Lipoti a le Matagaluega Suetusi a le Ekalesia, 2003

Uso Pele: O lo o i ai i le Ekalesia a Iesu Keriso o le Au Paia o Aso e Gata Ai se matagaluega suetusi, e tumaoti le faatinoga o ana galuega mai isi matagaluega uma ma galuega a le Ekalesia. O le pule faatonusili o le Matagaluega Suetusi a le Ekalesia, e lipoti sa’o atu e le aunoa i le Au Peresitene Sili. O le aufaigaluega a le Matagaluega Suetusi a le Ekalesia, e aofia ai tausitusi faamaonia mai fafo, o suetusi faamaonia mai totonu, o suetusi faamaonia o mea tau faamatalaga, ma isi polofesa agavaa ua faamaonia.

O se tofiga mai le Au Peresitene Sili, o lea ua i ai i le Matagaluega Suetusi a le Ekalesia le pule e sue ai tusi a matagaluega uma ma galuega a le Ekalesia i le lalolagi atoa. Ua i ai i le Matagaluega Suetusi a le Ekalesia le aia tatau e taulimaina ai polokalama uma, faamaumauga, o tagata faigaluega, o meatotino e manaomia e sue ai tusi o saofaga, tupe faaalu ma punaoa a le Ekalesia. O tulaga faapolofesa i le taulimaina o mea tautupe ma suegatusi o loo faafoe ai le galuega faasuetusi. O le tulaga e ono lamatia ai, o le faavae autu lea e taialaina ai le sailia o suetusi.

O le Aufono e Pulefaasoasoaina ia Sefuluai o loo i ai le matafaioi, ma o le tausaga 2003 sa faamaonia mai ai foi ia tupe faaalu a le Ekalesia. O lenei aufono e aofia ai le Au Peresitene Sili, o le Korama a Aposetolo e Toasefululua, ma le Au Epikopo Pulefaamalumalu, e pei ona faama’oti mai i le faaaliga. I lalo o le taitaiga a lenei aufono, o le faamaumauga o saofaga, tupe faaalu, ma puna’oa a le Ekalesia, o loo pule faasoasoa e ala atu i vaega o pulega o matagaluega, faapea ma Matagaluega o Paketi ma le Matagaluega o Tupe a le Ekalesia. O le faafoeina o tupe e nei pulega, o vaega o paketi, ma vaega o tupe, sa sueina ma lipoti mai.

E faavae i luga o a tatou suegatusi, ua manatu ai le Matagaluega Suetusi a le Ekalesia, o tulaga o galuega faaletino uma, saofaga sa maua mai, ma tupe sa faaalu, ma punaoa a le Ekalesia sa faaaogaina i le tausaga 2003, na faatautaia e tusa ma taiala faamaonia o paketi ma aiaiga ma taualumaga o mea e fai a le Ekalesia.

O mea tautupe i totonu o faalapotopotoga a le Ekalesia, ia e ese lona faafoega mai le Ekalesia, e le i sueina tusi e le Matagaluega Suetusi a le Ekalesia i le 2003. Sa sueina tusi ma isi gaoioiga o le pulega e ni kamupani suetusi tumaoti mai fafo. O nei faalapotopotoga, e aofia ai le Deseret Management Corporation ma ona kamupani, ma faalapotopotoga o aoga maualuluga a le Ekalesia, e aofia ai le Iunivesite o Polika Iaga. Ae ui o lea, sa faamaonia e le Matagaluega Suetusi a le Ekalesia, sa tauaaoina mai lipoti e tatau ai o suegatusi a nei kamupani suetusi mai fafo, i faalapotopotoga o komiti suetusi taitasi.

E tuuina atu ma le faaaloalo lava,

Matagaluega Sustusi a Le Ekalesia

Wesley L. Jones

Pule Faatonusili