O Le Togiola ma le Taua o le Agaga e Tasi

O Ianuari na mavae atu nei na mafatia ai lo matou aiga ona o le maliu faafuasei o Nathan, le atalii o le ma atalii, i se vaalele na pa’u. Sa auauna atu ia Nathan i le Misiona a Baltic e faaaoga ai le gagana Rusia. Sa ia alofa i tagata ma na ia iloa o se faamanuiaga le auauna atu i le Alii. O le tolu masina talu ona mavae ona ou faatinoina lana faaipoipoga e faavavau i lana manamea o Jennifer, ae uma loa lona ola i lenei faalavelave. O le faafuaseia ona aveesea o Nathan mai le matou mafutaga faalelalolagi na toe liliu uma atu ai o matou loto ma mafaufau i le Togiola a le Alii o Iesu Keriso. E ui lava e le mafai ona ou faaupuina le uiga atoatoa o le Togiola a Keriso, ae ou te tatalo ina ia mafai ona ou faamatalaina le uiga o Lana Togiola ia te au ma lo matou aiga, atoa foi ma lona uiga ia te outou ma o outou aiga.

O le taua o le soifua mai, soifuaga, Togiola i le Togalaau o Ketesemane, o le puapuagatia i luga o le Satauro, o le falelauasiga i le tuugamau o Iosefa, faapea ma le Toetu mamalu ua avea uma lava ma se mea moni faafouina mo i tatou. O le Toetu mai o le Faaola ua faamautinoa mai ai ia i tatou uma e faapea, o le a i ai foi se aso, o le a tatou mulimuli ai ia te Ia ma tatou oo foi i lo tatou toetutu. E maeu le filemu, e maeu le mafanafana lea e oo mai ia i tatou mai lenei meaalofa silisili e ala mai i le alofa tunoa o Iesu Keriso, le Faaola ma le Togiola o tagata uma. Talu ai ona o Ia, o lea ua matou iloa ai e mafai ona matou toe faatasia ma Nathan.

E leai lava se isi faailoga o le alofa e sili atu, nai lo le Togiola toa na faatinoina e le Alo o le Atua. Ana le seanoa le fuafuaga a lo tatou Tama Faalelagi, lea na faavaeina a o lei amataina le lalolagi, o le mea moni lava, o tagata uma—na soifua i taimi ua mavae, o le taimi nei, ma le lumanai—semanu e tuua e aunoa ma se faamoemoe o le alualu i luma e faavavau. O le taunuuga o le solitulafono a Atamu, na vavaeeseina ai tagata mai le Atua (tagai Roma 6:23), ma e semanu e faavavau ai pea sei vagana ua maua se auala e motusia ai noataga o le oti. O le a le faigofie lenei mea, aua o le a moomia ai le taulaga e sui ai a le toatasi o le e leai se agasala, ma o le na te mafaia ona tauaveina i Ona luga agasala a tagata uma.

E faafetaia ai, le faataunuuina ma le lototele e Iesu Keriso o lenei taulaga i totonu o Ierusalema anamua. O iina i le toafilemu o le tuufua o le Togalaau o Ketesemane, na Ia tootuli ai i totonu o le lavelave o le togaolive, ma o se auala maoae lava e leai ma se tasi o i tatou e malamalama atoatoa i ai, na tauaveina ai e le Faaola i Ona luga ia agasala a le lalolagi. E ui lava sa mama Lona soifuaga ma saoloto mai agasala, ae na Ia totogia le tau mo agasala—a oe, o au, ma tagata uma o e ua soifua mai. O lona tiga i le mafaufau, lagona ma le agaga sa matautia, lea na mafua ai ona tafe mai le toto i pu ninii o Lona tino (tagai Luka 22:44: MFF 19:18). Ae peitai sa puapuagatia Iesu ma le loto i ai ina ia mafai ona maua e i tatou uma le avanoa e toe faamamaina ai—e ala i lo tatou faatuatua ia te Ia, salamo i a tatou agasala, ia papatisoina e ala i le pule sao o le perisitua, e ala i le mauaina o le meaalofa faamama o le Agaga Paia e ala i le faamauina, faapea ma le taliaina o isi sauniga uma e talafeagai ai. A aunoa ma le Togiola a le Alii, e leai ma se tasi o nei faamanuiaga e avanoa mai mo i tatou, ma e le mafai ona tatou agavaa ma saunia e mau i le afioaga o le Atua.

Na onosaia mulimuli ane e le Faaola ia le tiga o fesili, sasa matautia, ma le maliu e ala i le faasatauroina i luga o le satauro i Kalevaria. Talu ai nei lava, sa tele ni manatu sa faaalia e uiga i lenei mea, ae leai ma se manatu na matuai faamaninoina mai le manatu taua e tasi e faapea, e leai se tasi na i ai le mana e aveeseina ai le soifua o le Faaola mai ia te Ia. Na Ia ofoina atu e avea ma se totogi mo i tatou uma. I le avea ai ma Alo o le Atua, na Ia te ia le mana e fesuiaia ai le tulaga. Ae peitai o loo faamanino mai e tusitusiga paia, na Ia tuuina atu o Ia lava ia fasia, faalumaina, puapuagatia, ma iu ina faasatauroina ona o Lona alofa tele i le fanau a tagata (tagai 1 Nifae 19:9–10).

O le Togiola a Iesu Keriso o se vaega sili lea ona taua o le fuafuaga a lo tatou Tama Faalelagi mo le misiona faalelalolagi a Lona Alo faapea ma lo tatou faaolataga. E tatau ona tatou matua lotofaafetai, ona e lei faalavelaveina e lo tatou Tama Faalelagi, ae sa ia taofiofi Lona manao faatama ina ia laveaiina Lona Alo Pele. Talu ai ona o Lona alofa faavavau mo oe ma au, o lea na Ia faatagaina ai Iesu ina ia faamaeaina Lana misiona na muai faauuina ai ina ia avea ma o tatou Togiola. O le meaalofa o le toetu ma le tino ola pea ua tuuina fua mai e ala i le alofa tunoa o Iesu Keriso i tagata uma o augatupulaga uma, e tusa lava po o a a latou mea lelei po o mea leaga e fai. Ma o i latou o e filifili e alolofa i le Alii, ma i latou o e faaali atu lo latou alolofa ma le faatuatua e ala i le tausia o Ana poloaiga, ma agavaa mo le atoatoaga o faamanuiaga o le Togiola, ua Ia ofoina atu i ai se folafolaga faaopoopo o le faaeaga ma le ola faavavau, o le faamanuiaga lea o le ola ai e faavavau i le afioaga o le Atua ma Lona Alo Pele e faavavau.

E masani ona tatou pepese i se viiga lea e faailoa atu ai lo’u lagona pe a ou mafaufau i le taulaga togiola alofa a le Faaola:

O Iesu Keriso, le Faaola ma le Togiola o tagata uma, e le o maliu. O loo soifua o Ia—le Alo toetu o le Atua soifua—o la’u molimau lena, ma o loo Ia taitaia mataupu o Lana Ekalesia i aso nei.

I le tautotogo o le 1820, o se malamalama faaniutu na suluia ai se togavao i le itu i matu o Niu Ioka. Na faaali mai ai lo tatou Tama Faalelagi ma Lona Alo Pele i le Perofeta o Iosefa Samita. O lenei mea na tupu, na amata ai le toefuataiga o mataupu faavae moni mamana lea na leiloloa mo le tele o auga senituri. O se tasi o na upumoni na toetoe a leiloa ona o le liliuese, le upu moni musuia lea e faapea o i tatou uma lava o atalii ma afafine agaga o se Atua alofa o le ua avea ma o tatou Tama. O i tatou o se vaega o Lona aiga. E le o ia o se tama i le na o se faatusa po o se lagona ua masani ai. O Ia moni lava o le tama o o tatou agaga. E manatu mai o Ia mo i tatou uma taitoatasi. E ui lava o lenei lalolagi e i ai sana lava auala e ta’ufaatauvaaina pe faaletauaina ai alii ma tamaitai, ae o le mea moni lava ia o i tatou uma lava o se gafa tau tupu ma le paia. I lena faaali atu e le mafaatusalia o le Tama ma le Alo i le Togavao Paia, o le upu muamua lava na fetalai i ai le Tama o i tatou uma o le igoa lava lea o “Iosefa.” E faapena le sootaga o le Tama ia i tatou uma taitoatasi. Na te silafia o tatou igoa ma augani mai ia i tatou uma ina ia agavaa e toe foi atu e mau faatasi ma Ia.

Na auala mai i le Perofeta o Iosefa Samita le Toefuataiga o le talalelei. Na toe faaalia mai e le Alii o Iesu Keriso, e ala mai i Lana perofeta filifilia, ia sauniga ma le pule o le perisitua e faatinoina ai mo le faaolataga o tagata uma o e o le a talitonu i ai.

O se isi perofeta i se tasi taimi sa faaali atu i ai “malo o le lalolagi” (Mose 7:23). “Ma sa faaali atu e le Atua mea uma ia Enoka, e oo lava i le iuga o le lalolagi” (Mose 7:67). Sa vaai foi Enoka ia Satani “o loo i ai i lona lima se filifili tele, ma ua ufitia ai le lalolagi atoa i le pouliuli; ma sa ia (Satani) tepa ae i luga ma ataata” (Mose 7:26).

I mea uma lava na vaai i ai Enoka, ae tasi lava le mea na foliga mai na ia taulai atu i ai nai lo isi mea uma. Sa vaai atu Enoka i le Atua “o silasila ifo i tagata o le lalolagi na totoe, ona Ia tutulu lea” (Mose 7:28). O loo tusia i faamaumauga paia e faapea sa fesili soo atu ia Enoka i le Alii: ”Po ua faapefea ona e tutulu? … Ae ua faapefea ea la ona e tutulu?” (Mose 7:29, 31).

Na tali atu le Alii ia Enoka: “Faauta i ou uso nei; o i latou o galuega a ou lava lima; … sa ou fai atu i ou uso … ma poloaiina foi i latou, ia latou fealofani, ma e ao ona latou filifilia au, lo latou Tama; ae faauta, ua aunoa i latou ma le alofa, ma ua latou inoino i o latou lava toto” (Mose 7:32–33).

Na vaaia e Enoka ia tulaga o aso nei e gata ai. Na silafia e ia ma isi uluai perofeta e faapea sei vagana lava ua tatou taliaina le Togiola i o tatou olaga ma taumafai e ola i le talalelei, ona faatoa mafai lea ona tatou faafetaiaia ia luitau o le olaga ma maua le filemu, olioli, ma le fiafia. O le malamalama i lenei meaalofa silisili o se sailiga lea a le tagata lava ia mo fanau uma taitoatasi a le Atua.

Uso e ma tuafafine, ou te talitonu afai e mafai ona tatou malamalama i le Togiola a le Alii o Iesu Keriso, o le a tatou iloaina le taua tele o le atalii po o le afafine e toatasi o le Atua. Ou te talitonu o le faamoemoega faavavau o le Tama Faalelagi mo Ana fanau e tele lava ina ausia e ala i mea iti ma le faatauvaa tatou te faia mo isi. I le ogatotonu o le upu faaperetania o le “atonement” e i ai le upu “one.” Afai e malamalama tagata uma i lenei mea, semanu o le a leai se tasi o le a tatou le manatu i ai, e tusa lava po o le a le matua, ituaiga, kenera, talitonuga faalelotu, po o tulaga tau le tamaoaiga ma le lautele. O le a tatou taumafai e faataitaia le Faaola ma o le a tatou le mafai lava ona le agalelei atu, pe le manatu i ai, pe le faaaloalo, pe le mafaufau i isi.

Afai tatou te malamalama moni lava i le Togiola ma le taua e faavavau o agaga taitoatasi, o le a tatou sailia ia le tama ma le teine le usitai, ma isi atalii/afafine le usiusitai o le Atua. O le a tatou fesoasoani ia i latou ina ia iloa le alofa o Keriso mo i latou. O le a tatou faia mea uma tatou te mafaia ina ia fesoasoani ai ia i latou ia maua sauniga faaola o le talalelei.

Afai e pito i taua i mafaufau o taitai o uarota ma paranesi le Togiola a Keriso, e leai se tagata fou liliu mai pe ua toe faatoaga mai, e tuulafoaiina. Ona o le taua tele o agaga taitoatasi, o le a galulue faatasi taitai ia mautinoa ua aoao tagata uma i mataupu autu o le talalelei a Iesu Keriso.

Pe a ou mafaufau ia Nathan ma lona taua ia i matou, e mafai ona ou iloa ma le manino, ma lagonaina le lagona e tatau ona i ai i lo tatou Tama Faalelagi ia i tatou uma o Ana fanau. Tatou te le mananao i le Atua ina ia tutulu ona ua tatou le faia mea uma tatou te mafaia ina ia fetufaai atu ai i Ana fanau upumoni faaalia o le talalelei. Ou te tatalo ina ia sailia e o tatou talavou uma taitoatasi ia faamanuiaga o le Togiola, ma ia latou taumafai ina ia agavaa e auauna atu i le Alii i le misiona. E mautinoa lava e toatele isi ulugalii matutua faapea ma isi o e o le a faatagaina e lo latou soifua maloloina, o le a naunau e auauna atu i le Alii i le avea ai ma faifeautalai pe afai o le a latou mafaufau loloto i le uiga o le taulaga togiola a le Alii o Iesu Keriso. O Iesu lava na fetalai, “Afai foi e faapea ona oulua galulue i o oulua aso uma i le alagaina o le salamo i lenei nuu, ma aumaia, tau lava o se agaga e toatasi ia te au, faauta i le tele o lo outou olioli faatasi ma ia i le malo o lo’u tama” (MFF 18:15; faamamafa faaopoopo). E le gata i lena, ae faauta i le tele o le olioli o le Alii i le agaga ae salamo! Aua e taua ia te Ia le toatasi.

Uso e ma tuafafine, ua aapa mai lo tatou Tama Faalelagi ina ia tatou toe foi atu ia te Ia e ala i le Togiola a lo tatou Faaola. Ua Ia valaaulia i tatou uma ina ia “o mai ia Keriso, o Le Paia o Isaraelu, ina ia tofusia outou i lana faaolataga, ma le mana o lona togiolaina” (Ominae 1:26). Ua Ia aoaoina i tatou, o lo tatou usiusitai ma le faamaoni i mataupu faavae o le talalelei, o le mauaina o sauniga faaola ua uma ona toefuataiina mai, o le auauna atu faifai pea, ma le tumau e oo i le iuga, e mafai ai ona tatou toe foi atu i Lona afioaga paia. Pe i ai ea se isi mea o i le lalolagi e mafai ona latalata atu lona taua i lenei mea?

O le mea e faanoanoa ai, i le lalolagi i aso nei, o le taua o se tagata ua masani ona faamasinoina e ala i le toatele o tagata maimoa o loo i ona luma o loo ia faafiafia i ai. O le auala lena o loo faatulagaina ai ia ala o faasalalauga ma taaloga, o le auala lena o loo fuafuaina ai le lauiloa o pisinisi i nisi taimi, ma e masani ai foi ona maua le tulaga o se faigamalo. Atonu o le mafuaaga lena e le mafai ai e matafaioi o le avea ma se tama, tina, ma se faifeautalai ona tau le mauaina ni faalauiloaga. O tama, tina, ma faifeautalai e “tau leiloa” lava a latou galuega o loo fai. Ae peitai, i le silafaga a le Alii, atonu e na o se aofia e tasi e tumau lona taua—ma e na o le tasi, tagata taitoatasi, o oe ma au, ma fanau taitoatasi a le Atua. O le faaupuga taufeagai o le Togiola o le leai se iuga ma le faavavau, ae peitai o loo faatatau i tagata taitoatasi, e tasi le tagata i le taimi.

O le pese a tamaiti o le “O A’u Se Atalii o le Atua” (Viiga, nu. 184) e ogatasi ma le upumoni e faavavau. O i tatou o fanau a le Atua. E taua i tatou uma taitoatasi i le tulaga o le aumaia lea i le Alii le Atua Silisiliese o se olioli atoatoa, pe afai tatou te faamaoni, po o le tutulu foi, pe afai tatou te le faamaoni.

E pei ona fetalai atu le Faaola toetu i tagata sa Nifae, e mafai foi ona Ia fetalai mai ia i tatou i lenei aso:

“Amuia outou ona o lo outou faatuatua. O lenei, faauta, ua atoatoa lo’u olioli.

“Ina ua uma ona fetalai atu o ia i nei upu, ua tagi o ia, ma ua molimau ai le motu o tagata, ua ave foi e ia o latou tamaiti taitoatasi, ma faamanuia ia te i latou, ma ua tatalo i le Tama mo i latou” (3 Nifae 17:20–21; faamamafa faaopoopo).

Uso e ma tuafafine, aua, aua lava ne’i manatu faatauvaa i le “toatasi.” Ia manatua pea le apoapoaiga a le Alii, “Afai tou te alofa mai ia te au, ia outou tausi mai i a’u poloaiga” (Ioane 14:15). Ia taumafai pea e le aunoa ina ia ola agavaa mo le atoatoaga o faamanuiaga o le Togiola a le Alii o Iesu Keriso. O lo matou faanoanoa i le valavala ai ma la matou pele o Nathan, ua oo mai ai le filemu lea e na o le Faaola ma le Togiola e mafai ona tuuina mai. Ua liliu atu taitoatasi lo matou aiga ia te Ia; ma ua matou pepese nei ma le malamalama ma le matuai talisapaia:

O’u uso e ma tuafafine pele, ia outou tuuina atu i isi ma ia outou mauaina foi mo outou lava ia faamanuiaga uma o le Togiola a le Alii o Iesu Keriso, ou te ole atu ai ma le lotomaulalo, i le suafa o Iesu Keriso, amene.