moni ou te fai atu ia te outou, o le a le aveesea lava i latou mai lo latou nofoaga” (MFF 124:45).

O Le Ekalesia a Iesu Keriso o le Au Paia o Aso e Gata Ai o le a agai i luma “seia tumu ai le lalolagi atoa” (MFF 65:2) ma folafola mai e le Ieova silisili ua maea Lana galuega (tagai History of the Church, 4:540). O le Ekalesia o se uafu saogalemu. O le a puipuia i tatou e le faamasinoga tonu ma faamafanafanaina e le alofa tunoa (tagai Alema 34:15–16). E leai se lima eleelea e mafai ona taofia le alualu i luma o lenei galuega (tagai MFF 76:3).

Tatou te le o tauaso i tulaga o i le lalolagi.

Na valoia e le Aposetolo o Paulo ia “aso faigata” i aso e gata ai (2 Timoteo 3:1), ma ia lapatai mai, “Aua tatou te le tau ma tagata, a o alii sili, ma faipule, ma alii o le pouliuli o lenei lalolagi, atoa ma agaga leaga i mea o i le lagi” (Efeso 6:12).

Na folafola mai e Isaia, “E faatumauina oe i le amiotonu: e mamao ma oe le sauaga; aua e te le fefe: e mamao foi ma le mata’u, aua e le faalatalata mai lea ia te oe” (Isaia 54:14).

Na faamalosiau mai le Alii lava Ia, “O lea, ina fiafia ai ia, ma ‘aua le fefe, aua o au le Alii o loo faatasi ma outou, ou te tu foi faatasi ma outou; tou te molimau foi ia te au, o Iesu Keriso lava, o au o le Atalii o le Atua soifua, o au le na i ai, o le o loo i ai, ma le o le a oo mai” (MFF 68:6). I le suafa o Iesu Keriso, amene.