I Le Malosi o le Alii

A o ou talavou, sa ou galue auauna o se fesoasoani i se peresitene atamai o le itu i le Ekalesia. Sa taumafai o ia e aoao mai au. O se tasi o mea ou te manatua lo’u le malamalama ai o le fautuaga lea sa ia aumaia: “A lua feiloai ma se tagata, ia fai e pei o la e i ai i se faalavelave matuia … ona silia ai lea ma le afa o le taimi e te sa’o ai.”

Sa ou manatu i lena taimi, o se tala e aveane ai. Ae, i le 40 tausaga mulimuli ane ai, ua mafai nei ona ou vaai i lona malamalama lelei i le lalolagi ma le olaga. A o gasolo aso, ua faateleina ona faigata le lalolagi, ma ua faasolo foi ina faaitiitia lo tatou malosi faaletino ina ua matutua. Ua manino, o le a tatou manaomia se malosi e sili atu nai lo le malosi faaletagata. E sa’o lava le fai Salamo: “O loo mai ia Ieova le faaolataga o e amiotonu; o ia lava lo latou malosi i ona po o le puapuaga.”¹

O le talalelei toefuataiina a Iesu Keriso, e maua mai ai lo tatou fesoasoani e iloa ai pe faapefea ona tatou agavaa mo le malosi o le Alii, a o tatou taulimaina puapuaga. Na te ta’u maia ia i tatou pe aisea tatou te feagai ai ma faigata i le olaga. Ma, e taua atu nai lo lena, e ta’u mai ai le auala e maua ai le puipuiga ma le fesoasoani mai le Alii.

Tatou te feagai ma tofotofoga, aua e alofa lo tatou Tama Faalelagi ia te i tatou. O Lona faamoemoega o le fesoasoani lea ina ia tatou agavaa mo faamanuiaga o le ola faatasi ma Ia ma Lona Alo o Iesu Keriso, e faavavau i le mamalu ma faatasi ma aiga. Ina ia agavaa la mo lena meaalofa, e tatau ona maua o tatou tino motale [faaletino]. O lena tino motale, ua tatou malamalama o le a su’eina i tatou i tofotofoga ma faigata.

E le gata ina aoao i tatou e le talalelei toefuataiina i le mafuaaga e tatau ai ona sueina i tatou, ae na te faamanino maia foi le suega. Sa aumai e le Perofeta o Iosefa Samita ia i tatou se faamalamalamaga. I se faaaliga, sa mafai ai e ia ona tusia upu na tulei i ai i le Foafoaga o le lalolagi. O ia upu e faatatau ia te i tatou, o fanau agaga a lo tatou Tama Faalelagi o le a o mai i le olaga nei. O upu nei:

“Ma o le a tatou faataitai ai i latou, ia iloa ai, pe latou te faia mea uma e poloaiina ai i latou e le Alii lo latou Atua.”²

Ua fesoasoani lena faamatalaga tatou te malamalama ai pe aisea tatou te feagai ai ma faigata i le olaga. Ua tatou maua ai le avanoa e faamaonia ai lo tatou faamaoni i le Atua. Ua tele naua mea e tofotofo ai i tatou i le olaga, e faigata ma e toetoe lava ina tatou le gafatia. O le uiga lena ia te au o upu o le mau, “ia tumau e oo i le iuga”³ ina ua ou faatoa faitau i ai. Sa le manaia lena faaupuga ia te au, e pei o le nofo sa’o ma taofi mau le nofoa a o se’i e se isi lo’u nifo.

Onosai e oo i le iuga, e mafai ona foliga faapena i se aiga e faalagolago i faatoaga ae leai se timu. Atonu e tuufesilisili: O le a le umi tatou te onosai ai? E mafai foi ona faapena i se talavou o loo feagai ma le teena o le tai fana’e o mea mataga ma tofotofoga. E mafai ona foliga faapena i se alii talavou o loo tauivi ia maua le poto na te manaomia mo se galuega, e tausi ai lona toalua ma le aiga. E mafai ona foliga faapena i se tagata ua le mafai ona maua se galuega, pe uma mai lea galuega ma lea galuega ona ua tapunia kamupani. E mafai ona foliga faapena i le tagata e feagai ma le fai ifo o le soifua maloloina, ma le malosi faaletino lea e ono vave pe tuai foi ona oo mai i le olaga mo i latou, po o i latou foi e alolofa i ai.

Peitai o le suega ua tuu mai e se Atua alofa i o tatou luma, e le o fia iloa pe mafai ona tatou onosaia faigata. O le suega ia iloa ai pe mafai ona tatou onosa’ia faigata ma ola amiotonu. Tatou te pasi i le suega i lo tatou faaalia lea sa tatou manatua o Ia ma poloaiga sa Ia tuuina mai ia te i tatou. Ma o le tumau lelei ai, o le tausia lea o na tulafono tusa lava po o a mea tatou te feagai, po o a foi tofotofoga, ma pe o a foi gaogaosa o siomia ai i tatou. Ua ia te i tatou lena malamalama manino aua ua matua faafaigofie e le talalelei toefuataiina le ata o le fiafia, ia malamalama ai.

O lena manino ua tatou iloa ai le ituaiga fesoasoani tatou te manaomia. Tatou te manaomia le malosi e sili atu nai lo i tatou lava, e tausia ai poloaiga i soo se tulaga o le olaga e oo mai. O nisi, o tulaga o le olaga o le mativa, ae o nisi o le tamaoaiga. O faafitauli e afua i le soifua ua matua po o le osoosoga o le malosi o le talavou. O le tuufaatasiga o tofotofoga ma le umi, e eseese lava e faapei ona esese le fanau a lo tatou Tama Faalelagi. E le tutusa ni mea se lua. Ae o le mea o loo tofotofoina, e tutusa i taimi uma i o tatou olaga ma tagata uma. Pe tatou te faia ea soo se mea e poloaiina ai i tatou e le Alii lo tatou Atua?

O le iloa pe aisea e tofotofoina ai i tatou, ma pe o le a foi le suega, e ta’u mai ai pe faapefea ona tatou maua se fesoasoani. E tatau ona tatou o i le Atua. Na te aumai ia i tatou o poloaiga. Ma o le a tatou manaomia se malosi e sili atu nai lo le tatou lava malosi e tausia ai.

O lea foi la, o le talalelei toefuataiina ua faamanino maia mea faigofie e ao ona tatou faia. Tatou te maua ai foi le talitonuga, o le fesoasoani tatou te manaomia, o le a oo mai, pe a tatou vave faia na mea ma le naunautai, a o le i taitai oo mai le taimi o faigata.

O le mea muamua, o le ogatotonu, ma le mea mulimuli, o le tatalo. Ua uma ona faasino mai le ala e le Faaola. O se tasi o faatonuga aupito manino o loo i ai i le 3 Nifae:

“Faauta, e moni, e moni, ou te fai atu ia te outou, e tatau ona outou mataala ma tatalo e le aunoa, ne’i oo mai le faaosoosoga ia te outou; aua e manao Satani ia te outou, ina ia lulu o ia ia te outou e pei o le saito. O le mea lea e tatau ai ona outou tatalo e le aunoa i le Tama i lo’u igoa; O mea uma e tatau tou te ole atu ai i le Tama i lo’u igoa ma le faatuatua tou te maua ai, faauta, e foaiina mai ai ia te outou. Ia tatalo i o outou aiga i le Tama i lo’u igoa, ina ia manuia a outou ava, ma la outou fanau.”⁴ O lea, e tatau ona tatou tatalo e le aunoa.

O se tasi mea faigofie e fai, ina ia mafai ona aumai e le Atua le malosi ia i tatou, o le fiafia lea i afioga a le Atua: faitau ma mafaufau i tusitusiga faavae o le Ekalesia ma upu a perofeta soifua. O loo i ai se folafolaga o le fesoasoani mai le Atua, e maua i le faitauina o tusitusiga paia i aso taitasi. O le suesue ma le faamaoni i tusitusiga paia e aumaia ai le Agaga Paia ia te i tatou. O loo tuuina mai le folafolaga i le Tusi a Mamona, ae e faatatau foi i afioga uma a le Atua ua Ia tuuina mai ma o le a tuuina mai, e ala mai i Ana perofeta.

“Faauta, ou te apoapoai atu ia te outou, pe a outou faitau nei mea, afai e tusa ma le poto o le Atua tou te faitau ai, ia outou manatua le finagalo alofa o le Atua i le fanauga a tagata, e afua i le faiga o Atamu, seia oo lava i le aso tou te maua ai nei mea, ina ia mafaufau i ai i o outou loto.

“Pe a maua e outou nei mea, ou te apoapoai atu ia te outou, ia outou ole atu i le Atua, le Tama Faavavau, i le suafa o Iesu Keriso, pe le moni ea nei mea; afai tou te ole atu ai ma le loto faamaoni, ma le manatu tonu i ai, ma le faatuatua ia Keriso, na te faaalia le tonu ia te outou i le mana o le Agaga Paia.

“O le mana foi o le Agaga Paia tou te iloa ai le tonu i mea uma lava.”⁵

E tatau ona silia i le faatasi ona tatou tatalo pe moni tusitusiga paia uma ae le na o le Tusi a Mamona. E faataunuuina lava le folafolaga. E moni le mana o le Agaga Paia. O le a oo mai, ma saga oo mai pea lava. Ma o le upumoni e tasi e molimauina mai pea e le aunoa o le, o Iesu o le Keriso.

O lena molimau o le a tosina atu ai i tatou i le Faaola, ma le taliaina o le fesoasoani ua Ia ofoina mai i tagata uma ua tofotofoina i le suega matautia o le olaga nei. Ua faatele ona Ia fetalai, Na te faapotopoto ia i tatou e faapei ona ofaofata’i e le moa lana toloai i lalo o ona apaau. Fai mai a Ia, e tatau ona tatou filifili e o atu ia te Ia i le agamalu, ma se faatuatua tele ia te Ia ia salamo ma le “loto atoa.”⁶

O se tasi ala e faia ai lena mea, o le faapotopoto ma le Au Paia i Lana Ekalesia. O ia outou fonotaga po o sauniga, tusa lava pe foliga e faigata. Afai e te naunau, o le a fesoasoani o Ia ina ia e maua le malosi e fai ai.

Sa tusi mai se tagata o le Ekalesia ia te au mai Egelani. Ina ua fesili atu lona epikopo pe na te talia se valaauga e faiaoga ai i le seminare i le taeao, sa ta’u atu [e le epikopo] ia te ia e tatau ona tatalo ae na te le i taliaina. Ina ua feiloai atu o ia i matua o tamaiti mo le taimi muamua, sa tu le epikopo i ona tafatafa. Sa ia faasilasila atu ua na lagona e tatau ona lima aso o le vaiaso mo le polokalama seminare. Sa faaletonu le pupula a nisi o matua. Sa fai ane le isi tagata, “O le a le o mai tamaiti. O le a filifilia e tamaiti i o latou vae.”

Ia, sa sa’o i se isi itu le au masalosalo. E sa’o lava sa filifili lava tamaiti i o latou vae. Ae o lo latou auai i na taeao pogisa ma le malulu, ua silia nei ma le 90%. Sa talitonu lena faiaoga ma le epikopo, afai e amata ona o mai tamaiti aoga, o le a faamalolosia i latou e le mana e sili atu nai lo latou lava malosi. Na tupu. O le a puipuia i latou e lena mana pe a o i nofoaga o le a na o i latou ai ni tagata o le Au Paia o Aso e Gata Ai. O le a le tuulafoaiina lava i latou e aunoa ma se malosi, aua ua latou taliaina le valaaulia e potopoto faatasi ma le Au Paia, i le taimi sa le i faigofie ai.

O lena malosi e tuuina atu ia i latou e matutua faapea foi i latou e laiti. Ou te iloaina se fafine ua oti lana tane, ua silia ma le 90 tausaga o lona soifua. E fealuai i se nofoa faataavale. E tatalo e pei foi o outou, e augani atu mo se fesoasoani e foia ai faafitauli e le mafai i lona malosi faaletagata ona foia. O le tali na ia maua, o se lagona i lona loto. Na uunaia ai o ia e tausi i poloaiga: “Faauta, ia outou potopoto soo.”⁷ O lea sa ia sailia ai se auala e oo atu ai i sauniga. Sa fai mai tagata sa i ai iina, “Ua matou matua fiafia lava ina ua vaai atu ia te ia. Na te aumaia se agaga matagofie tele.”

E ‘ai o ia ma inu i le faamanatuga ma faafou ana feagaiga. Na te manatua le Faaola ma o loo taumafai o ia e tausi Ana poloaiga. Ma o lea e alu ai o ia ma ave Lona Agaga faatasi ma ia e le aunoa. Atonu e le foia ona faafitauli. O le tele lava o ona faafitauli, e afua mai i filifiliga a isi, e oo lava i le Tama Faalelagi o loo faafofogaina ana tatalo ma alofa ia te ia, e le mafai ona faamalosia isi e filifili le mea sa’o. Ae e mafai ona Ia auina atu o ia i le malologa o le Faaola ma le folafolaga o Lona Agaga e faatasi ma ia. Ma ou te mautinoa, i le malosi o le Alii, o le a ia pasia ai le suega o loo feagai ma ia, aua o loo ia tausia le poloaiga e potopoto soo faatasi ma le Au Paia. O le molimau lena o lona tumau ai lelei, ma le puna o lona malosi mo tofotofoga o loo faatalitali mai.

E i ai foi se isi mea faigofie e fai. Ua toefuatai mai le Ekalesia a le Alii, ma o lea, soo se valaauga lava e galue ai, o se valaauga e auauna ai ia te Ia. Sa atamai lena epikopo i Egelani. Sa ia faatonuina le tamaitai e tatalo mo lona valaauga e galue. Sa silafia e ia le tala o le a maua e le tamaitai. O se valaaulia mai le Tama ma Lona Alo Pele. Sa ia silafia le mea sa aoaoina moni [e le tamaitai] i lona tali atu i le valaauga mai le Matai. I Lana galuega, e oo mai le Agaga Paia o se soa ia i latou e taumafai e fai le mea sili latou te mafaia. Atonu sa ia lagonaina a o tu i luma o matua, ma a o vaaia e ia le filifili o tamaiti i o latou vae. O le mea sa foliga faigata, ma sa toetoe ina le mafai i lona lava malosi, na avea ma ea e olioli ai i le malosi o le Alii.

Pe a faitau o ia ma mafaufau i mau, ma tatalo ina ia saunia mo na vasega, na te iloa lava ua uma ona ole atu le Faaola i le Tama, ina ia auina ifo le Agaga Paia ia te ia, e pei foi ona sa Ia folafola atu ai i Ona soo i le Paseka Mulimuli, ina ua Ia silafia tofotofoga o le a feagai ma i latou ma ua tatau foi ona tuua i latou e Ia. Na te le i tuua i latou o matuaoti. Sa Ia folafola atu ia te i latou le Agaga Paia, e pei foi ona Ia folafola mai ia i tatou i Lana galuega. O le mea lea, soo se taimi e oo mai ai le valaau e galue, ia e talia. E aumai lava i le valaauga le fesoasoani e faatoilalo ai tofotofoga e sili atu nai lo faigata tatou te feagai ona o lena valaauga.

E le tofu uma tagata ma ni valaauga e tuu mai aloaia. Ae e auauna uma lava soo i le Matai, e ala i le tuuina atu o molimau, ma agalelei i tagata latou te mafuta. Na folafola atu e tagata uma ua ulu ifo i le vai o le papatisoga, o le a latou faia lena mea. Ma o le a maua e tagata uma le mafutaga a le Agaga pe a latou tumau ai i le tausiga o a latou tautinoga i le Atua.

I le galuega a le Matai, o le a e iloa ai ma alofa ia te Ia. Pe afai e te tumau i le tatalo ma galue auauna atu ma le faamaoni, o le a amata ona e lagonaina ua avea le Agaga paia ma au soa. E toatele i tatou, ua tele se taimi o tuuina atu lena ituaiga o auaunaga ma lagonaina lena mafutaga. Afai e te toe tomanatu i lena taimi, o le a e manatua ai ua i ai suiga ia te oe. Ua faaitiitia le tofotofoga e fai le mea leaga. Ua faateleina le naunau e fai mea lelei. O i latou sa iloa oe ma alolofa ia te oe o le a faapea atu: “Ua ese lou agalelei, toe tele lou onosai. Ua e le pei o le mea sa i ai muamua.”

Ua le o oe o le tagata lea sa i ai muamua, aua e moni le Togiola a Iesu Keriso. Ma e moni lava le folafolaga, e mafai ona avea i tatou ma tagata fou, ma sili atu. Ma e mafai foi ona tatou malolosi atu mo tofotofoga o le olaga. Ona tatou agai atu ai lea i le malosi o le Alii, o se malosi e atiina ae i Lana galuega. Tatou te o faatasi ma Ia. Ma o le a i ai taimi e avea ai i tatou ma Ona soo sa tofotofoina ma ua faamalolosia.

O le a e vaaia se suiga i au tatalo. O le a sili atu ona naunau ma faifai soo. O upu e te tautala ai, o le a ese sona uiga ia te oe. Ona o le poloaiga, lea tatou te tatalo ai e le aunoa i le Tama i le suafa o Iesu Keriso. Peitai, o le a tele atu lou talitonuga e te lagona, a o e tatalo i le Tama ma lou iloa, e te alu atu ia te Ia o se soo faatuatuaina ma le faamaonia o Iesu Keriso. O le a avatu ia te oe e le Tama le filemu ma le malosi e sili atu i lenei olaga, ma o le a aumaia ai foi se faanaunauga fiafia e faalogo i upu, pe a maea le suega o le olaga: “Ua lelei ia, le auauna lelei e, ma le faamaoni.”⁸

Ou te iloa o loo soifua le Atua le Tama. Ou te molimau atu e faafofogaina e Ia ma tali mai i a tatou tatalo uma. Ou te iloa Lona Alo, o Iesu Keriso, sa totogiina le tau o a tatou agasala uma, ma e finagalo o Ia ina ia tatou o mai ia te Ia. Ou te iloa e finagalo le Tama ma le Alo ina ia pasi a tatou suega o le olaga. Ou te molimau atu ua uma ona La saunia le ala mo i tatou. O le Toefuataiina mai o le talalelei i aso e gata ai, ua manino ai le ala mo i tatou. E mafai ona tatou iloa poloaiga. Ua ia te i tatou le aia tatau tatou te maua ai le mafutaga a le Agaga Paia i le Ekalesia moni a Iesu Keriso. Ma e mafai ona tatou tumau lelei ai. I le suafa o Iesu Keriso, amene.