“Ma le Alofa Mutimutivale o se Matua Agamalu: O Se Savali o le Faamoemoe i Aiga

E pei ona valoia e Paulo, ua tatou ola i “aso faigata.”¹ “Ua [fealualuai] Satani, ua taitai ese loto o le nuu,”² ma ua faateteleina ana faatosinaga. Ae e tusa pe o le a le amioleaga ua i ai le lalolagi, e mafai lava ona i ai le filemu i o tatou aiga. Afai tatou te faia le mea sao, o le a taitaiina ma puipuia i tatou.

O le viiga sa masani ona usuina e o tatou augatuaa paionia, o loo tau mai ai ia i tatou le mea e ao ona fai: “Ia tatou tau finafinau. O le Atua tatou te au.”³ O le lototele lena ma le faatuatua tatou te manaomia i le avea ai o ni matua ma ni aiga i nei aso e gata ai.

O Tama Liae, na i ai lena lototele. Sa alofa o ia i lona aiga ma sa olioli i nisi o lana fanau sa tausia poloaiga a le Alii. Ae atonu sa nutimomoia lona loto ina ua “le aai ona atalii o Lamana ma Lemuelu i le fua o le laau” ua faatusaina i le alofa o le Atua. “Ua atu tele lava o ia ona o [i laua]; ioe, na ia atuatuvale, nei lafoaiina i laua ai luma o le Atua.”⁴

O matua uma lava, e fetaiai ma taimi o na atuatuvalega. Ae peitai, pe a tatou faaaogaina lo tatou faatuatua e ala i le aoaoina o a tatou fanau, ma faia mea tatou te mafaia e fesoasoani ai ia i latou, o le a mou ese atu o tatou popolega. Sa finafinau Liae, ma faatasi ai ma le faatuatua sa “ia apoapoaina ai [lana fanau] … ma le alofa mutimutivale o ia le matua agamalu, la te usiusitai i ana upu, a e atonu e alofagia i laua e le Atua.” Ma “ua fai ane o ia ia te i laua, ia tausi i poloaiga a le Atua.”⁵

O tatou foi, e tatau ona i ai ia i tatou le faatuatua e aoao ai a tatou fanau ma valaaulia i latou ina ia tausi poloaiga. E le tatau ona tatou faatagaina a latou filifiliga e faavaivaia lo tatou faatuatua. O le a le fuatia lo tatou agavaa i lo latou amiotonu. E lei aveesea mai ia Liae ia faamanuiaga o le taumafa i le laau o le ola ona na mumusu Lamana ma Lemuelu e tofo i ona fua. I le avea ai ma matua, o nisi taimi, tatou te manatu ai ua tatou toilalo pe a fai e a tatou fanau ni mea sese pe se ese mai foi. E leai ni matua e toilalo pe afai latou te faia le mea sili latou te mafaia, e alolofa, tatalo, ma tausia ai a latou fanau. O lo latou faatuatua, tatalo, ma taumafaiga o le a faapaiaina mo le lelei o a latou fanau.

E finagalo le Alii mo i tatou i le avea ai ma matua, ina ia tatou tausi i Ana poloaiga. Ua fetalai mai o Ia, “[Aoao] lau fanau i le malamalama ma le upu moni, e tusa ma poloaiga… . faatulaga tonu lou lava aiga… . Vaai ia [e] matua maelega ma popole i le aiga.”⁶

Ou te fia faamanatu atu ia te i tatou uma i le aso, e faapea, e leai se aiga ua oo atu i le atoatoa. O aiga uma lava e tatau ona feagai ma tuutuuga faaleolaga nei. Ua tuuina mai ia i tatou uma le meaalofa o le saolotoga—e filifili ai mo i tatou lava ma aoao mai i taunuuga o a tatou filifiliga.

Soo se tasi o i tatou e i ai se toalua, se tamaitiiti, se matua, po o se tasi o o tatou aiga lautele, o pagatia e tusa lava po o le a—i le mafaufau, faaletino, faalelagona, pe faaleagaga; e mafai foi ona aafia i tatou lava i nei puapuaga. I se isi faaupuga, e le faigofie le olaga nei.

E tofu aiga taitasi ma o latou tulaga faapitoa. Ae o le talalelei a Iesu Keriso na te taulimaina ia luitau uma—o le mea lena e tatau ai ona tatou aoaoina atu [le talalelei] i a tatou fanau.

Ua tau mai i le [tautinoga] O Le Aiga: O Se Folafolaga i le Lalolagi:

“Ua i ai i matua se tiute paia e tausia a latou fanau i le alofa ma le amiotonu, ia tuuina atu i ai mea e manaomia i le faaleagaga ma le faaletino, ia aoao i latou e alolofa ma feauaunaai, ia tausia poloaiga a le Atua ma avea ma tagatanuu usiusitai i tulafono i soo se mea e nonofo ai. O tane ma ava—tina ma tama—o le a latou tali atu i le Atua mo le faataunuuina o nei mea e ao ona faia.”⁷

O le faataunuuina o nei tiutetauave o le ki lea i le puipuiga o o tatou aiga i nei aso e gata ai.

Na lapatai mai Mose, “Ia e matua aoao soo ai [nei upu] i lau fanau, ma ia e tautalatala ai pe a e nofo i lou fale, pe a e savali foi i le ala, pe a e taoto, pe a e tulai foi.”⁸ E tatau ona i ai pea lava pea o tatou aiga i o tatou mafaufau.

Na silafia lelei e Mose le manaomia o le aoao atu e le aunoa, aua na ola ae o ia i taimi faigata. I le taimi na fanau mai ai Mose, ua uma ona faia e Farao se poloaiga, o fanau tama laiti uma a tagata Eperu sa i totonu o Aikupito, e tatau ona lafoai i le vaitafe. Ae sa manatu mamafa ia matua o Mose i o la tiute faamatua.

O loo tusia i tusitusiga paia, “O le faatuatua sa natia ai Mose i masina e tolu e ona matua … na le fefefe foi [ona matua] i le poloaiga a le tupu.”⁹ Ina ua matua Mose ma ua le mafai ona toe natia, na saunia ai e lona tina o Iokapeta se ato kome, na puluti i le pulu emeri ma le pulu safeta, ma tuu ai i totonu lana tama. Sa ia taitaiina atu le ato laitiiti i le auvai, i se nofoaga saogalemu—agai i le mea na taele ai le afafine o le farao.

Ina ia mautinoa e leai se mea e tupu mai, na auina atu ai e Iokapeta se fesoasoani musuia, o lana tama teine o Miriama, e alu e vaai. Ina ua maua e le afafine o Farao, le perinisese ia le pepe, sa ofo atu ma le toa ia Miriama na te alu e aami se fafine failele o Sa Eperu. O lena failele o Iokapeta, le tina o Mose.¹⁰

Ona o lona faatuatua, na faasaoina ai le ola o Mose. Na oo ina iloa e [Mose] lona faasinomaga moni, o lea sa ia “tuuina ai Aikupito, ua le fefe i le ita o le tupu.”¹¹

Ou te auai faatasi ma matua faamaoni i soo se mea i le folafolaina atu, ua tatou iloa moni i tatou lava, ua tatou malamalama i o tatou tiutetauave o ni matua, ma tatou te le fefefe i le ita o le alii o le pogisa. Tatou te faalagolago i le malamalama o le Alii.

E pei foi o Iokapeta, tatou te tausia o tatou aiga i totonu o se lalolagi amioleaga ma le fetauai—o se lalolagi matautia e pei lava o faigamalo a Aikupito sa taitaiina e Farao. Ae peitai, e pei lava o Iokapeta, tatou te lalagina faataamilo i a tatou fanau se ato puipui—o se ato ua taua “o le aiga”—ma taitaiina atu i latou i nofoaga saogalemu e mafai ai ona faamausali a tatou aoaoga i totonu o le aiga ma le ekalesia.

Mulimuli ane, tatou te taitaiina atu o tatou aiga i le fale e sili atu i aoaoga uma—o le malumalu paia, lea e mafai ai i se aso ona latou tootutuli, ao siomia e tagata faamaoni o o latou aiga, ina ia faamauina i se soa agavaa mo le olaga nei ma le faavavau. O mea na latou aoaoina mai ia i tatou, o le a latou aoaoina ai a latou fanau, ma o le a faaauauina ai pea le galuega o aiga e faavavau.

E i ai taimi o le savaliga i le ala, pe a o ese mai a tatou fanau mai ia i tatou, e saunia ai e le Alii ni “Miriama” musuia e vaaia i latou—o se tagata faapitoa e ese mai i matua ma le tamaitiiti e pei o, taitai perisitua ma ausilali, faiaoga, aiga lautele, ma uo agavaa. O nisi taimi e musuia ai e le Agaga i tatou o matua e saili atu se fesoasoani faapitoa i tua atu o i tatou e ala i punaoa e pei o fomai ma faufautua agavaa. O le a taitaiina e le Agaga le taimi ma le ala e mafai ai ona maua na ituaiga fesoasoani.

Ae o le fesoasoani sili mo o tatou aiga e ala mai lea i le talalelei—mai lo tatou Tama Faalelagi, e ala i le taitaiga a le Agaga Paia, i aoaoga ma mataupu faavae, ma e ala mai i le perisitua. Sei ou faasoa atu ia te outou ni elemene taua se lima i tulaga faamatua, o le a fesoasoani ia i tatou i le faamalolosia o o tatou aiga.

Fai fonotaga faaleaiga. O nisi taimi tatou te fefefe ai i a tatou fanau—e fefefe e fefaasoaai faatasi ma i latou ona o le popole nei le fiafia. O loo i ai ni faamanuiaga anagata e tatau ona maua mai le fono faatasi ma o tatou aiga, e faaalia ai le fiafia moni i olaga o tagata o o tatou aiga. E i ai taimi, e mafai ona auai uma tagata o le aiga i fonotaga faaleaiga o se vaega o le afiafi faaleaiga po o isi faatasiga faapitoa. Ae e tatau lava ona tatou fono e le aunoa taitoatasi ma a tatou fanau.

A le faia lenei faatalanoaga taitoatasi ma a tatou fanau, o le a mafai ona latou talitonu e le malamalama pe le popole ia Tama ma Tina, po o Tamamatua ma Tinamatua i luitau o loo latou fetaiai. Ao tatou faalogo atu ma le alofa ma aloese mai le faasalaveiina, o le a fesoasoani le Agaga ia i tatou, e iloa ai le auala e mafai ai ona tatou fesoasoani atu ia tatou fanau ma aoaoina i latou.

Mo se faataitaiga, e mafai ona tatou aoao atu ia i latou, e mafai ona latou filifilia a latou amioga, ae le [mafai ona latou filifilia] taunuuga o na amioga. E mafai foi ona tatou fesoasoani malie atu ia i latou ia malamalama po o a taunuuga o a latou amioga, e mafai ona oo i ai o latou lava olaga.

O nisi taimi pe a le usitaia a tatou aoaoga, ma pe a le ausia o tatou faamoemoega, e tatau ona manatua, ia tatala pea le faitotoa i o tatou loto.

I le faataoto i le atalii faamaumau oa, tatou te maua ai se lesona mamana mo aiga ae maise lava matua. Ina ua “atamai” [le atalii faamaumau oa]¹², na tonu loa ia te ia o le a alu i le aiga.

Na faapefea ona ia iloa o le a le teenaina o ia e lona tama? Aua sa ia iloa lona tama. I taimi o lona talavou i le leai o se malamalama, feeseeseaiga, ma le valea, e mafai ona ou vaai faalemafaufau i lona tama o i ai iina ma se loto malamalama ma le alofa mutimutivale, o se tali filemu, se taliga e faalogo, ma se opo faamagalo. E mafai foi ona ou vaai faalemafaufau ua iloa e lona atalii e mafai ona sau i le fale, aua sa ia iloa le ituaiga aiga sa faatalitali atu mo ia. Aua fai mai le mau, “Ua iloa mamao atu foi o ia e lona tama, ona mutimutivale lea o lona alofa, ua momoe atu ia, ua fusi ia te ia, ma sogi atu ia te ia.”¹³

Ou te molimau atu e tatalaina pea e lo tatou Tama Faalelagi le faitotoa. Ou te molimau atu foi, e le o tuai ona tatalaina le faitotoa i le va o i tatou ma a tatou fanau, i upu faigofie e pei o le “Ou te alofa ia te oe,” “Ua ou sese,” ma le “Faamolemole faamagalo mai au.” E mafai ona tatou amata nei ona fausia se aiga, e mafai ona latou fia foi mai i ai—e le gata i le taimi nei, ae faapea foi i le faavavau.

E mafai foi ona tatou fesoasoani ia tatou fanau usiusitai, e tatalaina pea le faitotoa o le faamagalo atu e ala i le faailoa atu o lo tatou alolofa ma le talisapaia o i latou, ma fesoasoani ia i latou ia olioli i le salamo o nai o latou tei.

Faatasi ai ma le matala pea o faitotoa o o tatou loto, e tatau ona tatou aoao ina ia faatatau tusitusiga paia i o tatou olaga.

E masani ona tatou talanoa e uiga i le aoaoina o a tatou fanau mai tusitusiga paia, ae e faapefea ona tatou faia lena mea?

O ni nai tausaga ua mavae, sa ou aoaoina ai lo ma atalii e uiga i le olaga ma aafiaga o le uso o Iareto. E ui lava ina sa manaia le tala, ae lei ootia ai. Ona ou fesili atu lea pe o le a le uiga o le tala ia te ia lava. E tele na’ua se uiga pe a tatou fesili ia tatou fanau. “O le a lona uiga ia te oe?” Sa fai mai o ia, “E te iloa, e leai lava se eseesega mai le mea na faia e Iosefa Samita i le togavao ina ua ia tatalo ma maua mai se tali.”

Sa ou fai atu, “E tali tutusa lava lou matua ma Iosefa Samita. E te manatu o le a fesoasoani se tatalo e pei o lana tatalo ia te oe?” Na faafuasei lava ona ma le toe talanoa i se tala ua leva i se nuu mamao. A ua ma talanoa e uiga i lo’u atalii—e uiga i lona olaga, o ona manaoga, ma le ala e mafai ai ona fesoasoani le tatalo ia te ia.

I le avea ai ma matua, o lo tatou tiutetauave o le fesoasoani i a tatou fanau ina ia “faatatau tusi paia uma [ia mautinoa, o vaega uma o le talalelei a Iesu Keriso] ia te i tatou [ma a tatou fanau], … ina ia aoga e aoaoina ai [o tatou aiga].”¹⁴

Pe o tatou faatatauina uma ea ia aafiaga faaletalalelei o a tatou fanau i manaoga moni o o latou olaga? Pe o tatou aoaoina i latou e uiga i le meaalofa o le Agaga Paia, salamo, le Togiola, le faamanatuga, ma faamanuiaga o le sauniga faamanatuga, a o latou fetaiai ma luitau o o latou olaga? E le lava se taimi i faatulagaga aloaia e aoao ai a tatou fanau i mea uma e tatau ona latou iloa. O le mea lea, e tatau ai ona tatou faaaoga avanoa i aso taitasi e aoao atu ai.

O nei taimi e le mafaatauina. E oo mai a o tatou galulue, taaalo, ma tauivi faatasi. Pe a oo mai, o le a mafai ona fesoasoani le Agaga o le Alii ia i tatou e iloa ai upu e fai atu, ma fesoasoani ia tatou fanau e talia a tatou aoaoga.

O se fiafiaga ma se faamanuiaga le i ai o le Agaga i totonu o o tatou aiga! Ma o se faamanuiaga foi le valaauliaina [o le Agaga] e ala i le tatalo, suesueina o tusitusiga paia, tautala ma le alofa, ma le faaali atu o le talisapaia e le tasi o le isi! Ia tatou saunia taimi e aoao atu ai e ala i le tatalo e pei ona sa tatalo Alema mo lona atalii, ma le “faatuatua tele”¹⁵ ma le malosi uma o o tatou agaga e ala i le anapogi, saili i tusitusiga paia, salamo mai a tatou agasala, ma faatagaina le Agaga Paia e faatumuina o tatou loto i le alofa, faamagalo atu, ma le agalelei. Ona faatumulia ai lea o o tatou fale. Ona tatou faalagolago ai lea i le Leoleo Mamoe Lelei.

Sa taitaiina atu e le tina o Mose, o Iokapeta lana tama i le auvai ma le faatuatua i le “Leoleo … o [tatou] agaga.”¹⁶ I le avea ai ma matua, e mafai foi ona tatou faalagolago atu i le Leoleo Mamoe lelei e taitaiina ma faatonutonuina i tatou. Ua folafola mai e Isaia, Na “te taitai filemu”¹⁷ i latou uma o e ua i ai le tiutetauave mo le fanau.

O le a fesoasoani mai o Ia ia i tatou ina ia faalagolago atu ma faamamalu i mataupu faavae o le filifiliga saoloto, faafeagai, ma le Togiola, e tusa lava pe fai e a tatou fanau ia faaiuga e le lelei. E ala mai i Lona Agaga, o le a Ia fesoasoani mai ia i tatou e aoao a tatou fanau e faafetauia uma ia luitau, tofotofoga, ma faaosoosoga o le olaga e ala i le manatuaina po o ai i latou—o fanau a le Atua. O le a musuia i tatou i auala e fesoasoani atu ai ia i latou e oofu i le “ofutau atoatoa o le Atua,”¹⁸ ina ia mafai ona latou onosaia ia “u fanafana mu a le fili”¹⁹ i le “talipupuni o le faatuatua”²⁰ ma “le pelu a le Agaga.”²¹ A o faaaupegaina ma faamalolosia faaleagaga a tatou fanau, o le a Ia faamanuiaina i latou e tumau i le iuga ma le faamaoni ma toe foi atu i le aiga, ma agavaa e tutulai ma ola i le afioaga o lo latou Tama Faalelagi i le faavavau.

O ia mea uma, o le a tatou faanoanoa i le vaai atu i tagata o o tatou aiga o pagatia i maata ma u fanafana i le olaga nei. Peitai o le a tatou tutu ma ofo i le alofa o le Faaola mo i latou. Talu ai ona o Ia, e le tatau ai ona faatoilaloina ma faaumatia i latou e puapuaga, ae e mafai ona faamaluluina, faamalolosia, ma faapaiaina ai i latou.

I matua ma aiga o le lalolagi atoa, ou te molimau atu o le Alii o Iesu Keriso e malosi e faaola. O Ia o le Faamalolo, o le Togiola, o le Leoleo Mamoe laveai na te tuua le ivagafulu ma le iva ina ia sailia le tasi. Afai o loo tatou sailia le faaolataga o “tagata” faapitoa i totonu o o tatou lava aiga, ou te molimau atu e mafai lava ona Ia aapa atu i ai. Tatou te fesoasoani ia te Ia i le aapa atu ia i latou e ala i le ola faamaoni i le talalelei, faamauina i totonu o le malumalu, ma ola faamaoni i feagaiga sa tatou faia ai iina.

E mafai ona maua e matua se faamafanafanaga tele mai le saunoaga a Elder Orson F. Whitney, e uiga i aoaoga a Iosefa Samita:

Ua folafola mai e le Perofeta o Iosefa Samita—ma na te lei aoao mai lava se mataupu faavae aupito sili ona faamafanafanaina—o faamauga e faavavau o matua faamaoni ma folafolaga paia na faia ia i latou mo auaunaga lototele i le Faapogai o le Upu moni, o le a le gata ina laveaiina ai i latou lava, ae faapena foi i a latou fanau. E ui lava ina e i ai nisi o mamoe o le a se ese, o le a i ai pea fofoga o le Leoleo Mamoe i o latou luga, ma o le a le umi pe o se taimi mulimuli ane foi, o le a latou lagonaina ai ia ave o le Manuia Faalelagi e oo atu ia i latou ma toe aumaia i latou i le lafu. A le o lenei olaga pe o le olaga a sau, o le a latou toe foi mai lava. O le a latou totogia le tau o le faamasinoga tonu; o le a latou tigaina mo a latou agasala; ma atonu o le a latou savalia le ala matuitui; ae afai o le a iu ina taitaiina ai i latou, e pei o le Faamaumau oa na salamo, e agai atu i se tama ma se aiga alofa ma loto faamagalo, o na aafiaga tiga o le a le maumau lava. Tatalo mo a outou fanau faatalale ma lē usiusitai; uumau pea ia i latou ma lou faatuatua. Ia faamoemoe pea, faalagolago pea, seia oo ina e vaaia le faaolataga a le Atua.²²

E tuuina atu lau molimau faapitoa, na tuuina mai e Iesu Keriso Lona soifua, ua mafai ai ona maua le faaolataga ma le faaeaga o aiga uma i luga o le fogaeleele. Ma le mutimutivale o le alofa o se matua agamalu, ou te faailoa atu ai lo’u alofa ma le alofa o lo tatou Tama Faalelagi ia te outou ma o outou aiga.

Tau ina ia tatou faapotopoto mai e ua pele ia i tatou, “ia [tatou] tau finafinau. O le Atua tatou te au.” O le faatuatua, lototoele, ma le alofa, o le a faavavau moni ai aiga. Ou te tautino atu ai i le suafa o Iesu Keriso, amene.